" سـوالـف الـمـشـاغـب اليـومـيـة " - صفحة رقم 7 - نادي الهلال السعودي - شبكة الزعيم

الـمـشـاغـب · #91 29/05/2008, 07:05 AM

.

** المشاغب في درة الملاعب **

هالقصة حصلت لي لما كنت صغير ولسّه عظمي طري أيام ثالث ثانوي وكنت على نياتي بريء

كان لي ولد عمة أكبر مني متزوج وكان صديقي ويجمعنا حب الهلال

<< ودي أقتبس هالجملة وأحطها بمنتدى الجمهور

في ذاك اليوم كانت مباراة للهلال مهمة مدري قدام مين يمكن النصر ويمكن الاتحاد وكانت في استاد الملك فهد اللي بذاك الوقت ما عمري دخلته .. قال لي ولد عمتي : جهز نفسك بنحضر المباراة

استانست كثير وتحمست وكنت أعد الدقايق والثواني عشان المباراة

جاء المغرب ودقيت على ولد عمتي ببيتهم وقال لي : خلك جاهز بأي لحظة بأدق عليك .. قلت أوكي يا زعيم

راح المغرب وأذن العشاء والسربوت ما بعد اتصل

.. اتصلت عليه ورد علي أخوه الصغير وقال لي : ترى علي راح الملعب ويقول أنك تركب ليموزين تلحقه

أخذت جوال أخوي لأن جوالي ما كان فيه رصيد

.. وركبت الليموزين ورحت الملعب ..
وصلت متأخر ودقيت على علي أسأل وينه بأي مكان؟ .. قال أنها زحمة وبيلاقيني بين الشوطين ..
بين الشوطين دقيت عليه .. وقال خلها بعد المباراة

بهالأثناء لقيت بالصدفة زميلي بالصف فهد

سلمت عليه وقعدت عنده وعند أخوانه وحسيت بالأمان أخيراً

انتهت المباراة وقال لي فهد امش معنا بنتعشى ونوصلك .. قلت كثر الله خيركم والله ولد عمتي هنا بأطلع معه

مشى فهد وأخوانه ..

ودقيت على علي .. ألوو علي وينك؟

تدرون وش قال لي؟

قال : أنا مشيت

علي من جدك مشيت؟؟ أنا منتظر عشانك وآخرتها كذا؟

قال : أرجع لك؟ بس تراها زحمة والله ..
ما يحتاج أقول لكم وش سويت .. أكيد قفلت بوجهه

طلعت من الملعب وأنا أحسب الدعوى سهلة مثل ملعب الملز تلقى الليموزين وتقعد تكاسره على السعر

مشيت أدور ليموزين .. مشيت ومشيت ومشيت

.. في البداية مشيت 500 متر وأنا بشارع فيه إنارة لحد ما وصلت شارع طويييييييييييييييل مظلم

كنت أشوف وين الناس تمشي وأمشي وراهم .. ما دريت أني دلخ وأن اللي أمشي وراهم رايحين حواريهم اللي بالنظيم مدري الجنادرية

والله ما أكذب عليكم كنت أقرأ التشهد وأقرأ قرآن من الخوف

أبي ربي يحفظني

مدري وش اللي خلاني أواصل المشي بهالشارع؟ يمكن لأني أشوف ليموزينات كثيرة تمر عليه ولا واحد منها وقف ..
( طبعاً الليموزين ما يوقف في هالأماكن لأنه ما يستامن فيها )

كل ما أشرت ما أحد يوقف .. وأشوف كل شوي عيال صغار يمشون بالشارع ويرمون السيارات بالحصى

أكيد كنت مهيء نفسي أن ممكن هالعيال ما يلقون لهم سيارة ثم يحطوني لعبة لهم ويحذفوني

عشان كذا هيأت نفسي للهرب

الشيء اللي طير قلبي من الخوف .. أنه ولد صغير أسمر غامق لابس بدلة الإتحاد جاء جنبي ويكلمني

الشهادة لله الولد يجنن رغم أنه خال شكله بريء

بس الولد سادح الميانة معي ويسولف وهو يمشي جنبي .. عاد أنا أحاول أكون لطيف معه عشان ما يقلب علي وينادي الشرذمة اللي وراه

حاولت أتأخر ويتأخر هو معي .. أتقدم وهو يتقدم .. يا رب استر

أخيراً عرفت أصرفه وأروح الشارع الثاني

ويوم رجع لأخوياه رجعت أنا للشارع عشان أكمل طريقي لأني أشوف نور بآخر الطريق .. لكن بعدين ما دريت إلا وهو جنبي

عشان تعيشون معي الموقف تخيلوا أحد فيكم يمشي الساعة 11 بالليل في شارع مظلم وبالنظيم وحوله أمم من الشباب الداشر

ما أطول عليكم .. لقيت محل تموينات ودخلته ومعي هالولد .. أخذت لي مويه بعد ما نشف ريقي

وخليت ريالين للخال الصغير كود ربي يهديه ويحن قلبه علي ويفكني من شره

الحمد لله نجحت الخطة وطلعت بسرعة ..

أسرعت الخطا وأكملت مشوار الكيلو والنص لحد ما ربي أنقذني بشايب على ددسن عرض يوصلني مخرج 16 بـ 30 ريال

والله لو قال 100 ريال بذيك اللحظة لأعطيها اياه

وصلت الحمد لله البيت وعطيت الشايب فلوسه ومن زود الفرحة بغيت أخطب بنته

المهم .. اكتشفت بعدين ان ولد عمتي علي .. لا راح الملعب ولا هم يحزنون

والقهر أنه يقول أنه سوى فيني مقلب ما راح أنساه .. وصدق والله

مشكلتي أخاوي ناس ما تعرف وشو المزح

طبعاً زاعلته لأكثر من شهرين لا أكلمه ولا أسلم عليه لأن اللي سواه ما هو بهين .. بغى يروح بهالمقلب شرف واحد عظمه طري

بنهاية هذا المقلب .. تعلمت أني لازم أصير نذل وأتغدى بغيري قبل ما يتعشى بي

هلالي جامعه البترول · #92 29/05/2008, 07:43 AM

مالي بالهواش وعوار الرأس .. بس اشتقت لك حيل يالقطووووووووووع وقلت لازم أجدد عهدي فيك وابلغك أن الزيادي مشتاااق لك بعد ومشتاق لخويه أيام العسكريه (( حقوي )) .. !!

كأني قريت رد لواحد يسأل عن نور (( رجاء شباب عن الغلط وكلن يلزم حدوده ويقضب أرضه << اذا هي نور اللي ع بالي

مشاغبوووووه

الشرقيه كلها مشتاقه لك

القاضي · #93 29/05/2008, 08:54 AM

بعد الاستئذان من صاحب السوالف ، تم إغلاق الموضوع.

عرفناها مشاغب أفندي.