بسم الله الرحمن الرحيم
تحية طيبه لاعضاء منتدى الزعيم الكرام
نصيحه من اخوكم الصغير ..
. انسوا البطولة اللى ضاعت .
. ولاتضيقون صدوركم .
. مقبلين بااذن الله على خير
حبيت اغير هالجو الحزين بقصه واقعيه حصلت لواحد من الشباب اسمه ابو فيصل ...
نبذه عن ابو فيصل
ابو فيصل : مجموعه من الخبال .. ماايدري وش يبي بالظبط من الدنيا
العمر : فوق الثلاثين بواجد ..
. شكله فوق الميه والثلاثين بواجد .
.. التفكير مرات : فوق الثلاث سنوات بشوي
كل يوم له هوايه .. مره طلعات للبر .
. وعلى ذكر البر والطلعات مره واعدنا وكنا في البر وانه يلحقنا بعد مايطلع من دوامه .. وقبل مايجي والا حنا شابين الضو ونتقهوا .. وابريق الشاهي على الضو .
. وش هاكا الشاهي الخاثر والسوالف المسكته .
. ويجي ابو فيصل .
. ويسحب جلنط ( غير مسؤول ) ويحوس الجلسه ويكب عشانا ( يعني جلستنا )
ويغبر فينا ويدخل بالشاهي تراب .. وتطفى النار .. الله يكفينا شر النار ..
. يوم نزل من السياره والا الرجال طربان .
. ويرقص على انغام .. ( نانسي : مافيني اعيش الا معك )
والا والله معصبين ودنا نفرشه .
. قلنا ياولد خله مبسوط يمكن ..
. رقص له كم رقصه وشكشك كم شكشكه .. ولو ان الشكشكه مهيب لايقه عليه ابد ..( عطفا على الخشه ) .
. خلص من الرقص وجاني
قلت وش يبي ذا ؟؟؟
ومعه زقاره
!! قالي : يابو طلال .. منيب اشوفك تصلي ياخوي ؟؟ الا الصلاة وانا اخوك!!!
شفت وجهه والا الرجال قلب وجهه جدي .
.. ماكانه هو اللى يرقص من شوي ومعه زقاره .
. ضحكت وماتو الربع من الضحك .. قلت ان شالله .. ابشر ... بس طف زقارتك والا طس وابعدها عن وجهي .. قالي سم سم ... ( خبل والله )
المهم .. مالكم بالطويله ( وش عقبه )
انتهت طفت البران .. وطاح بالنت .
. وخلاها ..... يوم طاح بالغزل .. وماادراك مالغزل .. عاد متزوج وابو عيال وشين ( ياربي لك الحمد ) والا يبي يصير راعي بنات .. ( كاوبوي ) هههههه
تعرف على واحد مغزلجي من الرياض واتفق هو واياه على انه يجيب له بنت ..( ناوين يفلونها الليله )
وكان الموعد في بيت ابو فيصل بعد مايودي عياله لاهلهم ... جاء اليوم وراح يودي عياله لاهلهم ورجع للبيت والا الرجال ومعه البنيه عند بيته ... دخلهم .. وراح يغير ملابسه .. يبي يكشخ الولد .
.. ( طق الترنق الاخضر الضيق مره .. ابو خط .. وعليه علامه وزاره المعارف ) لبسه وتتطيب بعلبه ( سفن اب انما ايه ) على قوله عادل امام
سبحان الله ويدخل بالمجلس ويقعد عند الرجال والبنت ..ناوين يسهرون ويمرحون ويسرحون .
.. شوي وبعدها بساعه والا زوجته رجعت للبيت .. ناسيه شي تاخذه معها ظروري .
. يوم دخلت للبيت والا زوجها طاق البدله ..
ويرقص بالمجلس وعنده رجال وحرمه لابسه ( هشك بشك ) ...
طبعا هو ماعلمني وش صار بالظبط . بس اعرف زوجته شديده والموقف صعب .. فااكيد انه شطب من السالفه ( الكف ) اللى جاه ههههههههه
طبعا طلعت وراحت بيت اهلها .. وحلفت ماترجع والا تبي ورقه الطلاق
.. جاني ذيك الليله وسولف علي .
. وانا بداخلي والله اضحك وبنفس الوقت راحمه ..
.. خلوني اعلمكم ليه راحمه .. لانه انكشف قدام عيال وبيته راح ينهدم والشي الثاني انه اول مره يخون زوجته .
. حتى مابعد خانها المسكين ......
الشي اللى اضحك عليه فيه ... هو اللى خلاني اكتب لكم هالقصه ..
سلمكم الله بعد ماكشفته المره . وقالي هو السالفه .. قلت طيب وش قلت لها ؟؟ قال : قلت لها ان هذا خويي ومعه مرته وهي علمانيه !!!!!!!!!!!
والعلمانيات عادي عندهم كذا وهو عادي ماتتغطى مرته
.. هو قالها والا ماقالها وانا اطيح واتسدح من الضحك .
. بصراحه فكره ّ! شلون جابها ابو فيصل .
. اصلا ماعنده غير هالعذر ..
. قلت له وصدقت المره .؟؟
.. يقول ان شالله تصدق !!! بصراحه ياجماعه ماتحسون ان ابو فيصل رغم دلاخته السابقه الا انه بكلمة ( علمانيه ) اثبت انه سريع البديهه وفطن .. الملعون ..
.. والا وش جاب له هالكلمه وهالتعبير وهو في هالحاله !!!
ابشركم الرجال الحين في بيته ورجعوا له عياله بعد سالفه العلمانيه .
. وتدخل الاقرباء ورجاحه وتسامح زوجته
لكن ماانصح اي متزوج بهالعذر .. ماكل وحده بيمشي عليها كلمه ( علمانيه ) غير مثلا قل لبراليه ... اشتراكييه .. يعني بدل ....
.... اتمنى اني ماطولت عليكم واني داري بطوالت هرجي ..بس ان شالله تكون السالفه اعجبتكم وافادة الاعضاء ;)
على الاقل تطلعهم من حاله الحزن بعد البطوله .. وان شالله البطولات قادمه ... نسيت اعلمكم ان ابو فيصل هلالي
واللى يبي يوقع له ابو فيصل على اوتوغراف يعلمني او يرسلي
تحياتي للجميع
الوضع الشجري
