فكرة : الماســـه الزرقاء .
تصميـم : عاشق بويعقوب .
اعداد&تنسيق : الكــلاسيكي .





نعود إليكم أحبتي من جديد مع (حياة @ نت )

وكما تعلمون فهي عبارة عن سلسلة ستستمر معنا بإذن الله لفترة ما في مجلسنا العام إعتماداً على تفاعلكم الكريم,
يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .





ضيفنا اليــوم .. ضيف عُــــرف بجرأته وشفافيته .. جعل له اسلوباً ونهجاً مختلفاً عن الجميع ..
اشتهر بأسلوبه الساخر .. و بـصراحته في الطرح .. وبحسن اسلوبه ودقة اختياره للمواضيع ..
لمع بقلمه الفريد من نوعه .. واصبح محبوباً من قبل الجميع .. دائما ماتكن لمواضيعه طابع خاص..
وتفاعل كبير من قبل الأعضاء .. يقنع الكثير بفن اسلوبه وبكتابته .. ويحضى بشعبيه كبيره من
قبل الكثير من الاعضاء .. حتى اصبحت مواضيعه يشار لها بالبنان .. واصبح اسلوبه محبب لجميع ..

ضيفنــا المتألق صاحب البسمه والقلم الساخر هو .. /

«¤¶`هــلالي الظـهـران `¶¤»

نترككم مع كاتبنا وضيفنا المميز.. ليُبحر بكم في عالمه الافتراضي ..




[مقــدمــه]


ذات مساء وبينما انا مختلي بنفسي كأحد الفلاسفة العظماء وقد ارتمت خيوط الصمت بعد ان حلت في فلكي الدوار.. وفجأه ومن دون سابق انذار.. أبى صوت ينبعث من داخلي الا أن يقطع هذه الخيوط ببعض كلماته وحكمه.. كان هذا الصوت لهلالي الظهران الانترنتي وهو يشاورني بأن أتصفح شبكة الزعيم.. فقلت أصبت ياصديقي فقد طالت الغيبه .. فما كان مني الا ان درعمت بخلسه ووجدت رساله من أختنا العوده "الماسه الزرقاء" تطلب المشاركه في سلسلة المجلس العام "حياه نت دي جي" .. فما كان مني الا ان درعمت مرة اخرى للرد مباشره قائلا.. شبيكم لبيكم هلالي الظهران بين ايديكم.. فاذا بهلالي الظهران الانترنتي يمسكني على جنب ويضع في جيبي حبتين من أكياس الليبتون!!

قلت: وش هذي؟ عشان الحسد؟!

فضحك وقال: وش يحسدونك عليه؟! هذي وانا اخوك علشان تثقل خابرك خفيف وكل من قالك شي درعمت ..

عاد حصل اللي حصل وان شاء الله تعدي هالحلقه على خير مع احساسي الكبير أني بحوق الدعوه..




[صيف عام 2000: بعد اول ثانوي]


في البدايه وقبل أن أغوص معكم في أعماق عالم الانترنت ونستخرج الدرر والآلئ القابعه في احشائه لنستشعر عظمة هذا الاختراع المسمى بالانترنت (مانيب عاقل سليمان العيدي ).. دعوني أعود للوراء بضع خطوات لاحكي لكم بداية علاقتي بما يسمى بالحاسوب لما له من علاقه وطيده وسبب في تأخر دخولي عالم الانترنت الحقيقي..

كانت البدايه بعد الصف أول ثانوي وتحديدا صيف عام 2000 م..
في صبح أحد أيام الاجازه الصيفيه.. وكالعاده كنت استعد للنوم.. واذا بالباب يطرق.. وألقى الوالد بوجهي ويطلب مني ان ارتدي ملابسي حتى أذهب معه..

يالربع لبست ملابسي وركبت السياره معه بدون ماينطق بكلمه! مايحتاج أقولكم قامت معي أنواع الهواجيس.. أقول هو درى ولا مادرى.. معقوله أحد قايلن له.. وبعد ماتنقعت مضبوط قال طال عمره: بدل ماتضيع وقتك في النوم وأمور مالها سنع أبيك تتعلم على الكمبيوتر..

وأنا اللي أتنهد وأقول بنفسي: الله يلعن ابليسك هذي اخرتها لو انك انتظرت شوي كان كعيت (عاد لاحد يسأل وش انا مسوي ).. ما أخفيكم حسيت بانشكاحه عظيمه وبدأ الماخوذ ابليس يربط معي اللي صار بالصيفيه اللي قبلها يوم سافرت أخذ لغه.. حتى وصلت الهواجيس لدرجة اني افكر وين بيرسلني:p .. وسالته :وين بتوديني؟

قال: وين بوديك يعني؟! باريس ولا جنيف.. أكيد عندي بالمكتب (يذب طال عمره )..
قلت: افا يابو عمر يعني مافيه ثقه؟

قال: مو مسألة ثقه لكن هنا وهناك واحد ومايحتاج تحتك بأحد علشان تتعلم..

قلت: بس يبه أنت تحب البنات.. لاتفهمني غلط بس اذكر انك وصيتني قبل أسافر المره الماضيه وقلت.." اذا ودك تتقن اللغه تعرف على بنيه ترطن انجليزي وبترجع بلبل" .. طيب الحين شلون أبتقن الكمبيوتر؟(<<مسوي حشره )..

قال: لا أفهم غلط! وش دعوه ومن مايحب البنات ياولدي (ماعنده وقت ).. المهم ماعليك أبخليك مع اسماعيل وان شاء الله تحبه ويحبك..

عاد هالاسماعيل من شفته لعنت ابو الساعه اللي ابتعلم فيها على الكمبيوتر.. يا الربع شفتوا أحد يكحل براطمه .. وخدوده من كثر الخطوط والمشقات اللي فيها صايره كنها طريق ممشطينه بيسفلتونه من جديد.. والشعر واقف تقولون شابكينه بكهرب.. باختصار هو عباره عن مشق يمشي.. صدقوني لو انه راح العراق كان فزنا من زمان ..


المهم.. حاولت اتعلم منه بدون فايده وحاول يعلمني ومامشى الحال.. ياالربع قسم بالله عفته هو والكمبيوتر وهو عافني.. لاني اللي تحملت خياسه ولاهو اللي تحمل بثارتي .. وبدل مايكون هو اللي يعلمني صار ينحشني ويغطي علي بعد.. وبدل ما اتعلم على الكمبيوتر كرهته هو وبرامجه والشي الوحيد اللي فلحت فيه هو "الوورد" وكيف استخدم اصابعي العشره بالكتابه.. وهالشي مهوب من باب اهتمام بقدر ماهي مقوله عظيمه للاخ اسماعيل..

قال اسماعيل فكني الله واياكم من خياسه: ياخي اعتبر الكيبورد بزاته حُرمه قدامك وانتا داير تسيطر على الجزم(الجسم) كله ..

عاد خويكم ذيبن امعط بهالامور.. حطيت الكيبورد بحضني وخذ سيطره ..

ياالربع لاتحسبوني استهبل.. والله اني اقوله صادق.. لدرجة ان الواحد اذا سألني حزتها وش تعرف عن الكمبيوتر.. قلت الكمبيوتر هو الكيبورد! عاد يحلفون ان مابه ازرار الا وتحته قطعة بسكوت او فصفص ..

وحتى لا أطيل بهالفقره أكثر من كذا.. أبقول اني اخذت فكره سلبيه وشعور بعدم أهمية هالماخوذ المسمى حاسوب.. والسبب هالشيفه اسماعيل.. صدقوني لو كانت نسرين بدل اسماعيل كان شفتوني الحين انافس "كوكتيل" ..





[2000-2002:ثاني ثانوي+ثالث ثانوي]


في بداية الصف الثاني ثانوي كانت حصة الحاسب عباره عن حصة فراغ والسبب كما سمعنا ان هناك تغيير للمنهج وانتظار معلمين جدد للماده!! وبعد مضي عدة أسابيع تم تكليف احد معلمين الدين بتدريسنا المنهج القديم مؤقتا.. وكان رجلاً فاضلاً وقوراً لكن لايتعدى فهمه للحاسب أرنبة أنفه (ممسكه فصحى بالغلط..اصبروا شوي وتفك ).. وكان دائما مايبدأ اي حصه الا بديباجته المعهوده حتى حفظناها عن ظهر قلب: "الحمدلله عظيم السلطان قوى عباده ولو ضعفوا بالايمان واصطفى خير الخلق للرساله فجاء بأحسن بيان" ..

ومن بعد الديباجه يبدأ المناقشه حيث يقول معلمي الفاضل: " وبعد اعلموا رحمني الله واياكم وجعل الجنة مثواي ومثواكم ان الغرب وان سبقونا في علم الآله الا انهم ضلوا في مسألة الدين ضلالا بعيدا"

وحين نناقشه بأننا لابد ان نتعلم علومهم حتى نجاريهم كان دائما مايتعلل بقوله: " اعلموا يا أبنائي يرحمكم الله ان القوس زادت استدارته وان الوتر مشدود وان الهدف واضح وضوح الشمس في كبد السماء.. وكل شيءٍ يقول لابد للسهم ان يطلق.. فالحذر الحذر ان تغزوكم أفكار عدوكم فيغلبوكم" ..

وان الحينا في مناقشته بدأ باستخدام طلاسم كأن يقول:" وجد في مكتباتهم العامه بين مؤلفاتهم بون شاسع ولمخطوطاتهم مطايفات متناقضات بنسخٍ متقطعات وخرومات في الافكار....." (سامحني أستاذ خالد والله اني احبك )..

وهكذا ذهبت الحصه تلو الحصه في مناقشات لا علاقة لها بالماده.. حتى هبت رياح التغيير.. حيث تم اختيار المدرسة الملتحق بها من ضمن خمس مدارس في المملكه يُدرس فيها مناهج جديده ومطوره عن الحاسب تحت التجربه وبعد امضاء سنتين والتخرج من التوجيهي نُعطى شهادات خبره من شركة مايكروسوفت!!

ولتدريس المنهج الجديد التحق بالمدرسه معلمٌ جديدٌ.. وكان شاباً يافعاً عالماً بامور الحاسب وخفاياه.. لكنه كان داجاً هاجاً مارجاً.. وكيف مايكون مارجاً هارجاً وهو زميل مهنه.. وانا واياه كل خميس وجمعه نسعسع في قرية النخيل من ورده للثانيه ومن بستان لبستان ..(ابشركم فكت ولله الحمد.. بس لاتسألوا عن قرية النخيل )..

من محاسن أو بالأصح مساوئ الصدف كان لي سابق معرفه بهالمدرس قبل لايصير مدرس.. صار بالمدرسه معلمي وخارجها خويي!! بالمناسبه كان اسمه "نهار" بس ماحد يناديه بغير "الاشاره" ولهالتسميه مناسبه.. حيث انه مره من المرات كنا نمارس هوايتنا بقرية النخيل.. كان نهار لابس بنطلون اخضر وفانيله صفراء.. وصادفنا وردتين ملكعتين.. قامت وحده منهم لبسته كاب أحمر والثانيه قالت: أنت الحين مشروع اشاره ناجح (ههههه الله ياخذ ابليسها ذبه في الثمانيات )..


الشاهد من السالفه.. ان هالسنتين مرت بعزئه.. مع ان الحق يقال ان الاستاذ نهار حاول معي بشتى الطرق وبكل أساليب الاغواء الشيطانيه وان ورى هاللي يقوله رزقٌ وفيرٌ.. بس كنت احسبه يبي يمسك علي أنه علمني ويذلني عليها لاصرنا بالبستان .. بالاضافه ان تأثير اسماعيل والاستاذ خالد اثر في رغبتي .. والسبب الاهم اني حطيت في بالي اني مابي اتعلمه .. وحصيلة هالسنتين كانت شهادات خبره من مايكروسوفت في الشبكات والبرمجه والصيانه.. وانا خبرتي الفعليه كانت في كيفية تشبيك الكمبيوتر بالكهرب والتوصيل بين اجهزته المختلفه ..

بالرغم انه في هالفتره الوالد جاب جهاز جديد في البيت لكن كما هو متوقع مافلحت الا باحتضان الكيبورد والطقطقه عليه لدرجة ان اخواني كانوا يجيبون قلم فلومستر ويعيدون على الحروف الممسحه ..






[صيف 2002: بعد نهاية التوجيهي]


اما أول استخدام فعلي للانترنت كان بعد التخرج من التوجيهي.. خلال فترة الصيف حيث اني اضطريت ألجأ للماخوذ الانترنت لأن التسجيل للالتحاق في شركة أرامكو عن طريق الانترنت فقط.. طبعا مثلكم عارف ان الدعوه تحتاج مودم واعدادات واشتراك واخواكم في الله خيطي بيطي.. والله وأجيب شخص مختص وضبط الأمور كلها وقال مابقى الا تشتري بطاقه وتتصفح على هواك.. والله وانقز السوبرماركت واطق بطاقه ورجعت للجهاز وولمت كل شي.. طبعا كان يطلب اليوزر والباسوورد.. كنت ادخل اليوزر بس ماالقى الباسوورد!

قلبت البطاقه وجه وقفا ومالقيت شي.. شفت رقم اتصال الخدمه وادخله كرقم سري بس رفض:p .. حاولت احط ارقام من دميجتي لكنه رفض بعد .. رجعت للهندي حق السوبرماركت واتلاعن معه شلون يعطيني بطاقه بدون رقم سري.. عقبها علمني ان الرقم السري مغطى بطبقه لازم أكشطها:p .. صح ان الموقف يفشل بس انا انسان عصامي بعدين ماانلام كانت أول بطاقه ليك يائلبي ..

المهم وادخل اليوزر والباسوورد وفتح معي.. ياشباب ماأوصفلكم حالتي حزتها حسيت اني ألعب في البرازيل (على طاري الشباب انتم جالسين تقرون والا جالس اكتب لعمري )..


طيب بتسألوني وش صار على التسجيل.. ياطويلين الاعمار فتح معي الموقع بس ماعرفت وين اروح.. المهم ضغطت على ايميلهم ويفتح الاوت لوك وابدأ اكتب .. طبعا ماعرف وش كنت أسوي.. صرت افتح النت كل يوم انتظر ردهم .. نفسي اعرف وين كنت .. كنت متوقع ألقى منهم رد وانا حتى ايميل ماعندي:p .. ياالربع ومالكم علي يمين صرت ادور بالمستندات والمفضله على الرد.. حتى الوورد دورت فيه ومالقيت شي ..

وفي النهايه قفلت الأخلاق ومابقى على التسجيل الا كم يوم واعطي بياناتي واحد من الشباب وجزاه الله خير ماقصر وسجلني..





[2002-2003:السنه الجامعيه الاولى]


مرت الايام والحمدلله جانا القبول وبدينا الدراسه ومحاضرات من 7 الى 5 يوميا وحنا مشغولين نحسبها ثانوي:p .. مرت أسابيع على هالحاله وعقبها بدأت الدجه..

والانترنت له أولويه في اهتمامات الشباب وخويكم ياغافل لك الله.. وحتى تكون طالب جامعي ناجح لازم تعرف تلعب كوره وتفت بلوت وتتسدح في القهاوي بالساعات ولك خبره بالنت .. وانا الاخيره تنقصني.. والله وأنشب لواحد من رواد مقاهي الانترنت واتكي معه على نفس الجهاز.. وأخا العرب فاتح شات ومابقى أي نك فيه ريحة بنيه الأ ويفتح له شاشه صغيره ويكتب: ممكن؟
الين ردت عليه وحده منهم حزتها صرفني بجهاز لحالي وعلمني بالموقع والطريقه ..

المهم استمريت على الشات كم يوم لكن ماجاز لي.. مهو بزود ورع او تقوى(هدانا الله واياكم) لكن السالفه بكبرها مادخلت مزاجي! خويكم متعود كل ابو دايم ماينقي الجحه"البطيخ" الا على السكين .. يعني معقول بعد هالعمر أروح أخذ جحه مقفله مادري هي حمراء ولا بيضاء.. بعدين انا وش يدريني انها جحه؟! يااخوان امكن انها تصير قرع او حتى كوسه ..

الشاهد ان الشات ماجاز لي ونصحوني بالشات الصوتي.. بديت اطقطق عليه وفعلا جوه كان غير وفيه سعة صدر لكن احيانا يجونك ناس مدري وش يبون وخذ انواع المصاله والغباء والفقش .. يجيك واحد مثلا ويبدأ الاسطوانه المشروخه.." يابنات انا ادرس بامريكا هندسه نوويه في الجامعه الفلانيه(الله من الكذب) وعندي مشكله ابيكم تساعدوني فيها لاني مررره متعقد.. لما كنت في السعوديه كنت احب وحده لكنها ماتت(ويوقف يصيح شوي لزوم الحبكه ) وصدقوني لليوم مالقيت وحده تعوضني عن حبها وحنانها ولا اظن اني القى وحده تخليني انساها.. والمشكله اني بالمررره وسيم والبنات يلاحقوني لكني ماابغاهم لاني عايش على ذكر المرحومه" .. ويشغل أغنية خالد "الذاهبه" لزوم التأثير!

ياخي اعنبوا ثقالة دمك واعنبوا اللي علمك ترقم يا السطل.. أجل بامريكا ويسمع خالد عبدالرحمن .. وش ذنبا تخرب جونا(<< باقي حره بقلبه )..


وكان من الطبيعي اترك الصوتي وازود الحيار عبتين(<<صارت ممنوعات) وكانت المحطه التاليه البالتوك.. ياشباب اللي اخترع هالبرنامج عبقري ولو علي كان عطيته جايزة افضل لاعب .. هالبرنامج خرافي ياناس مدري شلون اوصفه لكم بس اعتبروه زي الانتركوم هاللي يركبونه بدل الجرس(<< على باله يمدح:p )..

في البدايه بدينا الفرفره بين هالغرف وتعلمنا الصنعه وتبرع واحد لنا وضبط روم خاص كان اسمه "انا قمر وانتم نجوم" بقيادة محدثكم المايسترو "ابو باسكال" (والله ياذكريات هالنك ) وصاحب الصوت الجهوري "ابو شويش".. يالربع والله ايامها كانت قمه في الهبال والزحف(زمان يافن ).. كان الروم للهبال وسعة الصدر.. انواع المقالب والتسحيب والاستلكاع على خلق الله وقوة تشبيك بهالبشريه.. حتى عدد الزوار للروم وصل ارقام مرتفعه حزتها.. كان الوضع زحف زحف بمعنى الكلمه حتى الدراسه صارت زحف وبغيت اتشوت بس ربك ستر وتركت البالتوك فتره خلصت فيها السنه الاولى على خير ..

بعدها رجعت للبالتوك مره ثانيه بس الوضع ماش تغير وصار قمه في الانحطاط الاخلاقي وجات فتره الله لايعيدها .. ياناس تغيرت حالتي وامتلى وجهي حبوب وصرت راعي هواجيس وأفهم بالشعر .. والحمدلله ماطالت الفتره وطلقنا هالبالتوك بالثلاث..






[2003-2004:السنه الجامعيه الثانيه:بداية المنتديات]


بعد الزحف اللي صار في السنه الاولى قررت اني اخذ سكن داخل الجامعه حتى أركز على الدراسه أكثر.. ومن باب العلم السكن متوفر فيه النت وبسرعة تصفح ممتازه لكن مايفتح مواقع الشات او اي برامج محادثه.. وبقية المواقع مفتوحه ومن ضمنها المنتديات..

عاد خويكم حزتها ماقد طب منتدى أبد ومع الفضاوه قررت ان الامر ماينسكت ولازم تتم مساعي حثيثه لاجتياح اروقة المنتديات.. صرت افتح قوقل واكتب منتدى واللي يطلع معي اتصفحه .. بس القهر اني اشوف الناس تتكلم وانا جالس اتفرج.. وكان القرار التاريخي اني اسجل بالمنتديات بس المشكله انهم يبون ايميل.. خذ عاد من وين اجيبلهم ايميل؟!

صرت اشوف يوزرات رازين ايميلاتهم في تواقعيهم واروح اتويقع على واحد منهم واحطه في خانة الايميل بس يطلع واحدن اقشر يقول:" هذا الايميل مستخدم من معرف اخر" ..

عاد انا ماني بقليل.. دبرت عمري وحطيت ايميل وش زينه مميييييييز.. وقبله اخيرا في منتدى والله ماعاد اذكره:p .. كلها يومين واليوزر حقي مااقدر ادخل فيه .. اعنبوا القهر من اللي يكتب باسمي وصار عضو رسمي بعد .. هذا وانا جالس اتفنن بالايميل<< الخبل جايب ايميل من دميجته ويبي يسجل فيه (اللي بيقول سبيكه بتوطنى ببطنه )..

المهم شاورت واحد من الشباب عن المنتديات ونصحني بالاقلاع.. لكن قالي ماهم مفعلينك الا عقب شهور.. كانك تبي عندي يوزر ومااستخدمته.. قلت اهم شي فيه ايميل.. قال: اجل شلون مسجل يالسبيكه ..

والله واخذت اليوزر وبديت فعليا اكتب واشارك.. وكان الاقلاع اول منتدى فعلي اسجل فيه وعرفت نظام المنتديات من خلاله.. واستمريت من خلاله فتره ليست بالقصيره حتى بدأ نجمي بالبزوغ( اخس ياظلال نزار قباني ) الين صارت لي مشكله مع مشرف ووقفني بسببها..حاولت اتراسل مع الاداره وكلمت خويي يعلمني بالايميل لكن للأسف طلع غير مستخدم من فتره طويله وتقفل .. وانقفل معه بوجهي اخر أمل بالاقلاع ..




[2005:السنه الجامعيه الثالثه: تسجيلي بالزعيم]


بعد ماانتهت علاقتي بالاقلاع كنت حزتها بمنتصف السنه الثالثه بالجامعه.. كان عندي وقت فراغ كبير (واسألوا المشاغب ونمر ) ويروح اغلبه في تصفح الانترنت.. ايضا خلال الفتره اللي كنت مشارك فيها بالاقلاع تعرفت على شبكة الزعيم وكنت يوميا اتصفح منتدى الجمهور وكنت أتحمس للمشاركه لكن كنت اصطدم بحاجز الايميل..

وقتها قررت أنفذ اهم القرارات حسما في تاريخ مسيرتي النتيه ألا وهي الحصول على ايميل.. وفعلا نفذت العمليه بسهوله(مدري وين كنت ) وحققت نجاحا باهراً وفتحاً عظيما.. تخيلوا من عام 2000 وانا احارب وماتحقق النصر الا في 2005..

أول شي سويته بعد ماامتلكت الايميل سجلت بالزعيم.. طبعا نك"هلالي الظهران" كان تقريبا عاشر خيار .. وبدأت المشاركه في منتدى الجمهور واذا انتهيت اخذت لفه على المجلس العام..

طبعا بعد ماعانيت وحتى صار عندي ايميل تكونت عندي ردة فعل عكسيه فرغتها بالتسجيل بمنتديات اخرى.. بديت بمنتدى سامي وبعدين سجلت بكل المنتديات الهلاليه ثمن قمت اسير على المنتديات واسجل.. بالعربي حللت الايميل تحليل لدرجة اني سجلت بموقع "حواء" وعرفتلي كمن خلطه من هاللي يطول الشعر واللي يكبر مدري شنو واللي يجعل اظافرك براقه .. وسيرت على المطبخ ووشلون تسوين بسبوسه من دون ماتفتت والبيض المسلوق من دون مايتفجر .. حتى المنتديات الزوجيه ايميلي عندهم .. لكن سرعان ماطفت هالفوره واكتفيت بشبكتي الزعيم والهلال..

حتى الماسنجر ماني من ربعه ابد.. تمر شهور بدون ماأفتحه واللي أضافوني يعرفون هالشي.. بس القهر اني ابعرف هالبشريه اللي القى طلباتهم واضيفهم من يطلعون .. والبلا اني لو ادخل لاي غرض واسأل الموجودين عن هويتهم يبدأ الاستلكاع والنصبه الأزليه ان مالهم يوزرات بالشبكه لكنهم متابعين فقط .. بالمناسبه أعتذر لأي شخص انصك ببلوك خلال دقيقتين ..





[مشواري في شبكة الزعيم]


علاقتي بالشبكه من بعد تسجيلي كفتره ليست بالطويله ولكنها قياسا بتواجدي كانت موفقه والحمدلله اولا واخيرا .. وبمجرد ماتطرى الشبكه على بالي أشعر بالسرور والحبور والحمدلله ..

بدايتي مثل الجميع كانت من منتدى الجمهور وكنت متابع بدقه مايدور من خلاله.. وكانت مشاركاتي من خلال الردود فقط.. وحاولت أكتب فيه لكن وجود اسباب مختلفه اغلبها مني والبعض الاخر خاص بالشبكه فضلت على اثرها اني اكتفي بالمتابعه واحيانا بالردود.. طبعا خلال هالفتره كان لي اطلاع على المجلس لكن حزتها كان موجود منتدى الأعضاء وكنت مرتبط فيه ارتباط شديد لوجود أعضاء بالفعل كانوا مثل الاخوان في البيت الواحد.. قبل ان تستجد بعض الامور فابتعدت عن منتدى الاعضاء صوب المجلس العام( قلوب من هنا لاخر ديار المسلمين) حتى أصبح تصفح منتدى المجلس العام أول عمل اقوم به خلال تصفحي للانترنت.. بصراحه ارتباطي بالمجلس وأعضاؤه ارتباط روحي.. وفيه الكثير الكثير اللي سعدت بتواجدي معهم وهم أكثر من ان أحصيهم ..

خلال هالسنتين ماكان فيه أمر خارج عن العاده خصوصا واني انسان امشي جنب الحيط باستثناء اني توقفت مره واحده في البدايات لمدة يومين بسبب وشايه ظالمه مجحفه.. ولا أجد حرجاً أن اقول انه من خلال بعض الاصدقاء في الشبكه جاني عرض من أحد الملاحق الاسبوعيه لاحد الصحف السعوديه بالكتابه معهم ..






[الانترنت وحياتي الاخرى]


سبق وان اعطيتكم بالتفصيل الممل ارتباط الانترنت بحياتي الخاصه الى ماقبل المنتديات.. بالمناسبه في الشهور الاخيره قل تواجدي بالشبكه ولكن لم انقطع عن الشبكه العنكبوتيه! ففي اعتقادي هي أمر لايمكن الاستغناء عنه مطلقاً..

فمحور حياتي يعتمد بعد الله على الانترنت.. يعني من خلال الدراسه مستحيل أشك خيط بابره من دون تصفح المواقع والمكتبات والفهارس والموسوعات العلميه.. ايضا في الفتره الاخيره بديت بامور البزنس واغلب اموره تتم من خلال المراسلات بالانترنت.. وكمثال على احدى هالامور الأسهم(احس ناس قامت تدعي علي الحين ).. عاد حظي في الاسهم مثل حظ فهد الحيان(قولوا ماشاءالله)..

وعلى طاري الانترنت والاسهم اذكر في مره جاتني توصيه على صافولا وانا بوسط المحاضره.. والله واترك المحاضره واطلع لاقرب معمل حاسب واسوي امر شراء بسرعه وارجع للمحاضره.. المهم يوم ارجع واكتشف مع العجله اني اشتريت معدنيه.. وعاد هذاك اليوم صافولا قفلت نسبه تحت ومعدنيه نسبه فوق .. وخيطي بيطي خذني يارفيقي ..

اما من خلال المنتديات فانا عندي وجهة نظر من خلالها أفصل حياتي الشخصيه تماما عن المنتديات.. لكن خلال هالفتره حدثت بعض اللقاءات العابره مع بعض الوجوه الطيبه.. من اللي قابلتهم في المنطقه الشرقيه بالفترات اللي يتواجد بها الزعيم الغالين بووليد وعاشق ابو بندر.. وايضا الخلوق وطيب القلب والرائع جدا جدا جدا عاشق بو يعقوب.. وايضا اذكر مره كنت مع مجموعه من الاخوان وقابلت لدقائق الزاحف ثامر واحد اس اس وراعي المرمره الجميل الحاتمي.. ومؤخرا حدث أمر جميل كسرت فيه بعض قناعاتي الشخصيه بعد ان قابلت رجلين بمعنى الكلمه وهما اصدقائي "الهاوي" و"ماجد مقبل" ..صدقاً صدقاً وبدون أي مجامله أفتخر أشد الفخر بمعرفتي بهم وأدين للمجلس العام بأن جمعني بهم..وبمجرد انك تتعرف على ابو مقبل صديق الجميع فحتما ستتعرف على المزيد من الحبايب.. ومن هذا الباب تواجهت خلال احد الجلسات مع زميلي الجامعه..صاحب الابتسامه الدائمه والروح المرحه المطوع "المشاغب"..وفارس الفرسان ومحلل الشخصيات"نمر15"..ايضا تواجهت مؤخرا بصاحب العلاقات المتعدده والاخلاق العاليه"خالي من الهم" برفقة المشاغب.. وعلى وجه العموم انا اعتز بكل من تعاملت طيلة فترة تواجدي بهالشبكه الرائده..







[النهااايه]


في الحقيقه جاتني أوقات كثيره وانا ما أتخيل اني في يوم اقدر ابتعد عن المنتديات والمجلس العام تحديدا.. فقلبي مشغول بها وبحبها انا ابتليت.. استهلكت وقتي.. وضيعت نظري.. وقتلت امالي.. وصرت ماأقدر اعيش من دونها.. لو أفقدها خشمي يحكني..ويديني ترتجف.. وراسي يوشوش.. اصير ماني بوعيي.. يصيبني هبال ..

لكن بعد انشغالي في الفتره الاخيره أيقنت بأن دوام الحال من المحال وانها لو استمرت لغيرك ماوصلت اليك وتذكرت أحبه كانوا معنا في فترات سابقه وابتعدوا.. والآن كل ما أتمناه أن تطول فترة تواجدي في هالمكان العزيز على قلبي ومع اخوه لهم في سويداء القلب منزلاً وشأناً.. والله يكتب الخير للجميع وجعل عيني ماتبكيكم ..

ختاماً.. أعلم اني أطلت كثيرا وأكثرت من الغث ومالا يفيد فالعذر والسموحه منكم واستروا ماواجهتم .. بالتوفيق للجميع..

سبحانك اللهم وبحمدك.. أشهد ان لا اله الا انت أستغفرك وأتوب اليك..


كتبت في 14/5/2007 ..ثم عدلت في 2/11/2007


أخوكم/ أبو سباستيان





ونحن بدورنا نشكرالأخ/هــلالي الظهران لإٍستجابته لدعوتنا وانتظرونا الأسبوع القادم بإذن الله في



تقبلوا أرق التحايا وأطيبها
من مشرفي واستشاريي
منتدى المجلس العام



للإطلاع على الحلقات السابقه لـ ضيوف حياة@نت
«¤¶`أرشيف حياة نت " `¶¤»