هلا وغلا بابو الطل

والله لا والوالد - رحمه الله -

ولا الوالده يطقون

بس يوجد بعض المحاضرات


اللتي تنهل على رأسي يومياً

ولكن اتقبلها بكل يسر والحمد لله

لا يوجد طق ولا طقيق

.: برايفت لابو طلال :.

انا قلت ابو طلال

ابو الطل العشى موجود اغبيلك ولا لا

ما أتذكر طق طق بمعنى الكلمه

ماتبي تطلع فضايح

اتذكر يوم كنت في سادس ابتدائي كان حلمي العب {{بالسيكل}} برا في الشارع

وذاك اليوم ماكان فيه احد في البيت اخوي نايم وامي طالعه وابوي مسافر

واخذ سيكلي واطلع وانادي الشغاله تجلس عند الباب

وانا الف وادور في الحاره {{بس مارحت بعيد}}

شفت سياره من بعيد كأنها سيارتنا

وفعلا امي جت وشافتني في الشارع

انا شفت السياره ولا لا جاني هبال

واسرع وادخل البيت واروح غرفتي وكأني ماسويت شي

وانا ادعي يارب تكون ماشافتني

وتجي امي وتقول فلانه تو وين كنتي فيه

قلت وانا {{طاقتني ام الركب }}

في غرفتي

قالت لا والله

ما ادري إلا طلعت معلاق الملابس وطاحت فيني ضرب ضرب عمري ماذقت مثله

إلا جسمي ازرق احمر اخضر جميع الوان الطيف {{امحق من طيف}}

وتقول هين خلي ابوك يجي والله لأعلمه

لو يدري ابوي علي السلام

طبعا جلست اتأسف واحلف اني ما اعيدها بس ما تعلم ابوي

بعدها ما اتذكر اني انضربت

يعني تقدر تقول هاذي الاولى والاخيره حتى الان

{{طبعا الله لايخلينا من التقبيص}}

انا ياليت مثلكم انطق خلوها على الله

مووضووع حلووو ورائع

اجل بترد الكف هههههههههه << والله انك كنت زاحف

انا ما اذكر اني انطقيت اذكر انه المحاظرات والسب كل يووم

مشكور على الموضوع
وعساك على القوه

"

"
وعليكم السلام ورحمه الله وبركاته

اممممممممممممم
بصراحه ماحس اني انضربت كثير يمكن لما كنت صغيره ماتذكر
وقليلا المواقف الي تستحق الضرب لي وش حليلي هاديتن عاقلتن كافيتن خيري شري
>>>>>>>>>>تمدح بعمرها
واابووي الله يحفظه ماتوقع كان يتعامل بالضرب يمكن يعصب بس ماحس اننا كنا نسوي شي يستحق الضرب او الصراخ
ولو غلطنا الافضل نبتعد عن مصدر الخطر

الضرب غالبا للاولاد احس قليل بنت تنضرب

تذكرت مره اتوقع هي الاولى والاخيره الي انضربت فيها
كنا انا واختي وبنات عمتي ثنتين ووولد خالتي
طبعا عددنا خمسه يعني واحد مايلعب معنا
نلعب (كيرم )
المهم اني خسرت الظاهر عاد تعرفون الدلع مدري وش قلت وعصبت والظاهر بكيت علشانهم طلعوني او بمعنى اصح خسروني

اتذكر تنرفز ابوي من رده فعلي وضربني

الله لايعيد الكيرم الي بيعرضني للضرب


عوافي اخوي ابوطلال
والله الله بطلال وفارس لاتمد يديك عليهم

إقتباس الرسالة الأصلية كتبت بواسطة G o L d E s T لا تقلب المواجع يابو طلال

إقتباس الرسالة الأصلية كتبت بواسطة G o L d E s T أحس أنك توك ضارب طلال وتحسفت وبتسألنا طبيعي الضرب ولا لا أنا أبوي ضربن مرة وحدة كانت هي الأولى والأخيرة طول الله عمرك أنا الولد قبل الأخير بالعائلة الكريمة مرة من المرات يوم اني بثاني أو ثالث ابتدائي كنت ألعب مع أخوي ( آخر العنقود ) طبعا كنا ماسكين سلك طويل كل واحد ماسك طرف وقاعدين نلعب به رجع أبوي من صلاة العشاء ويجيك أخوي الصغير يسوي حركة نذالة يمسك الحبل ويلفه حول رقبته عاد أبوي شاف الوضع كذا قال ما يحتاج أكيد اني أبذبح آخر العنقود بحكم الغيرة وأنا مظلوووووووووووم وماسك الحبل ومدري وش أسوي ويجيك الوالد يقول اترررررك أخوووووك ويطقن بذاك الكف اللي خلان آخذ لفه كاملة وادخل البيت طبعا الدموع أربع أربع بعد ما أخذت اللفه ورحت أصيح بالمجلس وأقول لنفسي أنا وش اللي مخلين أعيش مع هالعائلة اللي يضربونن وأنا مظلوم <<< فكر يهج برا البيت طبعا الوالد الله يحفظه تندم وأرسل أخوي يدورن بأنحاء البيت ويوم شافن أخوي الكبير قعد يسحبن لمين رحت لابوي والوالد ما قصر عطان مبلغ مالي وقدره عشرة ريالات بعدها نسيت الضرب <<< أيام كانت العشرة تعيشك أسبوع أما الوالدة ما سبق أنها ضربتني

اثاريكم مثلي
اتذكر اول لو صرخووا علي او ماشروا لي شي ابيه
فكرت اهاجر الدياااار واحس الدنيا تسود بعيني احسن بظلم عنيف لو مالبو لي طلب

الله يذكر ذيك الاياام والحمد لله قدرنا نتمالك اعصابنا ومانحشنا

إقتباس الرسالة الأصلية كتبت بواسطة saudi’s heart وعليكم السلام ورحمة الله وبركاته هلا بك اخوي ابو طلال.. الصراحه مااذكر متى اخر طقه بس اكيد ماكانت من الوالد الله يحفظه ويخليه لانه مايعترف بشي اسمه ضرب الا مع العيال طبعا اذا كان في ضربه بالصغر فهي شد الجديله من الوالده ايام الابتدائي

هلا والله وغلا بقلب السعوديه النابض ... ياجعل قلبك ماياقف ان شالله

الله يخليلك والدينك .... واهلا بك كااول عنصر نسائي يتكلم بصراحه .. وكان الوصف ( شد جديله ) زي ماتوقعت بالظبط والظاهر تسعين بالميه من وصف البنات جدايل او ( قبصه ) .. مااعتقد فيه اب او ام حنون يستخدم ( الخقله ) كنوع من العقاب تخيل بنت تخقلها ؟؟

شاكر لك اختي حضورك ولاتحرميني من مرورك بين الحين والاخر في هالموضوع المتواضع

إقتباس الرسالة الأصلية كتبت بواسطة أحلاهم واتحداهم وعليكم السلام ورحمة الله وبركاته .. الله يهديك يخوي ناوي تفضحنا مممم آخر مرة انطقيت فيها كنت مخلصة الابتدائي وسببها كنت متهاوشة مع اختي وانطيقيت انا وياها بنفس طريقة الاخ الي يقول الطق جماعي عند ابوه عوافي عالموضوع

لافضيحه ولا شي .. يعني وين عايشين بااوروبا .. كلنا عيال قريه وكلن يعرف اخيه
وسالفه الطق الجماعيه منتشره عندنا .... ارخص واوفر مجهود .. شكل الوالد محاسب الله يحفظه
يالله تعيشين وتاكلين غيرها

وشاكر لك حضورك

إقتباس الرسالة الأصلية كتبت بواسطة "هلاليه أنا " لكن والله لو تدري وش ضربنا به بشيء غير متوقع ...ولا اقدر اقوله لكم عشان لا تقولون ابوك متوحش اللي يشوف << ضرب الناس >> يهون عليه ضربه ههههههههههههههه جالسه أتفرج وأضحك عليهم أبو طلال يعطيك العافيه موضوع في وقته

هلابك والله اختي ... وحلوه من يشوف ضرب الناس يهون عليه ضربه

اجل من النوع اللى يحب يتفرج ويطلع لسانه للمجلود

شكرا لك اختي وترى ماعطيتينا وش صار معك .. يعني ماعلمتينا .. هي شد جديله .. او كف .. او قبصه

إقتباس هلالي مدريدي 10 مالها داعي الفضايح ولا فيه كثير

عطنا اخر وحده .. اللى قبل اسبوع

شكرا قلبو

إقتباس فهد عاشق البرسا والله يا ابو طلال مدري وش اقولك ابوي ماعمره مد يده علي عودني على الكلام او الصراخ وهو والله تأثيره اقوى من الضرب الضرب تأثيره مؤقت ثواني وينتهي اما الكلام يبقى فالنفس مايمحي اسلوب سيئ في التربيه اتمنى ياابو طلال انت وغيرك من الأباء ما تستعملونة ضد ابنائكم عوافي خيو

هلابك والله فهد ... الضرب ماضرنا ولا ضر ابائنا واجدادنا .. واخواننا .. لايهمك بس كلام الجرايد والقنوات الفضائيه

شف جيل هالوقت ماينضرب وكيف منحرف ! وش فاده الدلع والتربيه الحديثه

الواحد تلقاه يرد على امه .. ولايحترم ابوه ..

الضرب وسيلة من وسائل التربيه .. والتعليم بعد ... بس مو بوحشيه .. يعني لادلع ولا قسوه .. وامسك العصى من النص

تحياتي لك اخوي فهد ومشكور حضورك ... وان شالله ابنائنا مايحدونا على الضرب وزي مانتذكر الحين ضرب ابائنا ونقول اللى لايشل ايدينهم على ضربهم لنا وتعليمهم وتربيتهم .. يقولون عيالنا نفس الشي .. لو ضربناهم ( مثلا يعني )

إقتباس الرسالة الأصلية كتبت بواسطة S K Y ابو طلال ماشاء الله عليك مواضيعك دايم جميله وتشد الانتباه بالنسبه لموضوع الضرب ابوي فيه ميزه مايضرب قدام أهلي يحشرني بغرفتي ويعطيني المقسوم وفي الضرب طبعا مايستخدم غير العقال ( بس عليه عقال تقول عجره ) كنت في أول متوسط ندرس انا وواحد من عيال عمي في نفس المدرسه نغزنا الشيطان قبل تبدأ الحصه الأولى وانحشنا من المدرسه ورحنا لبيتهم ورقدنا في الملحق عاد انا مسوي ذيب ومعطي المدرسه رقم البقاله لأنه مايفتح الصبح بس ابوي طلع اشطر مني رايح لهم من وراي ومعطيهم جواله ،، طبعا اتصلو على رقم البقاله محد رد ثم اتصلوا على جوال ابوي بعد مانمت وشبعت نوم رحت للبيت < من زد الدلاخه طبعا وجهي كله نوم امي شافت وجهي باين عليه النوم وماقالت شي ( ياحبي لها ماتبي تضلمني ) وابوي في العمل طبعا ومحد يدري عن نحشتي من البيت رجع ابوي العصر وشافني عند اخواني قال لي تعال وراح لغرفتي ،،، عاد انا طاح قلبي بعد مادخلت الغرفه سكر الغرفه وقفلها ( الباقي مشفر اذا عندك بروكسي ادخل ههههههههه ) بعد مادخلت نزل عقاله بكل هداوه وأريحيه وقال وين كنت الصبح ؟ عاد انا ووجهي مسوي ابي اجحد قلت في المدرسه ويعطيني الأولى ثم قال وين كنت اليوم الصبح عاد وانا اخووور قلت له في بيت عمي ويعطيني الثانيه قال قسم بالله لو تكذب علي لـ اعلقك في المروحه وانا احلف له اني كنت نايم في بيت عمي ونكبت ولد عمي معي وهو يعطيني المقسوم ويطلع بعد ماطلعت مريت من جنب امي قالت لي وانا اشوف وجهك بعد ماجيت من المدرسه كله نوم من عقبها الله يجزاه خير ويخليه ماعاد افكر انحاش حتى ولد عمي سحبت عليه ( طبعا سحبت عليه اسبوع بس هههههه )

ههههههههههههههههه حبيب قلبي ربي يسعدك والله ضحكني هالموقف ... بدت المواقف الساخنه والحلوه تطلع من بعد هالرد

موقفك يستاهل طباعه .. وكل مافضيت اقراه

مااقدر اقتبس ولا اعلق ... مااقول الا الله يسعدك زي مااسعدتنا بتشريفك وحضورك يالغالي

الف شكر ياقلبي

إقتباس الرسالة الأصلية كتبت بواسطة Hilali88 هذا إللي ناوي يفضحنا بالنسبة للوالدة ماعمرها طقتني أما أبوي حدث ولاحرج آخر طقه ما أذكر متى كانت بس كل الطق إللي جاني يوم كنت في الإبتدائي ومن خشيت المتوسط ما أذكر إنه طقني يوم كنت في الإبتدائي عد واغلط كم كف على كم رفسة على كم لشطة بالعقال مرة طقني أنا مع أخوي بالعصا قمنا رحنا غرفته بدون ما يدري وكسرنا عصاته بس أبوي حكيم ما قال شي عوافي

هلا بطير شلوى .......... هو الأبو اللى يسوى قلق بالعاده
وكسرت العصى حل مؤقت .... لكن حكمت الوالد غيرت اداة الضرب من عصى إلى ( لي ) كهرب .. ياشينه بالظهر خصوصا بالبرد
شاكر لك قلبي ............... وتعيش وتاكل غيرها

إقتباس الرسالة الأصلية كتبت بواسطة the bast وعليكم السلام ورحمة الله وبركاته .........! يعطيك العافية أخوي أبو طلال .........! والله ماأذكر متى أخر مرة لكن إذا ذكرت أبشر بقولك .. لكن سؤال أنت متى اخر مرة طقيت طلال ..؟ سؤال وجيه صح ..؟ يعطيك العافية

اذا جاوبتني جاوبتك ... بس شكل الاجابات كلها قريبه ...

يعطيك العافيه اخوي .. وننتظرك ....... بااخر مزح ثقيل مع الوالد .. يالله مانبي نقول طقه

إقتباس الرسالة الأصلية كتبت بواسطة كلي هلالي ياعيني يابو طلال شكلك انضربت اليوم .. ولا ضربت فارس وتذكرت جلد ابوك لك ما اذكر اخر مره فرشني فيها الوالد. بس اذكر اقوى ضربه على بداية المراهقه والزحف اول مره اتأخرعن البيت اول مادخلت استقبلني الوالد الله يحفظه بمزهريه على راسي طبعاً راسي ماصار فيه شي الضرر جا للمزهريه وإلى الحين أذكر لون المزهريه لونها بني على ذهبي <-- يلعن هيييك تنسيق بالالوان الحين كبرنا ونقدر نتأخر . بس تصدق ان ضربة المزهريه ولا شي عند أبوي الشباب يعقلون بعد الضرب اما انا استمر على عادتي واتحمل الضرب بررب احك راسي

هههههههههههههه شكلك من عقب المزهريه سويت لك ملحق وخليت ربعك يسهرون عندك

وسلامة رويسك .. والا المزهريه تروح وتجي اخوي

على طاري التأخير .. تذكرت نكته واحد تأخر على البيت وطق الباب وفتحت له امه وقالت له :: ليه متأخر ؟؟ لا وريحتك بلوت بعد !!

شاكر لك اخوي حضورك الرائع

إقتباس الرسالة الأصلية كتبت بواسطة ياقاهرهم يالهلال اذكر اخر مره جاني طراق يمشي مليون من ابوي كنت في المتوسطه على ماظن والسبب لاني كذبت عليه قالي رحت صليت قلت ايه معد دريت عن نفسي الا وانا ادور بمكاني

اانا لو منك مااعترف ... اخليه يشك بنفسه انه ظالمني
بس شكلك علمته بالاول والتالي بعد هالكف

يعطيك العافيه اخوي وتعيش وتاكل غيرها

إقتباس الرسالة الأصلية كتبت بواسطة أول العنقود آخر لشطة أذكرها أيام المتوسطة !! يوم إني جلدت أخوي الصغير بس ناسي ليه أبو طلال .. مواضيعك ما شاء الله تووووووحفة

اول شي حلوووووووووه اللشطه ........ وهذي سنة الحياة انت تذكر الطق اللى جاك ولاتذكر سبب طقك لأخوك ..

يطولي عمرك ثامر على هالحضور والمرور .. واذا لك موقف ثاني هاته ترى مانقول لا

إقتباس الرسالة الأصلية كتبت بواسطة عاشقة الزعيم15 ياحبك للفزااايح حاولت اتذكر اخر ضربه بس ماتذكرت بس اتذكر ايام الابتدائي كنت انضرب كثييير والسبب عشان اتضارب مع اخواتي يقوم يضربنا واتذكر ماما كانت تضربني ايام الابتدائي عشان لما يسوا اجتماع للامهات يقولوا لها اني شاطرة بس مشااااغبتي طاغيه عالشطارة وان اختي الي اكبر مني هاديه وشاطرة ماشاء الله عليها وانت متى اخر مرة ضربت طلوو >>> خليك صريح

انا من شفتك تقولين ( ماما ) عرفت ان تطليعة اللسان بالنسبه لك قسوه انا ابي ضرب صدقي .. حقيقي .. زي بتوع السيمااا بالزبط
الله يعطيك العافيه عاشقه ........ واخر مرة ضربت طلووو قبل ثلاث ايام او اربعه .. والسبب انه قال كلمة مهيب زينه تعلمها من خواله .. خصوصا انه هاليومين ولمدة اربعين يوم عند خواله .. وعندهم بزران بس شياطين وماضربته .. بس قبصته مع شفته لين مادمعت عيونه




[QUOTE=(((أخلاق سامي)));6686221]هلا ابو طلال ....


والله موضوعك في غااااااااااااية الروعه

انا اخر مره طقتني امي بس عجزت القى السبب نسيته والله بس على ما اضن اني تركت اخوي الصغير بلحاله في الملاهي او زي كذا بس اهم شي في ذا الورع الصغير

بس ياهو كف ياهو كف جاني والله ارتج جسمي رج مدري وش جاني ذاك اليوم



تقبل مرووووري يالغالي


الضنا غالي يابعدي .. تعيش وتاكل غيرها .. اجمل امك الله يخليها لك تتعب وتحمل وتشقى وتربي وانت تضيع اخوك اللى تعبانه فيه علشان عيونك طايره بالملاهي
واحس انك يامشعل حبوب وطيب .. من يطق هالمؤدب ياعالم .. احس انك ماتوذي

شكرا مشعل ويعطيك العافيه ....

إقتباس الرسالة الأصلية كتبت بواسطة G o L d E s T لا تقلب المواجع يابو طلال أحس أنك توك ضارب طلال وتحسفت وبتسألنا طبيعي الضرب ولا لا أنا أبوي ضربن مرة وحدة كانت هي الأولى والأخيرة طول الله عمرك أنا الولد قبل الأخير بالعائلة الكريمة مرة من المرات يوم اني بثاني أو ثالث ابتدائي كنت ألعب مع أخوي ( آخر العنقود ) طبعا كنا ماسكين سلك طويل كل واحد ماسك طرف وقاعدين نلعب به رجع أبوي من صلاة العشاء ويجيك أخوي الصغير يسوي حركة نذالة يمسك الحبل ويلفه حول رقبته عاد أبوي شاف الوضع كذا قال ما يحتاج أكيد اني أبذبح آخر العنقود بحكم الغيرة وأنا مظلوووووووووووم وماسك الحبل ومدري وش أسوي ويجيك الوالد يقول اترررررك أخوووووك ويطقن بذاك الكف اللي خلان آخذ لفه كاملة وادخل البيت طبعا الدموع أربع أربع بعد ما أخذت اللفه ورحت أصيح بالمجلس وأقول لنفسي أنا وش اللي مخلين أعيش مع هالعائلة اللي يضربونن وأنا مظلوم <<< فكر يهج برا البيت طبعا الوالد الله يحفظه تندم وأرسل أخوي يدورن بأنحاء البيت ويوم شافن أخوي الكبير قعد يسحبن لمين رحت لابوي والوالد ما قصر عطان مبلغ مالي وقدره عشرة ريالات بعدها نسيت الضرب <<< أيام كانت العشرة تعيشك أسبوع أما الوالدة ما سبق أنها ضربتني

لو مانقلب المواجع .. ماطلعت هالسالفه الرهيبه .. عاد تصدق سالفتك ثاني اجمل سالفه شفتها للحين .. فيها فائده ونقاط مهمه ... بس رحمتك والله

بس العشره نستك الظلم وسنينه ... من يوم يومك مادي

شكرا لك اخوي .. وعساه ناخر الاحزان والظلم والكفوف

إقتباس الرسالة الأصلية كتبت بواسطة هـــ الشماسيةـــلالي هلا والله أخونا العود ابوطلال بارك الله فيك على موضوعك الشيق المصحوب بالتسلية والترفيه ,,,,, كان يوم عز وفخر عندما تحولت إلى فارس مغوار عندما تقمصت شخصية الزير سالم وأتقنتها أيما إتقان لولا النهاية الأليمة إليكم القصة بالتفصيل : أعتقد كنت بالإبتدائي ذالك الوقت وحينها أتميز بأني دبيب شوي وصادف يوم عرفة أي قبل عيد الأضحى بيوم ذهب والدي إلى سوق الغنم واشترى خروفين للضحية وتم وضعهن بحوش البيت ,, جاء وقت الظهر وخلد الجميع للنوم ,, عندها فضلت أن أداهم ضيوفنا بالحوش اللي هم الخروفين فعزمت أن أمتطي ظهر أحدهم فأمسكت به بعد مطاردة مثيرة تم فيها سحب محاكيكم على خشته بالبلاط وبذلك أرحت الوالدة من عناء تنظيف الحوش للعيد ,, أمسكت به واعتليت ظهره ممسكاً بلجامه اللتي هي أذان الخروف !! وما أن ركبت حتى أحسست بشعور غريب وشعور يدركه ويعرفه كل فارس مر بمثل تجربتي ,, حتى أني أمسكت بصنخ النخل وفعلت منه سيف وبحثت عن الباب لكي أحرر القدس !! وبدأت أجوب الحوش عرضاً وطولاً وبدأت أكر وأفر كأني وسط المعركة ,, حتى ظهرت وحصلت الطامة عندما انكسر ظهر الخروف ومات قهراً وحسرة وفضل الانتحار على الاستمرار في تلك المعركة المزعومة ورغب الموت ولا يطأ عليه ذلك الجسم الدبدوب ,, وماأن جاء والدي وجدني واقف والخروف أمامي والسيف بيمني فعرف وأدرك المصيبة وقبل أن يسألني عن مالحدث استبقني بكف يحبه قلبك لكي يكسر أنفتي وعزتي وعلشان أتعوذ من الشيطان ولا أتهور وأعمل شي خصوصاً والسيف بيدي !!! 00000000000

مسوي قلق الزير سالم راعي الشماسيه

خل سيفك ينفعك هههههههههههههههه

موقف والله روعه وسردك للقصه زادها جمال ورعه ... ربي يسعدك لن اعلق على هالموقف .. اترك الاستمتاع للقاريء الكريم ... بس ابعد السيف لاتعور احد يالقوى

شاكر لك اخوي ولاتحرمني من حضورك ومرورك



للحديث بقيـــــــــــــــه :::

السلام عليكم ..،

هذي قصه انطقيت فيها طق

القصه ومافيها كنت في ثاني ابتدائي ايام الديره حلو ومسكت معي الا ابي فلووس

يقنعووني وش تبي فيها اقول ابي فلووس مدري وش كنت مخطط عليه عااد بهذلتهم

وفي الاخير سطرني اخوي تسطير كفر فيني عااد انا زعلت وقررت اترك البيت

وجمعت ملابسي قسم بالله بكيسه اخوي الصغير يقنعني طاارق اقعد وانا اقوله

والله ما اقعد اقعد في بيت مايحبووني واخذت ملابسي وطلعت عند الباب يوم

طلعت اشووف ظلام ومافيه احد في هالحظه تمنيت اخوي يجي يترجااني اجلس

بالبيت عشان اقوله عشانك بس وفي الاخير جت امي وراضتني ورجعت ملابسي

إقتباس الرسالة الأصلية كتبت بواسطة خالي من الهم لاحول ولا قوة إلا بالله. سهل كلاسيكي فيه قسم لازم تسونه للمواضيع السامجه . يؤ يؤ يؤ وش هذا الموضوع يبو طلال. أولا ترا امزح ولكن الله يسعدك وش هالفضايح ياولد. واللهابوي اخر مره ضربني وانا طالع من المتوسط للثانوي. ليه والله صعبه اقول بس مسوي جريه كبيره . كيف ضربني بقولكم كيف. دعاني وقال ابيك واول ما جيت الله لا يوريك اشي كف على اشي عقال على اشي ترفيس ووين بالشارع. الطريف بالموضوع ان عيال الجيران جو يفزعون وجتهم بعض الكفووف والعقل عاد ابوي يلحقهم وانا هربت عند امي يالبى قلبها . بس بيني وبينكم وربي كنت استاهل هذاك الضرب . الله يوسع صدرك يبو طلال قل امين

هوبا حبيبي ... شكرا لأنك قدمت وسيلة جديده للاعضاء الكرام في الضرب وهي ( الترفيس ) وهذي فائده مثل هاالمواضيع .. واحد يقول اخر لشطه .. والثاني يقول كف .. وتقبيص .. وتشويت .. وتخقيل .. وجدايل .. يعني فيه تنويع بالموضوع وهذا اللى نبيه .. ترفيس اجل هع هع هع هع

تعيش وتاكل غيرها هوبا ... وضرب الحبيب زي اكل الزبيب .. والمثل يقول صياح(ن ) منه ( الشايب يعني ) ... ولا صياح(ن ) عليه ... الله يخليه لك ويحفظه ..

شاكر لك هوبا وربي يسعدك يالغالي

إقتباس الرسالة الأصلية كتبت بواسطة الازرق المتعصب ما أدري وش فايدة الموضوع لكن يله قبل 10 سنين بسبب إني اتتن << قال اتتن قال اتتن = أجييب اوراق وألفها وأشبها ويله هالكلام كان عمري 11 سنـة

مااحد يكسب ولا يخسر ... هنا موضوع لسعة الصدر والفرفشه وتغيير الجو ...

اذا تدور المكسب والخساره ادخل على موقع تداول والله يرزقنا واياك ...

وعموما اهلابك وبمشاركتك .... ورح اوزن نفسك شف نقص من وزنك شي ؟ بتلقاه هو نفسه ماتغير

هلابك من جديد

إقتباس الرسالة الأصلية كتبت بواسطة ^ العنود ^ انا اخر مره كان قبل سنه كف من ابوي قعد علاماته اسبوع بخدي السبب اني كنت سهرانه على فلم وسط الاسبوع ايام المدرسه وجت 4 وللحين مارقدت وقواية عين يوم شافني قلت يبه ماني رايحه المدرسه الا وجايني كف طاااير الله يرجك تذكرته عوافي ابو فارس وطلال

العنود هلابك والله اني ضحكت على موقفك ضحك غير طبيعي ... واللى خلاني اكركر سالفة ان ابوك يدخل وانتي مانمتي .. وتقولين ... يبه ماني رايحه للمدرسه !!! واااااااااوك ياشكلك بعد الكف المباشر وش كانت النومه بعد هالتميلح اللى ماله سنع ... يقالك صريحه معه
سالفه تضحك ربي يسعدك .. وشكلك بعد هالكف صرتي تروحين للمدرسه الخميس والجمعه
شاكر لك يالعنود وماقصرتي .. الله يرج عدوينك قولي امين

إقتباس الرسالة الأصلية كتبت بواسطة عاشق الأخطبوط خخخخخخخخخخخخ ياحبك لتّـنبيش بالماضي أنا أبقولك وبكل صراحه ومصداقيه الحقيقه هذي السالفه طويله اسردها لك باختصار طبعا الحادثه صارت قبل اربع سنين اي بمعنى يومي بثالث او ثاني متوسط مااذكر والله المهم كنت خارج من المدرسه وجاي لم البيت عاد وانا جاي تحرش بي ولد الجيران طبعا توه بزر مدري يمكن وقتها ماكان الا صف ثاني ابتدائي عاد انا خليته عقبها الا اشوفه يقول كلام غير لائق وكبير بالمره بالمره وعقبها مدري وش حذفني اظنه خشبه المهم ماتشوف الا اللي يطرد وراه خخخخخخخخخخخخ ويمسكه مع راسه ودووف على الرصيف هههههههههه وقعد يبكي وحالته حاله الزبده رحت البيت ونمت وصحيت العصر الا ابو ولد الجيران وعياله جايين كلهم خخخخخخخخخخ الا ابوي يناديني تعال عاد جيت وفهمت ابوي السالفه وقاله ان ولدك مخطي عاد جاك الجار اللطيف وقال حتى لو اخطى تجي وتقولي قال انا لازم اخذ حق ولدي قاله ابوي يابن الحلال منا ومنا قال لا ياتاخذ حق ولدي ولا انا بكره الصبح اوريك وقعد يسب ويلعن المهم جا الوالد الله لايهينه ويصفقني كف يمين وكف يسار حول اربع او خمس مرات خخخخخخخخخخخخخ تهوور بالمره عاد عقبها راح الجار بس انا قلت والله لا اوريه ان شفته بكره لا انجفه <<<<<<<< شايل معه سكين المجرم وهو رايحن للمدرسه ههههههههههههه المهم جاني الوالد وقالي تراي ماضربتك لاني حاقد عليك ولا مااحبك والله خوفي عليك من هالحشاش ذا يسوي بك شي لانه ماهوب صاحي ومجنون وبس هذا اخر مره اذكرها ضربني بها بس ماهوب قاصد خوفن علي من جارنا الحشاش يفقّع وجهي خخخخخخخخخخخخخ يعطيك العافيه حبيبي ابو طلال

سلملي على ابوك .. والله انه ذيب .. وفعلا الأب لما يطق يطق خوف على ولده ومن حبه له .. مايعني الطق الكره والحقد

شاكر لك اخوي على هالموقف الرائع .. روعه تصرف شايبك الكريم ... الله يخليكم لبعض




للحديـــــــــــــث بقيــــــــــــــــــــــــه :