مين طب التنكه - صفحة رقم 2 - نادي الهلال السعودي - شبكة الزعيم

algohmani · #1 28/04/2008, 10:15 PM

السلام عليكم ورحمة الله وبركاته

كيف حالكم حبايبي بالمجلس العام :

( مين طب التنكه )

طلعت مع جدي طلعه للإبل حقته قلت بجرب واشرب حليب النوق مع إني مدمن بيبسي يعني بالعربي اذا مر علي يوم وانا ماشربت بيبسي تجيني حكه واقعد احك احك لين تجيني علبة بيبسي .

المهم طلعت معاه واثاري الشايب مو بسهل يوزع حليب بالمجان على بعض الإصدقاء ( هو باقي أحد حي ) لا .. لا اللي حي منهم .

المهم جدي جاب التنكة ومليانه حليب طالعت فيها وقلت ياجد ترا مافيه إلا انا وانت وش هالحليب اللي حطيته بالتنكه ذي .. مويه هو سلملك الله وبتتروشبه ..

طالع فيني وقال أفا يالرخمه هذي ماتكفي إلا اثنين ويادوب إثنين ..

أطالع بجدي وانا أقول والله لو واحد مرصص ومسكت به بقعه على التنكه ماشربها ..
المهم جدي راح يبي يتوضأ يجهز نفسه لصلاة العشاء والإضاءة بالمكان ماهي بذيك الإضاءة وانا رجال بنظارتي يالله اشوف الدنيا .. قلت بروح اغسل يدي واشرب ( ههه ناوي ياكل هذا
مو بيشرب ) .. لا ... برضك النظافة من الإيمان .

رحت غسلت يدي وجيت مسرع ولانتبهت للتنكه وتقدر تقول ماشفتها وطبيتها برجلي وانطش الحليب اللي فيها ..

جا جدي وانا متفشل منه تعرفون النياق اليا خالفت يبيلها ثلاث ساعات عشان تحلبها مره ثانيه وجدي ينام بعد العشاء مباشرة ولايقدر يجلس تعرفون الشيبان حدهم الساعه ثمانيه
واللي مخربها وفالها فل يجلس لين تسعه ..

قال جدي ( مين طب التنكه ) وانا مطنش لا واللي يشوفني يقول هذا بريء ماسوى شيء

طالعت بجدي .. وقلت بقوة وجه .. جدي شايف فيه احد غيري انا وانت ... قال ... لا .. قلت طيب افهمها

قال : الله يسامحك والله انك في ظلال وماتدري عن روحك الله يهديك بس ... ( اللي يسمعه يقول هذا مرتكب فاحشه مو طاب تنكه )

طالعت بجدي وقلت له ترا هاليومين يمدحون حليب الصافي لا ويقوي العظام ترا مثله مثل التنكه اللي انت تشرب منها وعلى الأقل نظيفه مو زي تنكتك اللي حليب بنكهة الغبار
مطنش جدي ومسوي فيها ثقيل مايرد ( جا في بالي لو ان معاه جوال ويدق عليه الوليد بن طلال ويعطيه مشغول )

المهم حبيت راس جدي وقلتله انا آسف وحقك علي وهذي آخر مره اجي معاك اصلا انا حقي كوكا كولا ولا بيبسي اقعد اتمغط فيها ويش جابني لهالسوالف ...

للنقاش :

قديما كان اصحاب الإبل يقومون بصب حليب النياق لمن يقدم على صاحبها بدون ثمن وحاليا يباع حليب النياق ليصل الى ارقام مبالغ فيها ..

أولا : هل ترى أن بيع حليب الإبل حق مشروع من حقوق صاحبها ولايعد ذلك انتقاص للكرم العربي الأصيل

ثانيا : هل ترى ان المجتمع حاليا ميال ابنائه الى عدم الاهتمام بالإبل واذا كان هناك اهتمام فهو للتظاهر المزيف

ثالثا : هل ترى وجود الحليب بالبقالات يغني عن الحليب الطبيعي وبالتالي لاحاجه لوجود المواشي لدى اي شخص

رابعا : الشيبان يشربون طاسه كامله من الحليب وأولاد هاليومين يالله يشرب فنجان ماهي الأسباب التي أدت الى ذلك بنظرك

سبب كتابة الموضوع : وانا ماشي بالبر مع احد اصدقائي مرينا على صاحب نياق وطلبنا منه طاسه قال بثلاثين ريال واحنا منتفين مامعانا الثلاثين فحطنا ومشينا ماعاد إلا هي .. ( أجل تبغونه ببلاش ياقوة وجيهكم )

توضيح : أعرف ان فكرة الموضوع غريبه شوي ولكن هي فكرة موضوع مهم وكلي أمل أن يجد استحسانكم وأن يجد المكانه التي تليق به حتى من غير المهتمين بالموضوع ..

تصبحون على خير جاهز للنقاش بس بدون سحبات خصوصا اللي سحبي الموضوع اللي طاف ترا هالمره ان سحبت باخذ فيك كرت اصفر واسويبك زي ماسوى تكر بناجي مجرشي