السلام عليكم ورحمة الله وبركاته
كيف حالكم يالربع كل ابوكم عساكم بخير



بصراحة يالاخوان حبيت اطرح هالموضوع بحكم اننا قربنا على موسم الصيف والاجازات والسفريات للخارج للدراسة وللغة ولغيرها والموضوع موجه للطلاب الجدد اللي حابين يسافرون للخارج للدراسة بالأخص .
في البداية خلال سفرياتي لكندا ولنيوزيلندا لاحظت ملاحظة خاصتا في فصل الصيف ملاحظة مهمة حبيت اضعها لكم ليتجنبها وليعرفها من لا يعرفها من باب المسلم اخو المسلم . فالملاحظة اني ماشاء الله في نيوزيلندا كل ماركبت باص الاقي سعودي ضايع وكل ماركبت صب واااي في كندا الاقي سعوودي ضايع والاقي في وجهه الاسى والحزن والكائبة والضيقه والنكد نعم هذي الحقيقة يالاخوان ،،
هل السبب الغربة ؟ أم السبب اختلاف العادات والتقاليد ؟ ام السبب قلة المال ؟ ام هناك اسباب اخرى ....؟


فخلال سؤالي لهم السؤال التقليدي كم لك في هالبلد يالاخو ؟
الجواب اسبوع حولها .
السؤال الاخر واضح انك طفشان ؟
الجواب يارجال الله يقلع اللي يسافر خارج السعودية هههههه
ايوالله يالاخوان هذا هو الجواب ، الواحد قبل السفرية في السعودية يكون متحمس ونا ماراح اكلم عرب ونا اذا شفت العرب حتى السلام ماراح ارسلم عليهم ونا بفلها هناك ونا ونا ونا ولكن ينصدم وهو راكب الطائرة وفي نص الطريق ان وجهه ينقلب ويجيه المسمى ــ الحنين للوطن ــ وتبدأ اعراض الضيقه والهم والغم .
فالمهم يالاخوان انا طرحت هذا الموضوع للجميع وبالاخص الاخوان الراغبين بالسفر في العطلة لأهميته والله لابد منهم الاستعداد معنويا وماديا ..
الاعداد المعنوي يفهمه نفسه ويعلم انه اول اسبوع او اسبوعين راح يحس بضيقه وطفش غير طبيعي وبرغبة بالرجوع على اقرب طيارة كما صارت لزميل لي ــ وصل لكندا يوم الخميس صباحا تقريبا ورجع الخميس القادم يعني اسبوع واقل من اسبوع بعد ورجع السعودية ــ هذي قصة حقيقة يالاخوان وصايرة قبل شهر بالضبط لقريب لي من النوع الاجتماعي جدا جدا والقصة الاخرى ــ حدثت لي في نيوزيلندا لمجموعة شباب سعوديين منهم المتزوج ومنهم صاحب السفريات ومنهم اول سفرية والله يالاخوان مجرد وصولهم للاراضي النيوزيلندية الاول خفض مدة دراسته من ستة شهور إلى شهرين والثاني صاحب السفريات خفضها من ثلاث شهور إلى شهر والثالث المتزوج والمدرس خفضها من ثلاث شهور إلى شهر وغيرهم وغيرهم وصارت حوسة غير طبيعية ونا احاول فيهم يالربع صبروا اول اسبوع تحملوا وماحولك أحد ،، بعد مرور الشهر حولها يجيك الكلام السنع ويرجعون مدة دراستهم للمدة الاصلية وشبلاكم يالربع والله في البداية تصرفنا تصرف اطفال واستعجلنا لكن هالحين تعودنا والود ودنا نمددها اكثر من هالمدة ــ فبصراحة الموضوع بالغ الاهمية ولا يستهان به نعم الغربة صعبة يالاخوان صعبة صعبة تحتاج لاسبوع او اسبوعين تتاقلم على الوضع والبعض يحتاج لشهر والبعض الاخر المرتبط بعلاقة سواء خطوبة او غيرها تزيد عليه هموم الغربة اكثر .
والبعض من الاخوان يسافر ورأس ماله غير كافي يعني يقول انا بوفر ونا ونا لكن لمن يشوف زملائه واصحابه وقت بريك الغداء طالعين للغداء يشوفهم وقت الويكند رايحين لجزيرة رايحين لمنطقة سياحية للترفيه عن النفس رايحين والصرفية شغالة يحس بضيقة تجيه الرغبة بالذهاب معاهم بالتمشية بشراء بعض الحاجات المهمة لكن للاسف الحالة المادية ضعيفة وتزيد عليه الضيقة وتزيد ونا اتكلم بتجارب واقعية وحقيقة صارت لي ولغيري يالاخوان ..
فالخلاصة يالاخوان الراغبين بالسفر للخارج لابد من فهم الكلام اللي قلته لكم جيداً لان والله هذي الحقيقة ولا تستهين فيها ابدا أول اسبوع مايمنع تكلم ناس عرب او سعوديين لانك راح تشوفهم بكثرررة كلمهم على خفايف ونس نفسك شوي طير الضيقه والضغط من داخلك بعد ماتتأقلم على الوضع وتحس نفسيتك ارتاحت شوف مصلحتك وماعليك فيهم .
راح تشوف الشباب اللي يرفعون الرأس اللي لابس اسواره واللي لابس سلسال ذهب واللي ماسك زقارة الحشيش وراح تشوف الشاب اللي يراكض وراء بنات المعهد ويصرف عليهم للاسف الشديد ،، ولكن انت ماعليك فيهم كل انسان عقله براسه ويعرف خلاصه .
وبخصوص الامن ياشباب كثير يتابع هالافلام ويشوف الجرائم اللي فيها ويسمع عن العنصرية وغيرها لكن كلمة حق اقولها بحكم سفرياتي المتكررة والعديدة لكندا ونيوزيلندا ماوجدت اي عنصرية او جريمة حصلت امامي ابد والحمدلله وطبعا لا اقول لك معدومة ولكن شبه معدومة .
فالخلاصة ياشباب اتمنى كلامي ومقصدي من هالموضوع البعيد عن الرسميات والهندسات فيه ولكنه يحمل في جعبته اشياء مهمة جدا اتمنى قرائتها ..
قبل مانهي حاب اذكر كم سالفة صارت لي مع بعض الشباب


ــ السالفة الاولى صارت لي في صب وااي كندا ونا داخله وهو مقرب على الوقوف اشوف لك واحد ملامحة معروفة ههههه سبحان الله ربعنا لو يهندس بوجهه لو يقلب شعره برتقالي ينعرف ينعرف مهما يسوي فالمهم المح لك واحد ملامحة سعودية وواقف معاه كتب المعهد وواقف وسط منطقة الصب واي وكل مايمر عنده واحد يمد له يدهـ كأنه يبي شي ههههه فالمهم نزلت من الصب واي وأشوفه كل مايمر جنبه واحد يمد له يده ويقوله ــ لو سمحت ــ بالعربي طبعا ، فانا كتمت الضحكة داخلي وقلت ابسير جنبه واشوف يعرفني او لا فمادريت الا وهو قافطني قفطة من كتفي انت سعودي ، ضحكت وقلت له هلا بولد الديرة ،، قال يارجال الله يلـ( بين قوسين ) إللي يطب هالديرة ثاني ههههه وشبلاك ياولد العرب ،، يقولي ياخوي انا صاير لي ثلاث ايام بالمعهد وكل يوم على هالموال اوقف في هالمنطقة انتظر فاعل خير يوصلني للبيت فالمهم خذيته وطمنته شوي وارتاحت نفسيته شوي وفهمته ان اللي يسويه هذا شي طبيعي لان سواه قبله مليون واحد وقلت له بعد اسبوعين او ثلاثه راح اقابلك وبتندم على كلامك اللي قلته لي قبل ومر على هالكلام شهر تقريبا او شهر ونص واروح لك مقهى ( مقهى ابو هيثم حق كندا ههههه ) وانا اشرب هذاك الشاهي نعناع اشوف لك الاخ داخل ويوزع ابتسامات ماشاء الله عليه ،، واعترف لي انه ندمان على كلامه اللي قاله لي قبل وان اموره تحسنت وفهم طريقة الباصات والصب واي وارتاح جدا جدا لان مشكلة الصب واي وفهمه تعد مشكلة للجدد لكن لو يركز فيها راح يعرف انها بسيطة فوق مايتصور ....
السالفة الثانية يالربع صارت لي في نيوزيلندا تقريبا اول رحلة لي في نيوزيلندا وراح اقولها لكم
بصراحة قبل السفرية ماتتخيل شكثر مستانس وتخطيطات مع الشباب وكلمني صاحب المكتب وقالي بص يازلمة أي شاب سعودي بسلم عليك ماتردش السلام عليه لانه راح ينشب لك هههههه قلت يارجال لاتوصي حريص قسم لأسحب على العرب كل ابوهم وماتكلم ولا كلمة عربية ..
فالمهم خويكم يروح المطار وهو يوزع ابتسامات وضحكات وركبت الطيارة وحسيت بنقزة في قلبي ههههه وطارت الطائرة وحنا في السماء جلست افكر هالحين بروح هناك كل هالمدة ولغتي مش حالك وانا عربي وسعوووودي بعد ول ول ونا ماشي والهواجيس تجيني وتجيك هذيك الدمعة ماشية مليووون من عيني هههههه واحاول اخبيها لكن ماش الا غصب تنزل وبدأ مسلسل الندم والحنين للوطن ااااه منه بس اول حلقات هالمسلسل الضيقه والهم والتفكير وصلت لنيوزيلندا استقبلني واحد نيوزيلندي وجاتك الضيقة الثانية وااااوو لعبووا علي انا قايلهم ابي عايلة عجوز ماقلت ابي رجال ( اثر هالرجال صاحب المعهد جاي يوصلني للعجوز ) ونا افكر واقول راحت علومك ياولد هالحين بيخطفك ويطلب فدية والتفاكير تجيني وكل كلامي حقيقة ايوالله يالربع ووصلني للعجوز واشوف هذاك الوجه هههههه جاتني مثل الصدمة ماقدرت اتكلم تقولي هو ار يو اقولها الله يسلمك بالعربي ضاعت علومي وتلعثمت ورحت للغرفة وهموم الدنيا فيني ماقدرت انام في الليل خايف تجيني العجوز او تجيك عصابة المهم استمريت على هالحال يومين ويجيك اول يوم دراسي للمعهد ويجي صاحب المعهد مشكورر للبيت ويوصلني للمعهد ويوديني لمحل يفطرني فيه وحنا ماشين في الطريق للمعهد برجلينا طبعا المح لك واحد من نص كيلو ههههههههههههههه ، ياولد هذا عربي مو مصدق عيوني واوقف والرجال مستغرب اقوله هذاك عربي والرجال متنح للحين ،، وكل شوي يقرب يقرب إلين مايوصل وطلع الاخ سعودي يدرس في نفس المعهد اللي انا مسجل فيه ،، وتجيك هذيك الابتسامة مني وكان ودي ادخل في مخباته عشان مايبعد عني وارتحت شوي واروح معه للمعهد ونا افكر في داخلي ،، ايييه هذا اللي كان يقول ماراح أرد السلام عليهم وأبسحب على ابو عرب كلهم ومع مرور اول اسبوعين ارتاحت علومي شوي وكل مايجينا طالب سعودي نفس الحالة اول فترة نعلمهم طريقة الباصات ونفهمه المشكلة ويضبط وضعه إلى أن جاءت المشكلة الكبرى لي بدخول أغلى انسانة عندي للمستشفى بعد اضطراب مفاجا لها مع مرض الله يشافي منه كل مسلم ( السرطان ) وخربت نفسيتي وتدمرت لاني كنت افكر فيها كثير واحتيها كثير وخايف عليها كثير ،، ونا ذكرت للشخص المرتبط بخطوبة او بمشكلة وغيرها راح يكون باله مشغول وراح تزيد عليه الضيقه شوي ،، وماتت الله يرحمها أن شاء الله
ختامها يالاخوان اتمنى من الجميع المشاركة ولو بذكر موقف صاررر له في الخارج او تجربة قضاها او سمعها ليستفيد منها الاخوان والله يوفق الجميع ان شاء الله .



وعلى طاري النشبة مع الطلاب الجدد اذكر كان فيه طالب ساكن في الحارة اللي ورانا فكنت اعلمه طريق الباص في الروحة والرجعه وارجعه للبيت واتفاجا ونا طالع من البيت الصباح الا وابو الشباب في وجهي هههه يالله صباح خير ،، قلت ماعليه اول يوم مشيها ياولد
ويجي ثاني يوم وافتح الباب الاقي ابو الشباب في وجهي ويقول أهاااااااااااااااااااا
ونا اقول في نفسي والله ابو الشباب دعس وصاير ينكت وحركات قلت يارجال مشها ثاني يوم له
ويجيك ثالث يوم ونا نايم أحصل ابو الشباب فوق سريري واقف ويقول أهاااااااااااا وعلى هالموال ويمر اسبوع كامل وخوينا في الله مصبح في وجهه ممسي في وجه يعني باختصار ناااشب نشبة غير طبيعية ،، في الاخير زبدت له وقلت له يابن الحلال اذا قبلت بكرهـ عند باب البيت قسم لأخلي المعهد يغير السكن حقك هههههه ركد بعدها خوينا في الله

(علفكرة يالربع انا والله راح بالي ونسيت ان منتدى الزعيم يوجد قسم للمغتربين ووضعت الموضوع في المجلس العام اسف مره اخرى وكل مانريده والله هو فايدة المغتربين بالدرجة الاولى )