رجاء حار لادارة الهلال ،، تكفووووون الا سامي ،،،

المدرب وجى بعد مافرطنا بالصدارة اللي كانت بايدينا وقلنا معليش ،،
الاعبين الاجانا الله بالخير ، وقلنا معليش القادم أحلى ،،
حلاق ويدرب زعيم اندية آسيا وقلنا سحابة وتزول ،،،

الا سامي الجابر ، نبي نشوفه في اسرع وقت بالقميص الأزرق .

لا تقولون حنا بس ننتظر اجتماع اعضاء الشرف ، لا تقولون ان الاتحاد الانجليزي
يسكر ابوابه يوم السبت والأحد ، لا تقولون حنا جاهزين بس للأسف الاتحاد الفلاني
سبقنا ،،،، لا تقولون .....

ترى المسألة مهي معقدة فقط رفض طلب النادي الانجليزي وطلب استرجاع بطاقة سامي
الدولية ، ترى الفاكس ماياخذ ثواني والبريد السريع مستعد والله على حسابي .

سامي عطر الملاعب ، سامي امير الكرة واسطورتها المتوجة ، سامي اللي خلانا ما نناظر
الساعة مدامه في الملعب ، سامي اللي انقذنا من اشباه المهاجمين ، سامي اللي انقذنا
من مهاجمي الثمانية عشر المحنطين ، سامي اللي ارتكب الذنب الأعظم يوم انه وضع القميص
الأزرق فوق الراية ورفعها عالياً ومن يومها وهو يعاني من احقادهم ( مع انه اعتذر وقال
انا ماقصدت اني اجرح مشاعركم ، انا رفعت القميص الأزرق عاليا لجمهور الأزرق ) سامي شلال
الرعب لخصوم الزعيم .

احبائي ، تمنيتكم شفتوا طلة الذيب سامي في استاذ الدمام ، وكيف ان العشب رجع اخضر برجوعه ،
تمنيتكم شفتوا ابتسامته لجمهوره ، تمنيتكم شفتوا كيف ان القلوب رجع لها الدفء يوم انه قام
يسخن ، تمنيتكم شفتوه وهو يبادل جمهوره التحية يوم ان الملعب تزلزل بدخوله ، كأنه يقول
انا رجعت لكم ورجع الفن الجابري .

تكفووون ياادارة الهلال ، نبي نشوف سامي في مباراة الهلال والاتفاق ، في ذاك اليوم انا راح
احمل قشي وبسكن جنب الاستاذ في انتظار شوفة الذيب بالقميص الأزرق ، لازم يرجع حتى يعين ابويعقوب
ويساعده على تطبيق نظرياته ، ترى ابويعقوب انهد حيله وهو يقاتل ويصلح اخطاء غيره ،


تكفون ياادارة الهلال ، كل شي نسامح فيه الا الذيب سامي يوم 28 بالشهر بالقميص الأزرق لازم نشوفه

ياعسى تصدق امنياتي ،،،،،،