[[موقفي ومواقفكم مع الإجرام ]] موقفين طريفين - نادي الهلال السعودي - شبكة الزعيم

أبو ميار · #1 17/12/2007, 01:04 PM

السلام عليكم ورحمة الله وبركاته

تحية جميلة لكم

طبعاً يعلم الجميع أنه بعد غد سيكون هناك إراقة دماء في الشعب الإسلامي الكبير .

وسيتم إبادة الملايين من الضحايا .

أكسبنا الله أجرها إن شاء الله .

موضوعي هو بالتأكيد أن كل شخص حصل له موقف في يوم العيد ويوم الذبح

إما أن يكون هذا الموقف طريف أو غيره .

أرجو من الجميع وضع مواقفهم هنا لكي نستمتع ونفيد ونستفيد .

أما عن موقفي أنا .

فهو ليس موقف وحيد بل موقفين .

أنا من يوم ولدتني أمي وأنا أكره أشوف شيء أسمه دم >> ناعم

سموني اللي تبون تسموني أهم شيء ما أشوف دم .

من جد المرجلة أمام الضحايا وبالأخص أمام الخرفان تضيبع .

وشعاري لا مرجلة أمام الخرفان

خلاصة الموقف أنه في أحد أيام الذبح في إحدى السنوات وبعد تهزيء جائني من أهلي (( كيف أنا أكبر عيالهم ولا أقدر أذبح أو حتى أشاهد ))

المهم جاني تأنيب ضمير ليلة العيد وفكرت جدياً بالبدء في طرد هذا النحس عني إبتداءً من الغد

قلت أبجيبها حبة حبة .

بالأول خلني أشوف عن بعد

وبعدين عن قرب

وبعدين أمسك ذبيحة

وأخيراً أذبح ذبيحة وهو المطلوب .

كل الليلة المذكورة كانت أنواع الهواجيس

طبعاً للتذكير كان عمري وقتها 15 سنة .

رجعنا من صلاة العيد للبيت

ذاك الوقت مسموح الذبح بالبيوت .

أنا على طول للصالة اللي في الدور الثاني

لأن نافذة الصالة تطل على مسرح الجريمه

وفتحت النافذة وجاء التوقيت .

وأتت لحظة الصفر

وأنا مركز جداً .

مجرد خروج أول نقطة دم وأنا فاقد الوعي

ولم أصحى إلا بعد الظهر

وبعد أن طارت الكبدة والحميس .

فلم أطل لا بلح الشام ولا عنب اليوم

الموقف الآخر :

كان عمري وقتها 19 سنة عندما كنت أؤدي فريضة الحج

طبعاً حجيت مع بعض الشباب الملتزمين (( جزاهم الله كل خير ورحم من توفى منهم ))
لا تحسبوني كبير بس فيه واحد منهم توفى الله يرحمه ويغفر له .

المهم يوم جاء وقت ذبح الهدي وحنا متوجهين إلى مسلخ مكة حيث مكان الجريمه .

قال لي كبيرنا متعب لازم تذبح .
قلت يا عمي طير .
قال أفضل لك بالأجر.
قلت والله لو إن الحج ما يكتمل إلا أذبح عز الله ما ذبحتها .
قال يا آدمي .
قلت لا تخليني أخرب حجي وأرفث أو أفسق وتكون أنت الضحية .

قال : مرررررررة .
قلت مرتين يا عم .

قال أجل تشوفها وهي تذبح
قلت كنك يازيد ما غزيت .

وجلس يحاول فيني هو والشباب اللي معي وقالوا إن لك أجر أكبر

صراحة أنا رافض الفكرة من الأساس خصوصاً وأن ليس لها أي تأثير ديني على فرائض الحج بس علشان أسكتهم قلت أوكي ما عندي مشكلة أبشوفها بس .
طبعاً هم يعرفون مواقفي السابقة مع الذبح وأعتقدوا أنهم كسبوا الرهان .

وأنا كنت مبيّت النية لم تجي السكين على الرقبة أصد 10 ثواني وأفتح وكأن شيء ما صار .

أنا طبعاً لحظة الذبح فقط هي اللتي لا أستطيع مشاهدتها .

المهم دخلوا المسلخ وقلت إذا جاء دور ذبيحتي نادوني من السيارة .

المهم نادوني دخلت وأنا ثقيل الركبتين محاولاً تفادي أي موقف .

المهم قالوا متعب تقدم وأذبح .
قلت ما أتفقنا قالوا طيب من تبي يذبحلك قلت أي شخص .

المهم قالوا بسم الله وأكبر
وأنا أصد إلا وأشوف بنفس اللحظة واحد يذبح بقرة .

وبالتأكيد وكالعادة أقع وأنبطحت أرضاً بجانب الأضاحي

شالوني وودوني للسيارة وصحوني .

المهم بعد ما تطمنوا علي رجعو لمسرح الجريمه .
وأنا منسدح بالسيارة قلت خلني أرفع راسي شوي .

إلا واحد من هالأفارقة ينحر بعير وقدامي

والله هذا اللي صار .

وتعرفون البعير ينحر وهو واقف في بعض الأوقات .

طبعاً كالعادة وقعت مغماً علي مرة أخرى .

يا ربييييييي وش قد أنا ناعم

>>> لا بارك الله بالنعومة بس وش أسوي ؟؟

أخيراً تدرون أنه بسببي لم يستطع أخي مشعل أن يحج ؟؟

طبعاً أنا الكبير وبعد أخوي مشعل وبعده مشاري .

وهم من يساعدون الوالد بالذبح .

أخوي مشاري مسافر للدراسة بالخارج

ومشعل قال لأبو أبحج .

قال أبو ومن يساعدني
تعرف أخوك مشاري برا
وأخوك متعب ما حولك أحد

وأقتنع أخوي مشعل وأجل فريضة الحج لحين عودة مشاري

ختاماً أتمنى أن أشوف مواقفكم وهل هناك غيري من الرجال من يعاني من نفس مشكلتي

شكراً

متعب التعبان الخائف من الخرفان

عفره · #2 17/12/2007, 01:22 PM

هههههههههههههههههههههههههههههههههههههههههههههههههههههههههه
والله موضوع حلو

بالنسبة لي انا انذبحوا اوادم قدامي ولا كن شي صار<<<اقول اها بس
لا الجد الجد اني انبسط لا شفت الخروف ينذبح ويرافس قدامي
والمواقف شكله تبي تبدا من هالسنه
انا قايل للوالد من السنة اللي راحت انه بالعيد الجاي ان شاء الله اني بذبح
وان شاء كله يومين ونشوف انا رجال ولا لا

وبالنهايه اشكرك على الموضوع الرائع

كيف التنسيق

جرح يشكي · #3 17/12/2007, 01:28 PM

متعب ترا الخرفنه في قلوبنا

_________________________

عدنا

وعليكم السلام ورحمة الله وبركاته

متعب الله يهديك خوفت بزراننا <<< ما يقصد اول العنقود وبلد القلق ترا

ايام اول كنا محولين حوش البيت لـ مجزرهـ تراق فيها الدماء بدون عيون السلطات ،<< ضريف الولد

اتذكر العام الماضي اجتمعت العائله الكريمه " اعمامي وخوالي " في البيت الكبير ،ووصلت الاضاحي لـ 5

، يا ولد اشوف الوالد اذا ذبح الاضحيه يصير قوي

، قلت ما بدهاش يا بو حميد امسك السكين وقطع مندوب مندوبها

وما ان هممت لـ اقوم بـ عملية النحر تذكرت مقطع شفته في الجوال ، كان عن واحد يطبق فيه حكم الشرع " القتل " ورميت السكين " ووالله ما اكلت لحم غنم لـ اكثر من شهرين

.

اما عن سالفة الدم

كان واحد من اقاربي يحتاج لـ تبرع دم ، طلعنا لـ بنك الدم وتبرعنا له وقتها خالي قال ماني داخل البنك ولاني متبرع " نفس حالتك ما يحب يشوف الدم

" المهم تبرعنا وطلعنا لـ المريض

وخالي معانا

وصلنا لـ غرفته وحصلنا الممرضه تسحب عينة دم من المريض ، خالي ما صدق خبر " دوووووووووووووووق دووووووووووووب <<<< صوته يوم طاح

"

ترا من جد سالفة " فلان شاف دم وطاح مغمى عليه تستحق الدراسه ، اكيد فيه سبب ..!!! "

اخوي مولع بـ الهلال

تقبل تحياتي

اخوك محمد

ورده

أبوشلاخ الهلالي · #4 17/12/2007, 01:34 PM

هلابكـ والله مولع .. أفا تخاف من الذبح
أنا العيد هاذا مافيه الى أنا بس أنا بخلي وااحد من شيبان الحارة يذبح والسلخ علي ..
المهم الحين الخروف يرافس فوق السطح من أمس وانا لين الحين ماقد شفته على الله مايكون
كبير

هلالي مدريدي 10 · #5 17/12/2007, 01:56 PM

يااااااااااااااي هههههههههههههههه

فزاع الاجيال · #6 17/12/2007, 02:00 PM

^
^
^

يا عيال صدق الحين يغمى عليكم اذا شفتوا دم !

اخ بس لو يشوفكم نمر بن عدوان .. قسم بالله ان ينتحر من هول الصدمه

!

يا ناس الحين فيه حريم يذبحن .. حريم اول بعد يذبحن اوادم مو بعارين ولا خرفان ..

وانتم عجزين بس تشوفون !

اما سالفتك يا مولع سالفه .. خصوصا حقت الحج .. والله لو انك بافغانستان ولا العراق وش تسوي !

اما سالفتك الاولى .. والله ازين شي انه راحت عليك الكبده

..

بس صدق حاول تعدل من وضعك .. ترى وضعك مزري .. وعمرك كبير

..

على الاقل تدرب اليوم بدجاجه .. وبعده اجلس شف معهم لا تطب .. خلك عضو شرف .. بس جب قدر ود قدر ..

طيب الحين سؤال .. ذبحوا الخروف وخلصوا .. مات الله يرحمه .. لو جيت وشفته مذبوح بتطيح ولا لا ؟

ولا بس يغمى عليك واهم يذبحونه .. يعني يطلع الدم مباشر

..

وذي هديه بسيطه من لك ورده

..

leo messi · #7 17/12/2007, 02:19 PM

حي الله متعب

لي عودة بعد ماتقوم من الاغماء اهم شيء ركز على الجدار

ـخخخخخخخخخخخخخخخخخخخخخخخخخـ

................................................................................

<--- قاعد يتخيلك الحين وانت مغمى عليك

ـهههههههههههههههههههـ

على طاري الاغماء انا مايغمى على لو شفت ذبيحة لكن مرة سويت تحليل دم
وسحبوا مني .. عاد خبرك انا يالله هالقطرتين الدم تمشيني

وسحبوها

عاد عيوني قامت تأشر زي علامة البنزين اللي بالسيارة خخخخخخخخخخخخخخ

المهم كنت واقف عند الدكتور انا وابوي وحسيت بشيء زي البرودة يمشي
من رجولي ثم يداتي وانا مسوي قوي اقول لا مافيه شيء والله مادريت الا وانا
في غرفة وحولي الدكتورات

وانا مدري وش صار ..ّ!!

بيني وبينك يوم شفت الاهتمام من الدكتورات

فكرت اخليهم كل يوم يسحبون

ادري ان شطحت كعادتي حفظني الله لكن ماعندي موقف يحضرني الحين عن الاضاحي ..!!

يامال الثانكيوات يامتعب على الموضووووووووووع ..!!

.

فزاع الاجيال · #8 17/12/2007, 02:49 PM

^^
^^

يا اخوان لا يصير صدق فقد الوعي ..

لاني من يوم ما دخلت وهو اسمه تحت موجود .. وللحين موجود ما طلع

!

والله يسويها متعب

أبو ميار · #9 17/12/2007, 02:51 PM

ياسر ترى أبجرب الذبح لكن فيك >>>> خربها

الصورة عادي أهم شيء ما تكون لحظة الذبح وهي ما تتعدى عشر ثواني

يعني عادي أشوفها ترافس

فزاع الاجيال · #10 17/12/2007, 03:05 PM

ايه اشوى ..

قلت الحين تموت واستاثم بك

..

بلد الوليد · #11 17/12/2007, 03:17 PM

خخخخخخخخخخخخخخخخخخخخخخخخخخخ
مابي احطم معنوياتك واقول ياي

الذبح سبحان الله فيه ناس مدري ليه يصير لها كذا
انا اعرف واحد كبير شايب اقشر مايوقف قدامه احد من لعانته
بس خله يشوف جرح يسفط على الارض على طول

والله يا موقفك الثاني عذااااااااااب خخخخخخخخخخخ

بكل مكان عالم تذبح واخوياك المطاوعه ملزمين تذبح

مالهم حق والله ما يعرفون ان متعب رقيق

,, الله يرحم ميتهم ,,
تراني قاعد اجرب شكل الخط اول مره اجربه هذا

احد من العيال عنده مقطع فديو فيه العشر ثواني المشؤومه

انا ما عندي الا هذي

انت شف ام احمر الي ورا وخذها من عندي ماراح يغمى عليك اسبوع لو تذبح ليو ميسي

الســفيرة · #12 17/12/2007, 03:23 PM

وعليكم السلام ورحمة الله وبركاته ..

حالتكـ يسمونها hematophobia وهي الخوف الغير طبيعي من منظر الدم

طبعا محدثتكـ _ الي هي أنا_

،، مع اني ادرس طب بس مع الاسف للحين ماتحمل منظر الدم الي يطلع بعد الذبح

حتى الدجاجة ماتحمل اشوفها تنذبح

مااوصل لحد الاغماء مثل حالتكـ

بس اجلس اتسمر

المواقف حاليا مافي شي ببالي اذا حصلت بارجع

،، واتوقع ماني راجعة لاني ماحاول حتى ازيل هالعقدة

يعطيكـ العافية عالموضوع وماتشوف شر

باسكن روبنز · #13 17/12/2007, 03:28 PM

يااربيه بصراحه مالوومك

مادري كيف الشريرين يذبحون << يــآآي شريرييين

جد ...كيف يشوفون الدمآآء وهي تطلع من الخروف

وبعدين البعير كبير وطويل شلون الانسان يذبحه ؟؟؟<< سؤال وجيه

احس اللي يذبحون ماعندهم مشااااااعر <<اسكتي بس

-النايف- · #14 17/12/2007, 04:01 PM

اللي شدني للموضوع ترتيب اخوانك انت ثم مشعل ثم مشاري
مثلي بالظبط

A.K.N 505 · #15 17/12/2007, 04:54 PM

و الله لازم تتعود وانا اخوك

انا كنت ما احب المس الذبيحة يعني عادي اشوف الذبح والسلخ لكن عادي الحين
لكن ان تطلع الكرش وو.. هذه من بعيد..

ذبايحنا توصل ل 12 خروف يعني لازم تشتغل

بس احلى شيئ لمل يكون المنقل بجنبك وتشوي من هالكبدة..