بسم الله الرحمن الرحيم
اخواني اخواتي جماهير نادي الهلال..
مالي بالطويله ومثلكم شايف انا مواضيعي موبكثيره بالمنتدى بس ان لفتني شي كتبت
وكله لمصلحة الزعيم..

يمكن عنواني مر عليكم قبل كذا وهو لأحد الاعضاء مشكورآ وانا اعتذر هنا له بسرقة عنوانه
بس اللي خلاني اذكره ان اكبر حمله جماهيريه في منتدى الهلال حدثت في ذلك العنوان
قبل المباراه المشؤومه وكلي امل اناحصل في موضوعي على ربع الجمهور الذين قرروا الحضور
في ذلك الموضوع, لذلك وبحكم الضروف وبحكم انني مشجعه ولست مشجع املك بعض المقومات
بقرب الريموت وقناة الجزيره مني وثلاجة القهوه والحلاوه البحرينيه مني

اخواني الزعماء..
الكل شايف ان الهلال فتح المتجر ولله الحمد وتشكر موبايلي وادارة الهلال على ذلك
هم ماسووا الا واجبهم اتجاهنا كجمهور..
والجمهور ماقصر زار المتجر وعساه فاتحة خير..
بس الغريب في الموضوع واللي لفت انتباهي ان المنتدى قلب عن المتجر وصار يتكلم عنه
ونسى ان في اقل من 24 ساعه مباراة مهمه مع الوحده..
على فكره تراه متجر والحمدالله مومتنقل زي متجر الاتحاد يعني احنا والمتجر والزمن طويل..

للتذكير**فإن الذكرى تنفع المؤمنين**
غدآ الهلال في مواجهة الوحده في مواجهة الثلاث النقاط: 3+3+3....الخ = دوري
قميص هلالي+تيشيرت+شال.....الخ = مابطير المتجر

واعيبااااااااااااااه..
غريب حالكم يالجماهير..
الموسم الماضي اذا جت مباراه للهلال وشفنا احد الاعضاء نزل موضوع حملة جماهير كانت توصول
الردود الى 100 الحين افتح المنتدى واشوف احد الاخوان منزل موضوع ماألاقي الا 17 رد
والله قوييييييييييييه
لا وبعد نصها رمي الحمل على الاخر..

هي وحده من اثنين..
1/ياإنا همة الجماهير قلت بعد مافقدنا الاسيويه وراح جريتس وهذا واضح في الاداره قبل الجمهور
ماصار في همه زي قبل يعني اذا جاء الدوري ياهلابه وان راح زعل ساعه وانتهى
مافي ثقه بكالديرون..
2/او ان مستخسرين الحضور خاصه من أهل الرياض وتشوفون ان مشوار للملعب..

والله يااخوان وبحق من انزل المصحف على خيرة عبده اني لا أملك من المال الا 2000 ريال
اذا تبون ادفعها وارسلها لحساب احد مشرفين المنتدى يشتري فيها تذاكر والله فدوه لكل هلالي
عاشق يبي يحضر والتذكره عائق بطريقه واذا تبونها منصه خذوها بس احضروا..
% كل شي نملكه يفدى الزعيم%

نقاطي من الفريق وبطولات الموسم
قرار كالديرون بالمشاركه بالصف الثاني في بطولة ولي العهد قرار متعجرف لا ينمي عن عقليه
احترافيه( جريتس العام ركز على الدوري والابطال واسيا وماأخ1نا الا الدوري)..

قرار الاداره بالاستغناء عن لي يونج قرار غريب لاينمي عن اداره تبحث عن بطوله او تغطية
نقطة ضعف واضحه وتجلة في مباراة الاتحاد بوجود محمد نامي في بعض الاوقات..

احمد علي بمتابعتي للدوري المصري بقوه صفقه ناجحه وروعه لاعب ذكي جدآ مايتبلطح مثل
ياسر في منطقة الجزاء يقنص الفرصه قنص..

ماجد المرشدي الفريدي واشراك الشلهوب كمحور نقطة ضعف واضحه في الهلال الفريدي
يرجع للدكه والله يازينه وهو بديل تحس عنده شي يبي يسويه ووياخذ الشلهوب مكانه
خاصه في مباراة بكره بغياب الدوسري والله نكبه وبينكبنا كالديرون لو حط الشلهوب محور
مافي صناع لعب على كذا بس الله يجيب العواقب سليمه..

ياسر كراس حربه لحاله دمار وانتهى مفعوله يجب اشراك احمد علي كمهاجم ثاني اذا
مااردنا الظفر بالنتيجه..

ختامآ..
اتمنى من الاخوان الحضور والتفاعل وكتابة (بحضر انشاء الله) موبصعبه على اهل الرياض
والله ماعليكم شرهه ياباقي المناطق لو في شرهه لاهل الرياض 4 مليون
ثلاث ارباعه هلاليه عشرهم يعبي ملعب الملز..
كل التوفيق للهلال وان كنت ارى انها اقرب للتعادل لو ماتفادى النقاط اللي ذكرتها بس انشاء الله خير..
تحياتي لكم
**سفيرة الهلال**