السلام عليكم...

اه اه اه اه اه شباب والله اه..رغم كل اللي يصير معنا والله مع ذلك حبي يزيد للزعيم وربي مانقص رغم مايسونه رجال الامن..

شباب تذكرون سالفة البرمودا اللي كتبتها لكم..اللي كلنا اتفقنا عليها انها فشيله وتخلف..!!

كثير منكم قرى اللي صار لي مع صاحبي صاحب البرمودا ..وفي ذاك الموضوع انا سويت نفسي مهايطي شوي وقلت لكم والله المباراه الجايه بحضر انا واصحابي كلنا ببرمودات... ...

صار معي موقف اسخف ومن جد شي يقهر وفعلا بعد هالموقف عرفت انهم مستقصدين نادي الهلال بالذات..والله شي يبكي..شوفو ايش صار..

------------------------------------

طلعنا انا واصحابي...والله ثم والله كلنا قلنا يا شباب.. لحد يلبس برمودا..لا والله قلنا لحد يلبس شي غير الثوب..كلنا طقمنا ثياب قلنا بنسوي الشي اللي يبونه..وطبعا انا الوحيد اللي شعري طويل وتذكرون يوم قلت لكم انهم تكلموا على شعري..كفيت شري ولبست كاب ودسيته...

يعني احد يقدر يتكلم علينا الحين ها حضرنا المباراه بالزي الرسمي...!!!(( صبرا جميل والله المستعان))

وصلنا الملعب تقريبا على اذان العشا..((لأني من جد انا من زمان ماشفت هالجمهور اللي جا توقعت بلقى مكان بسهوله))
والله تفاجأت طبعا احنا ماصلينا العشا...وقلنا انا واخوياي وقتها طويل نصلي بين الشوطين ورحنا مسرعين نحجز اماكن....بين الشوطين والله الشيطان شاطر نسانا الصلاه الله يلعنه...
المهم اول ماصفر الحكم طلعنا ركبنا السياره ومسكنا الدايري قلت انا ياعيال بنروح للمشى طريق الامير عبدالله نصلي هناك في مكان للصلاه...

وصلنى للمشى ..(( ملاحظه اني كنت حاط شال هلالي ناسيه على كتفي من بداية المباراه...فقط والله العظيم ورب الكعبه بس شال هلالي على كتفي لا اكثر بتفهمون بعد شوي ليه الحلف))

نزلنا توضينا يوم دخلت اتوضا انا توني انتبه للشال قلت يووو مشوار ارجعه للسياره خلني بس اصلي وبنمشي...
صلينا ويوم خلصنا قال واحد من العيال امشوا بطلع بسيارتي خلونا نغير السياره..((هو موقف سيارته في الجهه الثانيه من الممشى)) رحنا نمشي والشال كان على كتفي...والله يا عيال اني ماشي حالي حال نفسي انا واخوياي حتى صوتنا مو طالع ماكنا نسولف اصلا..

تفاجأت الا واحد يصارخ من بعيد هي انت...انا مطنش الا والصوت كانه يقرب التفت الا وذاك العسكري اللي يمشي مليون ويتلني مع كتفي...قلت خير يبو وش فيه...!!!

قال وين اثباتك..!!! قلت في السياره مو معي ليه وش السالفه..!!
يقولي..مسوي تستعبط وتقول وش السالفه..!!!...((قسم بالله اني خفت قلت لايكون واحد ارهابي مسوي شي ويحسبونه انا))
قلت وربي ماسويت شي...وقال ذا اللي لابسه وشو..((انا بالي راح للكاب)) قلت كاب عادي...قال لاتستخف دمك..!!..((عيال والله مدري وش الموضوع))

قالي ذا الزفت اللي حاطه على كتفك...!!((عرفت انه يقصد شال الهلال)) انا طرطعت والله يوم قال ذا الزفت..بس مانفخت عليه تعرفون عسكري كلها كف الا موديني في ستين داهيه...قلت ليه خير انشالله هذا شال للهلال...

وقالي بالحرف الواحد..انت ماتعرف ان هالاعلام والشالات ممنوع اللي يلبسه. قلت لا والله بعدين هذا شال مو علم يعني عادي..ومن متى صار ممتوع ماقد سمع هالقرار ..!!! شال ممنوع..!! اجل لو اني لابس فنيلة الهلال وش صار..!!

قالي اي عادي وقام ينافخ يقول انت مبلغ عنك اصلا..!!! (( يالله مبلغين عني الله يستر)) قلت من جدك انت..((احسبه يستهبل))
قال مو انت راعي الاوبل البيضا اول مانزلت وهم مبلغين عنك كذا دوريه ويللا اطلع معي بوديك للباص بعدين للتوقيف....!!!!!!!!

شباب شوفواا ايش جالس يصير والله حرام...!!!

انا جيت افهمه الموضوع بقوله انه مو قصدي انزل بالشال في الممشى والله اني ناسيه وقلت له اني من العجله نازل اصلي ونسيته علي,,,الا وقال لي..

عساك صليت بالزفت ذا..!!! قلت ايه وش فيها...والله حاولت معه يمين يسار ومعي اصحابي ولا قدرت كان يصارخ علي والله ياعيال ركبني الدوريه

وتأخرت عن الجامعه(( الا ماحضرت اصلا لأنه ما امادني انام)) وابوي طبعا تعرفون الابهات انتم مايحتاج ولدهم كذاب دايم...قلت والله ابوي ماسويت شي بس الشال ناسيه على كتفي...الا والله قال لي الشرطي مايكذب اكيد مسوي مشكله اعرفك ضروط..!!! ((والله ان ابوي طيب ابوي اي ضروط والله اني حال نفسي وطيب ولا عمري تمشكلت))

طبعا الوالد ماقصر وقال اخر مره تطب الملعب وطحت من عيون ابوي عيال والله شي يقهر قسم بالله ابو سلطان عارفين انك ماقصرت لكن شد اكثر انت واعضاء الشرف شوفوا المهازل اللي تصير لنا

يمكن قصده بعد المباريات ممنوع الاحتفال في الاماكن العامه
يعني تحط العلم على الشنطه بعد المباراه تراه ممنوع

اوكي هذا الشي ممنوع معروف...

لكن انا اقول الشال كان على كتفي وكنا والله حتى ساكتين وهو شايفنا وكل ربعه بعد والله ماكنا نسولف حتى..يجي يركبني في اللومينا ويبي يوديني مع المشاغبين في الباص ثم للتوقيف..!! ياخي والله ظلم يقارني بذوليك اللي جالسين يفحطون ويتعرضون للعالم وانا حالي حال نفسي..!!