يـخـرب بـيـتـك يا إيـاد مـدنـي شـوي شـوي علـيـنـا !! تلفـزيـونـكـم إنهـبـل يا رجـالـه - صفحة رقم 2 - نادي الهلال السعودي - شبكة الزعيم

G o L d E s T · #1 01/09/2006, 04:39 PM

والله انا ما قهرني الا الرياضية

والا الباقيات ما من حرص

اجل ما ينقلون مبارايات المنتخب

20 ياسر الجابر 9 · #2 02/09/2006, 06:33 AM

إقتباس

الرسالة الأصلية كتبت بواسطة مجنون @ الزعيم


	والله انا ما قهرني الا الرياضية والا الباقيات ما من حرص اجل ما ينقلون مبارايات المنتخب

هههههههههههههههههههههههههههههههههههه أحسك منقهر من جد

تيماوي · #3 02/09/2006, 08:41 AM

@ موضوع في غاية الروعه والأهميه أتمنى ان يجد من يستمع له من ولاة الأمر ..

@ ابو ساره بلا شك تواجدك بيننا أسعدنا كثيراً ...

التميميه · #4 03/09/2006, 03:24 AM

يخرب بيتك يا ابو ساره,,,

تبي توهقنا أنت,,,

بس تدري شلون,,,

دامها خربانه خربانه,, والله انك صادق,,,

أنا أقول لو يروح لألمانيا يخرف لنا من نخلتنا اللي هناك أصرف,,,

يسلمووووووو خيوووو ع هيك موزووووووع ,,,

الهلالي- ابوسارة · #5 07/09/2006, 09:38 AM

بسم الله الرحمن الرحيم ..

يا جماعة الخير والله فيني طبعن شين .. يمكن تسألوني تقولون وش هو ؟ راح أقول لكم مالكم دخل

.. لكن من جد آسف على التأخير لأني في قاموسي أعتبر كتابة الموضوع والله أسهل من الرد !

لما أكتب الموضوع أكون قاعد أسولف على نفسي , لكن لما أرد أكون قاعد أرد على أشخاص كبار ومميزين ولهم ثقلهم وهذي والله البلشة .. عموماً شاكر لكم ترحيبكم ويا مال السيل يا المجلس العام << يبيكم تغرقون عشان يفتك من الردود

في البداية أحب أقول لكم أن إياد مدني معطينا بالخامس ولا درى عني ولا عن موضوعي ولا عن ردودكم ! أجل ابن الذين آمنوا جايب أمس نبيلة عبيد وفاروق الفيشاوي ومحمودعبدالعزيز في فيلم واحد ! لا والله كملت ! هالثلاثي المهوي لو جاء الواحد منهم في فيلم سوى بلاوي لحاله , ياعبال يوم أجتمعوا ! (( خذوا بالكم من كلمة ياعبال ترى سارقها من جدتي لعيونكم

))

عموما قبل أرد أحب اقول للي حط ضحكة ومشى .. من الحين هذي ضحكة رد على ضحكتك :ههههههههههههههه وترانا خالصين ..

اللي حط وجه تعبيري من الحين أقول له يروح صفحة الوجيه التعبيرية وياخذ له خسمة وجيه على حسابي وترانا خالصين ..

اللي قال يعطيك العافية ومشى أحب أقول له من الحين ياخذ قطته : الله يعطيك العافية بعد انت .. وترانا خالصين ..

والحين عقب ماجريتكم على وجيهكم تعالوا أرد عليكم واحد واحد بس تكفون بالدور وبلاش مساقط ياللي واقف هناك .. ايه انت يا دبل كيك

<<< ياحبي لهالآدمي قسم بالله .

------------------------------

ردود الصفحة الأولى :-

الهنوف :-

الله حيها وابقها وأصلحها .. وش هالقهاوي والقدوع والسنع كله .. بيض الله وجهك وانا أخوك .. بس خلي عنك : يا والله اني يوم شفت هالبنية وانا اللي أسحب على بقية ردك وقعدت أتمقل !!

إقتباس

الله يهديك يا هنوف هالحين وش انا قاعد أقول من الصبح ؟ طاب في إياد مدني وتلفزيونه تجين ترزين هالماخوذه في الرد ههههههههههههههههههههه الدعوى عناد ياهنوف ؟

بعدين وش هالقفله :-

إقتباس


	الهنوووف كانت هنا ورحلت

وش اللي رحلت ! لا ياشيخه فال الله ولا فالك

مشكورة وأنا أخوك ومنورة وتواجدك كأول رد هذا فال حسن للموضوع عشان كذا تثبت ..

ملاحق دجاج :-

أم الجحده اللي كذا يا شيخ

محجوز وآخرتها ركبه ههههههههههههه عموماً منور ..

سندريلا الهلال :-

هلا والله سندريلا منورة الموضوع ياوخيتي.

إقتباس


	مثلاً في القناة الرياضية مقدم البرنامج !!هو نفسه مذيع الأخبار !!

تقولينه صادقه ..! ياختي الله يستر بكرة لا أفتح برنامج كل الرياضه وألقى حسن كراني هو اللي يقدم هههههه .. يا مال العافيه ياسندريلا ومنورة ..

نمر15 :-

هلا والله ومرحبا .. يازينك والله ويازين اسمك والرقم اللي معه ( قلب حب كبر قريح ))

إقتباس


	قد ابهرتني باسلوبك وبكتاباتك وانا من المتابعين لك واتذكر موضوعك الاخير في هذا المجلس واتذكر المقطع(حلوه مقطع مسوي صوت) الي يقول فيه ابوك شام ريحه بلوت

ياخي أخجلت كل التواضع اللي في جعبتي عقب هالكلام .. يا لبى قلبك لو تدري .. مشكووور يا نمر ياعساك تسلم دوم .

تغريد :

هلا والله أختي , على طاري المسلسلات أنا مايفقع مرارتي الا شي واحد :

أذكر أني لما كنت أتابع مسلسلات القناة الأولى من زمان .. نقعد نحتري الدعايات اللي عقب الأخبار تخلص عشان يبدأ المسلسل.. لا وتلقينا قاعدين نتطاق كل واحد يبي يحجز مكان حلو عند التلفزيون .. بالنهاية نتفاجأ بمحمد خيري او مزيد السبيعي يطلعون علينا طاقين الترسيمة ثم يقولون :

والآن ننتقل بكم الى تسجيل لحفل تخريج الدفعه الثالثه من القوات المسلحه على شرف صاحب السـ ( طوط طوط )) <<< هذا اللي بيجيب فيكم العيد بعد شوي

.. عاد وقتها شوفي التحطيم على أصوله .. هبلوا بنا حقين القناة الاولى قسم بالله

اييه يا تغريد خليها على ربك بس .. ومشكورة على المرور .

رعبوبة الزعيم :

هلا وخيتي رعبوبة .. منورة وانا أخوك .

إقتباس


	حتى المسلسلات الكويتيه كانوا يقطعونها تقطيع من 30 حلقه يخلونها 15 حلقه

هههههههههههههههههه عز الله صدقتي .. لا والمشكلة يجحدون الحلقة الأخيرة ولا يعرضونها

(( جابوا لنا جنون البقر حسبي الله عليهم ..! ))

هالحين مع إياد الوضع اختلف .. الولد يحن لأصوله وقام يعرض لنا أعمال مصريه عساهم يشوتونه في أقرب فرصة .. تسلمين على المرور .

iq1399 :

ياخي أروح وطي معك انت وهالاسم ههههههههههههههه وين ياعمي موديل جوال

إقتباس


	المهم يابو سارة وراك مطول الغيبه .. ولا اعجبك الوضع هناك اجل اطخم دقرت الظروف بوجهه كلش يهون عند الكتاب اللي خبري خبرك

وانا أخوك شبكة الزعيم بيتي الأول وراحتي فيها لكن في الاقلاع حرية طرح أكبر لأنه مخصص لهالنوعية من القصص العيارية اللي ذكرتها .. يعني لو أعرض وحده من هالقصتين بأي شبكة هلالية ماعني وعن ايقاف سنه كاملة وغرامة 100 ألف ريال <<< والله لو انك محمد نور

منور يا خلفهم ومشكور على متابعتي ولا توقف

20 ياسر الجابر 9 :-

إقتباس


	عالعموم أبو ساره لا تقطعنا مره سيّر علينا في الملجس لو تجي وتصك اللطمه وتقعد بالزاويه

ويييين أدق اللطمة وأتكي بآخر الفصل ههههههههههههههه والله لو اني من عرابجة الثانوي

منور ياغالي ومشكور على كلامك يابعدهم ..

أبو ريمان :-

هلا والله وغلا .. نعنبو بليس تو ما أنور الموضوع ... وش الموضوع الا المجلس العام بكبره .. وش الملجس العام الا الشبكة بكبرها ! وش الشبكه الا مدينة الملك عبدالعزيز كلها أنورت ياخوي يوم شيكت على الموضوع

وانا اخوك ما نقول الا الله يرزق حكام المسلمين البطانه الصالحه .. هم فيهم خير أكيد بس مايدرون وش يصير من الناس اللي تحتهم ! المشكلة أن العلمانيين هالفترة كلما لهم يصلون لمناصب مهمه في البلد والله يستر من الجاي .. أبوريمان أجحد العلمانيين والليبراليين والحكام كلهم .. بأقول لك سر :

منور الموضوع يا كبير وتسلم على مرورك .

القمرالهلاليية :-

هلا وانا أخوك .. مشكورة على مجاملاتك اللي أحرجتني أنا وكيبوردي ..

إقتباس


	من اللي يتجرأ ويتطاول على كاتب الموضوع والله انك فله وقلت لك قبل هالمره أسلوبك يجنننننننننن ..رووووووووعه

<< عاض اصبعه ويناظر بالأرض ووخدوده حمر

إقتباس


	والله كلامك صحيح 100% ,أنا مايقهرني إلا المذيعات المصريات,والله ياهن غثيثات بالحيل بس الحمد لله أنا منذ مبطي مافتحت التلفزيون ..

المشكلة أنهن محسوبات علينا سعوديات ! لا وجيهن تفتح النفس ولا تقديم زي الناس ..ياشيخه والله لو اني وزير ما أخليهم يقدمن ولا حتى طبق اليوم .. مشكورة قمرالهلاليية على المرور وتسلمين .

الهلالي أبوسارة :

ياخوي منيب راد عليك أقلب وجهك بس

ابويارا المغترب :

هلا والله وغلا ومسهلا .. منور أبو يارا ..

إقتباس


	اياد مدني اوسخ منه مافيه...وهو علماني بحت

والله بيني وبينك عجزت أعرف هو وش من لحية .. مرة علماني مرة صوفي مرة بقايا حج <<< وش يبي ذا

أبويارا يا مال العافيه فرحت بشوفة يوزرك وربي .. تسلم لي ياغالي .

الماسة الزرقاء :-

هلا والله بالماسة .. يعلم الله اني احترمك أختي في الله ومنورة الموضوع ومنورة مجلسنا العام ياخوك << ظف وجهك بس !!

إقتباس


	الله يكثر هالأحداث المدوية عشان نشوفك يومياً

يعني قصدك يستلج إياد مدني زيادة ؟

إقتباس


	والله وتغيرت قناة السعودية كلها هذا يصير فيها وإحنا ما ندري

ايه يحق لكم يا عملاء أوربت

إقتباس


	يبدو إن الأحداث هاذي تصير في كل بيت ,, الوالد إذا ما اعجبه شي في عياله قال جاذبينهم خوالهم ,, والأم بس تدافع عن اهلها واخوانها ...

بس خلي عنك .. والله ان كلمة يبدو ذي تعبت معها وانا أقراها .. حبتين يا يبدو ههههههه

مساكين الخوال عندنا في نجد ..اذا طلع ولد الأخت غبي أو مطفوق أو بثر أو شين .. قالوا طالعين عليهم ! انا من هالمنبر أطالب بتكوين لجنة نسميها : لجنة الدفاع عن حقوق الخوال !

8

8

8

بلاك والله رخمة طالعن على خوالك <<< أبوي اللي يتكلم مهوب أنا

الماسة منورة الموضوع لو داري انك بتردين علي كان طاب في إياد من مبطي .. مشكورة وخيتي .

هلالي القرعاء :

هلا والله فيك وفي أهل القرعاء كلهم .. لأجل عين تكرم مدينه وانا أخوك .. منور الموضوع

إقتباس


	والمجلس مجلسك ومتى مابغيت تكتب موضوع تعال هنــا ..

والله ما لي في المجلس الحين .. ممكن أروح أتسدح في المقلط ؟ <<< مااش ماصل ياعيال

إقتباس


	صبح صبح يابو سارهـ ..

هههههههههههههههههههههههههههههههههههههههههههههههههههههههه

ضحكت على هالكلمة لأنها ذكرتني بفيلم بوحه .. اللي مايدري وش بوحه ينتظر عند القناة الأولى ترى يسويها إياد ويعرضه

إقتباس


	والله أنا من تالي صايرن ماأفتح قنوات السعوديه (موليّه) ..

مدري ليش تذكرت مريم الصالح وانا أقرأ هالاقتباس خخخخخخ

إقتباس


	ذكرتن بـ فلم كنا نشوفه على غصب 2 .. وحدهـ تصفر للشرطي وتعطيه ذيك الإشارهـ اللي طارت عيوني معه والله مب تبلي على مدني لكن المشهد هذا مر مرور الكرام

لا خل عنك .. مشهدي اللي ذكرته بالموضوع أقوى من مشهدك .. لا تحاول

إقتباس


	بالمناسبه .. في صورهـ بـ توقيعك كل ماشفته أضحك

قصدك ملك الاستشوار ؟

الله لايخلينا منه قسم بالله رفع رووسنا في ألمانيا .. أحرج الحلاقين الالمانيين بهالاستشوار ووصل لهم رساله مفادها ان العرب يجي منهم ههههههههههههه

يعطيك العافيه على مرورك الممتع وكلامك الذرب وترحيبك اللي يسر الخاطر لا هنت يا اخوي ومشكور ..

قفلة :-

((

)) <<< هذا منهو ؟

هذا سلمكم الله واحد ليبرالي قاعد عند التلفزيون ويصفق مبسوط على اللي قاعد يسويه إياد !

((

)) <<< طيب هذا منهو ؟

هذا الله يلسم لي خششكم واحد مثلي ومثلكم فيه خير ومو عاجبه الوضع اللي حاصل !

أوووكي طيب هذا ((

)) منهو ؟

هذا إياد مدني يوم قرأ ردودكم وتعليقاتكم قام استخف المسيكين هههههههههههه

يالله تشااو أجمعين

هلاليه2005 · #6 08/09/2006, 05:40 AM

هلا وغلا بابو سااره

توو مانوور المجلس ..

صبحهم بالنور والسرور .. الله حيهم كل واحدن باسمه .. واللي ماعنده اسم الله يحييه باسم أخوه

هلااا وغلااا صباح النووور

والله من زمان عن المجلس العام .. لي عنه فوق السنتين يمكن .. شكل المشرفين يقولون من هالبثر اللي دلّـه على مكاننا من جديد

هع حيااك الله بعدين تراني ادري من هو اللي دلك وبعلم المشرف <== مسويه بتكشفك

يا إخوان يا أخوات والله اني جاي أحط راسي وأرقد .. مافي راسي نية لكتابة موضوع .. بس الشكوى لله .. فيه حدث مدوي خلاني أقتحم المنتدى عشان اكتب لكم عنه

اي والله وانا اشهد انه حدث مدوي ,, والا ماصار اقتحام هع

جعلها دووم هـ الاحداث

أذكر في السابق .. كانت الاعلانات التجارية يجيبون حريم متسترات محتشمات شوي قسم بالله ويلبسن دسوس

ايييييييه زمان اول تحول

يااقدمممممممك

نور الشريف اللي ماخلا حرمه في أفلامه الا وغمرها بحنانه تقوم ترزه في قناتنا يامدني ؟ أنهبلت يا ابو الشباب

خخخخخ والله انك صادق

جالس أنا والوالد في جو مفعم بالروحانية الأسرية .. في جو تملأه السكينة والوقار والحنان الأبوي .. وقاعدين نتفرج على القناة الأولى :-

مقددر انا ع الروومانسيه ياناااااااااااااس

"يبه أصب لك شاهي ؟ .. لا وانا ابوك توني متقهوي عند واحد .. لا يبه خلني أصب لك بياله على شاني ..بس ياولدي مالي فيه الحين والله .. ! وش اللي مالك فيه لا والله ان تشرب من يدي الجدا تراها بياله.. لعنتن تلعنك وانا أبوك وراك حقنه أقول لك ماأبي شي !"<<< طاح وجهه

مشكلة التقدير والحنان الابوي عند الشعب السعوودي

البطلة مصختها يا جماعة الخير .. قامت وترست البانيو مويه ورغوة صابون .. ومازال إبااد مدني وتلفزيونه العزيز حاضرين وحالفين الا يورونا البطلة وهي تتروش

دخل عليها في الحمام رجال .. قامت تضحك هي وياه والكاميرا ثابته على رقبة البطلة وطبعاً اللي تحت الرقبة من غير هدوم وما طلعه المخرج بس الرجال اللي قاعد يكلمها أكيد يشوف !!

لااااااااااااا تعليق

يالخسيس ياالهيس الأربد والله اني داري ان الدش اللي مركبه انت واخوانك يجيب قنوات فرنسا وتكذبون علي تقولون بس يجيب مباريات ! ..قلت: يبه الله يجزاك خير والله انك تسمع بفرنسا وش جاب فرنسا وقنواتها والله ان هذا تلفزيون دولتك انا وش دخل أهلي في الموضوع

خخخخخخخ انووااع الزحممممه اجل فرنسا هههههه

أرجع للحبيب اللي بايع أمها بريال إياد مدني

انا اشهد انها بنص

رسالة لأبو مدني :

ترانا نفهم وفينا مثقفين ويجي منا .. مدري من لاعب عليك وقال ان مشاهدينكم دلوخ !! عمر التطوير ماكان بالتعري والتحرر وجيبوا فلانه خلوها تقدم وأفلام مدري وش تبي وتجميع هالساقطين والساقطات ..

أفلام وما أفلام هذي عادية في أي قنوات ثانيه .. لكن قناتنا قوية.. ترانا شعب له خصوصيته أو ماتدري ؟

البرامج الثقافيه في تلفزيونك دمار وقديمه شفناها مليون مرة من يوم اننا صغار.. وينك عنها وعن تطويرها؟ ..
في الرياضه تلفزيونك دمار ومافيه بطولة كبرى نلقتوها لنا ومنتخبنا ماشفناه من سنة ونصف ولا أدري وش قاعد تسوي؟ ! في تلفزيونك أنواع الركاكة في الإخراج والتصوير ولا انت داري ! في تلفزيونك يعك المقدم ويلت ويعجن مليون مرة ولا عنده ثقه في نفسه مثل غيره من المقدمين في القنوات الاخرى..

كفيييييت ووفيييييت ;)

المووضووع للنقاش وتجاذب الآراء ويمنع منعاً باتاً التطاول على المسؤؤلين وأولهم كاتب المووضوع

لا توصي حريص هع هع

برايفت إلى والدي العزيز :-

أمووت وأعرف ليش ماطقيتني الا يوم أنتهى المشهد ؟ كان بإمكانك تدبغني في منتصفه أو في بدايته لكن مدري وش سالفتك يا أبو عبدالله .. آآآآخ منك يامفتري ههههه

ههههههه بدري

يسلمووووووووو ابو سوير

بس بقولك شغله

ترا محدن محلي سواليفك غير طاري ابوك الله يحفظه <<

<== لا تصفقها

تقبل مروووووري

الهلالي دائماً · #7 01/09/2006, 01:29 PM

يؤيؤيؤيؤيؤيؤ ....

الهلالي ابو سارة بشحمه ولحمه ...

الله حيوه اخوي الغالي ....

وسلمت اناملك ولي عودة انشاء الله

الهلالي- ابوسارة · #8 10/09/2006, 11:09 AM

بونسواغ .. بونجواغ ..وش الأخباغ ؟ <<< عشان بس تدرون أني منيب بسيط وأفت فرنسي ..

ماجد مقبل :

الله يحييك ويبقيك .. انت اللي منور المجلس كله وان شاء الله اشوفك مكان عوني كنانه قريب لكن ثق ثقه تامه انك بتلقى منافسة طاحنه من خليل أبو ديه المخضرم

أبو دية يلعن أم الاسم الفلة خخخ ومشكور لمرورك .

قشطة التاج :

إقتباس


	بس عذر إنك تبي تكمل المشهد عشان أبوك مايشك فيك هذا عذر استراتيجي مايمشي علينا كثرررر يامعلم

آآآخ منك يا قافطني

.. مشكوووور لمرورك .

سوسو الهلالية:-

إقتباس


	وانت بعد قطعتني من الضحك يا ابوساره

والله لو أنك جريدة يوم أقطعك ! <<< قلت لكم بدت المصالة ماصدقتوني

شكرا لمرورك سوسو .

القاضي :

هلا وغلا بالقاضي .. ياعزيزي على قولتك .. صح نحزن لما نشوف الابراهيم مخربها في ام بي سي .. والوليد يدهر مع روتانا .. لكن قمة البؤس هو ان تشاهد قنواتك المحلية وجهازك الرسمي ينحى نفس المنحى ويقلد الفضائيات ويعرض الساقطات وملكات السح الدح ام بو .. لكن عسى الله ان يجعل لنا من ضيقنا مخرجا ومن همنا فرجا ويذلف هالصوفي إلى مزبلة التاريخ غير مأسوف عليه (( ياخي أحس اني في قناة الجزيرة على هالكلام هههه )) .. قاضينا شكراً لمرورك.

مغرور حدي :

هلا بالمغرور .. تدري أن اسمك أثار في داخلي تساؤل مهم جداً يخص الموضوع ..

كلمة مغرور كيف ينطقها الشخص الألتغ ؟ ياخي معاناة .. وش رايك في تساؤلي الهام والذي يصب في بوتقة موضوعنا الهام عن مدني وقنواته

مشكور ياالمغرور للمرور <<< أروح كشنه مع السجع

كناري الازرق :

هلا بالكناري .. وش هالاحراج وش دخلك في خالي محمد ومتى آخر مرة زرته

ما أبطيت عنه أذكر اني أول ما دخلت الابتدائي شفته في أحد المناسبات وحبيت راسه بعد .. أيه أعجبك واصل وأعرف الأصوول

منور الموضوع وربي.

العنفوان الازرق :

نعم أحسنت .. ابن باز ناصحه وقرأت عن هالموضوع من فتره .. لكن الله يرجه مهوب وجهه وجه من يسمع النصايح .. مشكور لمرورك بس وش رايك فيني وأنا أقول لك أحسنت ؟ ماحسستك أني مدرس نحو هههههه

كنترول الزعيم ..

أنت اللي منور الموضوع والمجلس وشاكر لك ياغالي ..

الهلالي الثقفي

ألله يا الدنيا ..مهوب انت اللي اسمك ياسر ؟ <<< له عن المجلس سنتين من جد

! هلا بأديبنا وشاعرنا وقيسنا الملوح المهلهل .. هلا بالروعه اللي تمشي على الأرض .. هلا باللي قال ادبغوا جستنيه في أحد مواضيعه التي تم حذفها سريعا ولكني زقطت الموضوع وقرأته قبل الحذف <<< وش تبي انت

قاعدين من شوي نتكلم عن اياد مدني ونصح العلماء له .. فأتيت بالخبر اليقين مشكور للإضافه مشكور للمرور ومنور ياثقفي ..

افتخر بالزعيم :

ياخي من جد لا تستغرب بكرة تلقى شريط الرسائل القصيرة في قناتنا :

" محمد الخبر يقول لبنت سكاكا افتح الموبايل ياغلاي !! مجنون الوله يقول لأميرة الحرمان ولكم باك .. أبوسارة يقول لأفتخر بالزعيم منور الموضوع .. الخ الخ

" تحياتي لك ياجدي .

مجنون الزعيم :

والله اني أقترح على القناة الرياضيه يسكرون ويروحون يبيعون فصفص في سوق الحمام أصرف لهم من جلستهم في هالقناة اللي حتى الدوري الأرجنتيني طار منها ههههههههههههه .. تحياتي لألك .

الوافي 666 :-

لعلك تغير يوزرك فالرقم الموجود فيه يسبب عقده لأصحاب دينلسون

منور الموضوع يا غالي .

جراح :

الله يعافيك

متلثمه في شال الهلال :

هههههههههههههههههههه حلوة تفسيرك للوجه التعبيري أهنيك عليها .. تحياتي ومشكورة لمرورك يا أم شال

سهل :

حي الله مشرفنا .. حي الله الحكومه .. حي الله الدوريات ..

إقتباس


	انت طالعن على خوالك والا عمانك

عزيزي هذي تحكمها أهواء الوالدين .. إن أرضيت الوالد ذاك اليوم قال كفو ولدي الذيب طالعن على عمانه .. وان خنبقت قال اقلب وجهك يالسمرمدي يالرخمه جاذبينك خوالك ! والوالده ان رضت قالت طالع على خالك فلان وان خنبقت قالت على عمانك .. وحلها عاد

منور يا غالي ومشكوور للتثبيت ومنور الموضوع .

نايف :

والله اني مثلك وتساؤلي هو صدى يتردد لتساؤلك .. كيف صار وزير الحج ..؟ (( بيجيك صدى الأمس ويقول من ناداني..؟ لوح ههه ))

نايف مشكور لمرورك ويا علك تسلم .

هلالي الروضة :

الله يكتبها لنا ياخوك ولكل مسلم .. مشكور

صدى الامس :

<<< قلت لكم بيجي

ياخي انت أختر أرد عليك هنا أو هناك ؟ أقول يلعن بليس اللي مايحطك على راسه ويرد عليك مرتين ولا شي والله .. منور الموضوع يا عمده ..

إقتباس


	يا بعدي تلفزيوننا لازم يواكب التطور ؟؟ والا تبي الناس يقولون عنا اننا متخلفين !! لازم نشوف البانيو ولازم نشوف القصير وشوي شوي نشوف اللي من غير هدوم

تصدق أقنتعني .. خلاص أباسحب احتجاجي

<<< خقخق مع كلمة : من غير هدوم

إقتباس


	يعني ترى غصب واحد اللي على الأوروبي تختلف عن اللي في عرب سات << ابو مدني متطلم وهو يحاول يصرف

ههههههههههههههههههههههههههههههههههههههه

تكفى قل له لا عاد يحاول يصرف ! ألله يا هو يسمع بالتصريف ألله يا هو من جنبها ولا تهون انت بعد هههههههههه

إقتباس


	كل قوي وفيه اللي اقوى منه

والله انك صادق .. يعني فيه رياضي عالمي متميز وفيه اللي فوقه :- من كبار رياضيي العالمية .. (( أنت ماخذ بالك ؟

))

إقتباس


	اجل تبي تتطور وانت ماتجيب هالحركات !! تبي تتطور وانت صاك على الحريم مايقدمون !!

أوكي جب حريم بس حريم حرييييييييييييييييييييييييم .. مهوب تجيب لي كم وحده ماتدخل مع هالباب والوجه كفر منصلخ وتقول قدمي ! ياعمي شغالتنا مياتي الاندونيسيه أصرف منهم لو تقدم مع ان خشمها مختفي في ظروف غامظة

إقتباس


	تحياتي لك ابو سارة ولا تقطعنا انت من اخذت الترقية وانت متغلي علينا

هاه هاه وشو ؟ << جحد أم الموضوع

صدى أقرب .. مهوب أنتك كلك . . أذنك بس .. بأهمس لك :

وش فيك غايب طعنت القلب بغيابك .. ياللي أحبك حرام انك تجافيني ..

يا مل قلبن مايطيق الصبرا يا صدى :sad: . يالله عاد وخر اذنك بأرد على الباقين

الدم الازرق :

هم ماخربوها .. إلا خربوها ونص .. أجل جايبن تسلاب أمريكيات يتتنن مارلبورو أبيض في قناتنا !

مشكور لمرورك .

سامي :

انت اللي منسم .. انت اللي منتب صاحي .. أنت اللي منور موضوعي والمجلس الله لايخليني ومشكور .

الاماكن كلها مشتاقة لك :

هلا والله بقصيدة منصور البلوي الخراط

.. ياخوك والله ماهنا ذيك المتابعه للتلفزيون السعودي لكن طحت فيه بالغلط وطبيت فيه وبس

مشكوووور لمروووورك .

الفيروسة الزرقاء :

هلا والله وغلا ..

<< أووووه تعبت بعدين أكمل الرد ( طنقرت الخاله فيو

)

الفيروسة منورة الموضوع ياخوك ولأن لياقتي في الرد أنتهت لعلي اتوقف هاهنا على أمل الاستكمال لاحقاً والبدء بردك عشان تنطرح البركة فيه

تحياتي للجميع ..

الهلالي- ابوسارة · #9 10/09/2006, 11:17 AM

برايفت عبدالله الجمعان :

ممكن استعير رجلك اليسرى خمس ثواني بس ... لا ولا شي بس فيه اثنين بأنتفهم برجلك من المجلس لين مايردهم الا منتدى الثقافة الاسلاميه

أبونورة شايت الكورة + هلالي الظهران .. يلعن بليسك انت وياه وش تبون ؟ ياخي الله يقلع الدراسه اللي تجمعكم ثانيه يالسمرمد

يالله انت وياه قدامي على منتدى الجمهور لا والله بالعجرءا آلله ابو ذا الوجيه

<< تحمس هههههه

ياحبي لهم هالثنائي المرح .. من حبي لهم ودي أجحدهم ولا أرد عليهم

بالله يا مشرفين خذوا بالكم منهم ترى اياد مدني مروحهم عشان يخربون موضوعي ويقلبونه شات

قشطة التاج · #10 01/09/2006, 01:29 PM

مبدع دائما يابوسارة والله المفروض نشتريلك عمود تكتب فيه بالوس أنجلس تايمز جنب توماس فريدمان وتصيرون مثل الشمراني ونجس النية وترى محد أشوفه بيحلق شنب فريدمان ذا مثل أبوسارة , وبالنسبة "للضرب بعد انتهاء المشاهد من قبل الآباء" فهذه لها نظير ببيتنا العامر خخخخ , بس عذر إنك تبي تكمل المشهد عشان أبوك مايشك فيك هذا عذر استراتيجي مايمشي علينا كثرررر يامعلم , تحياتي لك وعساك دوم على القوة ياغالي

سوسوالهلاليه · #11 01/09/2006, 01:34 PM

والله اني من زمان عن السعوديه
حدي الرياضيه والمجد والنت ولا انسى اي ار تي سبورت بس!!
بس سمعت عن قصه مثل ذي!!
وتقطعت من الضحك...اجل السعوديه تجيب مثل ذي
احسها مي لايقه!!
وانت بعد قطعتني من الضحك يا ابوساره
والحمد لله على السلامه متى الوصول؟؟<<بدى التكليج

القاضي · #12 01/09/2006, 01:35 PM

يا أخي و الله أنا لا أدري لِم لا يفطن إياد مدني و غيره أن لهذا البلد خصوصية ليست لغيره. فهو مهبط الوحي و فيه الحرمين الشريفين و نعلن دوماً أن و يشكل رسمي أننا دولة تحكم بشرع الله - مثل ما صرح بشار الأسد أن دولته علمانية قومية في قناة دبي.

نحن نحزن أن يأتي وليد الإبراهيم بقنواته المتعددة و فيها ما فيها و هو يمثل هذا البلد ، و يأتي الوليد بقنواته الغنائية المتعددة و هو يمثل الأسرة الحاكمة ، و يأتي صالح كامل بقنوات فيها ما فيها و هو يمثل هذا البلد. لكن حزننا يشتد و يتعاظم عندما يتم السطو على القناة الرسمية لهذا الوطن و بدلاً من أن نجعلها أكثر استقامة و رزانة و تجديداً في طرح الخبر نجد تقليداً فجاً للقنوات الأخرى.

لو أردت أن أشاهد فيلماً هل أبحث عنه في القناة الأولى فلماذا يا وزير الثقافة - و لا أدري هل تصلك كلماتي أم لا - تأبى إلا أن تحول بوصلة واجهة البلد الإعلامية لتكون مجرد تابعة للقتوات الأخرى بدلاً أن يعمل فريق عملك لتطوير القناة فتتميز أكثر.

أبا سارة أحسنت في طرق هذا الموضوع بطريقتك الخاصة.

مغرور حدي · #13 01/09/2006, 01:52 PM

هههههههههههههههههههههههههههههههههههههههه

ماني من متابعين القناه الاولى خخخخخخخخخخخ << يعلمكم ان عنده دش .. بس ماشاء الله تطور مفاجئ وسريع .. أجل نور الشريف .. واحمد زكي الله يرحمه ..

اول يجيبون الدعايه فيها بنات متحجبات ويقطعونها .. الحين الشكوى لله ..

ابو ساره بيني وبينك :
تنصحني احطها مع القنوات الي بالمفضله لووووووووووووووووووووول

اي صح نسيت ارحب بك بالمجلس العام تعرف بطله الفلم نستني اسمي ... ياهلا وغلا فيك .. ونور المجلس ولاتحرمنا طلتك ..

تحياتي لك وللجميع
أحمد

الغريب · #14 03/09/2006, 11:59 AM

أضحكتني حد الثمالة ياأبا سارة .. وشر البلية مايُضحك !!!!

أضحك الله ضروسك

فعلا هالصوفي المهجن .. يعبث في تلفاز بلاد الحرمين الرسمي !!! ويبدو أنه قد حظي بضوء أخضر من أحد كبار البطانة الفاسدين !!!

أبو سارة .. أنا .. أنا الموقع أدناه .. الغريب .. أنا .. ما أحد قال لي .. وأقسم بالله العظيم .. أني شاهدت في القناة الأولى .. مشهدا سينمائيا فيه رجل وامرأة في فراش الرذيلة ولا يسترهما إلا .. الشرشف !!!!

ألا لعنة الله على المفسدين !!!

وكلامك ياأبو سارة مية .. مية .. التطوير في الأدوات .. في مساحة الحرية .. في تأهيل المذيعين والمعدين والمخرجين .. في البرامج الراقية .. التي تجمع بين الترفيه والثقافة واحترام المشاهد !!! ماهوب التطوير .. في التفصخ !!

لكن .. لأن عقل الوزير .. فاصخ .. فهذا هو كل مايعرفه عن التطوير !!!

أنت تدري يابو سارة .. إن هالصوفي مستدعي رئيس تحرير جريدة الجزيرة ومجتمع فيه 4 ساعات كلها تقريع وتوبيخ على نشر تعقيب الشيخ صالح الفوزان على قليل الأدب حماد السالمي ... وتم التعميم على جميع الصحف بعدم نشر أي تعقيب للشيخ !!!

هين .. ياولد مدني .. والله الذي لاإله إلا هو ... إن الخير في هذا المجتمع الطاهر باق رغم أنفك وأنف من ورائك .. وقريبا بإذن الله سيتم اقتلاعك ومن ( يتشدد لك ) ورميكم في أقرب زبالة .. للتاريخ !!

بس ياأبو سارة ... سلم لي على أبوك وحب راسه وقل له : أبو متعب الله يطول بعمره ويرزقه البطانة الصالحة المؤمنة .. مايدري عن هالأشياء .. وعندما يتم كشف الخونة .. الذين استغلوا طيبة وثقة أبو متعب ... فسيكون لأبي متعب كلمة قوية تعيد الأمور إلى نصابها !!!

وبعدين لاتظلم أبوك .. تراه كمل المشهد لين انتهى .. علشان مايستعجل بحكمه .. ولا تنسى بدايات باكيتا السيئة .. وبعدين انطلق الفريق وجاب خماسية <==== ماسكه معه كورة يحسبه بمنتدى الجمهور

الكناري الأزرق · #15 01/09/2006, 02:23 PM

السلام عليكم و رحمة الله و بركاتـــــــــــــه ؛؛

يـاله حي ابو سـارة القـاطع ,,

اجـل سنتين .. ؟!

و الله شكلك ما تصل رحمـك

..

سؤال على الطاير ..

مـتى اخـر مـرة زرت خـالك محـمد

.. ؟!

لا تقـولي هو زارني يوم كنت بالمهد

.. ؟!

إقتباس


	واللي ماعنده اسم الله يحييه باسم أخوه (( بدت المصاله )) !

طيب اللي مقطوع من شجرة ينادونـه باسم ايـش

.. ؟!

لا تقـولي باسم ولد الجيران

!!

إقتباس


	مافي راسي نية لكتابة موضوع

اجل الله يحفظ اياد مدني اللي خـلاك تكتب موضوع

..

إقتباس


	أذكر في السابق .. كانت الاعلانات التجارية يجيبون حريم متسترات محتشمات شوي قسم بالله ويلبسن دسوس .. ويقعدن يسولفن ويتميصلن ثم تقول وحده لخويتها : ماجربتي المنتج الفلاني ؟ تقول خويتها : لا واللهي ماجربتهوش .. تقوم خويتها تعطيها المنتج اللي يتكلم عنه الاعلان ثم بعدين تجي تشكرها وتقول فعلاً منتج مهوب صاحي فادني كثير وينتهي الاعلان ويا دار مادخلك شر ..

سـبحان الله اعلاناتنا تقل افلام هنديـة !!

لان اعلاناتنا نفس ما قلت الفكرة ما تتغير .. !

و نفس الكلام عند الـهنوود ..

تجي عصابة لم بزر و ابوه و يذبحون ابوه و بعدين يكبر و يجي سوبر مان و يمسح بهم البلاط و يقاله انتقم لابوووه

..

إقتباس


	"يبه أصب لك شاهي ؟

تسـان قـلت له يبه اصب لك كابتشينو

.. ؟! تتطور ياخي ! << و الله انت اللي مفروض تتطور ,, ذبحتنا بهالكابتشينو خلاص مصدقين انك تعرفـه يالقروي

..

برايفت إلى والدي العزيز :-

إقتباس


	أمووت وأعرف ليش ماطقيتني الا يوم أنتهى المشهد ؟ كان بإمكانك تدبغني في منتصفه أو في بدايته لكن مدري وش سالفتك يا أبو عبدالله .. آآآآخ منك يامفتري ههههه

خخخخخخخخخخخخخخ ..

الله يرجك يابو سوير

..

تلقاه دخــــل جـــو

..

***

الله مير يعطيك العافية على هالموزوع الزريـف ,, يعجبني فيك انتقاء المواضيع الممتازة باسلوب فــُــكاهي

..

مـا شـاء الله عـليك ,,

و اخر دعوانا ان الحمد لله رب العالمين

..

و الصلاة و السلام على اشرف الانبياء و المرسلين ,,

و اقم الصلاة !! << متأثر بصلاة الجمـعة

..

***

السلام عليكم و رحمة الله و بركاتــــــــــه ؛؛

***