الينك جبتها ياخوي راعي المحبة ..

وابي اقط معك بالشكوى يمكن يقراها موظف والا مسئول ويخاف الله فينا

هذا ياطويل العمر والسلامه .. فيه اوراق ارسلها لي اخوي الصوت الهلالي من جده قبل شهر تقريبا .. واتصل علي وقال تراي ارسلتها بالبريد الممتاز وعليها رقم جوالك .. الظاهر يوم الاثنين .. وربي اني قلتله وليش بالممتاز كان ارسلتها بالعادي احسن واسرع .. المهم مر يوم .. يومين ولاحد اتصل وجا بعده خميس وجمعه وانتم تخبرون وش يعني الخميس والجمعه .. صار السبت مدري الأحد ( تراي اضيع بسرعة ) واجي واشد الرحال للبريد الممتاز واروح للموظف واعطيه اسمي مير يقول ماشفت اسمك يعني ماجاك شي .. ولو جاك كان دقينا عليك .. قلت تأكد يابن الحلال منت خسران شي .. الرجال مرسلها من خمسة ايام ويمكن اكثر .. وتوي مكلمه ..
واشوى .. يتكرم الموظف ويقوم وينبش بهالرسايل بين هالاوراق .. ويالله لك الحمد وتطلع رسالتي واصلة لها اكثر من خمس ايام والحمدلله والشكر على سلامتها .
واجي واسئلة ليش ماعلمتوني عن وصولها .. عاد شف العذر اللي اقبح من الذنب بتأخيرها .. يقول هذي عليها رقم جوال .. وحنا مانتصل على جوالات مانتصل غير على ارقام عادية ( قسم بالله بغيت اشتمه بعد هالعذر ) لكن كالعادة مالنا الا الصبر والاحتساب .

بالله ليش ماخذين 50 ريال !! ريالين يبغن يعجزنكم ؟
وبالله ليش يقبلها موظف جدة وهي عليها رقم جوال !! والا بريد جدة غير بريد الجوف ؟
وبالله ليش ما رجعتوها لراعيها مدام انكم ماتبون تتصلون !! اجل ليش مسوينه ممتاز ؟
وبالله ليش ماحولتوها للبريد العادي وعليها رقم صندوق البريد !! ووليش ترمونها بدروجكم !! ووليش ماعطيتوني تنبيه على صندوق بريدي اللي على الرسالة ان لي رسالة بقسم البريد الممتاز !!

اسئلة كثيرة دارت براسي .. لكن مهما قلنا ومهما حتسينا حنا الخسرانين .
اجل تبي تعلم موظف الدولة شغلة