[c]

بسم الله الرحمن الرحيم

مساء الخير جميع و اسعد الله أوقاتكم بكل خير يا رب

قبل ما أدرررعم و أطب عقده في هالموضوع لا أحد ينط وينشب في حلتسي ويقول لي وش معنى العنوان لأني كيف الحال وشلونكم عساكم بخير الله يسلمكم وبناء على مشاوراتي مع سموي وجدت إن الغريب هو أفضل من يحل هالإشكال لذلك يالغريب أدهر لو ما عليك أمر وفسره لنا

تبون تقولون وش تبي بقولكم ما أدري الموضوع وما فيه إن أخر خبري بالهلال يوم يكلمني اخوي ويقول لي شالوا المصيبيح والنوبة الثانية يوم أدخل على شبكة الزعيم وأشوف وش صار على الإجتماع هم لقوا لهم رئيس و إلا جبت لهم واحد على دربي و أنا راجع

أذكر قبل ما يقارب سنتين طلب مني الأخ العزيز فرانكلين الله يذكره بالخير إني اكتب موضوع رياضي بلغه عاميه يعني قصيميه وكنت مواعده عاد الله عقلني و ألهم علي أومير اكتب هالموضوع

من أربع شهور و انا أكتب في العنوان و الحمد لله خلصت منوه وجت النتيجة تطمن وزينه وكل شيء على ما يسر عاد وش خلاني أكتوبه اليوم أيه سئتلوني بقولكم كلمني سلمان ولد التسعات الساعه ثمان بالليل الله لا يسلطنا ولا يسلط علينا خرب على نومتي وقمت تقل سبهه ما أدري وين أنا بوه قعدت أفر أفر لين تشمعت جبهتي في أفياش الكهرب يوم رديت و شميت الريحه أويلاه بس ريحة الزعيم أومير تقطع تسبيدتي من الشهاق وصياح الله لا يوريكم تجمعوا الجيران ألتفت يمين و أشوف ماري تقول وش بك أويلاه لا تصيح تكفى تراك كسرت خاطري تكفى وعلى اليسار اشوف ماري نمبر تو (ما أعرف إلا هالإسم) من شدة ما هي متأثرتن ومتفاعلتن معي جاها فصص بركبته عاد أنتم خابرين يحبون الشرافه تكوموا حولي وكلموا على 911 عاد هم كلموا من هنا عينك ما تشوف إلا النور مطافي واسعافات وأمن الطرق وسحب السيارات وكل واحد يسحبن من جهه و الله أن تعلمن وش بك قلت لهم أعذرون اويلاه حالتي صعبه قالوا وش رايك نكلم لك مجلس الأمن تراهن بطرف العاير مايبون شيء كلها حذفت عصا وهم ناقزين لنا قلت ما هيب شينه بس مانبي الكلافة قالوا لا كلافة ولا شين أومير يأنقز هاك الواحد انشهد أنه طير شلوى ويعظ الثوب والهجيج

عاد يوم شفت أنهم تسذا قلت لهم اسمعوا ما اعتقد أحد منكم ما يعرف الهلال قالوا ييييس وي نو هلال ذس إذ بق نادي إن اوريجا رياض قووووود فريق والله قلت أنشهد قالوا عسى ما من خلاف بس قلت تخيلوا هالبق فريق قعد خمسة أشهر ما عنده رئيس قالت واحدتن من الماريات هوووووو شلون الهلال ما عنده رئيس قلت ما تشوفين حالتي حاله قالت الله يلوم اللي يلومك يا أوخيي قالوا وش بعد قلت حالة هلالنا ما تسر هزايم والمصيبيح راح ولا فيه لاعبين ومدربنا دبشتن صقعا وحالتنا لا تسر لا عدوا ولا صديق أنا ما امداني اخلص كلامي إلا هالشقر مناقز وصياح راح اور تيم وش السواة راح اور تيم وش السواة يوم بغن يقطعن هدومهن قلت أصبرن موب الحين إلا وتنقز وحدتن منهن بوهتها تقول إن ما عندها ما عند جدتي بس يوم بدت ترطن ولاه عنده سالفة قالت مستر عواكيس قلت يالبيه قالت لووك يو نووو ناخيل تيم قلت أيه وش بوه قالت إي ثينك إنوه درجه ثالثه او رابعه قلت الزبده انهقي قالت ايفري داء هزايم ومكسفينن بأهلهم قلت ايه وبعدين أخلصي "يا اخي الشين ما تقبل منوه شيء حتى لو يقول شعر و أغاني" قالت الهلال درجه ممتازه قلت أيه وقالت بطولات قلت أيه وبعدين ما جبتي جديد وش عندك اومير تقول قولتها المشهوره واللتي اصبحت مثلاً شائعا "كل شيء أهون من اللي أكود منوه" وبس

الحين الهلال وش معجلهم بكثر المباريات وراه ما يركدون ويعينون من الله خير ترى العجله ماهيب زينه أويلاه

كل عام وانتم بصحة وعافيه يا رب
وأتمنى الجميع يكونون بخير وصحة وسلامه يا رب

والله لكم وحشه يا شباب ومشكورين على الاهتمام والسؤال وربي يغنيكم يارب

الغريب يا حبني لك بس

أبو لما وش فيك فسقت وبديت تكبكب كراتين التفاح أقول اركد لو والله أعلم عليك منظمة المحافظة على التفاح العالميه

مخاوي البطولات وكايدهم يوم تركتوا الإشراف رجعتوا للإبداع ليتكم من زمان تاركينه أثره مربّطكم الله يعطيكم العافيه يا رب على كل ما قدمتوا و بيني وبينكم احس إنكم تردون الحين و انتم مبسوطين وتضحكون عندي سؤال يقرقع بقلبي أنتم اول تردون و أنتم تصيحون

العوام عسى ما شر سبع طعش صفحه أنت وعبود عيوني جاهن صفاق من القرايه ترفقوا بنا الله يرحم حالكم

أبو هيا دووووووووووووووس امووه يا شيخ بيني وبينك لو إني اشجع غير الهلال تسان ما علمتك وإلا وش يفكن من لسانك;) ;)

سلمان والله إنك اكوس واحد ما عرفوك والله

فيه علاج جديد للخرشه والعجله تجيبون ثلاث شعرات من ابط الجراد وتنقعونهن بمويه حاره لمدة ثمانطعش دقيقه همن تخلطونهن بحلتيته ومره وهمن تفرجوا عليهن وقولوا الله يخلف على أهلنا بأحسن منا

فاهم جدا تصدق إذا قريت مواضيعك احس بأعوجاج باللسان و إنفهاق باللوزتان حتى انهن بعد ما أنتهي يسلمن على بعض ويقولن الحمد لله على السلامه

أبو ذكرى نو انقليش خطه ماهيب صاحيه

الحين ما فقدتوا معي الهلالي محمد و الأزرق بعيون خضراء هذولاء هم المستقبل وين اختفوا الله يوفقهم يارب

أبو بدر يا حبني لك كثر حبك للهلال مع إنك توحش بس لا خلا ولا عدم يارب يا أخي أضحك تكفى تصدق عاد حلم النصر بالبطولات أهون من إنك تحلم وتشوف ابو بدر يضحك

الرساويه وينهم هالقطوعين هاه لا سور ولا جدار وش فيهم غطسوا موب منهم من الحبحر في رمضان والله ما تطفي حرته ولا ترامز الحرم كلها قصمان وتولجوا لهم حبحر

ما عليه طولت عليكم بس وش نسوى بالشوق نشوفكم بالقريب العاجل بخيمة أبو هيا إن شاء الله لا خلى ولا عدم يارب

[/c]

ياهلا فيك والله ياعواكيس ، وكلنا مشتاقين لك مثل ما انت مشتاق لنا .

إقتباس فاهم جدا تصدق إذا قريت مواضيعك احس بأعوجاج باللسان و إنفهاق باللوزتان حتى انهن بعد ما أنتهي يسلمن على بعض ويقولن الحمد لله على السلامه

تصدق اني حسيت ببعض هذه الاعراض وانا اقراء موضوعك .


موضوع رائع ياعواكيس ، ويعطيك العافيه .


تحياتي ، ناصر

هلا والله بالطش والرش

والله فرحتي بالموضوع لسببين :

( الاول ) تطمنا عليك ونورت الشبكة بوجودك.
( الثاني) تطمنت انك الحمد لله ما عقلت ... وهذا اللي كنت شايل همه صراحة

@@@

إقتباس وبناء على مشاوراتي مع سموي

الله يقطع شيطان سموك انت ووجهك

إقتباس أفضل من يحل هالإشكال لذلك يالغريب

ما شاء الله ..

من يد داج ليد ادج اللهم ادمها نعمة

إقتباس كلمني سلمان ولد التسعات الساعه ثمان بالليل الله لا يسلطنا ولا يسلط علينا خرب على نومتي

هالفقرة مكتوبة لــ(ــعلي ) علشان يعلم الوالد والوالدة انك تنام قبل 8 بالليل
بس ما اعتقد انها تفوت عليه

إقتباس قلت حالة هلالنا ما تسر هزايم

هذا اول يا عواكيس .. الحين ما فيه الا ثلاثيات الله يتمم بس

إقتباس والمصيبيح راح

مش أوي <=== رد مصري

الحين ( رقوه) صار عضو مجلس ادارة ..

لا ازيدك من الشعر بيت .. والا تدري خل الموضوع (هادي ) ..

إقتباس الحين الهلال وش معجلهم بكثر المباريات وراه ما يركدون ويعينون من الله خير ترى العجله ماهيب زينه أويلاه

بخخخخخخخخخ

وش هاالخطمة الله لا يخلينا

إقتباس الغريب يا حبني لك بس

مهوب الحالك

إقتباس أبو لما وش فيك فسقت وبديت تكبكب كراتين التفاح أقول اركد

ههههههههه انت تشوف ..

تصدق اخاف نقوم من النوم باسر نلقى ابو لما مكسر بيض على البنر اللي فوق الرجال قافلة معه

إقتباس مخاوي البطولات وكايدهم

الله لا يخلينا منهم .. قبل وبعد

إقتباس العوام عسى ما شر سبع طعش صفحه أنت وعبود عيوني جاهن صفاق من القرايه ترفقوا بنا الله يرحم حالكم

العوام شكله معترض على ارتفاع اسعار رسوم دخول المهلاهي بالشرقية .. وقعد يلعب بالمنتدى ;)

إقتباس فيه علاج جديد للخرشه والعجله تجيبون ثلاث شعرات من ابط الجراد وتنقعونهن بمويه حاره لمدة ثمانطعش دقيقه همن تخلطونهن بحلتيته ومره وهمن تفرجوا عليهن وقولوا الله يخلف على أهلنا بأحسن منا

تصدق هذي الفقرة اللي طمنتني عليك

إقتباس فاهم جدا تصدق إذا قريت مواضيعك احس بأعوجاج باللسان و إنفهاق باللوزتان حتى انهن بعد ما أنتهي يسلمن على بعض ويقولن الحمد لله على السلامه

يبي لك دورة (مدلهمة) علشان تعود على الكلام الزين

إقتباس أبو ذكرى نو انقليش خطه ماهيب صاحيه

اجل تستخدم تكتيك ابو ذكرى

إقتباس الحين ما فقدتوا معي الهلالي محمد و الأزرق بعيون خضراء هذولاء هم المستقبل وين اختفوا الله يوفقهم يارب

الهلالي محمد موجود .. بس هذي سنة التخرج دعواتك له بالتوفيق .. واذا بغيته راح تلقاها على الماسنجر من الساعة ( 4:52 عصراً ) الى ( 4:58 برضة عصراً ) يومياً .. عدا يوم السبت والاحد والاثنين والثلاثاء والاربعاء والخميس والجمعة ..

لا صحيح الرجل موجود بس مرتبط بدراسته الله يكتب له النجاح وبتفوق

الأزرق بعيون خضراء صدقت .. غايب والله يطمنا عليه ..

إقتباس الرساويه وينهم هالقطوعين هاه لا سور ولا جدار

يمكن ما خلص العيد بالرس

إقتباس ما عليه طولت عليكم بس وش نسوى بالشوق نشوفكم بالقريب العاجل بخيمة أبو هيا إن شاء الله

الله يحييك وتشرفنا وابركها من ساعة

هلا والله بعواكيس

ياخي من زماااااان عن هالصرقعة العواكسية <-- بزعمه جامع(ن) اسمك!!

قبل كم يوم رحت لمحرّك البحث وقبل ما أحط اسم اليوزر إلا الجهاز مبرمج على يوزرك مدري حاس(ن) أنك مبطي عن كتابة المواضيع لذلك يبي يدّهر بالبحث عنك وإلا مدري وشلون
قريت موضوعك المنسم " السلق اللي بالشيعيب يطلعون" ضحكت ضحك الله لايوريك

أجل أبدعت يوم خليت الإشراف بخخخخخخخخخخخخ
أجل لوشفتني وأنا اكتب الموضوع بأصبع واحد وش تبي تقول ؟ <== فاهم الوضع غلط

هلالك أموره ماشية تمام التمام ويوم ورى يوم الأوضاع كل ما لها تتحسن بس بيني وبينك مبطين عن البطولات حتى توقيعي حق 37 بطولة وتونا ريضيين فيكم " عطيته فترة إستجمام" ويا خوفي أنها تطول هالفترة ..

بس بإذن الله الآسيوية والخليجية بالجيب لا ومن زود البخترة والثقة بالجيب الأيسر

مشتاقين لك حيل حيل .. والله الله بالجد والمثابرة .. نبي إذا جيت نخليك مشرف بمنتدى الكمبيوتر لأن ما نبي نضيّع مجهودك هاللي سويته <--- يحسب أنك رايح لأمريكا علشان تأخذ الإشراف من أبو منار

الله يردك لقواعدك سالم(ن) غانم(ن) مرفوع الراس <--- أحس أن وضعها حلو

تشكراتنا على هالطلـّة الحلوة ..

والله الله بالمواضيع مادام الأنترنت " فري" ..

تحياتي للمغتربــين

عواكيس
وشلونك يا بعدي عساك أشوى
الحمد لله هم فكوك من المطار .. أنا أقول انك هبلت بهم في مطار لااس فيقس
يا حليلك والله .. الحمد لله لك يارب أنك بخير وعافية .. الله يرجك على هالسالفة مع أني سامعها منك من الرياض .. الله يرجك رجا مبرحا ...

إقتباس ومدربنا دبشتن صقعا

يا عين عيني عليك .. مدربنا الدبشه أحلى أسم للراحل .. راح الله لا يرده ..
وجاء طير شلوى ... والله أنه كفووووووووووووووو ياشيخ

والله يا خويي ما فسقت ولا شيء ولا قمت أرجم التفاح .. لكن شيء في قلبي جعله ما يجي قلبك ... وعلى ماقال الشاعر : أن حكينا ندمنا وان سكتنا قهررررررر والله قهر


الله يردك سالم وغانم وعلى الخير والحب دائما نلتقي

يامرحبا يامرحبا يامرحبا بووووه ومسهلن بووووه وياربي انك تحييه وتعافيه وتخليه لعين ترجيه

إقتباس أذكر قبل ما يقارب سنتين طلب مني الأخ العزيز فرانكلين الله يذكره بالخير إني اكتب موضوع رياضي بلغه عاميه يعني قصيميه وكنت مواعده عاد الله عقلني و ألهم علي أومير اكتب هالموضوع

فرانكلن الله يذكرة بالخير ويطول عمرة , غيرت تلفوني وضاع رقمة بين الارقام اللي حذفتهن انقطع عن النت ولاعاد له طاري ابد , اذكر انه كلمني في الصيف وقال لي انا بالشرقية فرحت في البداية اني بشوفة وحزنت لأني فعلا ماقدرت اشوفة واقابلة بعد عشرة الاحرف ياليتة يشوف ردي ذا ويكلمني , راحت زبدة هالفقرة على فرانكلن

إقتباس فيه علاج جديد للخرشه والعجله تجيبون ثلاث شعرات من ابط الجراد وتنقعونهن بمويه حاره لمدة ثمانطعش دقيقه همن تخلطونهن بحلتيته ومره وهمن تفرجوا عليهن وقولوا الله يخلف على أهلنا بأحسن منا

بخخخخخخخخخخخخ و ههههههههههه و الله يرجك رجا ابرح منه اللي اكود منووه , المشكلة وين نلقى الجرادة في هالامطار, لأن خبرك عارف الجراد ما يطلع اذا فيه مطر وإلا شعرات ابطه مقدور عليها والفرجه عليهن امرها هين وسهل نجتمع في خيمة ابوهيا ونحط الشعيرات بالوسط وندلي بروسنا ونردد ساجو سماجو سالقاو ونشممممممممم

إقتباس الحين ما فقدتوا معي الهلالي محمد و الأزرق بعيون خضراء هذولاء هم المستقبل وين اختفوا الله يوفقهم يارب

محمد الهلالي ما فقدته اخر مرة شفت يوزرة من يومين او ثلاثة , اما الازرق بعيون خضراء فوالله اني فاقدة من مدة هو وحمد وسور الصين وجدار الطين وياسر وتركي الكبير وناس كثير نبي نحصل الجراد ولا حنا لاحقين على كتابة اساميهم الله يسلم الغايبين ويردهم سالمين

إقتباس ما عليه طولت عليكم بس وش نسوى بالشوق نشوفكم بالقريب العاجل بخيمة أبو هيا إن شاء الله لا خلى ولا عدم يارب

بالله عليك حاول توقت جيتك مع ياسر , لأن ابو هيا موعدنا انه بيسوي حفلة لا صارت ولا استوت ونبي نروح للبحر مره وحده خبرك عارف هالايام شتاء ولاعاد تمشي سوالف الصيف بروح للبحر واجي ;) ;)

يكفي شوفت يوزرك ويكفي قرينا عنوان موضوعك وفهمناه من دون ما يشرح لنا الغريب

اخوي عواكيس موضوع رائع وانشاء الله ترجع لنا بالسلامة .


تحياتي

السلام عليكم ورحمة الله وبركاته ....

أهلين وسهلين وكل عام وأنت بخير أخي الغالي عواكيس .... فعلاً لك فقده ومنزلتك في القلب لدى كل الهلاليين موجودة .... ربما نسيناك وربما أنستنا المشاكل الهلالية وعدم وجود الرئيس واللاعبين الأجانب كل من نحب ...... ولكن تبقى في القب وتبقى ذكراك موجوده وحديثك إلينا لا ينسى ولا زلت أتذكر مهاتفتك لي قبل عام تقريباً فأنت كما قال الأخوة سباق لكل خير ...


أعادك الله لوالديك ولوطنك ولهلالك سالماً غانماً ... وتقبل تحياتي وحبي تقديري ودعواتي لك بظهر الغيب .... والله يحفظك في حلك وترحالك وفي كل مكان تكون فيه .......

ياهلا والله والف هلا وغلا بعواكيس

الحمد لله انك طمنتنا عن احوالك ياغالي

المهم انك ما تقاطعنا ونبيك تكتب باي لغه قصيمية كانت او غيرها

تحياتي لك ياغالي

إقتباس إقتباس من مشاركة مخاوي البطولات يا هلا بهالطلّة .. على قولتهم بنمخمخ على موضوعك وننكس

هلا بعواكيس المحترم.....

موضوعك شيق جداً.....
وأتمنى لك التوفيق... كما نتمنى نحن أعضاء شبكة الزعيم بالخير والتوفيق لجميع من ذكرت من مشرفين الشبكة سابقاً وحالياً ....

كل الشكر لهم فهم مجندون لخدمة الهلال جزاهم الله خير.....

عاد ودي أشوف الأعضاء يدعون للمشرفين بالتوفيق ويساندونهم في عملهم الكبير..


شكراً:
أخوكم الأسير الأزرق( من عاصمة البرد حايل)

هالحين هذا العواكيس اللي مرة قال الغريب صدناه مرة من المرارررررريت صدفة ....

هلا به والله بس صراحة شكله رررررررجه من جد بعدين ماقدرنا نحتسي اللهجة القصيمية يبال نكتبها بس ابوالعواكيس ماشاء الله عليه كاتبها ولا بعد تابكها تبكة يحبها قلبك

الحمدلله على العودة وعقبال مايكون العود احمد ان شاء الله وان ترجع لهيلتك سالم وغانم وصالح وقاسم وان يفكك ربي من شر CIA و FBI

تحياتي لكم كل ابابيكم

ما ني مصدق عواكيس بلحمه وعظمه


مرحباً ألــــ 1000 ــــــف ،،،


صمت وأفطرت بسكري القصيم مع قشطة المراعي


خل نشوف لك مشاركات لا تقطع ، وكل شي بوقته حلو ،


تحياتي ،،،

إقتباس إقتباس من مشاركة shaheen السلام عليكم ورحمة الله وبركاته .... أهلين وسهلين وكل عام وأنت بخير أخي الغالي عواكيس .... فعلاً لك فقده ومنزلتك في القلب لدى كل الهلاليين موجودة .... ربما نسيناك وربما أنستنا المشاكل الهلالية وعدم وجود الرئيس واللاعبين الأجانب كل من نحب ...... ولكن تبقى في القب وتبقى ذكراك موجوده وحديثك إلينا لا ينسى ولا زلت أتذكر مهاتفتك لي قبل عام تقريباً فأنت كما قال الأخوة سباق لكل خير ... أعادك الله لوالديك ولوطنك ولهلالك سالماً غانماً ... وتقبل تحياتي وحبي تقديري ودعواتي لك بظهر الغيب .... والله يحفظك في حلك وترحالك وفي كل مكان تكون فيه .......

هلا والله ابوالعواكيس ...

عاش من شافك .. مدري وش حظ سلمان خمس تسعات اللي خلاه يسمع صوتك .. نتصل ولا ترد .. كل ذي ضيـعه بامريكــا ..

وابشرك امور الهلال متيسره بعد قدوم عبدالله بن مساعد .. وصارنا نزعل اذا فاز الزعيم باقل من 3