حقيقة يالاخوان فيه قضية للاسف يجهلها الكثير من المغتربين وغير المغتربين وهي فوائد الاذكار والادعية التحصينية اللي بفضلها الله يحمينا من كل شر والانسان مايضمن نفسه ونا خوكم وللاسف الشديد كثير من الأخوان اللي أعرفهم ماعمرهم قروها فمابالكم وهم في الغربة ومن باب العدالة أعرف بعض الأخوان مايفوت صلاة الوتر رغم بعض الصعوبات اللي تواجههم .
فأنا بدوري حاب اذكر بعض المواقف البسيطة اللي مرت علي ومنها لأبين فوائد الذكر وتحصين النفس قبل الخروج من المنزل .
بصراحة يالاخوان انا كنت مهمل جدا الاذكار وتحصين النفس ونكون واقعيين كنت ماعرفها اساسا وماكنت اعرف اهميتها ايضا وبيني وبينكم ماكان فيه تذكير او تشديد على هالموضوع رغم اهميته فالمهم كنت أسكن في منطقة تكثر فيها الجرائم وبصراحة تحس أنك عايش في جنوب أفريقيا فكنت أطلع من البيت بدون ترسيم خوف لايقولون هذا مطنوخ او دراهم ويتصيدون في الماء العكر هههههه المهم كنت ألبس لبس عادي جدا جدا لو أني لابسه بالسعودية العالم بتضحك علي وبتقول هذا نازل يجيب اغراض من سيارته ويرجع لبيتهم ههههههه المهم مالكم بالطويلة ،، فماكنت احصن نفسي أبد رغم أن معاي في الشنطة كتاب أذكار موجود من ايام الوالد الله يطول بعمرهـ بحكم ان الشنطة سارقها منه فماكذب عليكم يالاخوان كنت أنزل للشارع ونفسي مو مطمنه ابد رغم اني ماضيع الفرض ولله الحمد فأذكر مره من المرات على الساعة ثمان في الليل ذبحني الجوع وكان ساكن معاي واحد من الشباب فالمهم أتفقنا واحد ينزل يشتري أكل والثاني يغسل الصحون ويسوي شاهي فأنا اخترت الخيار الاول رغم أنه مشوار وقلق والجو بارد لكن بعدين تعرفون ليه أخترت هالخيار
.
المهم يالاخوان وأنزل الشارع بدون بسمله وبدون تعوذ من الشيطان ونا ماشي ألمح ثلاثة شباب كانوا جالسين يوم شافوني مشيت مشوو وراي واحد أسود والاثنين البقية ملامحهم هندية تقريبا وبصراحة أوقات تجيني صفة غبية أحب اذا شفت وجه أي انسان اتذكر من اللي يشبه له هههههه فالهنود الثنين ذولي ذكروني بأثنين كنت أتعامل معاهم بسرية في حي الشميسي أيام كانت اشرطة الفيديو المنسوخة ممنوعة ههههه فكانوا يقابلوني في حارة مظلمة أما الخال والكذب خيبة ماقدرت اشوف ملامحه الوضع كان مظلم شوي وهو مكملها ولابس له هذاك القبوع اللي يجيك ناشب مع الكوت وهالحركة منتشرة عند خوال كندا بأمكان اللي زار كندا يلاحظها بكثرة المهم وامشي وذولي وراي ومن دلاختي أقول لنفسي ياولد هذولي شكلهم ناويلك على نية ونفسي ترد علي وتقول بس انت اصبر شويه ههههههه وفي الاخير طنشتهم وكاني مادريت عنهم ودخلت المطعم
وقابلت اللي طلعت عشانها قابلت منى الافغانية او كما احب ان ادلعها منى شلبي
بصراحة ماشاء الله عليها جميلة حيل وماتمل وانت تطالع في وجهها فكنت أوقات أخترع لي موضوع عشان اروح المطعم و ادخل واشوفها اخر مره دخلت عندها مع الزحمة والربكه ومن كثر مانيب مدقق فيها حتى كلامها حفظته فأول مادخلت في وجهها قلت لها لاشعوريا Can I help u بنفس لهجتها فالبنت أنكمخت شوي ونا أنكمخت بعنف فقمت أصرف واقولها أنفع أكون كاشير جنبك <<<< من قلبه قايلها وتمناها ههههه فضحكت البنت وليتها ماضحكت
.
فالمهم يالاخوان دخلت المطعم وهالثلاثة وقفوا عند الباب ونا أطلب الطلب وابي ادفع الفلوس اشوف الثلاثة يطالعون علي من خارج المحل ويراقبوني وواضح السالفة انهم لصوص ولكن مدري شبلاني فاخذت العشاء ومن الجوع وحرارة الدجاج وريحته ووجود منى في المحل كنت أبسحب على خوينا واكله كله في المطعم ههههه ولكن تذكرت ملامح وجهه وهو يترجاني اروح اشتري ورحمته
فنزلت من المحل ورجعت من نفس الطريق كان طريق ضيق ومظلم وايضا اقولها مدري شبلاني رغم اني شايفهم من رحت للمطعم وهم وراي وشفتهم يراقبوني بنظراة غريبة وكنت عارف انهم لصوص ورجعت ايضا من نفس الطريق المظلم المهم ونا ماشي بنص الطريق اسمعهم يناودني لو سمحت لو سمحت ونا في هاللحظة تذكرت القصص اللي اسمعها واللي اقراءها من زملائي العايشين في كندا ومن بعض الافلام اللي شايفها بالتلفزيون لدرجة ان بعضهم يقولون لي اذا دخل عليك حرامي ويبي يسرق اغراضك من بيتك ساعده هههههه يعني اذا جاء يشيل التلفزيون حقك قوله عنك عنك ابشيل معك ولا تعارضه او تحارشه ابد فالمهم دعس الخال ووصل جنبي ويقولي لو سمحت عندك ولاعة وكأن الراحة بدت تدخل في قلبي قلت له ماعندي وامشي بسرعه الا شوي يوقف قدامي ويمسك رقبتي والاثنين ذوليك وقفوا وراي وقالي طلع محفظتك قلت له كل اللي عندي دولار واحد مايحتاج محفظة عشان اشيله حقد وطلع سكين من مخباه وقالي طلع دراهمك فعرفت الدعوة مافيها لعب وطلعت كل اللي بمخباتي كان دولار وربع تقريبا و خذاهم وخويه من جنبي يشد الكيس اللي فيه العشاء ونا اشد واقول له الا العشاء نفسي فيه ياصديقي وعيني حاره عليه ويحط الخال السكين على رقبتي واعطيهم العشاء الا شوي يقولي افسخ والسكين على رقبتي قلت له هنا عاد اسمحلي ماراح نتفق هههههه ويقولي افسخ ونا اقوله مابي ويعصب علي الخال ويصرخ ويقولي افسسسسسخ الدسوس اللي بيدك أنكمخت شوي وفسخت الدسسوس وعطيته وقلت الحمدلله ماقال افسخ جزمتك وانتم كرامه كانت جديدة وغالية ،، عارف وين تفكيركم راح هههههههه فمشيت عنهم بعيد وضمنت انهم ماراح يجيبوني ههههههه وجلست اصارخ واقوله يالخال أنت والدلوخ اللي معك في مخباتي خمس مية دولار وانحشت <<<<< يقاله بيعذبهم عذاب نفسي ههههههه .
فدخلت الشقة والاقي خوينا مزهب الصحون وطربان ويغني مع نفسه وكان معطيني ظهره ويقولي دخل العشاء في الصالة مباشرة ودخلت وانسدحت بالصالة ويجيك خوينا وينصدم واذا اجتمع الجوع مع الصدمة تصدر ألفاظ نائية ههههههههه ياولد وين العشاء أشرت بيدي على راسي وقلت هذا العشاء <<<< تعشو فيه الذيابه ههههههه ،
فعطيته تصريفه وقلت له ان المطعم مقفل خفت أعلمه بالحقيقة ونتوهق بعدين من يشتري لي عشاء هههههههههه وبعدها يالاخوان تعبي النفسي زاد شوي والله لأني اطلع من البيت ونا خايف ومرتبك فدقيت على الوالد بعد فترة وقلت له خويي صارت له سالفة كيت وكيت قالي ياولدي قله يحصن نفسه ويمسح جسمه وماراح يصير له الا اللي كاتبه الله ففعلا صرت اقراء على نفسي يوميا واحصنها ويعلم الله يالاخوان من يومها ونا امشي وكلي ثقة وطمئنينة ونسيت شي اسمه خوف لاني تحصنت بالله وتوكلت عليه ومن توكل على الله فهو حسبه حتى هالثلاثة كنت أقابلهم اوقات وكأنهم اول مره يشوفوني رغم اني قابلتهم مرتين في حارات مظلمة .
فكانت بصراحة تجيني مواقف كثيرة اذا تحصنت قبل ماطلع من البيت احس فيه شي يحميني ويبعدني عن الحرام بشكل غريب فان شاء الله راح اذكر بعض من هالمواقف في المره الجاية ان شاء الله .
ونصيحة لكم يالاخوان وأخص منهم المغتربين تحصين النفس والاذكار ماتاخذ ثلاث دقايق او خمس دقايق جربها مره وحده وشف الفرق والله يوفق الجميع ان شاء الله .
الوضع العادي
