15/04/2010, 01:28 PM
|
 | زعيــم مميــز | | تاريخ التسجيل: 02/05/2007 المكان: هنــآك ..!
مشاركات: 2,193
| |
حسافه والله العظيم !! .. صرنا نضرب المثل بغيرنا ، وغيرنا كان يضرب المثل فينا .!! ، وين هيبتنا ؟
السلام عليكم ورحمة الله وبركاته
في البدايه احمد الله واشكره على التأهل لدور الـ 16 واللعب على ارضنا وبين جماهيرنا
وان شاء الله نفرح سواء بالبطوله الأسيويه ، ويرد الفريق على كل هلالي متشائم من ملعبه على وجه الخصوص ..
في الحقيقه اللي نشوفه من الأعضاء هو ان الفريق ما يلعب زين على ارضه او ان نتائجه
دائم ما تكون ايجابيه على ارض الأستاد ، واستغرب انجراف جماهير كثيره ورى هالكلام
طيب خلونا نكون واقعيين ، هل البطولات الأسيويه اللي حققناها كلها برى الأستاد ؟
اجمل اوقات الهلاليين كانت على هالملعب ، واقربها اخر نهائي لعبناه واخذناه وبأفضل مستوى
والا النحس كان معزوم في قهاوي الفحص هذيك الليله ؟ 
تخيلوا ان اللاعبين انزرع فيهم هالشي ؟ وش راح تتوقعون بيسوون ؟
راح يلعبون كل مباراه على الأستاد تحت ضغط رهيب ، هذا غير الضغوطات الجماهيريه
وضغوطات الأعلام والظلم الأعلامي والتحكيمي اللي يصير على فريق الهلال بالذات ..
يا جماعه فكروا فيها بعقل ، ما يصير هالكلام ابد !
تخيلوا ان اللوبي الأصفر ومن يتبعهم ، استخدموا هالشي كـ وسيلة ضغط على الفريق في كل مباراه
يلعبها الفريق في الأستاد ، راح يستمرون لـ سنوات طويله وهم يكررونها ، مثل سالفة بطولات
الهلال التحكيميه ، وهالشي راح يأثر على كل الفريق في مبارياته القادمه .
الشق الثاني من الموضوع ، هو الحضور الجماهيري
خلونا نعترف ان جماهيرنا صارت بليده جداً في الحضور ، واستخلاق الأعذار في الحضور
يعني نطلع ألف عذر عشان ما نروح ، مره مشوار ومره العساكر ومره الرابطه ومره المدخنين
ما خلينا شي ما نقوله وكله عشان ما نحضر ، بالله عليكم يعني جديده سالفة المدخنين ؟
يعني اول
كانوا يطلعون برى عشان يدخنون ويرجعون يكملون مباراتهم ؟ والا العساكرمن يوم ما عرفنا
الملاعب وهذولا هم العساكر ، اخلاق زفت لا برى ولا داخل الملعب حتى في الشارع 
وش بيضرك اذا بتدخل عادي وبتحضر وبتدعم فريقك ، وش هالعسكري اللي بيجيك من بين
كم ألف مشجع وبيقول لك قم لا تشجع ؟!
يا ناس يكفينا اللي حنا فيه ، اللوبي الأصفر له مؤامرات كثيره وكله عشان يسقط اكثرية
جماهير الهلال ، وهذاهم يستشهدون بالحضور في مبارياتنا الأخيره ، في كل برنامج نشوفهم
يتكلمون ، بالله يالمشجع الهلالي في الرياض اللي تنتقد وتزعل على اللاعبين وعلى الفريق
بأكلمه ما تحس انك مقصر في الحضور ؟ ، انا ما اقول الكل لكن الأغلبيه مقصر .. قارن
نفسك بينك وبين اللي يجي من الجنوب ويضرب فوق الألف كيلو عشان يحضر المباراه
واللي يجي من الشمال !!
بالله عليكم ما جاء الوقت اللي تردون فيه على شلة هالجحلط اللي كثروا علينا اشاعات ومؤامرات
لسلب حق الهلال في كل شي ، حتى في جماهيريته اللي تقدرون تردون عليهم فيها بالحضور والدعم !!
ما جاء الوقت اللي تثبتون فيه انكم الرقم الصعب وانكم الأكثر على مستوى اسيا بأكلمها !!
بالله عليكم مثقله عليكم ساعتين والا ثلاث ساعات تحضرون فيها ؟ ، حتى في الأجازات
ما صرتوا تحضرون ؟
وين جمهور الهلال اللي نعرفه ؟ ، وين القوه الجماهيريه اللي تكلم عنها كوزمين ؟ ، وين
هيبة جماهير الزعيم اللي تعرفها اسيا قبل المملكه ؟
حسافه والله العظيم
اخر سؤال وبالله عليكم فكروا فيه زين ..
لو جت مباراة الهلال والنصر الجايه ، وصاروا جماهير النصر اكثر من الهلال ؟ وش بيصير
في التلفزيون والصحافه ؟ وش بتكون ردة فعل المشجع الهلال وهو يجاوب اي احد يسأله
ان الجمهور النصراوي صار افضل من الهلالي في الحضور ، مع ان النصر له غايب لسنوات
عن البطولات !!
طيب خلونا من الأكثر والأقل ..
ما فيه دعم للفريق ؟ مهوب في حاجتنا وحاجة دعمنا ؟ وش نبي بعد من الفريق ؟
لاعبين
اجانب وعندنا افضل لاعبين في المملكه ؟ ، لاعبين محليين ، وكلهم في المنتخب ودوليين
أداره ؟ وعندنا افضل أداره احترافيه ولا ينقصنا الحمد لله أداره ، والمدرب كل واحد فينا
يتمنى انه يستمر لسنوات ..
طيب وش نبي بعد ما نحضر ؟ ياخي مهوب ضارنا التعب لكم ساعه وحنا ندور اللي نشغل
انفسنا فيه ، وبعضنا يدخل المنتدى اكثر من ما يشوف اهله !!
يا ناس حتى مواضيع المنتدى بعد مباراة السد كلها تتكلم عن ليش ظلمونا في عدد الحضور
في مباراة السد والا رادوي ليش تهور وضرب البلوشي !!
مباراة النصر المصيريه باقي عليها اقل من اسبوع ، وهي ديربي وهامه وتأهل للنهائي مباشره
النهائي اللي ما جبنا بطولته الى الحين ، ويفتقدها الزعيم .. حتى النهائي ما وصلنا له في تاريخنا !!
الأسيويه وجبناها وخلاص مباراة دور الـ 16 باقي عليها كثير ، ليش ما ندعم فريقنا الأن
وننسى اللي راح ونهتم في الحاضر ؟!
يا جماعه ، تخيلوا الفريق بعد جريتس وعبدالرحمن بن مساعد وسامي ؟
يخوف صح ؟!
خلونا نستثمر وجودهم في البطولات وبحضورنا اللي يخلي فريقنا ما يحتاج ألا توفيق ربي سبحانه
دام حنا ومدربنا وأدارة فريقنا وراه ..
الله الله في تشجيع بعضنا لبعض في الحضور ، وفي دعم فريقنا ، ونترك كل شي ما يهمنا
ولا يقدم ولا يؤخر ، ونتكاتف لأجل فريقنا اللي بحاجتنا ، وننسى الماضي ونفكر بالجاي
ونترك الأستهزاء بالأخرين ، والزعل على بعضنا ونفتح صفحه جديده مع فريقنا لنوصل
للي نبيه ، وناخذ البطولات ونخلي لغيرنا الكلام ..
ترى ما كنا نقول شوفوا جمهور النصر كيف يحضر ، وشوفوا الأتحاد كيف يتأهل للأدوار
النهائيه في اسيا ..
كان يضرب بنا المثل في الحضور ، وفي فريقنا بأسيا وبالبطولات ..
لا نتغير ونصير مثل غيرنا ..
نفرح ان شاء الله بكأس خادم الحرمين للأبطال ..
وبالتأهل لـ دور الثمانيه في اسيا لـ هالموسم .. وندعم فريقنا الموسم الجاي
في الأدوار النهائيه في اسيا ..
الهمه تكفون ..
واتمنى من كتّاب المنتدى الكبار ، ما يقصرون في دعم الجماهير ..
وبالتوفيق لزعيمنا ..
|
الوضع المتطور
