نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - واخزيـــــــــــــــــــــــــــــــــــــــــــــــــاه

هلالي الظهران · #1 18/12/2005, 12:46 AM

السلام عليكم ورحمة الله وبركاته

الله لا يمسيكم ولا يصبحكم الا بكل خير

[ انتريهات ]

تهورت وانا اخوكم وقررت اكتب موضوع:p وتزاحمت المقدمات في بالي وماعرفت ايهم اختار

..

مره اقول.. ابصير رومنصي واكتب الكلام اللي دايم معجب فيه واحسه ما ينكتب الا في مذكرات البنات

.. خذوا عينه من هالكلام الكبير

..

اعزائي رواد المجلس

مساؤكم رائع وجمــــال..

يكفيني انا اضع سطري بين سطوركم ليكمل مسيره رحله قلمي.. وردي..
فانتم قادرين على احتواء التميز كــاملا..

متابعتكم وتشجيعكم بنكهه الابداع تحتضنها مشاعركم قبل اقلامكم..

^
^
اخق بصراحه مع الكلام الكبير مع اني ما ادري مين اللي اخترعه

..

ومره ثانيه اقول.. خلني ادخل عليهم بمقدمه اكبر فيها روسهم

وامدحهم هم ومجلسهم<< طلع منها

واسوي خبطة الموسم

.. بالله عليكم شوفوا ما مدحتكم

..

وااقف على بابكم ولهان ومسير ××× اسال عن اللي سال محبوبي الصغير

يومين مروا علي سنتين لو اكثر××× ماقدرت يا منيتي عن شوفكم اصبر

هذا النصيب انكتب احبه انا صغيرون ×××يحبني لكن هله يخاف لا يدرون

^
^
ركزوا بالسطرين الاوله وماعليكم بالسطر الاخير كتبته لزوم انهاء الكسرة ودقة العود ومن باب حفظ الحقوق الادبيه للشاعر

..وحبه فوق وحبه تحت

..

ومره ثالثه .. قلت بما اننا على ابواب اختبارات ومذاكره قلت اعطيهم سالفه تشد من ازرهم وتساعدهم على التفوق

..

جدتي الله يطول بعمرها قررت قبل عشرين سنه تقريبا انها تدخل محو الاميه حتى تتعلم وكانت توها شابه في الاربعينيات

.. المهم مرت السنين الى ان وصلت سادس ابتدائي واصبحت على ابواب الشهاده الاعداديه

.. وطلعت النتايج

..

جدتي راحت تستلم النتيجه وجدي وعيالها ينتظرون النتيجة بشغف

..

دخلت عليهم جدتي والابتسامه مقطعه وجهها من الفرحه

وتقول باركولي نجحت واخذت الاعداديه وازيدكم من الشعر البيت ماخذه التاسعه على العجاوز اللي بالفصل

..

طبعا باركولها وفرحوا معها

.. وفي لحظة نشوه فاجأها جدي بسؤال كم عدد الطالبات في الفصل .. جاوبت جدتي وبتشدق عشرة

..

الى اليوم وجدي الله يقلع ابليسه ماسك السالفة على جدتي

وكل مايبي يستفزها ذكرها فيها

الزبده من القصه.. ذاكروا انت وياها زين واحفظوا كوتاب الله

وبلاش شغل التزوير والنصب على اهاليكم

..

وبعد الحيره والتفكيره والوسوسه قررت اني اترك المداخيل السابقه وادخل مع الباب الرئيسي

..

[مدخل]

في موضوعين سابقين عطيتكم موقفين صاروا معي:p واليوم ابعطيكم موقف جديد صار معي انا وخويي الوسيم ابو عجب اليوم في سوق الراشد

..

يالله انت وياها سووا دائره كبيره وركزوا زين الدعوه فيها ترقيم ومن اللي الزي منو

..

واخزيــــــاه

الساعه الرابعه عصرا وانا اخذ قيلولتي << امحق قيلولة من الساعه 12

.. رن هاتفي المحمول النقال (لابارك الله في دريم

) وصحاني من احلى حلم

.. قفلت الاخلاق طبعا رديت بدون ما اشوف من المتصل .. عادها عيوني ما اشتغلت لان الغرفه ظلام

.. رديت وانا ناوي شر واابي العن ابو سادس اللي اتصل..

المتصل: الو مرحبا..

انا: نعم ..خير من انت

..

المتصل: افا والله حتى رقمي مسحته من عندك .. عموما شخبارك وعسى ما ازعجتك..

انا: لحظه لحظه اخوي .. طبعا بعد ماحسيت اني بجيح

.. هلا والله عبدالهادي (ابو عجب) اعذرني ابو عجب والله بس كنت نايم:p ..

المتصل( عبدالهادي ): عسى ما ازعجتك وصحيتك من نومك

..

انا: ابد والله .. بس لو انك قدامي كان اعلقك بالمروحه وانغزها على رقم واحد

..

كلام مشفر

..

عبدالهادي: والله يابو عبدالرحمن (احم ;) ) من زمان عنك وابي اطلع انا وياك للراشد..

قبل لا اقولكم ردي ناخذ فاصل لاني باعطيكم نبذه عن عبدالهادي..اللي يبي يطير شراب

عنده متسع من الوقت ..واللي ماعنده دي اس إل يقطع الاتصال عشان لاتوصل فاتورته الحد الائتماني

..

ابو عجب زميل عرفته من السنه الدراسيه الاولى بالجامعه.. انسان خلوق لابعد الحدود .. ماعنده من شغل الخمبقه..لديه روح الدعابه وصاحب ظل خفيف.. فتيت كوره درجه اولى .. واللي يهمنا في السالفه انه ماشاء الله يطيح الطير من السما من وسامته

..

عدنا

..

انا: ابشر ان شاء الله الوعد الساعه ثمانيه..

بصراحه انا انحرجت من الرجال كم مره اتصل واعتذرت واليوم ما كان عندي شي والا لو علي ما عتبت الراشد

.. ع فكره اخر مره دخلت الراشد الصيف قبل الماضي برغبتي والاسبوع قبل الماضي يوم جونا لاعبين الفريق الاولمبي ومشيناهم بالراشد..

الحين هدوووووووء وتركيز ..جينا للعلوم السنعه

..

دخلت انا وابو عجب الراشد بدينا في الدور الارضي لان الرجال ناوي يشتريله كم بنطلون على كم تيشيرت على كم بلوفر ومحدثكم ناوي يطقله جزمه- يكرم السامعين- وهالمحلات اغلبها بالدور الارضي..

السوق ماكان مزحوم لانه يوم السبت لكن فيه عدد لا بأس به من الشباب والشابات

.. وفي احد المحلات كان ابو عجب منهمك في البحث بين الملابس وياخذ رايي.. وهو يقلب بين الملابس الا تجي عينه بعين وحده .. هالوحده ريحة العطر صاكه سبع كيلو قدامها وطاقه ذيك اللثمه والعبايه المخصره نسال الله السلامه.. ابو عجب ياحبي له نزل عينه من الحيا لكن هالوحده عيت تشيل عيونها وقامت تتفحصه من فوق الى تحت وتعطيه من ذيك النظرات

.. ومن هنا بدا الحماس

..

من زود احراجه الولد سحبني وطلعنا من المحل.. الى هنا والوضع عادي والولد متعود على هالنظرات

..

فاصل اخر..

تخيلوا ان فيه دعاية احسن عشان اخشن

حتى لايجيني واحد ماشي سنكليون ويقول انت فيك ومافيك.. انا شاب وبين قوسين سعودي

.. وكلنا يعرف بحركات الترقيم والمغازل;) .. انا ما ادعي الصلاح ولكن اروي لكم ماحدث..

عدنا

طلعنا من المحل ورحنا لمحل ثاني وفي تفكيرنا ان النظرات عابره ولكن .. وجدنا نفس البنت خلفنا في المحل وتناظر ابو عجب بنفس النظرات

.. رحنا للمحل المجاور وهالادميه ورانا

.. صرنا زي توم وجيري

من مكان لمكان ومن محل لمحل وهي ورانا

..

ابو عجب يقولي وشفيها هذي تلاحقنا وشوي وتاكلني بعيونها.. قلتله وانا واثق وملئ وجهي ابتسامه ياخي عطها الرقم ودعها تذهب الى الجحيم وفكنا من شرها

.. قالي انهبلت انت هذا الناقص والله

.. في نفسي اقول ياخي اذا ماتبيها حولها علي

..

المهم..بنت الذين ماخلتنا نشتري شي وقلنا خلنا نطلع الدور الثالث نتعشى ثمن نطلع

..

طلعنا من الدرج وتركنا السلم الكهربائي على بالنا اننا ذيابه ونبي نضيعها

.. بدينا نلف على المحلات في الدور الثالث ونسيناها ..معروف ان الراشد ممراته ودهاليسه كثيره..

شريت معطر جسم من واحد من المحلات وطلعنا من المحل وانا اعطيه عبدالهادي يشمه.. والا هالادميه في وجهنا

.. انا وعبدالهادي وهي في ممر من ممرات الراشد لحالنا

.. طلعت جوالها المزود بكاميره وقامت تقلبه .. يعني افهم ياحمار انت وياها وهاتوا الرقم:p ..

عبدالهادي احس انه قفلت معه

وقام يخزها بعينه ومحدثكم في عالم ثاااااااااااااني

..

فجأه وبدون مقدمات..

قربت مننا وقالت لعبدالهادي ممكن جوالك لحظه

..والله الذي لا اله الا هو هذا اللي صار.. بصراحه ماني عارف اوصف لكم الموقف في هاللحظه .. عبدالهادي وفي لحظة انعدام للجاذبيه(يعني فهاوه

) عطاها الجوال.. دقت على رقمها من جوال عبدالهادي وعطته الجوال ومشت

..

عبدالهادي من هول الصدمه يقول.. ثكلتني امي ويحي البنت رقمتني ..وانا من زود الفهاوه صاير اقرا الرقم والجوال ماسكه بالمقلوب

..

تعشينا وطلعنا من السوق والى توقيت كتابة هذه الاسطر وانا مو مصدق اللي صار!!!

الى هالدرجه وصلت البجاحه والجرأه!!!

ما اقول الا ياخزيــــــــــــــــــــــــــــــــــــــــــــــــــــــاه!!!

ابي كل واحد يعطيني رايه بهالموقف الحلو البايخ

وعلى فكره ما ادري وش صار على ابو عجب وخويته

ومن الحين اقولها ماني معرف احد على ابو عجب

..

ليش؟؟

هذا واحد طاقتن عنده الغيره من بعض الناس ويبي يسأل ليش؟؟

1- ليش الأم يوم تاكل ولدها ولا يهون الاب لازم يغصبونه يكمل الصحن كله حتى ولو شبع

واذا طلع الاكل بعدها ياخذله ذيك العلقه المحترمه

.. صوره مع النيجاتيف لكل أم تكرر هذا الموقف يوميا

..

2- ليش حنا اذا جينا نبي ننام الواحد يحس كذا ان عيونه تتصكر

؟؟

[مخرج]

تعددت المداخيل في البدايه لكن المخرج واحد ومافي غيره;) ..

اسمحوا لي يكون المخرج عن شخص علاقتي فيه كانت قويه جدا, وبعدها تركني نهائيا وبصورة مفاجأه ,وبعد فتره من الزمن رجعلي مره ثانيه ويسالني عن اخباري !! اهديه الابيات التالية..

وش أخباري؟؟ وش أخباري؟؟!!

وش اللي جابني على البال .. وش الطاري !!

من اللي شاغل اللي شاغلك عني؟!

عسى ماشر وش خلاك تذكرني؟!

بعد ما اعتدت هجراني ليه تجدد أحزاني!!

بعدها تروح وتنساني وترجعلي في عمر ثاني!!

تسألني عن اخباري.. وش أخباري؟؟

ابد على حطة يدك ان كان هذا يسعدك!!

ماشي تغير للاسف لليوم كلي في دبرتك!!

صدقني لو كان بيدي انا تركتك من زمان!!

تسالني وش اللي حدني شلي جبرني على الهوان!!

اللي جبرني اني احبك .. اللي خذاني مني حبك!!

رجعني ليك ارجوك ارجوك حلفت بربك!!

وش اخباري.. هذي اخباري لكن باسئلك بالله وش الطاري؟؟

من اللي شاغل اللي شاغلك عني؟!

عسى ماشر وش خلاك تذكرني؟!

بعد ما اعتدت هجراني ليه تجدد أحزاني!!

بعدها تروح وتنساني وترجعلي في عمر ثاني!!

تسألني عن اخباري.. وش أخباري؟؟

[قفلة]

لا تنظر الى الناس من قمة الجبل فتراهم صغارا ويرونك صغيرا!!