|
الهلال ينقل مقره إلى شمال الرياض....$$
بسم الله الرحمن الرحيم
إخواني الزعماء السلام عليكم ورحمة الله وبركاته.....وبعد .
بصراحة لي فترتـ(ن) من الزمن وأنا أفكر بفكرتـ(ن) صاجتن راسي وهي تروح وتجي... وكل يوم أقول خلها تستوي وبصراحة طولت براسي إلى ما صارت طرشي وعقب ما فاحت الريحة صرت كل ما أمر عند إخوانا الصعايدة أشوف سعابيلهم تقوطر  (على قولة القصبي) عقبها قلت خلاص آن الأوان إننا نفترق ...قصدي آن الأوان إني أبطح الموضوع أمام سعادتكم ونشوف رايكم .......؟
الفكرة اللي حايستن أبو مريري هي موقع نادي الهلال؟
ياجماعة الخير الزعيم نادي كبير -والكبير الله-والنادي الكبير لازم يصير متكامل في كل شيء.. وموقع النادي بصراحة ما أعجبني حالياً..يعني قبل 15 سنة 10 سنوات معقولة لكن الدنيا تغيرت والرياض كبر وتمغط إلى ما تنتف .. . هذا بالإضافة إلى أن مدينة الرياض تمتد بشكل (يركض) إلى الشمال يعني ماكان يسمى شمال الرياض قبل 15 سنة صار ألحين وسط الرياض ووسط الرياض سابقاً صار جنوب الرياض ..وهلم جرا..
وخصوصاً إني شامم ريحة خبر إن موقع النادي يمكن يتغير؟
فمن شان هيك أنا أقول ليش الزعيم بمناسبة مرور خمسين سنة"ماشاء الله " مايغير موقع النادي ويضف عفشه من العريجاء إلى شمال الرياض ( سواء شمال شرق أو شمال غرب) لأنه بصراحه ملينا من كثر المشاوير رايحين جايين للنادي زحمات وصجة ولجة وإشارات ترفع الضغط  وأنتم خبركم ماشاء الله مترو الأنفاق يدهر بالرياض.. .بعدين خلونا حنا يا (أهل الشمال)نستانس بالزعيم (ياشين اللي توه ساكن هناك على طول يرفع خشمه ويحس إنه صار وزير ) يعني مهوب حكرن عليكم يا أهل العريجاء والسويدي وما جاورهما...وهلما جرا....(تصدقون إني كاتب الموضوع عشان أقولها)
هذا شي..
الشي الثاني وراه النادي مايبني له ملعبـ(ن) "سنع" يكون خاص بالفريق الأول وملاعب رديفه للفريق الأولمبي والشباب والناشئين...
وعشان أوضح الطرشي أكثر "الفكرة سابقاً "..
- يكون الملعب الرئيسي والذي يتسع لـ30 ألف هلالي على طراز عالي (مدرجات مغطاة (طبعاً مهوب بشينكو) +شاشةعرض إلكترونية +كراسي للجمهور ) خلونا ننبسط "يلعن أبو الريال قسم بالله إني أدعم النادي بـ12 ريال شهرياً...ريال يعف ريال ..
- ملعب رديف للمعسكرات ويكون مهيئ بطريقة ريفية يعني تحيط به الأشجار والخضرة والوجه الحسن من جميع الجهات  (وين الأخ بلبنان مادري إن جمهورنا شهبن لهب لاعبن فيهم المشق لعب)
- ملعب للأولمبي والشباب...
- ملعب للناشئين والبراعم..."ياحبيلهم"
- نادي رياضي خاص بالجمهور الهلالي على غرار "بودي ماستر" ويكون باشتراك..
- متاجر خاصة بالنادي تبيع أطقم النادي ....آلخ
- قاعة لكبار الضيوف..
- قاعة خاصة للمؤتمرات والاجتماعات
ماتلاحظون إني طولتها .... طرار ويبي ثوب كبك...مابقى إلا أقول يبنون لنا فلل دبلكس مع تأمين السيارة والوظيفة..
ما ودي أطول عليكم لأن المضمون وصل والفهم عليكم والله يرزقنا وياكم وماتشوفون شر ومنك المال ومنها العيال وخذراحتك ترى ماحنب غريبين
وأسدحوا آرائكم نشوفها
والسلام عليكم ورحمة الله وبركاته  | 