كيف حال الشباب، زمان عنكم كتبت رد امس طويل وفي الأخير انمسح بالغلط حقدت وقلت اجيكم بعد المباراة ونتفلسف شوي
الف مبروك
الصدارة مع أفضل دفاع وأفضل هجوم وصدارة الهدافين للدون كريس
الحمد لله طلعنا من دون إصابات، حتى دي ماريا ماعتقد إنها بتعيقه عن مباراة كلاسيكو أوروبا
مباراة كبيرة قدمها لاعبين الريال حماس، ولياقة، وإندفاع بدني، وتحرك بدون كورة، وتنويع في الهجمات بشكل ممتاز، وفوق كل هذا رتم سريع مع خصم نص لاعبينه احلف إنهم عدائين
ملقا عندهم كم خال، مافي إلا قوة سبرنتات
نجي للمباراة
اللي كنت ابيه من مورينهو سواه ماعطى ملقا وجه وحاول يخلص المباراة بدري بدري عشان يريح أعصاب لاعبينه وأعصابه هو، ويقدر يغير ويريح اللي يبي
ضغط عالي من هجوم الريال على دفاع ملقا (وهذا شيء جديد جدا على هجوم فريقنا) نلاحظ هيقوين ودي ماريا وأوزيل وحتى كريس بنسبة أقل يضغطون على فداع ملقا بشكل متواصل وهذا اللي خلى دفاع ملقا إما يخطأ في التمرير أو يشتت أي كلام ونبدأ الهجمة من جديد
ضغط هجومنا تبعه ضغط الونسو وخضيرة ومعاهم الأظهرة مارسيلو واربيولا السيطرة للفريق في الشوط الأول تقريبا كانت سيطرة مطلقة واستخلاص الكورة من الخصم كان راااااااااااااااائع وبدون أخطاء تذكر
هذا من الجانب الدفاعي بالنسبة للجانب الهجومي كان التحرك بدون كورة ممتاز جدا، وبالذات بين الرباعي الهجومي وإن كنت اعتب على مورينهو في شيء إن جهتنا اليمين الهجومية كانت شبه مشلولة مع وجود اربيولا السيء جدا هجوميا، دي ماريا وكريس كانوا دائما على الجهة اليسار اللي فيها أبو كدش، وأبو كدش مايقصر لحاله مسوي قلق لدفاع ملقا
الشيء هذا خلى خضيرة وأوزيل يميلون في بعض الأوقات لليمين عشان يفتحون جبهة هجومية جديدة
في الشوط الثاني صرنا نلعب بأقل مجهود نشد وقت ماللعب يشد، ونهدأ وقت مانبي اللعب يهدأ وصار الاعتماد على تفقيل ملعبنا والاعتماد على الهجمات المرتدة السريعة ومهارات هجومنا
واللي نتج عنها هدفين آخرين للريال ريحوا فيها أعصاب مورينهو
بعدها مورينهو سحب دي ماريا عشان ماتتفاقم إصابته ويعطي لبيدرو فرصة عشان يتأدب سحب هيقوين ودخل البنز ياخذ فرصة سحب أوزيل ولعب كاناليس اللي قاطع من زمان عن الكورة وخلى كريس
سبحان الله طبيعة كريس واللاعبين اللي مثله تحس إن المدرب ممكن يرتكب جريمة في حق المشاهدين إذا طلعه يخليه لين آخر المباراة، يمتع ويستمتع نعمة الله يخليه لنا
نقاط سريعة
هدف ملقا يتحمله أولا بيبي لأنه كان عند القائم الأول، وبدرجة أقل خضيرة اللي كان ماسك لاعب ملقا اللي يجل الهدف
خضيرة امس وبغض النظر عن الهدف اللي دخل مرمى كاسياس، كان ممتااااااااااااااااااااااااز وبصراحة لولا إن كريس مسجل هدفين ومصلح هدفين كنت بعطيه نجومية المباراة وانا مغمض لاحظتم كم كورة قطعها في الوسط، كم هجمة خربها عليهم، متى يزيد هجوميا ومتى لا، كم كيلو ركض في المباراة، الالتحامات البدنية غالبا مايكسبها واكثر شيء عجبني امس شوته اللي بغت تكسر العارضة (ماشاء الله عشان مايجينا زيد ) حلو إن خضيرة بدأ يتجرأ في التسديد، التسديد أحيانا يكون الحل الوحيد للفريق عشان يفك الدفاع المتكتل، ومحد يشوت عندنا زي الناس إلا كريس وعلى خفيف مارسيلو والونسو
اربيولا ممتاز دفاعيا سيء جدا هجوميا، حسنته الوحيدة الهجومية امس تمريرته للبنز، والشيء هذا صار اما مرر علاطول وماتفلسف زي العادة وقعد يلف ويدور ويحرك الكورة من رجله اليمين ل اليسار وبعدين يرفع الكورة عالية خلف المهاجمين
أبو كدش ، بديت احبه، أحلى شيء اما يحتقر الخصم ويقطع الكورة منه عند الدفاع ويسحبه على الخط ويمشي وقح صح هو بس لو يخلي فلسفته اللي يسويها أما يرفع لهيقوين بين ثلاث مدافعين يصير وقح بقوة
هيقوين أمس ممتااااااااز، دائما قدام ملقا يبدع هفدين الأول منهم يدل إن عنده لمسة هجومية ممتازة ماتلاحظون كل ماعلق علي محمد علي، يبدع هيقوين زي مايبدع كريس إذا علق أيمن جادة (أحسه يقهره )
شريم ، ماجت معاه امس، اربع فرص كانت ممكن تجي أهداف (حظه نحس)، بس عجبني في تحركه لتمريرة اربيولا، وعرضية اربيولا اللي لعبها برأسه، ابيه يسنتر بس في ال 18 ويخلي حركات الأجنحة عنه بس تكفي شوفته في الملعب بالقرعة والجزمة الصفراء
أوزيل والونسو ودي ماريا وكارفالهو وكاسياس كانوا ممتازين واتفق مع الشباب في سوء بيبي امس مقارنة بالآخرين
أخيرا عريس الليلة هداف الليجا لاعب يحسم لك مباراة هدفين وصلح هدفين وخذ ثلاث نقاط وانهي الموضوع
أما لو فورمة كريس امس تكون يوم الثلاثاء الجاي إن شاء الله بنشوف شخااااااااااااااااااااااااااااميط كثيرة في دفاع الميلان
وش باقي
راجعين مع النقاشات
ومباراة الميلان إن شاء الله نبدأ نتكلم عنها من بكرة
اول شئ الله يعطيك ألف عافية القمر الهندي مانزل له تحديث للحين وكنت متورط كيف اشوف المباراة وروابطك حلت المشكلة شكرا لك
نبدأ بالمباراة مباراة أمس جميلة ريال مدريد ماسك اللعب من اوله الى اخرهـ شئ جميل انك تشوف الريال يتناقل الكرة بكل راحة ويستمر تناقل الكرة مدة طويلة وكلنا نشوف برشلونة واللي يميز طريقة لعبهم الإستحواذ الكبير على الكرة وهالكلام ماكنا نشوفة ايام بلجريني لكن الحين مع مورينهو صرنا نشوفة استحواذ كبير للكرة بناء هجمة من الخلف مساندة الأظهرة للهجمة ومساندة المحاور وقوة الأجنحة وصناعات اوزيل وهـ بس يالملكي
قسم بالله انه بطل وكفو بلا روبين بلا هم ظهير بمعنى الكلمة قدم يسرى قوية احتراق مهارة عرضيات صح وفوق هذا مبلغ قليل بحقة ههههههه
امس هقوين كان مستواه حلو تحركات وكان واضح انه يبحث عن تسجيل اكثر اهداف ممكنة وهذا اللي حصل وإن شاء الله الهدفين البارح يعطوهـ دفعه معنوية لمباراة الميلان
كريستانيو عاد وبدأ يسجل ويصنع وكل شئ مستواه امس رائع الصراحة صناعة هدفين وتسجيل هدفين إن شاء الله استمرار ومن احسن لاأحسن
ماأقول الا جعل عيني ماتبكيك
إقتباس
الرسالة الأصلية كتبت بواسطة يمكن A عشقتك
ههههههههههههههههه الله يسعدك ضحكتني هالصبح
بالعكس انا اشوف ان بنزيما راح يبدع بس يبي له فرصة ووقت فقط لا غير
المدرب البرتغالي مورينيو المهتم منذ قدومة لريال مدريد في فريق الكاستيا حضر مباراة بين ريال مدريد (كاستيا) و فريق , كوينكا , .
وقد قاد مورنيو تدريبات الفريق الأول في الصباح ومن ثم إتجة إلى ملعب , ألفريدو دي ست , في مدرينة ريال مدريد الرياضية لحضر لقاء الكاستيا , ووصل مورينيو إلى الملعب الساعة 12:30 وتمكن من مشاهدة آخر ربع ساعة من الشوط الاول .
وكان بجانبة مُساعدة , ايتور كارانكا , وكذلك اللاعب , خوان كارلوس , .
إيكر كاسياس حقق 245 إنتصاراً في الدوري مع ريال مدريد
إيكر كاسياس يواصل كتابة تاريخة المميز في ريال مدريد , فـ بعد الفوز بالأمس على ملقة 1_4 , حقق كاسياس 245 فوزاً في الدوري مع ريال مدريد متساوياً بهذا الرقم مع اللاعب السابق , خوسيه انطونيو كاماتشو , صاحب التريب السابع لأكثر اللاعبين الذين حققو إنتصارات مع ريال مدريد .
وقد حجز قائد ريال مدريد كاسياس مكاناً في تاريخ ريال مدريد , وبالرغم من عمر اللاعب إلا أنه حقق إحصائيات مع الفريق , وكان الفوز على ملقة له معنى خاص لـ كاسياس ليس فقط من أجل الفوز وتقديم المستوى ولكن من أجل تحقيق 245 إنتصاراً مع ريال مدريد في الدوري , ويصبح كاسياس في الترتيب السابع لأكثر اللاعبين الذين حققو إنتصارات مع ريال مدريد متعادلاً مع الأسطورة خوسيه انطونيو كاماتشو .
ويعتبر هذا الموسم الـ12 للحارس كاسياس وهو يدافع عن قميص ريال مدريد , وقد لعب 392 مباراة في الدوري وحقق 245 إنتصاراً و 73 تعادل و74 خسارة , وكان أول فوز قد حققة الحارس كاسياس أمام إسبانيول 2_1 في الجولة الـ16 من موسم 1999/2000 الموسم الذي شهد بداية كاسياس .
ويأتي في المركز الأول للاعبين الذين حققو أكثر إنتصارات في الدوري المهاجم راؤول جونزاليز بـ 327 فوزاً من خلال 16 موسم قضاها في الفريق , وفي المرتبة الثانية يأتي , مانولو سانشيز , بـ312 فوزاً وفي المركز الثالث , باكو خينتو , بـ284 فوزاً وفي المركز الرابع , سانتيانا , والمركز الخامس اللاعب , فرناندو هييرو , وفي المركز السادس ,ميشال , وبإمكان أن يصبح في المركز الرابع في هذا الموسم .
جدول للاعبين الأكثر إنتصاراً في الدوري مع ريال مدريد
^^
من اليسار (إسم اللاعب) + (عدد المباريات) + (عدد الإنتصارات) + (عدد المواسم التي قضاها مع الفريق).
مبروك الفوووووووز . اداء مقنع وطقطقه وشغل حلو , الاعبين جميعا قدمو اداء بطل يعني كل واحد قدم المطلوب منه , رجعه الدون والطعس مع بعض فيها كميه فخامه موب طبيعيه يعني تخيل جاهزيتهم امس بتصير نفسها قدام الشيبان ميلان ان شاء الله وعععع راح فيها نيستا هههههههه
عندي ملاحظه على فريقنا خلال الجولات الي راحت , 3 اهداف دخلت على مرمى ايكر كلها من كور عرضيه ! شيء غريب يعني هدف سوسيداد الاول كان من كوره عرضيه من فاول , بعدين الديبور عرضيه ورأسيه وقول , وامس ركنيه وقول ! فريقنا شوربه بالعرضيات اذا ان هالانديه ابو كلب سجلو من هالكور ابراهيموفيتش وش بيسوي اجل ؟ لازم المو يشوف له حل عاجلا غير اجل عندي قرق واجد بس الصدز عجز انتم تخيلو وش الي ببالي ههههههههههه
.....
شـخباركم 
الوضع العادي
