أبي أشوف الشوفة الشرعية أكثر من مره : ( - صفحة رقم 3 - نادي الهلال السعودي - شبكة الزعيم

آخر طموحآتي · #1 17/10/2010, 02:01 PM

السلام عليكم ورحمه الله وبركاته

صباح / مساء الخير للجميع

بدخل بالموضوع على طول أعتقد مايلزم مقدمات

تعرفون أنتم العاطلين عليهم تفكير للمستقبل مختلف خصوصا اذا صار مقبل على زواج

فيجلس يفكر وشلون بتزوج وش بسوي وشلون النظره الشرعيه وأنا أفكر جت على بالي هالنقطه اللي بعرضها الحين .. ( الموضوع للنقاش )

طبعا نبي نناقش سوا النظره الشرعية ( أكثر من مره) فرجاء لاحد يجي الا اللي
يعترف بالشوفه الشرعيه والي يقول لا ماعندنا شوفه شرعيه لاشوف خشته بالموضوع

طيب ياجماعة الخير أنت مثلا خطبت بعد وصف أمك والا اختك اللي مايعول عليه أبد
وكم واحدن أكله جلست أمه واخته يمدحون بالبنت لين خلوها سندريلا بسم الله من كثر
المدح ، وقال خلاص خلاص مابي شوفه أكيد انها زينه ومناسبة لشخصي الكريم ، يوم دخل بليله العرس والا يشوف ذيك الشيفه

ياولد وين وصف أمي واختي ! وشهر شهرين مطلقها

حرام ياخي ليه ماشفت طيب ؟

نرجع لمحور حديثنا : قلت بشوف البنت وجاء وقت الشوفه

بعدين رحت ودخلت البيت بكل ثقة وعلامات الرضا مرتسمه على وجنتيك

جت بنت الحلال مستحية كالعاده

وجابت معها عصير وحطته وانت تطالع بخشته تقل واحد مهبول رافعن راسك شوي والا تنكسر رقبتك من الشفاحة

< مع اني ماقتنعت بذا الروتين الخايس ، لأنه يمكن يطيح العصير او تكبه على الخطيب المغلوب على أمره خصوصا اذا البنت خجولة ، فأفضل شي تدخلين مامعك شي والعصير والا الشاهي يجاب قبل تجين او بعد ماتجين ، وهذي نصيحه لوجه الله

المهم تجيب هالعصير والا الشاهي تحطه على الطاوله وتمسك الباب تمشي مليون حتى مايمديك تركز على مشيته حتى

بالله ذي تسمونه شوفه شرعيه ؟
ودايم تصيرهذي همن يجيك الطعس المروح تسأله تقول أمداك شفت ؟ يقول اييه اييه والله ارتحت من يوم شفته وحبيته بعد تصير خشك كذا

< ماعليش على الفيس بس مالقيت الا ذا يمثل الواقع لو هو يخرب التنسيق

سبحان الله حب وراحه من نظره وحده يانصاب

الصنف الثاني فيه ناس لا أكثر تطور يخلي البنت تجلس شوي بس وين يجلسها يجلسه على الجنب يعني ماتصير قبال ولد الحلال ، طيب ياخال وشلون تبين اشوف البنت اقعد اتلفت تقل مروحه قعاديه

فيه نوع ثاني لا أكثر تطور يخليها تجلس قبالك على الكنب

والبنت منزله راسة لكن لاتغتر ياشنب انها منزله راسها قازتن اللي جابك

لأن البنات عندهن حواس استشعار غير طبيعية

وشعرها طايح على خشته ولا تشوف الا أجزاء من جسمها والخشه مالك سنع

علما أنه أهم شي لزوم تشوف الخدود والوجنتين والخشم والعيون والفم

وأبوها ساكت ولا يكلمها ولا شي

طيب ياخي احتس معها خلها تكلم خلنا نسمع صوتها يمكن يصير شين ونهون

المهم :انا شفت الشوفه الشرعيه الأولى ، لكن ماشفت على سنع ماكلمت البنت تلخبطت ماشفت الشي اللي يريحني يعني ممكن يصير فيه راحه شوي لكن ماش يبي لي شوفه ثانيه لأن غالبا الشوفه الأولى الحياء زايد شوي وبأرضه البنت ممكن تصير متلخبطة ، كلمت ابو البنت يابو فلان الله لايهينك ابي اشوف مره ثانيه اذا مافيه مانع تلقاه يناظرك بنظرات تكره نفسك منها

واذا صار شايب جلس يزبد ويرعد وبنات الناس لعبه عندك وطردك مباشره

المهم في ذا الموضوع شباب وشابات ، الزواج مشروع متكامل ، ليه ماأشوف مره ثانيه وثالثه

< طماع ، لاصرت مو مقتنع بالشوفه الأولى اللي جلست اطالع فيها ماكلمتها ماسمعت صوتها ماعرفت طريقة تفكيرها مع ان معرفة طريقة التفكير شي ثانوي مو لازم ويبغالها جلسات متعددة ، يجب اني اكلمها اسمع صوتها بحضرة أهلها وش المانع؟
ولا أعلم حديث من النبي صلى الله عليه وسلم يدل على أن النظره الشرعيه مره واحدة ، بالعكس ربما النصوص تؤيد النظر أكثر من مره (فإن استطاع أن ينظر الى مايدعوه الى نكاحها فليفعل فإنه أحرى أن يؤدم بينهما ) ..
والأب الذكي يقول ياجماعه عن اذنكم بكلم انا أو يقول بجيب غرض من الصالة ،علشان آخذ راحتي اطالع فيها من فوق لتحت وآخذ جوي

وتاخذ راحتها هي بأرضه ..
وأنت ياطعس خلك ذكي مافيه مانع تلتفت على جنب شوي عطها مجال تشوفك

ولاهي خلوه شرعيه ولا شي وش اللي يمنع ؟

وتكلم معها وأنتي تكلمي معه ، هذاك تكلمين السواق ،لاصرتي ماتستحين من السواق ليه تستحين من زوج المستقبل ان كتب الله نصيب ، ليه التناقض الاجتماعي عندنا .؟

الأب الذكي يخليها تجيب شي عشان أشوف قوامها أشوف مشيتها اشوف مفاتنها كلها ومن حقي هذا ..
اللي يطلب الشوفه مره ثانيه ويقول تبريراته هذا الصادق مب مثل الكذاب المستعجل خفيف العقل اللي من يوم يشوفه يقول ارتحت ويالله بسرعه بسرعه بأتزوج !!؟

وياجماعة النظرة الأولى دايم تشنجيه ، لكن لو شفت أكثر من مره يصير استرخاء أكثر وأكثر ..

المفترض العكس البنت تطلب شوفه مره ثانية اذا كان الرجال عجل وتكلمه وتسولف معه ، لأنه الرجال وش عليه يتزوجها ويمكن يطلقها وينتهي الموضوع .. < شطحه بس اعتبرها منطقيه ولي الحق في اعتبار ماريد اعتباره ..

ليش في الغالب المجتمعات العربيه غير السعوديه وايضا الغربيه أنجح في العلاقات الزوجية ، لأنه تلقاها صديقه عمل ، او زميله دراسه ، ويعرف تفكيرها وكلامها واسلوبها ويعجب بها والعكس

أما حنا تجي على خشتك

ياتجي على ماتبي والحمدلله والا طلقها ، وانا ماادعوا أنه لازم يكون عندنا صداقه وكذا لا والله حاشا ، لكن التعرف أكثر الى البنت مطلوب ، ولا يتم هذا في الغالب الا بالنظر اكثر من مره

باختصار : بعض الفوائد من الشوفة أكثر من مره :

1- داائم النظر مره أخرى أكثر استرخاء من الأولى

2- تكلمها تسولف معها تحاول تعرف طريقه تفكيرها والعكس

3- ممكن بعد النظر أكثر من مره تعجبك أكثر وتتزوجها وهي ايضا كذلك ولو وقفت على النظره الأولى ممكن خليتها ودورت غيرها .

4- ممكن تعجبك من النظره الأولى ، لكم لين شفتها مره ثانيه تغيرت نظرتك ولا اعجبك اشياء فيها وتقرر انك ماتخطبها والعكس كذلك وهو الأصلح لكما .

5- دائم ماتطمئن نفسك مع النظره الثانيه بعكس الأولى تكون متردد ومتشتت .

في الختام ،،

الله يوفق كل من تزوج ويكتب للي ماتزوجوا الزوج والزوجه الصالحين

ونبي أرائكم لأنها مهمة وتناقش مسأله اجتماعيه أعتقد إنها ضروريه

* الموضوع كتب على عجاله ، فكره خطرت في بالي من كثر التفكير

العذر والسموحه على التقصير