«¤¶` رئة المجلس " الكناري الأزرق" ضيفاً على "حياة @ نت" `¶¤»
تصميم المبدع / عاشق بويعقوب .
فكرة و إعداد / الماسه الزرقاء.
نعود إليكم أحبتي مع (حياة @ نت )
وكما تعلمون فهي عبارة عن سلسلة ستستمر معنا بإذن الله لفترة ما في مجلسنا العام إعتماداً على تفاعلكم الكريم,
يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .
ضيفنا السابع من الأعضاء المتميزين في المجلس العام عُرف بحبه للأسلوب الفكاهي , مبدع ومميز بمواضيعه و متواجد دائماً ,
شعلة من النشاط ويستمتع بالرد على المواضيع كما ذكر ذلك من خلال سرده لحياته النتية
حتى أن القاضي سماه " رئة المجلس" نظراً لعدد مشاركاته التي جاوزت المليون
تجاوز اسوار المجلس وأبدع في المنتديات المجاورة وقد صدق حينما وضع مسمى " رحّال" في مكان اقامته. .
ضيفنا لسابع عدد من هذه السلسلة هو الرحالة
«¤¶الكناري الأزرق `¶¤»
نترككم مع كاتبنا وضيفنا الغالي .. ليُبحر بكم في عالمه الافتراضي ..
ايييييييه الله يذكر هالايام بالخييير , تصدقون اني اذكر اول ليله بالانترنت , كنت اجيب مجلة ماجد
اعداد قديمه حقت عام 2000 قبل الميلاد و اشوف المواقع الزينه فيها و اذا كتبت الرابط ما اعرف وش اسوي .. قعدت
احوس ساعه لين عرفت اضغط انتقال
دخلت هالعالم من تاريخ 2005 شهر 9 ,, <<---- وش رايك تقول لنا اي يوم ؟
و بديت بمنتدى الزعيم بمربع الردود .. و تميت عليه سنة لين جيتوا انتم الله يبلشكم و رحت لمربع الرسايل الخاصه ,
لو اني قاعد اشارك الحين كان يمكن زدت مية مشاركه <<---
((( بداية معرفتي بشبكة الزعيم )))
[] السوداني وسيارة الرياضية []
يا طويلين العمر في ليله خميس هادئة و الجو مغيم و السماء صافيه <<---- يرحم امك انطم يا شيخ ,,
كان الهلال يلعب مع فريق ما اذكــره , و طبعا زي عادتي اذا لعب الهلال مباراة تلقاني مرابط بالبقاله احتري جريده الرياضيه !
و انا معتكف بالبقاله جت سياره من بعيد قلت هذي سياره الرياضيه هلا و الله .. قالي السوداني و هو يتثاوب يا زووول هذا سياره الشرق الاوسط ..
قلت له يرحم امك انطم انا اعرف سياره الرياضيه لونه احمر و اللوحة [ ج هـ خ 495 ] و الاستماره يبي له تجديد ,,
جاء السوداني و وقف و جيته مسرع قال تصدق يا زووول احبك في الله ! قلت له ليش ..
قال عشان تشيل عني الجرايد و تدخلها البقاله داير انا تعبان شديد .. قلت ايييه من يوم ما عرفتك و انت تعبان
اتوقع لو يقومونك من النوم قلت دقيقه ابستريح !
الا يا عثمان يقولون انك اكلت منشطات و قدرت تمشي خطوتين ورى بعض !
ضحك الزول و قال الاخبار بنتتشر .... <<----- انتهت لياقه الزووول
رحت للزول حق البقاله قلت له سجل الجريده عالحساب .. فتح السوداني الدفتر حق الحساب يبي يدور ببسي فصفص حفايظ بامبرز ..
كل اللي موجود [ جريده الرياضيه 2 ريال , جريده الرياضيه 2 ريال , جريده الرياضيه 2 ريال ]
احس اني مصختها و هي ما تستاهل ,,
[] أبي انترنت وراه ما علمون ![]
المهم رحت للبيت و قعدت القم فصفص و مضبط ابريق الشاهي و كالعاده قطعت الجريده تقطيع حتى التاريخ ما سلم مني ,,
و انا قاعدن اقرآ خبر تعاقد ضمك مع اللاعب الشهير منيف بن بطيحان الا و اناظر تحت و القى مكتوب مواقع انديه !
لقيت موقع النصر و الاتحاد و الشباب [ تصدقون يوم دققت بمنتدى الاتحاد و منتدى الاتحاد الافريقي لكره القدم لقيتهم نفس الرابط ] ..
ما دريت الا عيني تجي على موقع الهلال الرسمي - الزعيم - www-vb.alhilal.com
قلت الهلال له موقع , شف عيال اللذينا وراه ما علمون !
نطيت لاخوي الفاهم بالكمبيوتر [ تصدقون كنت اتتطنز عليه و انا اشوفه يقعد ساعتين عالكمبيوتر و الحين انا اقعد ساعتين في 60 تربيع ] ..
قلت له ابي انترنت
قال يا قروي اسمه كمبيوتر .. قلت له طيب من وين اجيب هالكمبيوتر ؟ يبيعونه بالبطحاء ؟
صك اخوي باب الغرفه بوجهي و رحت و انا مقفله معي
[] جيت ابكتب الاسم و هنا كانت الفاجعه []
دارت الايام و نسيت موضوع الانترنت و ما دريت الا و كمبيوتر يدخل البيت
قلت يا ولد فرصتك .. و صار الكمبيوتر لي .. صحيح اني اول اسبوعين فزت بوزنك ذهب ستين مره بس معليش
ناديت اخوي و قلت له سجل لي بالزعيم .. كان مستعجل وراه مشوار قال ابروح قلت له و الله ما تروح الا و انت مسجل لي
قال و هي مقفله معه طيب .. جاء سجل لي عالسريع و كتب لي الاسم و الباسورد بورقه و راح ..
جيت فرحان ابسجل دخـوول .. كتبت الباسورد اول شي من الهداره [ الباسورد كان 123456 شفتوا البراءه وش لون ]
المهم جيت ابكتب الاسم و هنا كانت الفاجعه
ناظرت .. مسحت عيوني .. لبست نظاراه ابوي ! لا يا ولد انا بعلم منب بحلم ,,
تدرون وش لقيت الاسم ؟!
لقيته [ ابو **** ] ..
تدرون وش ال **** ؟ معيارتي
نعم فعلها الماصل الوصخ الاحمق المتبجح و كتب معيارتي
الحين مقدر اشارك واااااخزياااااهـ
قعدت اتصفح و مليت و نمت .. بعدها جاء بالليل و تهاوشت معه لين قرر يسوي لي ايميل و يعلمن وش لون اسجل ..
[] خرابيط العالمي وهمزة الكناري []
طبعا اول شي قلت خل اجرب هالتسجيل .. و على طول لمنتدى العالمي و اسجل بإسم [ خرابيط ] !
نعم لا تعجبو فالاسم هو هكذا .. [ خرابيط ] !
من العجله عجزت اكتب [ الفقر ؛ المسيار ؛ السلام عليكم ]
ضاقت علي الاسامي ,,
المهم نجح التسجيل و انا فرحان حسيت اني نيوتن يوم اخترع قانون الجاذبيه
و رحت لمنتدى الزعيم .. فكرت وش اسمي نفسي ؟!
و مدري وش لون طرآ على بالي اسم الكناري الازرق ..
قلت يا ولد مهوب شين .. و سجلت بهالاسم و الحمد لله ,,
و حياتي بشبكه الزعيم كانت اكثر من رائعه , قضيت فيها اجمل الاوقات بدون مجامله و الله ,
اعضاء مثل الاخوان و تحطهم عالجرح يبرى .. يا حبي لكم
و نوع الكتابات اللي افضلها طبعا الفكاهية :p ومن المواقع التي أدخلها شبكه الهلال,
((( إشراف بالنسخ واللصق)))
كنت مشرف بمنتدى الشلهوب , قصه الاشراف هي بإختصار نسخ و لصق من هالمواضيع اللي بالمنتديات
[ طبعا هالكلام زمان و لا الحين اكـره ما علي النقل ]
و الصعوبات اللي تواجهني نادر ما تشوف مواضيع من كتابه الاعضاء كلها منقوله <<----- أتأمرون الناس بالبر و تنسون أنفسكم أفلا تعقلون
عموما ,,
انا المنتدى تركته و تنازلت عن الاشراف لاني حسيت اني منب كفو ! <<---- احس لو ابوي قرآ هالكلام قال هذا و هو منتدى ما تحملت المسؤوليه وش لون لا صرت ابو عيال ؟
&&& معرفتي بالأعضاء &&&
يوميا اتعرف على اعضاء , لكن ابقول الاعضاء اللي تعرفت عليهم من بدايه معرفتي بالنت و الى الان اكلمهم
[ واحد منهم تو مزعجني و انا اكتب حياتي الانترنتيه و ترأ اول حرف بإسمه ما يبدى بخفايا الهلال ] ..
الاعضاء هذولا هم من الاقدم و الاغلى على قلبي ,,
المركب الازرق
هلالي القرعاء
خفايا الهلال
M E T O o
و فيه اعضاء تعرفت عليه من تالي و ما ينقصون عن سابقيهم شي
مثل الخروف سولتان " المشاغب " ؛ هامور البورصة ؛ جرح يشكي ؛ ماجد مقبل ؛ هتلر الرياض ؛
اعتذر ان كنت نسيت احد ذاكرتي مثل خشتي
و لا يهونون الاعضاء الباقين , كل واحد يقول للثاني طس انا ابقعد بمكانك :D
((((( ذكريات @ نت )))))
[]منتدى اعضاء شبكه الزعيم ,[]
كانت ايام حلوهـ ,, كنت ازيد باليوم مية مشاركه يا رب يرجعونه عشان ازيد مشاركات
[ على طاري المشاركات , ترى بعض الشباب اخذين فكره عني انا اموووت بشي اسمه مشاركات و ما همني غير
زيادتها , ترى و الله عادي و ما همني لكن انا اتونس بالردود ] ,,
[] ميتووو علمني الإستئذان []
انا و خفايا الهلال و هلالي القرعاء و ميتووو دايم نسوي محادثه جماعيه ,
و انا كنت كل ما مليت طلعت بدون استئذان , و يرجعوني و يعصبون يقولون ثاني مـره استاذن !
و مره من المرات كنا مجتمعين [ انا , هلالي القرعاء , ميتووو ] ,,
عاد جاني هلالي القرعاء بالخاص و قالي شف انت اطلع و انا ابي اهاوشك نبي نشوف وش يسوي ميتو ,,
قلت اوكي , طلعت و يا ليتي ما طلعت !!
دخلني هلالي القرعاء و قال ليييش تطلع يالمغرور يالمدري ايش يا .. يا .. [ طبعا يمزح لانه متفق معي ] ,,
رديت عليه قلت ياخي خلني براحتي ,,
بدآ يكتب ميتو ,,
قال خله يطلع طز به مدري ليش شايفن نفسه علينا اقسم بالله مصخها
انا قلت شكل الشباب حاقدين علي و انا مدري ,,
قلنا له السالفه , و من بعدها مستحيل اطلع بدون ما استاذن عشان ما يصجوني ,
قبل فتره طلعت بدون استئذان رجعت بخمس ثواني قلت اسف نسيت اقول ممكن اطلع ؟
**** إضافـــــة من حياة الـــواقـــع ***
]] سنشيرو والبيت المسكون [[
@ اتذكر بيتنا القديم .. يوم كنت ارابط بالمجلس على الفيديو الصغير و اقعد اشوف النمر المقنع و عدنان و لينا و سانشيرو
@ اتذكر يوم ما كنت داشر , كان فيه بيت مهجور بالحاره و بجمب الجبل , الساعه 10 و نصف ليلا .. عاد مع الجبل و
الهدوء تحس الساعه 2 بالليل !
قلنا يا شباب نبي ندخل هالبيت المهجور , و اللي يصير يصير ,
طبعا نعرف ان البيت فيه جن و اتذكر ان فيه هنود سكنوا بالبيت و قاموا الساعه 2 بالليل يصيحون و راحوا لشيخ الحاره
و يقولون الجن قاموا علينا و قعدوا يضربونا بالمواعين حقتنا و .. و .. و .. و وجه خايف !
و مره دخلوا خوياي و ما كنت معهم يحلفون لي بالله انهم دخلوا غرفه و لقو جني التفت عليهم بعدين هج !
طبعا مدري هم صادقين و لا لا .. بس احسهم كلاكين ! اصلا لو شافوا جني كان ما نحروني و قالوا لي المفروض ينحرون
بيوتهم يغيرون سراويلهم لانهم من الخوف عملوها
نرجع لمحور حديثنا ,,
قلنا يا ولد خل ندخل , و كان عددنا 8 تقريبا ,,
كل واحد اخذ خشبه اطول من لسان هلاليه و كلي فخر , و اعرض من جبهة الظهراني !
وحطينا عليها ديزل و ...... اشتعلت النار !
دخلنا البيت و طلعنا من الدرج و قلن يقول [ هو , هو , هو , هو , كننا الهنود الحمر ] ,,
يوم قربنا ناصل السطح اللي قدام خاف و رجع عاد الشباب كلهم هجو معه من الخوف ,,
الا انا جيت ابهج لكن طحت ,,
يا ويلي ,, حسيت انا ابعملها على نفسي من جد من الخوف
بيني و بين اخوياي متر واحد و احسها كيلو كامل من الخوف و احسهم مركبين مكاين من سرعتهم ,,
قمت و حطيت رجلي وراهم عاد تعرفون شعور واحد يكون اخر واحد ,,
يحس جني يلحقه !
ما صدقت على الله طلعنا من البيت .. و بعدها حلفت ما عاد ادخله ,,
][ اللياقة ماش ][
من الذكريات الحلوه , ابوي كان عنده معرض سياراه مشترك فيه مع عمي , كان بطرف المعرض ملعب صغير ,
كنا نجي انا و عيال عمي و نلعب كوره هناك , و الله يا شباب اني قبل كم يوم لعبت كوره و بعد خمس دقايق قعدت اشاهق لين بغيت اقول الله لا اله الا الله ,
تذكرت يوم كنا نلعب بالمعرض , تذكرت يوم كنت اقول لولد عمي و الله لياقتنا ماش , يبي لنا نتدرب ! كنت اقوله هالكلام و انا لي 3 ساعات العب
[] ابو عبدالله والسطل بألف[]
انا كنيتي ابو عبد الله , و واحد من اخواني كنيته ابو عبد الله بعد ,,
عاد كان اخوي المدعو ابو عبد الله عازمنا ,,
و بعد العشاء قال ابوي : اكرمك الله يا ابو عبد الله ,,
انا قلت لا شعوريا صحه و عافيه يبه
قعدوا يضحكون قالوا انت وش دخلك ؟ انا وجهي صار طماط تصدقون جاء واحد يحرج علي قال سطل الطماط بخمسه سطل الطماط بخمسه ,,
[ حرام عليه .. من كثر الحياء صار وجهي طماطن طبيعيٍ مية بالمية يستاهل السطل الواحد الف ريال ] ..
اتمنى اكون وفقت بالسرد ,,
و ........ خلاص لياقتي انتهت ! <<------ الزوووول !
ميسو
ان كان للابداع عنوان , فهو حتما انت [ اقول لا يكون احد مساعدك و انا و خشتي منب داري عنه ] ,,
؟
<<--- 
, شف عيال اللذينا وراه ما علمون !
الوضع الشجري
