الســلام عليكم ورحمـة الله وبركاته

صباحكم ومسائكم خير ، وتقبل الله صيامكم وقيامكم أباطرة المجلس الكرام

يقول الشاعر :
هجرت بعض احبتي طوعاً .. لأنني رأيت قلوبهم تهوى فراقي..
نعم اشتاق ولكن وضعت .. كرامتي فوق اشتياقي..
ارغب في وصلهم دوماً ولكن .. طريق الذل لا تهواه ساقي

أهدي هذه الكلمات للمجلس وأعضائه الكرام

^
الكاتب ما قرا الأبيات يحسبه مدح

شدّني الحنين والشوق إلى المجلس < كذاب
وأتيت مُسرعًا لأعانق مجلسنا < كذاب ساعة عشان تذكر الباسوورد



وش أقول ووش أخلّي ..
القصيم .. التراث ، التاريخ ، النمو ، الازدهار ، البيك قريبًا

صحيح اني أحد مواليد مستشفى الملك فهد الساعة 6 الصبح بجده
صحيح اني درست في مدارس جده
صحيح اني أحد سكّان جده
صحيح اني ما أروح للقصيم الا بالإجازات
لكن هذا لا يمنع ان الانتماء إلى القصيم باقٍ إلى الأبد

القصيم

من وين ابدأ ومن وين أنتهي

القصيم ما سهل من الأرض وكثر شجره والقصيمة منبت الغضى والارطى
شكرًا ويكيبيديا

تضم منطقة القصيم العديد من المحافضات وهي :
- بريدة ، القرعاء
- عنيزة ، الرس ، البكيرية ، عيون الجواء ، غاف الجواء ، المذنب ، البدائع ، رياض الخبراء ، الأسياح ، النبهانية ، رياض الخبراء ، الشماسية ، عقلة الصقور .. وغيرها

بريدة هي مقر إمارة القصيم بحكم أنها المحافضة الأولى في المنطقة
يارب ما يطلع لنا عنيزاوي ينشب لنا

القصيم قديمًا قبل الإنضمام للمملكة كنّا ناوين نسويه مملكة ونحط به البيك وسينما ونخلّي الحريم يسوقن
لكن يقال ان بن جلوي جاء وحلف ان نكوّن دولة وحدة ، قال عشان نصير أقوياء ويد وحدة ومتكاتفين .. ونبي نحط العاصمة جنبكم ان بغيتوا شي حياكم اقلطوا عندنا



بريدة

أشهر معالم بريدة هي :
برج بريدة



وهل يخفى القمر ؟
هذا البرج الموجود في كتب الوطنية
واللي جنبه على طول ناديي الرائد والتعاون ما بوه مثله بالقصيم




شارع الخبيب



يارب يصدّقون انه شارع الخبيب
شارع الخبيب التاريخي
هالشارع فيه كل شي منطقة تجارية
غلطة عمرك تروح له الساعة 5:30 العصر لأنه تبي تحوم تسبدك مع الزحمة والسيارات والهنود وابو خلَق المنتشرين في أنحاء الخبيب

مير انتبهوا ترا سيارة ساهر تاقف وانت رايح للخبيب قبل النقل الجماعي الجديد



سوق الجردة



بإختصار شديد ، مكان يتجمعون به الشيبان اللي ما عندهم شي ويتهاوشون به على الخردة



السوق الداخلي



اسمحوا لي أعطي هذا السوق مساحة أكبر في التعبير لكونه عزيز جدًا على قلبي وأعرفه من غربه لشرقه ومن جنوبه لشماله
وسبب خبرتي به هي المقولة الشهيرة لجدّتي "ياوليدي أبي السوق الداخلي أبمّر محل وأنا واقفة بس"
وأنا واقفة بس = ساعتين ونص وربما تمتدّ
وتلقى مباراة الهلال بادية ومحمد ماسك خلّاط مشهّب منقلعة ايده ورايح به للمحل يصلحه

هذا السوق يضم عدد من المحلات أشهرها هناك سوق الذهب
وهو المكان الأمثل للمرور لرفع ضغط المواطن وتخليص الدفاتر الصفراء
ومطاحن العيش والحنّا اللي متّرتهن تمتير
ولا يهون المصلّحاتي اللي أجيب له خلّاط عمره 40 سنة ويصلّحه ابن الكلب
وأيضًا محلات العطارة المشهورة هناك



مركز الملك خالد الحضاري



تقام فيه عدد من المهرجانات والبازارات على مدار السنة
وأشهر مهرجان يقام هناك هو مهرجان الكليجا
المهرجان هذا إذا كنت بالقصيم ما أفوّته
آخذ جدّتي ودلّة القهوة ونروح وما فيه غير قوّة بلع من الكليجا وتقهوي
وكل شي طااازج من الفرن إلى الفم
ونرجع للبيت سكّر جدّتي صاكّ الـ 400



عنيزة

أشهر معالم عنيزة

دوّار الساعة



ساعة عنيزة الشهيرة كانت سابقًا عبارة عن دوّار يتوسّطه الساعة
وتحوّلت مع التقدّم العمراني إلى إشارة منذ مبطي
وحطوا بها ساهر
ومع ذلك إذا جاء واحد يوصّف لك قال همّن يجيك دوّار الساعة ياخلفهم !



سوق المسوكف



هو عبارة عن سوق تباع فيه الأشياء القديمة
دلال واباريدز والكترونيات وعلب وقوارير وألعاب وسيارات ولوحات وغيره من الأشياء التراثية والقديمة



مزرعة التركي



مزرعة كرّاث ومهوب أي كرّاث
تروح للمزرعة تقول له عطنا بعشرة اريل ، ويروح يحصده لك وينفضه له نفضتين ويلفزه لك بكرتون ، من كثر ما تشتهيه ودّك تنحر أقرب بقّاله وتاخذ خبز حار وملح وتفتح الكرتون وتاكله .. حتّى بدون غسيل
سعابيل من هنا لعنيزة

مؤخرًا غيّر مكانه ورفع أسعاره الله يهديه



البكيرية



يكفي نقول انها المدينة الصحّية الأولى على مستوى المملكة
وفيها هرفي



عيون الجواء



شاهد على قصّة حب عنترة وعبلة ففيها قال عنترة في حُب عبلة
ولقد حبست بها طويلاً ناقتي .. أشكو إلى سفح رواكد جثم
يا دار عبلة بالجواء تكلمي .. وعمي صباحًا دار عبلة واسلمي

كان عنترة ساكن بعيون الجواء ولا جاء مسيّان راح عند صخرة وبدا يقصد ببنت عمّه عبلة ، كان دايخ معها ويحبّه حبّ ما بعده ولا قبله ، وصار مع الوقت يقابل عبلة على طلعة الفجر عند نفس الصخرة ويبدأ يقصد به ..
عاد درا به عمّه ابو علبة وراح هاوشه عند الصخرة ومعط عبلة عبلة مع جدايلها وقال لابوه خلّه يعقل ويخلّي عنه الحب والخرابيط ، ويجيك عنترة من شدّ حبّه لعبلة واعدها عند صخرة ثانية عشان ما يدري بهم ابو عبلة

وإلى يومنا هذا وصخرة عنترة موجودة في القصيم بعيون الجواء
وهذا إن دلّ على شيء فهو يدل على ان القصيم ديار العشّاق
صح الهيئة ناشبتن لنا بس ولو

( صورة صخرة عنترة )


الشماسية
بدون صورة لأسباب أمنية

خير الكلام عنها ما قلّ ودلّ
تخبرون القصبي يوم يعفط اذانه ويصيب ؟
هذي الشماسية




البلع

التمور
تعتبر القصيم من أكبر المناطق في المملكة تصديرًا للتمور
ويدّهر فيها سوق التمور طوال السنة وفي أوقات يكون فيها الطلب عالي
مثل قبل رمضان





الكليجا
هي عبارة عن قرص من الطحين داخله دبس
باختصار يعني
ولا تفوتكم كليجا أم عبدالله والله ياهي بالدماااغ





الحنيني
عبارة عن أكلة دورها تجيب لك حرقان





المرقوق - المطازيز - الجريش - السليق
أكلات شعبية لا يخلو منها أي بيت






رمضان



طقوس رمضان متشابهة مع باقي المُدن
تزيد إعلانات السوبر ماركت ومجلاتهن تلقاهن على باب كل بيت
نظام الفيمتو بريالين وما ياخذ الواحد الا قزازتين والحركات هاذي
سوق النخيل يعلّق لمبات صفراء على مداخله وقضينا

تبي الطقوس الصح تعال شفها بجدّه

رمضان شهر الخير
قبل يدخل رمضان يطلع المواطن السعودي ناوي يتقضّى كل ما لذ وطاب
ويطلع من السوبر ماركت معه ثلاث عربيات مليانة
ويرجع البيت ثم يتذكّر يقول نسينا قشطة المراعي ، ويروح من بكرة عشان يجيب قشطة المراعي ويطلع من السوبر ماركت معه عربيتين

عاد الحريم والبنات والشغالات تلقاهن في أول الأيام ما في الا قوّة لفّ بهالسمبوسة
حيث تصل سرعة الوحدة إلى 4 حبّات سمبوسة بالدقيقة
يعني حوالي 240 حبّة في الساعة بنت اللذين اهب
طبعًا المعدّل يتناقص مع انتصاف وانتهاء الشهر الفضيل إلى ان يصل إلى حبّة كل 4 دقايق 26 رمضان

وهذا يؤثر على سفرة الافطار طبعًا اللي ما تشوف آخرها في أول رمضان
وفي نهاية رمضان تلقى السفرة عبارة عن تمر وعلبة قشطة باقي به نصّه وبه قشور تمر ومنتهي تاريخه وذباب يلعّن عليهم يقول وش هالفقر




ختامًا لا نقول وداعًا بل إلى لقاء قريب ان شاء الله

أتمنى اني أكون عطيتكم نبذة عن القصيم الحُب
ولولا اني مستعجل وراي دوام كان فلّيته بهالموضوع

مادري وش السوات مع صوركم عيّت تجي بمقاس واحد
اللياقة وسط