تــعددت الأســـبــــاب .. والــجــاثــوووم واااحد ..!!
بسم الله الرحمن الرحيم
السلام عليكم ورحمة الله وبركاته
مساااكم الله بالخير جميعاً .. وأسعد الله اوقاتكم بكل خير ..!!
فلتعلموا اخواني الأعضاء إن أصعب مايواجه العضو في كتابة الموضوع
ألا وهي المقدمة  .. دائماً اتورط فيها لدرجة إني آخذ هم نجاح المقدمة أكثر
من إني آخذ هم نجاح الموضوع  .. فنجاح الموضوع لايهمني بل يهمني نجاح
المقدمة <<( اقوول ألبخ بس  )
زملاااااااي الأعضاء انا انسان عجل وراح ادخل بالموضوع دوغري 
فلو تكرمتوا كل واحد يجلس بمطرحه لنبداً بكشف الستار عن الموضوع ..!!
الجاثوووم وماأدراك مالجاثووم كلمة نسمعها تتداول بين العربان
تارة يقولون الجاثوم وحش مفترس وتارة يقولون إنه فارس ملثم 
فأنا انسان يالربع زارني ذات يوم مايسمى بالجاثوم  وياكثر زياراته
اللي ماتخلص ماشاء الله عليه هالجاثووم يسمع بزيارة سابع جااااااااار
لأن معي في البيت أكثر من 7 أنفار فليس من الأولى أن يزورهم ويهوون
عن زيارة الثامن اللي هو أنا 
فالجاثوم أصبح مداوماً على زيارتي مدري وش عاجبه بزيارتي ظنكم إنه حبني
وإلا إنه اعجب بطريقة نومي الأستوائية
فذااات يوم مغبر وشاحب وانا منهمك وغاطس بالنووم آتاني الفارس الملثم
اللي يسمونه بالجاثووم وخنقني وجثم على صدري ولسان حالي يقوول (يلعن أم
المزح البايخ )
وأصبحت مثل الأسير المكبل بالسلاسل والذي لايستطيع الوقوف
أحس بما يدور حولي من كلام السهرانين وشخير النائمين لكن الجاثووم
مصر إلا ياخذه بثاره ويموتني هذا كان تفكيري  << (تفكير واحد له سوابق )
فحسيت إن نهايتي قربت لكن تذكرت إن فيه رب ماينسى عباده فقعدت
أقرأ بعض الآيات والأذكار في قلبي ونفسي على وشك إنها تنقطع ..!!
وفي هاللحظه عااادت للي الروح وفكني الجاثووم بعد مازنطني وبغى
يموتني  .. انا مدري من اللي لاعبن عليه وقايله إن الغدير ذابحن أبووك 
وحمدت ربي إن المسألة كانت تهديد ووعيد من الجاثووم .. ومن يومتها
وأنا افكر في هالجاثووم .. من يكون ؟؟ .. ومنهو ابووه ؟؟ .. وليه خنقني ؟؟
ظنك يالغدير إنه طالب حرش ؟؟ .. طيب ليه مايقابلك وجه لوجه ؟؟
كل هالأسئلة كانت تدور بدمجتي المصونة .. وماكان لها جواااب 
لدرجة إني افكر بعض الأحيان إني انام وانا فاتحن عيني عشان مايرجع
لي سيء الذكر الجاثووم قبحه الله ..!!
وتكررت زيارات الفارس الملثم وعلى هالمنوال يخنقني وإذا درى إني اقرى
الأذكار ينحاش ويطلق سيقانه للريح وبائت محاولاتي باصطياد الجاثووم
بالفشل  << ( اقوول خل عنك والله لو تشوفه لتفطس مكانك )
وشجعني الفضوول إني اسأل عن الجاثوم عند بعض طلبة العلم الموقرين
بعضهم قالي : هذا نوع من الجان يكتم على صدر الأنسان بسبب
المعاصي وتأخيره الصلاة أو تركها .. ويجثم على صدر الأنسان
لفترة بسيطة حتى يذكره بالموت ويتوب ويبتعد عن المعاصي ..!!
والبعض قالي هذا بسبب كثرة الأكل الدسم آخر الليل .. والبعض
قال إنه بسبب انقباضات وارتخاءات في عضلات الجسم ..!!
وأصبحت محتاراً من أصدق فيهم ؟؟
لكنني أخذت الرأي الأكثر خطورة وواقعية ألا وهو الرأي الأول بسبب
المعاصي وتأخير الصلاة أو تركها .. وأصبحت أفكر فيه هل انا مقصر
في صلاتي ؟؟ هل أنا عاصي ربي ؟؟
والحمدلله من بعد هالتفكير أصبحت حريصاً على عدم تأخير الصلاة
أكثر من وقتها .. وبفضل الله ابتعد هالجاثووم عن زيارتي بعد قراءتي
للأذكار ..!!
.
.
لكن في النهاية تعددت الأسباب والجاثوم واحد ..!!
وفتكم بعافيه .. ولنا لقاء مع جاثوم آخر
الغدير الأزرق ورده
لأهل الشأن :
تراني تعذبت مع هالموضوع كل ماحاولت انسق خرب وصار كنه
وجه عبدالوهاب
خلاص لاعاد تمدحوني عن الأستشاريين تراني هونت
اعتذر عن رداءة التنسيق من المصدر
الله يقلع الساعة اللي يكتب فيها الواحد بالوورد
اخر تعديل كان بواسطة » الغدير الازرق في يوم » 06/12/2007 عند الساعة » 11:14 PM | 