في ذمة الله ...! - نادي الهلال السعودي - شبكة الزعيم

الـمـشـاغـب · #1 24/04/2009, 03:21 PM

نعم , ماجد مقبل في ذمة الله بعد أن صلى اليوم صلاة الفجر في جماعة ..
فقد قال صلى الله عليه وسلم : " من صلى الفجر في جماعة فهو في ذمة الله حتى يمسي " ..!
<<

أتوقع محد منكم صدّق العنوان .. لأن ابن مقبل ببساطة قطو بسبعة أرواح ( وعسى عمره طويل )

أجل أحط ماجد بذمة الله بالعنوان وجنبه هالفيس (

) وتبون تصدقون؟

استفتحت هالموضوع بهالمقدمة اللي ما تبشر بالخير عشان أتكلم عن موضوع يرفع ضغطي ويمغص بطني

رجاء لحد يجي يستذكي ويقول أني راح أتكلم عن موضوع الإشاعات

الموضوع يختلف عن هالشي .. وجتني الفكرة بعد موقف حصل قبل يومين ..!
كنت ناوي أكتب موضوع وأنتظر إجازة الرقابة خصوصاً أنه مخصص لفئة +28

لكن فضلت أني أكتب هالموضوع وأجل هذاك الموضوع .. لأن مالها داعي أتوقف قبل ما أقول اللي بنفسي
عن هالموضوع ..!

كنّي قاعد أسمع أحد يقول اخلص علينا وقل لنا وش بتتكلم عنه

لذلك أحب أقول له انثبر يا مال البواسير والدود والبلهاريسيا

لا تحطمَن

الموضوع اللي أبتكلم عنه مدري وش أقول عنه .. بس أكيد عن شي يرفع الضغط

تقدر تقول انه عن التفاول بالشر ..!

واحد من العيال تزاعل مع وحدة من اللي يعرفهم ..!
في آخر كلامه معها قال لها : أنا خلاص متضايق ورايح الرياض بكرة وان صار لي شي فهو بسببك
والله لا يسامحك

باليوم الثاني خلى واحد يرسل لها انه صار عليه حادث وانه بالمستشفى

يلعن حريشه ما عنده وقت

مع كامل احترامي له إلا أن الغباء يكرم ان يكون داخل جمجمته الفاضية

لا والمشكلة انه زعلان انها ما دقت عليه تتطمن

والله لو هي بقرة ما صدقت هالحركة الغبية ..!

شخص ثاني
كل كلامه .. " فلانة سددت فاتورتي " , " فلانة حوّلت لي المبلغ الفلاني " , " فلانة أهدتني هدية بالقيمة الفلانية " ..!
والعيال اللي يسمعون له بعضهم تقوطر سعابيلهم ويقولون يا حظه , والبعض الآخر يضحك على هالشخص
لأن هذا مو موضع تفاخر

أعرف بعض الأشخاص من هالنوع .. يستغلون البنات بالطريقة اللي أتكلم عنها في موضوعي ..
إما يقول لها أنه صار عليه حادث وما يدري وشلون يصلح سيارته , أو يقول انه مريض ولا عنده تكاليف العلاج ,
وبعضهم يبيّن أنه متضايق وكئيب عشان تسأله عن السبب ويوضح لها انه مطفر ومحتاج فلوس بس ما يدري من وين يدبرها ..!
البنت طيبة وتصدّق هالأكاذيب .. ممكن تكون حالتها المادية جيدة وتساعده بدون ضرر عليها ..!
وممكن تكون هي نفسها أكثر حاجة للفلوس من هالشخص لكنها تحاول تدبر المبلغ المطلوب ولو بالسلف ..!!
وبعد كل هذا يجي هالاستغلالي ويتفاخر بأن فلانة تحبه وتحوّل له فلوس ..!!

شخص ثالث تعرّف على بنت عن طريق الجوال ..!
هالشخص من نفس طينة اللي فوق .. يعني استغلالي ويتفاول على نفسه كثير

المهم .. مرة قال لي أن ما عمره ندم على أي علاقة كثر ما ندم على علاقة مع هالبنت .!
سألته عن السبب وقال لي : ان عادته ان البنات يتصلون عليه , ( طبعاً أكيد قايل لهم ان حالته المادية صعبة )

المهم .. يقول ان هالبنت تموت فيه بس ما تدق عليه إلا يوم الأربعاء بس ..!
وعلى هالحالة أربعة شهور ..
إلين مرة سألها عن سر اتصالها بيوم الأربعاء طول هالمدة ؟!!
هنا صدمه جوابها .. وأقسم بالله دمعت عيني يوم علمني بجوابها

قالت له : أن فسحتها للمدرسة ريالين .. وتحرم نفسها من الفطور عشان تجمع العشرة ريال بنهاية الأسبوع وتشتري بها
بطاقة شحن بعشرة وتكلمه

بالله عليكم .. هل مثله يستاهل انها تحرم نفسها الفطور لأربعة أشهر عشان بس تسمع صوته؟

فيه مواقف كثيرة تقهرني لما أسمعها وكان ودي انكم تنقهرون مثلي .. بس ما ودي أطوّل

ودي بس تكون البنت أحرص على نفسها من نفسها وما تكون طيبة زيادة عن اللزوم ويستغلها شخص ما يستاهل ..!
وودي بعد ان يفكر أي خروف قبل ان يستغل البنت ويتذكر ان هالفلوس اللي ياخذها بدون أي وجه حق وبالخداع
والتفاول على النفس هي فلوس حرام ..
وأن يمكن ربي يبتليه ويحقق اللي تفاول على نفسه فيه ..!!

الموضوع كتب بشكل سريع لتسجيل الحضور .. حبيت أن يكون خفيف علي وعليكم

بيننا ان شاء الله بالموضوع القادم بعد ما تجيزه الرقابة

يالله الحين طسوا ... يا لبى قلوبكم