السلام عليكم ورحمة الله وبركاته...

والله ياشباب اني من جد من جد خجلان اكتب هالموضوع علشان ما ابغى احد من خارج السعوديه يقرى هالكلام ويضحك على التخلف اللي عندنا...انا كنت ناوي اكتبها من بعد المباراه مباشره(مباراتنا مع المغاربه)) لكني مسكت نفسي ..لكن بعد ما رأيت تصريح رئيس الهلال في الاقتصاديه..
قلت يمكن صوتي او موضوعي يوصل لأن رئيسنا الجميل يحس باللي يصير لنا....

شباب انا طول عمري احضر مباريات الهلال ودايم ماتجي اهانات لنا..انا والله تجي لي اهانات كثيره من رجال الامن وغيري من الجماهير...لكن ماكنا نتكلم وخلوني اتكلم عن نفسي انا..انا ماكنت اتكلم وساكت متحملين وش نسوي متخلفين((اقصد رجال الامن اللي في الملاعب اللي مدري من وين جايبينهم)) انا اكبر من اني اخذهم على محمل الجد...لكن ماحصل قبل مباراة الوداد..لا والله هذي اهانه وانا ارفضها وبقوه حصلت لي و ولأحد اصحابي ولبعض من الجماهير..بسبت وجود شخص وضع على كتفه نجمه ونص خلاص كأنه امتلك المملكه العربيه السعوديه..المشكله ماكان يتكلم هو ماكان يواجهنا كان يوجه اللي اصغر منه رتبه...

ببدا بموقف اللي حصل معي انا ومع صاحبي...
طبعا حضرت للملعب انا ومعي عدد من الاصحاب جميعهم دخلوا الملعب ماعدا انا وصاحبي((وصاحبي كان يرتدي بنطلون برمودا)) بعد مافتشوني ودخلت...فوجئت بأن صاحبي كان امامي ومحاصر من رجال الامن والرائد كان ماسك صاحبي مع فنيلته ويشده للخارج ويقوله "رح لبيتكم وتحشم"
انا تفاجئت ووقفت في مكاني...((طبعا انا ماكنت ادري ان حضرته يقصد ان البرمودا ممنوع والله تخلف يا عالم)) وكان العسكر يجوني ويصارخون علي تحرك وانا كالعاده مطنشهم لأنهم متخلفين من جد...كنت ابي اعرف ايش اللي سواه صاحبي علشان يتعرض لكل هالاهانه..فرحت له في الحارج وقلت له خير وش السالفه وش مسوي انت..!!

قالي يقولي البرمودا ممنوع وشاتني برى..!!!

ايش التخلف هذا..!! برمودا ممنوع في ملعب..!! شباب انا في حلم ولا وين..برمودا ممنوع في ملعب كورة قدم.!! تخلف الى ابعد درجه ..

انا انفجرت غضبا مثل مايقولون فرجعت للضابط جلست اصارخ في وجه واقوله ايش التخلف هذا ايش الفشيله هذي برمودا ممنوع..!! ياخي لو انه جاي بشورت قلنا يمكن ماستر العوره اما برمودا مستوره خاف ربك..حتى لو جا بشورت ياخي اللعيبه نفسهم لابسين شورتات..طبعا هو مايرد علي من قده رائد... رائد يرد على مواطن..!! مافي امل..

عطاني ظهره وقال..اووووف ماحب الجماهير انا..((هههههههههههههههه ضحكت من جد))

رحت للعسكر الثانين وجلست اتفاهم معهم اقولهم يعني كيف بالله تبغون نجي للملعب بالزي الرسمي شماغ وثوب وعقال حتى الصروال الداخلي لازم يكون طويل..!! سناوي مشكله..!!..والله مو بعيده بمنعون انك تلبس سناوي تحت الثوب...
وانا رايح راجع لصاحبي برى وقت ماعطيت الامن ظهري الا وواحد منهم يقول لي بصوت عالي..."رح انت وشعرك"
..!!!!!!!!!!!!! تبغون تخلف اكبر من كذا..!! المشكله انه مو رجال لأني التفت عليهم واشوفهم كلهم متكتفين...

يعني والله جالسين ننهان...اما الموقف اللي حصل مع الجمهور...

انا طلعت برى عند التفتيش الا واشوف اربع شباب جايين ومعم بنت صغيره والله عمره مابين 5-6 سنوات واضح انها صغيره مره البنت.وكانوا صابغين وجيهم ازرق وابيض ماعدا البنت..((انا كنت ناوي اصبغ وجهي انا واصحابي بس اشوى اننا هونا لأننا من جد ماكنا متوقعين هالشي ممنوع يا عالم تخلف والله))
فجا الرايد بكل جبروت وطغيان وراح عند الشباب وقال لهم" رح انت وياه للحمام غسلوا وجيهكم وتعالوا..اما بالنسبه للصغيره ذي(وناظرها بعين واشر عليها باصبعه وقال وهو ينفخ) اما الصغيره ذي ماتدخل الملعب ودها لبيت امها"

..!!!! انا انهبلت من جد انهبلت فقيت خشتي وقتها..اللي قاهرني والله موقف لو شفتوه يا عيال ان تقدرون عصبيتي انا وقتها ناظرت في عيوني الطفله الصغيره هذي..والله تشوفون الدموع في عيونها والله حرام اللي ماعنده مشاعر ذا جاي يصارخ في وجه طفله صغيره ويقول لها روحي بيت امك..الولد حاول يمين يسار مع المتكبر...وقال الولد لأصحابه خلاص ادخلوا وانا برجع للبيت مع اختي مايمدي ادخل المباراه بتبدى قهر والله....

شباب والله الاشياء هذي ماتصير الا في الرياض..تشوفون كيف جمهور جده وكيف لبسهم ويدخلون باللي يبيون ويسون اللي يبون..ليه انا كذا متخلفين معنا..
يعني بالله الاسواق وهضمنا ان البرمودا والكت ممنوع فيها..اما ملعب..برمودا وكت ممنوعه في ملعب..!! يعني يا تعال بثوب وشماغ للملعب او لا تجي..

كلامي موجه لرئيس الاتحاد السعودي سلطان الشباب ونائبه الامير نواف والى حبيبنا ابو سلطان..
لكي لايلومون جمهور الرياض اذا ماحضر مباراة للمنتخب او للنادي..لأن اعز ما للانسان كرامته اذا راحت الكرامه وش بقى للانسان..!!