مابي البداوة ابي الحضارة والحياة الثمينة

السلام عليكم ورحمة الله وبركاته
هذي قصيدة سمعتها للشاعر أبو على الدخيل ( من القصيم) يقول : ان بعض الناس قالولي ورى ماتخذلك غنم وأبل يابو على وتحطلك بيت شعر بالبر وتعيش حياة البداوة تراها ونيسه
ورد عليهم بهالابيات آمل ان تحوز على اعجابكم يقول :




قالو تبدوا قلت مابي البداوة = وجدودنا من قبلنا عايفينه
مابي الدبش ومطارده والشقاوه = ابي الحضاره والحياة الثمينه
بيت الشعر مابيه لو به صفاوه = وقصري على جال النهر عامرينه
وعلّيت مبناه القوى بالنزاوه = قصر الحضاره للشرف ناقشينه
كنه قصر سلطان بذيك النباوه = كبره غدى بعيوننا شايفينه
بحى الروابي شرقنا أم الحساوه = قصر الشرف لضيوفنا حاكمينه
ابيه الياجاء بالليالي قساوه = يبقى مزار ومنزل(ن) للحصينه
وبنيت من حوله ملاحق زهاوه = وحطيت حضار(ن) للنشامى يمينه
لولاد على وغيرهم به سلاوه = فيه الدلال ونجرهن ناعسينه
وأبشتغل مابي معاش الاخاوة = لو مانحصل غير خبزة عجينه
أخاف يتروس بي خطات القطاوه = ونفسي عزيزة ماتبي من يهينه
وأزرع واعمّر لوزماني مضاوه = وغرس النخل من جدنا وارثينه
عقب القليب وزعبنا بالدلاوه = اليوم جبنا للمزارع مكينه
وأخص غرس السكري بالعذاوه = ماله مثيل (ن) بالثمر ويش زينه
شوفه يسر العين وطلعه حلاوه = والله لخلقه والنبي ذاكرينه
شوف النخل للقلب عز وسلاوه = ولامال ظله وانتحت عقب لينه
وأبسمع المذن وحس التلاوه = يلين قلبي والفخر عايشنه
وأدرس عيالي تروح الغباوه = ابيهم مشايخ قدوة(ن) بالمدينة
هذا وزير وذاك يدرس ابجاوه = وهذا تخرج قايد(ن) للسفينه
وهذا جيلوجي واخذن به علاوه = وهذا طبيب(ن) للبلد محتوينه
العلم نور وللملا به صحاوه = والا الجهل فيه العمى خابرينه
وصلوا على خير البرية نقاوه = محمد اللي بالحرم دافنينه