01/11/2011, 02:29 AM
|
| زعيــم متواصــل | | تاريخ التسجيل: 01/10/2011
مشاركات: 165
| |
|
هل السعودي مواطن متخلف ؟
أي شخص عربي أو سعودي يذهب إلى أوروبا وأمريكا وكندا ( الغرب بشكل عام ) سيذهل من قوة النظام وانتشاره بين الناس من يوم تنزل المطار وحتى مواقف التاكسي وفي الشوارع والمرافق الخاصة والحكومية ما تشوف إلا النظام والترتيب شي لا يكاد يصدق .
أي إنسان سواء من أهل البلد الأوروبي أو من السواح إذا يبغي يروح إلى أي دائرة حكومية يعرف وش راح يصير له وش إللي له وش إللي عليه ولا تحتاج تطلب فزعة ولا واسطة .. اللهم كل إللي عليك تروح للاستقبال أو العلاقات العامة وهم راح يعلمونك بكل شي .
في الغرب كل شي عندهم 1 و 2 و3 في الورق وأيضاً 1و 2و 3 على الواقع .
بكذا تقول الغربيين ناس نظاميين ومرتبين .
السؤال : ليش هم نظاميين وحنا أنواع الفوضى في الشارع وفي الدوائر الحكومية وفي مطاراتنا وفي جامعاتنا وفي مدارسنا إلخ ؟
هل العرق دساس ؟ هذا ما هو جواب ..
لو تتطلعون على تاريخ الأوروبيين حكومات وشعوب ما راح تصدقون بأنهم كانوا على رأس البشر في التخلف والجهل بل عرف عنهم قلة الاستحمام وانتشار الخرافات بينهم إلى درجة غير مسبوقة بل وصل الأمر بأن الكنيسة منعت وبالقوة تعلم الشعر أو الرياضيات لأنها من الهرطقة يعني كفر وفلسفة زايدة .
وشوفوا وين وصلوا الآن .. السؤال مرة ثانية ليييييششش هم منظمين ؟
الجواب أكيد النظام وتطبيق النظام وتطبيق العقوبات على المخالفين للنظام كائن من كان .
طيب سؤال ثاني : ليش حنا ما نصير مثلهم ؟!!!! وش المانع ؟
المشكلة عندنا يقال بأنها مركبة يعني من الدولة ومن المواطن .. مثال : تحصل الطريق كله حفر ومطبات وهذي مسؤولية الدولة .. وتحصل المواطن يمشي على هالطريق بسرعة أو عكس سير أو قطع إشارة وغيرها وهذي مسؤولية المواطن .. لكن أيضاً السؤال لازال مطروح : المسؤولية على مين ؟
من وجهة نظري الدولة هي المسؤولة فقط ولا غير الدولة .. كيف ؟ :
المواطن السعودي من وجهة نظري عنده قابلية لتطبيق النظام .. لا تستغربون .. أعطيكم أمثلة :
توقف عند إشارة فيها عشر سيارات وتحصل سيارة واحدة تقطع الإشارة !! على طول تقول وش هالتخلف ! .. لكن نسيت بأن فيه تسع سيارات واقفة ومحترمة النظام بالرغم من بأنهم لو قطعوا الإشارة والله العظيم ما عندك أحد ولا أحد درى عنهم ومع ذلك واقفين عند الإشارة ومحترمين النظام ..
أيضاً تدخل دائرة حكومية تحصل المراجعين أنواع الفوضى وعلى طول تقول شعب متخلف .. لكن صدقني هذا ظلم لأن المراجعين ما يدرون وين يروحون وعند من يمشي أوراقهم , فهم ماهم متخلفين لأنك لو تدخل بنك تحصل نفس المواطنين مرتبين ومنظمين .. ليش ؟ لأن البنك مرتب ومنظم ويعلم الناس من وين يروحون وكيف يخلصون أمورهم بكذا تحصل البنك هدوء وترتيب وبدون فوضى .
مثال آخر : المطار إذا ما فيه مشكلة من الخطوط تحصل المسافرين ما سكين طابور ومحترمين وهدوء .. لكن لو فيه لخبطة وفوضى وتأخر رحلات من الخطوط تحصل المسافرين يعيشون حالة من الفوضى .
عندنا أكيد عينات غريبة عجيبة ترفع الضغط وهذا موجود في أي دولة صدقوني في كل الدول .. لكن ليش ما نشوفهم في الغرب ؟! .. لأن عندهم عقوبات لأشكالهم , وعندنا ما فيه عقوبات بالتالي راح تشوفهم في كل مكان .. لكن صدقوني من الظلم التعميم .
حنا دائما نرى المخالف والمهايط وننسى بأنه في ذات المكان ناس محترمة وماشية بالنظام بالرغم بأنه لا يوجد ما يردعهم لو خالفوا النظام . بكذا أظن بأننا أحسن من الأوروبيين وإلا لأ .
من هنا راح أسئل مرة ثانية : من المسؤول عن بعض مظاهر الفوضى وحتى التخلف في بلدنا ؟
|
بالاسبوع ذا 
الوضع العادي
