طلاب ثالث ثانوي الشاطرين؟؟! - نادي الهلال السعودي - شبكة الزعيم

عابر القارات بالريوس · #1 03/10/2006, 08:38 AM

أبقولكم قصتي أيام ثالث ثانوي وشلون اني شاطر وما أحب أخرب أحد
طبعا أنا وحيد ماما وبابا ، بابا شغال بأرامكو بالرياض جاله نقل للدمام
ماما قالت رجلي برجلك تخاف يعرس عليها طبعا تغار ، أنا اعترضت قلت
والله لو تحبون رجلكم مقلوبة ما أفارق الرياض، قالوا بكيفك البيت موجود
مب طاير والشغالة (عفوا رفضوا وبشدة يخلون الشغالة بالبيت)حتى الشغالة
يغارون عليها ياسبحان الله ،
ومن هنا بدأ انضباطي الشديد بالمدرسة.
رحت اليوم الأول للمدرسة بعد ماسافروا الماما والبابا ، وأنا بطير من الفرح
لا رقيب ولا حسيب قلت للعيال بالمدرسة ترى بيتنا بيتكم وبيت الشعر ادفالكم
أي واحد ابوه يكرشه ولا يبي يتغلى على أمه كم يوم يجي عندي ترى البيت
فاضي (أبد ما أحب أخرب أحد)
ويوم ورا يوم صاروا العيال يوميا مسنترين عندي سوني وبعدين صارت شيش
وبعض الأحيان أنا أروح المدرسة وهم قاعدين بالبيت يقولون مالنا نفس نروح
وزاد الغياب ومما زاد الأمر سؤا أننا طلاب ثالث ثانوي شرعي وعدد طلاب الفصل
معروف كالعادة من 25-30 مايزيد وعدد العيال 13 وكلنا بفصل واحد وعاد هم
مابهم ملح إذا غابوا ما يغيبون واحد أو اثنين لا ، يغيبون كلهم ويصير الفصل فاضي
وكذا الأيام تمشي وتمشي وجت أيام الإختبارات وقلت لهم ما أبي شوف رقعة وجه
أي واحد منكم أيام الإختبارات ، اتفقنا على كذا وكان يوم السبت علينا اختبار مشاركة
لمادة الأدب الموقرة التي للأسف لم نستفد منها نهائيا ويوم قمت يوم السبت الصبح
شغلت سيارتي (الشروكي الموقر) لقيت الجو ممطر والجو فلت الفلة والأجواء هاذي ماتجي
إلا أيام الإختبارات والمدارس كالعادة ، قعدت أدور عند باب المدرسة والعيال كل واحد يدور
بسيارته عند الباب لين تجي سبع وندخل لكن أنا عجزت أهضم أني أداوم اليوم والجو كذا
بديت أشاور شباب وش رايكم الثمامة قالوا والإختبار قلت إذا شاف المدرس نص الفصل غايب
بأجل الإختبار الشباب بعد ماقصروا قالوا قدام وطلعنا وكشتنا لمين قرب الظهر
وكل واحد رجع بيتهم وعلى الحمام على طول يتروش من ربحة الحطب قبل ما يكفشه
أبوه إلا أنا مبسوووووووووووط وما عندك أحد .
ومرت ألأيام تلو الأيام والأوضاع تزداد تدهورا وتهورا إلى أن تسربت بعض الأمور إلى
بعض أولياء الأمور وجاء أبو كم و احد مسك ولده مع اذنه وقاله تعلمني وين تروح
ولا أنا أعرف وشلون أجيب خبرك وبعدين أنا أبد ما انكشفت بس درى ابوي وأمي وزمرة بسيطة
بين المدرسين الي ما يحشون بالطلاب أبد وقت الفسحة وبعدين جاء البابا ومصعني مع اذني
وعلى الدمام
ودمعتي في عيني لكن الحمدلله خصلت ثالث على خير
ونكست للرياض ورجعت الأيام الحلوة أكثر حلاوة من قبل

بالله وش رايكم بطلاب ثالث ثانوي والمشكلة مب هنا المشكلة اذا جلسنا ببيت الشعر
أو بالبر أو بأي مكان تلقى كل واحد يقول أنا ودي أصير مدرس والثاني يقول أنا
بصير دكتور وكل واحد له اسبوع اقل شي ماراح للمدرسة

على العموم حبيت اعلمكم بأخوياء العمر الي عشت ولا زلت اعيش افضل أيام حياتي معهم
وفي صور كان ودي أحطها بس في ثلاثة رفضوا وبشدة أني أنزلها بأي مكان
لكن أوعدكم إذا لقيت صور من دون أشكالهم
وريتكم صور من طلاب ثالث ثانوي المجتهدين