السلام عليكم جميعا 
في البداية الف مبروك فوز الزعيم
اللي بصراحة تاخر وخوفنا بس الحمد لله بالنهاية جاء
اتمنى ان الله يرزقكم صبر وتكملو الموضوع للاخر
انا بتكلم عن نقاط صارت ....
وبتكلم عن وجهة نظري كشخص حاضر بالملعب ...
لا احد يجي يقولي ما عندك سالفة ....
لان مرات اللي بالملعب تكون الامور واضحة قدامه اكثر من اللي خلف الشاشات *******************************************
نبدأ على بركة الله
1/ محمد الدعيع
وحش ... وحش ... وحش ما شاء الله عليه
والكورة اللي بغى ينكبنا فيها غلط من المرشدي
والله طريقة ترجيع الكورة من المرشدي للدعيع طريقة نكب عفش
لا احد يلوم الاخطبوط والله انا عذرته فيها
2/ مسفر القحطاني
بصراحة من قبل لا يطلع الاعلام طيره بالعجة!!!
صحيح سوى شي ما احد ينكر ...
بس برضو نكبنا بكم كورة غبية ... وما رفع ولا كورة صح!!
والاهم لو تعدون كم اوت لعب بالمباراة وشوفو ما استفدنا منها شي !!
يعني 95% من الاوت اللي جهته هو كان يلعبها
ودايما يتاخر فيها ونادر الكور اللي يرميها صح !!
يا يقطعها لاعب الحزم او توصل للاعب هلالي محجر عليه
حتى اخر شي فيه شايب جنبي بتقرون سالفته اخر شي
ارتفع ضغطه منه يوم شافه يرمي الاوت اي كلام ...
قاله تكفى ناظر اي شي ازرق وناوله
3/ مارسيلو تفاريس
والله انه صخرة وفعلا الدفاع بيعاني من بعده
وفوق ادائه الدفاعي المتميز ...
اذا اخذ كورة ما يحب الفلسفة يا على طول تسطيح للهجوم
او يلعبها كورة طويلة للجناح عشان يختصر تمريرات ويبني هجمه سريعة
باختصار ... والله اني لسني احبه يطلع من الهلال
4/ ماجد المرشدي
لو اتكلم من هنا لبكره الصبح يمكن ما اخلص
عشان كذا بختصر وبقول ....
تكفى يا ماجد خلك على قد مستوى واسم الهلال ....
والله اني اليوم قلت يا زين المفرج
5/ عبدالله الزوري
لاعب واثق من نفسه بكل معنى الكلمة
اذا طلع يرفع عرضية ... يخش على المدافع بكل قوة جسمه ومعه الكورة...
لانه واثق ان اي تهور من المدافع بلنتي او فاول خطير
جد لاعب ربك معطيه ملامح وجه حتى لو كان منكوب يموه عليك انه واثق
6/ عبدالعزيز الخثران
لاعب فيه بركة الشيوخ
من جد انه علامة فارقة بالفريق
اليوم سوى كل شي وانا شخصيا ما شفت منه اي غلط
ويكفيني القول اللي جابه
شفتو وش فايدة اللي دايم يحافظ على الدين وصلاة الفجر
7/ خالد عزيز
لاعب من طراز عالمي
شكيت وانا اتابعه ان الهلال جاب باتريك فييرا!!!
او ماكليلي ... او او او الخ
لاعب يقطع المويه والكهربا والاوكسجين على الخصم
اللي يفكر يمزح او يستهبل او يحاول انه يوصل الباب
على طول ابو عزيز يحجرله ويقوله ... وين اثباتك
طبعا من الاثبات يبين هو لاعب هلالي او لا
8/ عمر الغامدي
ايضا لا يقل عن عزيز كثيرا وان كان غلط كم غلط صغير
لكن عموما ما قصر وبصراحة انا يعجبني الغامدي والهلال كله
9/ طارق التايب
الشوط الاول شكيت انه طارق اللي نعرفه!!
مرتبك ... تمريرات خاطئة .. والكور الثابته كلها ضايعه!!
بس الشوط الثاني رجع لمستواه وبدأ يستعيد الثقة بنفسه
مع انه قهرني بالكورتين اللي ضيعهن عند الباب
بس مع كذا الجمهور يتحمس معه بكل احواله
حتى هو يستاهل والله ...
الاعب الوحيد اللي كان يجي عندنا ويحمسنا
10/ ليلو امبيلي
داري ان الجميع بيقولي ما يعرف بالكورة وانا معكم
بس بصراحة لاعب سلق سلق سلق
والله يا شباب سرعته تميزه !!!
يعني جاب لنا فاولات بسرعته ...
طرد لاعب ...
ضبط اكثر من هجمه ...
ويربك الدفاع وهذا يفتح المجال لياسر وغيره
انا بقولكم شي واحد ...
لا تناظرونه كمهاجم صريح ...
اعتبروه يلعب عشان يجيب لنا فاولات خطيرة
عشان يطرد لاعبين
عشان يصنع هجمات مرتدة بسرعته
واذا جاب قول خير وبركة
وتراه صغير يعني راعو عمره شوي
الى الحين عقله ما صار احترافي 100%
11/ ياسر القحطاني
هذا حبيب الشعب زي ابو نادين
طبعا اذا انتقدته بنجلد
واذا مدحته بنجلد بتقولون ما مدحته كويس
بس من جد شكرا ياسر حسمت اللقاء وريحتنا
والكبير يبقى كبير ... ومسكين اللي ما عنده ياسر
@@@@@@@@@@@@@
لن اتكلم عن التبديلات لكن باقي كم نقطة
1/ بصراحة المدرب تاخر بتغيراته
خصوصا الشلهب كان لازم ينزل بدري شوي
وقبل لا احد ينفخ ... انا يعجبني كوزمين
2/ من وجهة نظري ...
نجومية اللقاء يستحقها كل من ...
خالد عزيز بالصدارة
يليه الخثران وتفاريس والدعيع
الباقي ما قصرو بس هذولي كانو بيرفيكت والكمال لله
3/ عزيز كان متحمس كثير اليوم ...
ويصارخ ويعطي توجيهات
من جد حسيته يصلح كابتن بالمستقبل
يعني ان شاء الله بعد خمس سنين هو بكون القائد
4/ بصراحة الجمهور اليوم يفشل ...
انصدمت يوم وصلت الملعب لم اكن اتوقع اطلاقا هذا العدد!!
5/ فيه واحد جنبي شايب كبير بالسن
يا هو رايق انواع الهواش
يوم خلص الشوط الثاني واحنا ننتظر الاشواط الاضافية
اتصل على خويه يشكيله من لاعبين الحزم
يقوله يا هم جلدو لاعبين الهلال جلد
والحكم بس ينفخ علينا من اول فاول للتايب كرت
ووراي واحد شايب بعد<== يا كثر الشياب عنده
هذا جاي مع ولده الصغير
كل ما انكسر واحد وجات سيارة الاسعاف الصغيرة
يستانس يقول يا حظ اللي يسوق
6/ بصراحة الحكم اليوم كان ممتاز باعتقادي
اغلاطه ما اثرت على نتيجة المباراة
قهرني بشيء واحد...
انذار التايب بايخ ... مال امه داعي!!!
7/ الظاهر انه بقى شوية ثلج من صالة التزلق حقت يوم الجمعة
بعض الهجمات ما تلقى الا واحد طايح ومنسدح 8/ كان فيه نصراوي مسوي يفتخر بالشعار حقهم بين جماهير الهلال
وخويه يحجرله زي اللي يقوله لا حد يشوفك وننجلد يوم حس ان كثير يناظرونه
لف ورفع صوته وقال... عادي ياخوي
وش فيها لوكنت احب النصر وبنفس الوقت اعشق الهلال
9/ لا حد يتكلم على الرابطة ...
لان اكثر اللي يتكلمون اتحداكم لو حاضرين بالملعب!!
طبعا صعب ان الحقوي يقعد ساكت طول المباراة!!!
وصعب طول ال90 دقيقة يشجع!!!
لكن اليوم ما قصر بس بصراحة المفروض مكانه بين الجمهور
لانه عند المنصة بعيد مرة وما يتفاعل الا اللي حوله
10
/ واضح ان كان فيه مشاكل عند الرابطة!!
ما ادري وش بالضبط ...
بس انا ما كنت اسمع الا الحقوي بالميكرفون
يقول اللي ما يحترم نفسه والله لا اناديله العسكري
وشوي تسمعه يقول بس يا ورع
اخر شي يوم قفلت معه بدا يقول وين العسكري
واحد من العساكر يجي
طبعا انا ما ادري وش صار بس احس ان احد انجلد
11/ رحمت الجهاز الطبي
بس يطيح واحد تلقاهم يركضون مليون
ومسوين اخلاق ما يبون يدخلون من نص الملعب
ويلفون لفة طويلة من ورى الباب
واذا وصلو للاعب يقوم ما فيه الا العافية ...
تحس انه يستهبل عليهم ويصور برنامج صادووووه
موب كل المرات طبعا... كان فيه اصابات مؤثرة!!
داري طولت عليكم ...
بس فيه اشياء واجد ثانية لكن احس اني زودتها
لكن بقفل موضوعي بهالقصة اليوم اخذت معي ولد اختي عمره 6 سنوات
اول مره اخذه للملعب
المهم يوم وصنا ما شريتله تذكرة
يوم وصلنا للبوبابة العسكري غمزني وقال:
ليش تذكرة وحدة وين الثانية
قلتله يوووووه لازم يعني !!!
قال ايه ...
ناظرت ولد اختي وقلتله رح جب تذكرة وانا بنتظرك
وما تشوف الا الولد نزل راسه وبدأ يستعد للدموع
اخر شي ضحكنا وقلتله تعال خلاص نمزح
المهم بالملعب من هول الموقف<== متعوب عليها من الصبح ادورلها على جملة
المهم من الرهبة عشان اول مرة
الشوط الاول ساكت بس وهادي واذا تحمس بدا يهاوش بايديه وهو ساكت
الشوط الثاني بدا يتحمس ويهاوش الاعبين
الاشواط الاضافيه بدا يغني مع الرابطة ... يا هلال
والمشكلة اني قايله الشوط الاول بيلعب الهلال
والشوط الثاني بيلعب الانتر ومانشستر وصدق يا حليله
الشكر موصول لجميع الاعضاء اللي دخلو
ووصلو لهذا السطر ....
يعني من جد انكم صبورين وتستاهلون الشكر اللي الى الحين تقرون
تحياتي لكم وان شاء الله اذا صرت رايق نزلت بالردود مواقف ثانية
واللي حضر المباراة وعنده شي لا يبخل علينا
تحياتي لكم ... وان شاء الله من انتصار الى انتصار
وانا تعمدت اذكر مواقف من المدرج اكثر من الملعب ...
عشان انقل لكم اللي ما شفتوه ...
ما حبيت اقولكم شي انتو اصلا شايفينه بالتلفزيون
قفلة :
لا تخافون على زعيمكم قدام الشباب
انا متاكد انه بيكون غير وعلى قد البطولة 
الوضع العادي
