اليوم... في أحد الجهات الحكومية جمعني الأنتظار بمبتعث سعودي
تعارفنا وسولفنا...يدرس الدكتوراه في مجال الهندسة...
شوي والا قامت من جنبنا وحده...
البنطلون حقها كان نازل...مشت شوي...بعدين رفعته (بعد ما قطعت قلوبنا)
الأخ قعد يحوقل ويقول: شف هالمصايب...
ترا المرأة الغربية قبل مية سنة كانت تتستر...حتى شعرها ما كانت تطلعه...
والحين شف الله يبلانا...
وللأسف الليبراليين عندنا ما راح يرتاحون لين يشوفون المرأة السعودية بها الحال..
والمبتعثات اللي تشوفهم في كل مكان بيكونون رأس الحربة!!!!
ما رديت ولا علقت على كلامة....بس قعدت أقلب في الاوراق اللي معي...فهمها ولاعاد كلمني لين طلعنا من هالموقع بدون سلام ولا كلام
الحين...وانا ع السرير قبل النوم قعدت استعرض أحداث يومي....(عادتي اليومية)
لقيت سالفة هالأخ المبتعث تدور في راسي...وقعدت اربطها بالواقع
قلت يمكن الرجال عنده سالفة...
يعني الحريم كانت ملابسهم الداخلية طويلة (خط البلدة) الله يمسي جداتنا بالخير
شوي شوي وبدت تقصر..وتشمر
لين صارت الله لايبلانا كنها (مغاطات فلوس)!!!!
وقعدت اقارن المرأة السعودية......وعبايتها (مع الاعتذار والتقدير والحشيمة للمرأة السعودية و للعباية)
كانت عباية رأس...
ثم(ن) صارت عباية كتف
وبعدين مخصرة
واتوقع خلال العشر سنوات الجاية بتتحول الى بنطلون...
في البداية بتكون على شكل بنطلون فضفاض....بعدين بتضيق مع الأيام....
ويمكن...بعد خمسين سنة إن الله أحياكم.....تقرون هالخبر :
الهيئة تداهم محلات بيع العبايات في أسواق طيبة وتتلف مئات من عبايات (أم خيط)!!!
يا الله الخيره