مسيكم بالخير اخواني كيف الحال طيبين ندخل في الموضوع
السالفة ومافيها اخوي قبل 4سنوات تزوج حلو المهم الرجال طلق حرمته بعدها بسنتين لاسباب كثيرة بعد ماطلق الحرمة بحوالي 7شهور وفقه الله وتزوج على حرمة ثانية وهنا المصيبة الرجال تجهز للزواج ودفع مهر حوالي 60ألف ريال هذا غير المصاريف الثانية يعني الزواج كلف حوالي90ألف ريال تمام. السالفة ومافيها بعد ماخلصنا من العرس وكل شي اخذ اخوي حرمته المهم في نفس اليوم صار اللي ماهوب في الحسبان الحرمة بدات تصارخ وتسوي مشاكل اخوي حاول يهديها ماش الحرمة فيها بلى دق على اخوها وقال له السالفة تدرون وش قال اخوها؟ قال صح نسينا لانقولك فيها مرض نفسي قالها بكل تفاهة فيها مرض نفسي اخوي قال حصل خير ان شاء الله وقدرالله وماشاء فعل المكتوب مكتوب اخوي حاول يتعايش معها جلس معها حوالي اسبوعين ويحاول يتعايش معها كن مافيها شي بس صبر صبر ماش الوضع لايطاق قال مالنا الاابغض الحلال والشكوى على الله وداها لاهلها وارسل ورقة الطلاق . وطارت الدراهم على اللاش كنك يابو زيد ماغزيت. المهم بعدها بفتره اخوي يبي العرس يبي يتزوج وكل مارحنا نخطب يقولون اصبروا واخر شي يقولون الله ماكتب راح يبي يخطب حوالي 8بنات وكل ماراح يقولون اصبر وبنرد لكم ونفس الشي الله ماكتب . تعرفون لازم اهل الحرمة قبل مايخطب يسألون عن اخوي هنا صارت المصيبة اثر اهل البنت المريضة اللي فيها مرض نفسي يروحون لاهل البنات اللي نخطبها ويقولون الرجال فيه وفيه يقولون لاهل البنات اللي بنخطبهن تراه لعوب وبنتنا مافيها شي طبعا المتحدث اهل البنت المريضة بس تزوجها وماعجبته نصيحة لاتزوجونه. اخوي ماحب يقول لاهل البنات اللي يخطبهن ان حرمته الثانيه فيها مرض نفسي يعني ساتر ع البنت ولكن اهل البنت مصوخها وراح يتكلم مع اهل البنت المريضة والحمدلله تفهموا الموضوع بسبب انه قال بأشهر في بنتكم واقول انها مريضة. والى الان مازال البحث عن حرمه لاخوي والشكوى الى الله.
ننتقل لاخوي الثاني ماهوب هذا هذا واحد ثاني. السالفة ومافيها ان اخوي يبي يعرس قلنا خير ان شاء الله. وبدأت المصيبة الاخرى اخوي ولله الحمد والمنة بوظيفة ممتازة وكل سنة يروح انتداب خارج المملكة. المهم اذا جينا نخطب لاخوي يقولون اصبروا شوي ونرد عليكم. ونفس الحكاية الله ماكتب . بعد ماحاولنا نخطب حوالي 5 بنات اثر المصيبة يرفضونه بسبب انه راعي سفريات طبعا بدون مايقولون لنا بسبب انه راعي سفريات يقولون الله ماكتب. طبعا لو يقولون لنا عشان انه يسافر بنقول انه انتداب ماهوب فجور. والى الان لازال البحث عن زوجات لاخواني وان شاء الله يتزوجون.
ختاما: نلاحظ ان السعوديين يشتكون من العوانس واقول لهم انتم السبب ترفضون الرجال بدون ماتعرفون الاسباب وحسبي الله ونعم الوكيل.
طبعا زواج أخوك الأول مانقدر نقول فيه شيء لأنه أمر طبيعي زواج وانفصال شيء مألوف .
لكن الزواج الثــاني ..!!
فعلاً الشاب ممكن تقدر تجيب عنه برنت كامل .. وتقدر تستفسر عنه ويمكن يكون كتاب مفتوح ..للجميع .. لأصدقائه في عملة في بيتهم ..تعرف أخلاقه وطباعه لو تراقبه شهر واحد بس .مراقبة جديه مهب توقف مره عند مسجدهم وشفته يصلي قلت ايه ماشاء الله عليه يصلي لا مراقبة مداها طويل . لأن هذا زواج مو حفلة و تنتهي ..
البنت هي اللي فعلا ماتدري هي مناسبه او لا ..!!
لأن البنت ماتقدر تسأل عنها تنذكر لك فقط !!
والام والاخوات يروحون يشوفون الشكل اما الاطباع لا يعني من تسأل !! بتسأل امها اكييد امها راح تقول مافيه احسن من بنتي وهذا شيء اكيد ..!! يعني احيانا تسأل ام الولد ام البنت وتقول عسى بنتك تعرف تطبخ!! ترد تقولك عز الله مهب فاقدتها الا عند الغداء . . وهي والله ماعندها ماعند جدتي تدربي راسها ماتعرف البشاور من الهندي
فأخوك يوم ارتبط باللي فيها حالة نفسية الله يشفيها ان شاء الله ويعافينا من ما ابتلاها .. !!
ماكان يقدر يعرف هي فيها مرض ولا خالية ..!!
بس المفروض ان اخوك بعد فشلة في زواجة الاول انه تأنى كثيييير لان التجربة الاولى .. سواء بنجاحها او بفشلها مفيدة ..له او لغيرة ..
والحين يقول ابتزوج .. المفروض انه يصبر سنه سنتين ثلاث الين فعلا يعيد حساباته ويحسب كل خطوه يخطيها الزواج مستقبل .. مو سيارة تتغير كل كم سنة . .
الله يوفق اخوانك ويوفقك ان شاء الله ويوفق جميع شباب وشابات المسلمين ..
هامور البورصة ..
الله يصلح قلبك ان شاء الله .. هالحين المسيار مسمية زواج .. الزواج استقرار .. وهو مختل في زواج المسيار!!!!
هامور البورصه ^
^
وش مسياره انت الثاني .. ودي اقول قل خيرا او اصمت بس خايفه من ردة فعلك
ابو ندى
اخوك الاول
خييير اهل البنت ماقالوا له ان البنت فيها مرض نفسي الا عقب العرس ؟ وين الناس مايجوز اصلا
ووش يروحون يقولون للعالم انه فيه وفيه . لعبه عندهم اخوك ماش احس هـاللي ناسبتوهم ماعندك احد لابالدين ولا بالعقل . مع احترامي يعني ولا يمكن كله عشان بنتهم يخربون على اخوك !! او اخوك ماسأل عنهم زييين (فيس طايرتن بوهته)
واخوك الثاني
احس لو اني مكانه اذا قعدت مع ابو البنت ولا اي احد من اهله . بقوله كل شي ومن بين هـالاشياء ان دوامه فارض عليه انه يسافر وطبعا الدوام موب مسفره عشان يلعب بيروح يشتغل . ولو يبي يتأكدون هم بيقدرون