السلام عليكم و رحمة الله و بركاته ...
في البدايه أحيي أعضاء منتدى الزعيم بدون استثناء و أشكر الأخ صاحب المعرف الذي سمح لي بكتابة الموضوع بواسطة معرفه لأنني لم أتمكن من التسجيل لعدم معرفتي بالطريقه
لن أطيل عليكم و سوف أتحدث عن ما أريد و بدون لغة فصحى لـ أتمكن من التعبير عن مايدور في خاطري .....
[line]
يوم من الأيام كنت رايح أشتري أدوات ألكترونيه من مركز ألكترو على طريق الملك عبدالله و لقيت واحد من الشباب ( ماشاء الله عليه زي الورد ) جالس في محل صغير ( كشك ) تبع بطاقات نادي الهلال ....
قلت في نفسي الهلال يستاهل و ندعمه و مادام الدعوه ما تحتاج نطق مشوار لـ العريجا خلنا نشوف وش عنده !!
رحت له و سئلته و قال فيه فئات و كل وحده لها ميزه خاصه ....
و قال البطاقه الفضيه بـ 300 ريال لمدة سنه !
و قال لي مو دعم للهلال بس !! أنت راح تستفيد و راح نعطيك كوبونات مختلفه و لعدة محلات مثل (( محلات تأجير سيارات - مطاعم - مشاغل نسائيه - ورشات - محلات تلميع - ألخ ألخ ..... ))
قلت في نفسي لو أني نصراوي بـ اخذ هالبطاقه و شلون و انا هلالي ؟؟؟؟؟؟؟
قال لي المطلوب صوره لي و أجي بكره و أخذها و عطاني رقم جواله و قال اتصل قبل عشان تتأكد أنها خلصت <<<<<< أخلاق هالموووووظف
و دقيت عليه من بكره و كان وقت اذان العشاء و قلت له يمدي اجيك ؟ قال راح انتظرك عند البوابه لا تشيل هم <<<<< قايل لكم أخلاق هالموظف
أخذت البطاقه و كان معها كوبونات التخفيض و هدايا رمزيه مثل : ( كوب - ميداليه - قلم - قبعه ) و صراحه حسيت ان الهلال مهوب جايه ولا 10 ريال من هالبطاقه <<<< كان وده انه مطلع بطاقتين
مرت الأيام و يوم من الأيام كانت زوجتي فاضيه ....
شافت الكوبونات تبع المشاغل و استغربت هالعروض المجانيه ؟؟!!!
قلت لها هذا الهلال مايلعب
المدام ماصدقت خذت التلفونات و بدأت تتصل على المشاغل وحده وحده و تقول لهم أبغى أسوي ( بدكير أو منكير ) يقولون لها حاضرين (( تقول لهم بس أنا معي كوبون تبع بطاقة الهلال !!!!!
يبدأ مشروع التصريف و الكوافيره مشغوله و زحمه و مانقدر كلمي وقت ثاني !!!
هالمسلسل أستمر مع جميع المشاغل القريبه من بيتنا
و لقيتها جايه لي و مستانسه ::: افرررررح بــ بطاقه الهلال و بــ لها و اشرب مويتها
شرحت لي الي صار لها !!
استغربت و قلت يمكن مشاغل و حريم ....
توكلت على الله و مسكت لي كوبون تأجير سيارات و كوبون تلميع و غيرها و طلعت بالنتيجه التاليه ::
بعض الأرقام المسجله في الكوبونات للمحلات مالها وجود !!
رفض قاطع من المحلات أنهم يقدمون لك العرض الموجود بالكوبون !!
إجبارك على أنك تطفش منهم بطريقه غريبه جدا (( مثلا واحد من محلات الإيجار كان العرض تبعه هو إيجار سياره ليوم واحد مجانا )) طبعا دخلت عليه ولا جبت سيرة بطاقة الهلال طلبت منه إيجار سياره لـ 5 أيام و اتفقنا على السعر و بعدها طلعت بطاقة الهلال و الكوبون و قلت راح ادفع قيمة 4 ايام و الخامس مجاني !
قال لأأ لازم تاخذ شهر عشان تاخذ يوم مجاني !!!!!!!!!!!
و لمّا قلت له وشلون و انا لي حق أرفع شكوى عليكم حاول يغير الموضوع و يقول بطاقة العمل تبعك مانقبلها عندنا أصلا !!!
طيب وشلون كنت قابلها قبل وشايف كل أوراقي ؟؟؟؟؟؟؟؟
أعتذر على الموضوع المطول و لكن كل ماحصل هو تجربه شخصيه لي أنا و تعبر عن وجهة نظر خاصه فيني و ماكتبت هالكلام الا من حبي للهلال و أي شخص يبي إثبات ماعليه الا أنه يحاول يتصل بواحد من المحلات المقدمه كوبونات تخفيض أو عروض مجانيه ...
تحياتي لكم أخوكم .......
أبو سعود
