" سـوالـف الـمـشـاغـب اليـومـيـة " - نادي الهلال السعودي - شبكة الزعيم

الـمـشـاغـب · #1 27/05/2008, 03:20 AM

بسم الله الرحمن الرحيم

السلام عليكم ورحمة الله وبركاته

وبعد :

بصراحة وبدون مقدمات .. أنا إنسان مستخف دمي لدرجة ما تتصورونها

..

غير كذا مشكلتي مصدق نفسي وباقي لي درجتين لين أوصل قمة الغرور

عشان كذا وبكل ثقة وغرور وجبروت وتواضع وعنجهية فكرت أكتب سوالفي عندكم وأخليها يومية أجي أطقطق

على روسكم شوي

من زمان وأنا أمنيتي أكتب موضوع قصير على طلب بعض الأعضاء الكسالى

بس مشكلتي لا مسكت

الكيبورد معاد فكيته ليما ألعن والدي والديه وأحلل قيمته

يوووه نسيت ما أعلمكم وش سوالفي بتكون عنه

سوالفي الله يسلم هالخشش من نوع " ماعندك أحد " يعني لا فايدة منها ولا يحزنون .. مجرد سوالف دايم

لما نقعد مع الشباب يطلبون أعيد عليهم سالفتي عشرين مرة عشان واحد منهم ما بعد سمعها

عشان كذا اللي يدور من وراء خشتي فايدة أو مضمون ياليت يروح يفتح له كتاب " رياض الصالحين " ولا يتعب نفسه

^
^
كل هالأسطر وأنا أقول بلا مقدمات

خلونا نطس تحت شوي ندردش معكم .. من زمان ما سولفت على أحد

::::::::::::::::::::::::::

المشاغب إمام مسجد

أذكر في صيفية قبل الصيفية اللي راحت كان عندنا زواج بالديرة

المهم .. غالباً يخلصون الزواج على الساعة 3 الفجر لعدة أسباب .. من أهمها أن يرجع كل واحد بزوجته بأتم زينتها
وينومون العيال بدري عشان يتعودون يصحون بدري للمدارس بعد شهرين

<< هذول هم السعوديات ما يعرفون الزينة إلا بالأعراس أو الاجتماعات .. يا لبيه بس يالسوريات

في ذاك الزواج مدري وش فيهم حريمنا كل واحدة ركبت راسها وقالت والله ما نطلع لين يأذن الفجر مثلنا مثل باقي حريم الرياض والشرقية وش زودهن عنا؟

الرجال طفشوا وكل واحد يكلم زوجته وهي ساحبة عليه سيفون تقول شوي بس .. وعلى هالحال لين قرب يأذن الفجر
والحمد لله جاهم الفرج من عند ربهم

تفرق الجمع وكل واحد راح لبيته إلا أنا وبعض الشرذمة العزابية بقينا نندب حظنا العاثر

أذن الفجر وتفرقت الشرذمة كل واحد يقول بروح البيت أتغطى بالبطانية قبل ما يشوفني الشايب ساهر للحين ويجلدني << يا شيخ اجلدني كان الشايب بيصحى بعد ليلته الحمراء

المهم .. من زود الطواعة فيني رحت المسجد وكان فاضي ما عدا المؤذن الشايب .. جلست أقرأ قرآن وأنتظر الإقامة.

طولنا على هالحال أنا وهالمؤذن محد جانا ما عدا بعض الشيبان وبعض البزران اللي مستانسين أنهم لحد الحين صاحين

طال الحال وبديت أتوجس خيفة من نظرات المؤذن السبعيني

.. كنت حاس أنه يبيني أصلي بالناس لأن ما فيه إلا أنا اللي أصلح أصلي بالموجودين

<< والله أنه ماخذ فيني مقلب بقووووووة

زودها الشايب وصار يقرأ آية ويناظرني شوي .. يقرأ ويناظر .. يقرأ ويناظر .. لو ما كان يناظر كان حطيت رجلي ومشيت

بعد ما جاء وقت الإقامة .. التفت علي الشايب وقال : نتوكل على الله؟ .. تمنيت أنه يقصد أننا نتوكل على الله ونروح بيوتنا نصلي لحالنا

بس للأسف كان يقصد أني أصلي بالناس

قلت له : صبرك شوي خل الناس تجي ..!! كنت بهاللحظة حاقد أشد الحقد على المطاوعة وعلى الشباب الصالح اللي ما جاء في وقته وفك زنقتي

.. بس الله يلوم اللي يلومهم بعد ذي الليلة اللي تجيهم بالقطّارة

حاولت أقرأ ما تيسر لي من القرآن وأراجع الآيات الطوال اللي حافظها عشان ما أجيب العيد ..

بعد ما أقامت المساجد الثانية وبدت تخلص وحنا ما بعد أقمنا .. قال الشايب : خلنا نقيم نروح بيوتنا .. قلت: توكل على الله

أقامت الصلاة وأنا قلبي يرجف يرجف قسم بالله

وقفت قدام المصلين وعجزت ألتفت عليهم واكتفيت بالقول : استووا استقيموا . ثم كبرت ..!

كنت واقف .. قسماً برب الكون نصفي الأيسر ينتفض بقووة

.. رجلي اليسار ترقص

حتى استندت بجسمي كله على قسمي اليمين عشان أخفف الحمل

قرأت سورة الفاتحة والحمد لله ولا غلطة

بعدين سكت برهة من الزمن عشان أقرر أبدأ بسورة يوسف ولا أخليها بعد آخر آيتين من سورة البقرة؟

قريت آخر آيتين من البقرة .. ورغم أني دايم أقراها صم .. إلا أن الموقف هز كياني وخلاني أتفتف كأني هايلكس واحد قصيمي بطعوس الثمامة

طبعاً جبت العيد بهالآيتين .. وأستغفر الله ألفت آيات من عندي ما وعيت أني ألفتها إلا بعد الصلاة

طبعاً ما حولك أحد ما أحد رد علي ولا صحح لي .. وعدت الركعة الأولى على خير

بالركوع والسجود أطول فيها عشان تطول الصلاة لأني بالقراية كأني أقرأ جريدة من الخوف أستغفر الله .. وكنت أراجع بالركوع والسجود بداية سورة يوسف

بدأت الركعة الثانية والتوتر الحمد لله خف شوي .. وبديت أقرأ الفاتحة بكل ثقة حتى أني تفننت بقراءة : ولا الضالين ..

بعدين بديت بقراءة سورة يوسف .. وبالطبع جبت أبو العيد وأمه وأبوه فيها .. والمشكلة أن فيه واحد وراي أسمع صوته عيى يسلك لي كل شوي يصحح لي

بالمختصر جبت فيها العيد

بعد ما سلمت من الصلاة .. بالحييييل قدرت ألف جسمي جهة المصلين .. حسيت أني الشخص الغلط في المكان الغلط

.. بس الحمد لله والله أشكالهم ما هم حولي ولا يدرون وش اللي صار

الشي اللي غبني من جد .. هو أني شفت المطاوعة لاحق بعضهم الركعة الأولى .. وشكل واحد منهم هو اللي نشب بحلقي وقعد يصحح لي

انتهينا من الصلاة وطلعت من المسجد وأنا مطأطأ الرأس ما أقدر أحط عيني بعين أحد

.. بس الشي المفرح أن هالموضوع عدا على خير وماحد انتبه له

بس أنا حتى نفسي ما سلمت من لعانتي ماخليت أحد إلا وضحكته
علي

::::::::::::::::::::::::::

خلصت من السالفة هذي .. انتظروني بكرة أو اليوم بسالفة جديدة .. واللي عنده سالفة ووده يفضفض هذا الموضوع
حلاله يفضفض بس بليز بدون شتشتة

::::::::::::::::::::::::::

كلمة راس برا الموضوع : أنا لا بغيت أكتب عن شي أبيه بأكتبه وأوضح رأيي فيه .. ومنب في حاجة أني أقول لأحد يكتب موضوع .. حبيت أوضح هالنقطة عشان كلمة أثارها الأخ العزيز أبوخليلوفيتش لما قال أني طلبت منه يكتب الموضوع بينما الحقيقة أنه قال لي أنه بينزل الموضوع وقلت له نزله -لا أقل ولا أكثر- .. وفيه أعضاء غيره إذا طلبوا رأيي أقول لهم رأيي بكل تجرد بغض النظر عن اتفاقي أو اختلافي عن محتوى الموضوع ..!!

كتب أعلاه للتوضيح فقط لا غير .. وأنا وأبوخليلوفيتش وغيره سمن على عسل اختلفنا أم اتفقنا

أنا غير محسوب على أحد .. من يعزني أحطه بوسط عيني ومن يكرهني أبادله نفس الشعور .. ولا لأحد الحق يعلمني من أصادق ومن أعادي ..!!
يمكن كلامي ماله معنى ... بس كلام بقلبي وودي أقوله وقلته