مبروك لِـ ستاخوفيسكي البطولة , تمنيتها لِـ إيستومين اللي لعب علينا يوم مع فيدرير
قلت يعني على هالإصابة في سيسناتي خلاص ماراح يشارك في أمريكا , لكن ما شاء الله عليه لعب في هالبطولة وبيلعب في أمريكا بكره مع لاعب أرجنتيني مهبول اشوي اسمه " مكسيمو غونزاليس " .. شفته لعب أمام فلوريان ماير في الدور الثالث بطولة هامبورغ اللي فاز فيها اللاعب الكازاخستاني على ما أظن أمام ميلزر .
المهم .. الأهم في هالبطولة ان فيرداسكو ما شارك فيها
صراحة مدري شقول عنه .. يعني شهالغباء !!
يشارك في بطولة نيس اللي تسبق الرولان وهو مهوب محتاجها , وتدهور مستواه بسببها , وأحين وهو محتاج هالبطولة لتحسين مستواه ما شارك , لا والمشكلة ان كان البطل !
مدري وشناوي عليه هالمرّة
/
بدأت وجه السعد
أول يوم من البطولة ما نشوف المباريات كويس , كل اشوي على مباراة , لدرجة ودك تطفي التي في أهون من هالعشوائية .. يا مبدعين النتائج ما ردنّا بنعرفها !
المهم .. أسنع شيء ان سيليتش تأهل , لأني توقعته صراحة ان ما يتأهل من هالحواق هاللي عنده , لكن الحمد لله خيب ظني وتأهل ونتيجته طيبة بعد .. أمّا روبن فشكله تعب في مباراته اللي وصلت إلى 5 مجموعات , فاز بالمجموعة الأولى رغم ان كان متأخر بكسر الإرسال 4/1 وبس بعدها ما شفت غير تقطيعات , لكن الحمد لله تأهل وباين خصمه حسب اللي شفته ان لاعب مهوب هين لكن فعالية الإرسال سيئة وبقووة لدرجة انها وصلت إلى 45 تقريباً وهالشيء ما يساعده كثير خاصة لمّا يواجه لاعب من المصنفين الأوائل وكويسين في التبادلات .
وبعد تأهل مونفيس , رغم إني تأملت بقووة في حارس المرمى الأمريكي في ويمبلدون أمام موراي حبيبنا الظريف " كندريك " .. صحيح تعبّه لكن شستفيد دام هالفرنسي تأهل .
وتيبساريفيتش القوي طلّع روكوس القزم وتأهل بعد ما أخذ منه مجموعة .. والله يوفقه في الزوجي , وصح على طاري الزوجي .. في لاعبين كثير كالعادة راح يلعبون الإثنين , وهالمرّة تيبسا راح يلعب مع لاعب " نيو " مع الآسيوي اللي فرحنّا في ويمبلدون بعد ما طلّع روديك نسيت اسمه , المهم انهم راح يلعبون أمام الزوجي بطل نيو هافن " ستاخوفيسكي " و " يوجني " وشكلهم أول مرة يلعبون مع بعض .. المهم وشفت بعد الزوجي جارسيا لوبيز ومونتانيس , طبعاً لوبيز شكله يدوّر له على مخرج للعودة حبّة حبة .. وتنتيت نول يلعب زوجي بحكم ان صار " تلفيق × تلفيق " , وقد تكون فأل خير عليه .
عموماً , اليوم مافي شيء جديد ولا مفاجأة ولا حتى مباريات تستحق نتحمس لمشاهدتها , مواجهات بكره أونسّ
لكن مافي فايده , كلها راح نشوفها تقطيع غير مباراة نادال ويمكن النول
المهم بالنسبة للمواجهات الحلوة بكره هي : " فونيني vs فيرداسكو " - " فيرير vs دولجوبولوف " - " سيرا vs فلوريان ماير " - " جولبيس vs شاردي "
ونأمل في مباراة باغداتيس أمام كليمون اللي كان طرف في أطول مباراة - سابقاً - أمام سانتورو .. طبعاً هو الطرف الخسران , يعني سيم سيم " ماهوت " .. وأحلى شيء اثنينهم فرنسيين .. بس ياليت سانتورو صربي
صح نسيت غونزاليس .. طبعاً خلاص غصلت يدي منه .. بلا أمل بلا بطيخ , انسحب من أمام دوديك , فاز بالمجموعة الأولى 7/6 لكنه خرب كل شغله بالمجموعة الثانية بعد ما خسرها 1/6 ! الله يعينه على روحه , قاعد يخسر نقاط كثير , يعني تقريباً خسر 350 نقطة , وعلى ما أظن المشاركة عليها 10 نقاط ! يعني الولد قاضي بقووة هالموسم .
المهم .. بالتوفيق للنول بكره .
/
في بطولة تشالنجر تّلعب الآن اسمها " كومو "
أدري مش مهمة ولا لنا فيها , بس طالعت أسماء المشاركين فيها وعرفت كم واحد
من ضمنهم المغربي " رضا العمراني " .. طبعاً رضا طلع من الدور ما قبل الأخير في تصفيات أمريكا أمام لاعب فرنسي اسمه " سيدورينكو " , طبعاً هالهبل الفرنسي طلع من التصفيات الأخيرة أمام البرازيلي " خوليو سيلفا " اللي راح يلعب بكره أمام الأوروجوياني " كويفاس " .
وفي بعد حبيبنا الإيطالي " فولاندري " اللي قلدّ عليه النول تلبيةً لطلب مواطنه " ستراتشي " في غرف أمريكا في 07
وفي لاعب لعب يوم شفت اسمه ضحكت عليه . اللي هو النمساوي " كوليرير " واجه ديل بورتو في أمريكا في الدور الثاني على ما أظن , المهم حبيبنا هالنمساوي خويّ ميلزر , جاب نقطة على ديل بوترو - بالحظ وبقووة - بسبب تدخل الشبك في النقطة , عاد هو من الفرح راح - بوّسّ - الشبك عشانها مع ان الغبي بوترو أصلاً متقدم على إرساله 40-0 !! يعني الوضع ما يستاهل هالفرحة .
وفي بعد لاعب استغربت بقووة من تواجد اسمه .. أظن إني غلطان , لأن هاللاعب حسب ما أعرف ان أخذ المصنف الأول وأحين عمره 43 !
المهم هاللاعب اسمه " توماس موستر " .. طبعاً انا مش متأكد ان اسمه " توماس " لكن كاتبين حرف " T " بداية اسمه , فقلت أكيد هو توماس ما غيره اللي قالوا عنه برنامج الـ atp في الجزيرة
اللي يعرف عن هذا اللاعب شيء ياليت يفيدنا .
ونتمنى التوفيق لممثل العرب " رضا العمراني " في هالبطولة , وإن شاء الله نشوفه في بطولات أكبر
وفي بعد لاعب استغربت بقووة من تواجد اسمه .. أظن إني غلطان , لأن هاللاعب حسب ما أعرف ان أخذ المصنف الأول وأحين عمره 43 !
المهم هاللاعب اسمه " توماس موستر " .. طبعاً انا مش متأكد ان اسمه " توماس " لكن كاتبين حرف " T " بداية اسمه , فقلت أكيد هو توماس ما غيره اللي قالوا عنه برنامج الـ atp في الجزيرة
اللي يعرف عن هذا اللاعب شيء ياليت يفيدنا
مرحبا أخوي / J.COLE
نعم فقد اخترت لاعب يشار له بالبنان ، كيف ولا ونحن نذكر اسم اللاعب النمساوي / توماس موستر ( Thomas Muster )
أذكر تعليقاً للاعب ( الأسباني / رافائيل نادال ) عندما ذكر بأنه كان يستمتع عندما يشاهد مباريات ولقطات للاعب النمساوي
خاصة إذا ما علمنا أنه كان مبدع على الملاعب الرملية ، وقد فاز بلقب واحد كبير كان في ( رولان غاروس ) عام ( 1995 )
تغلب في العديد من النهائيات على لاعبين كبار أمثال ( الألماني / بوريس بيكر ) و ( الكرواتي / غوران ايفانيسوفيتش )
و ( الأمريكي / مايكل تشانج ) و ( الروسي / يفينجي كافلينكوف )
ولديه ( 44 ) بطولة ، وتصدر التصنيف العالمي في ( 1996 )
والله يهداك أي نبذة ! الـ atp كل شيء غير متوقع ينبرشون حوله
المهم .. راجع لك أكيد .. هاللاعب فاتني , قرأت عن لاعبين كثير وهذا ما جا في مخي قطّ
شكراً رهيف
/
انهزم بيرديتش
والله حرام من الدور الأول عاد .. صحيح ما خسر نقاط كثير لأن الموسم الماضي أصلاً سيء بالنسبة له , لكن هالموسم توماس أثبت نفسه وبشكل كبير وقوي
بيرديتش كان جاهل تماماً كيفية التعامل مع لاعب مثل لودرا .. لودرا غثييييييث بكل معنى الكلمة , وفيدرير بعد مباراته معاه في تورنتو قال ان هاللاعب يرهق خصمه كثير بسبب كثرة مجازفته
لودرا لاعب خبرة ومعرف عنه كثرة صعوده على الشبك , يصعد على الشبك بشكل كبير .. يعني في أحد عاقل يصعد على الشبك خلال 3 مجموعات فقط أكثر من سبعين مرّة ؟!!
أشكّ في مخه صراحة ... لا يُلام أبداً توماس على خروجه , لودرا كان يهاجم وبس , النقطة له ,مهيب له , أهم شيء يهاجم , تقول يركد اشوي لا مافيه , ما يعطي مجال .. يعني لو أفترض ان توماس معروف بسوئه في الباسينج شوت كان شصارت النتيجة !
لو كانت هذي المباراة الأولى اللي أتابعها لِـ توماس , كان قلت عنه ان أغبى لاعب في الباسينج شوت !
غير معقول لودرا على هالصعود .. يشكل رعب غريب على خصمه !
بس إن شاء الله يطلع أمام هانسيكو .
وطبعاً هالمباراة تعتبر المفاجأة الثانية هالبطولة بعد خروج باغداتيس اللي يسمونه الجزيرة " باغداديس " على يد كليمون .. توقعت مباراة حلوة وطويلة , لكن استعبدت خروج القبرصي من هالدور , لكن كالعادة الفرنسيين دائماً الأوائل في كسر التوقعات .
وصح بعد بالنسبة لِـ جولبيس , صراحة توقعت ان يطلع , شاردي أداءه تحسن كثير , وهالشيء كان مُلاحظ وبقوة من بطولتي " تورنتو , سيسناتي " أمام النول و موراي , كاد يطلِّع موراي بعد ما عادل المباراة , ولولا النكسة اللي صارت له في المجموعة الثالثة كان بإمكانه التأهل مكان آندي .. على كلٍ , صحيح خسرنا جولبيس لكن كسبنا لاعب حماسي من الدرجة الأولى بالإضافة إلى المهارات العالية اللي يمتلكها شاردي , بس إن شاء الله يطلع
ولا أنسى بليك اللي فاجأني بجدّ .. أبداً ما توقعت يتأهل حتى وإن كان خصمه أول مرة نسمع بإسمه , لا وبعد جايب نقاط حلوة في المباراة .. وعلى طاريه صحّ , هو لعب في نيو هافن وفاز على لاعب اسباني اسمه " ريبا " بنتيجة 2/0 تفاصيلها " 6/0 - 6/1 " في مباراة استمرت 35 دقيقة فقط .. وطبعاً في مباراة أقصر من كذا وفي نفس البطولة , وتعتبر أقصر مباراة في الموسم حتى الآن استمرت 29 دقيقة كان الفائز فيها لاعب بريطاني اسمه " روزي ديسكي " بنتيجة " 6/0 - 6/0 " على لاعب ألماني نسيت اسمه ... حمد لله والشكر , بطولة محدن حولك !
أمّا بالنسبة لِـ فيدرير , فتكفينا الطقطقة اللي صارت في المباراة .. وصح بالنسبة لخصمه يُقال ان أصله لبناني وفي من ينطق اسمه " دعبول "
أمّا نادال , فمباراته كانت توب .. جاباشفيلي كان خصم قوي مثل ما توقعت , خاصة ان قدم مستوى ممتاز في آخر مرة شفناه فيها في الرولان وتأهله إلى الدور الرابع , لكن نادال ما عطاه الفرص الكافية لكسر الإرسال كأدنى هدف .. أمّا على أداء نادال فأظنه ممتاز بالمقارنة مع أداءه في البطولتين الأخيرتين , وإن شاء الله يرجع على ما سبق فيها
النول .. أشكّ في ان تروييسكي سحب على تيبساريفيتش في الزوجي واضطرّه ان يلعب مع لاعب أول مرة يلعب معاه تجهيزاً لإقصاء النول
تروييسكي قدم أفضل مستوى شفته له من عرفته , ضربات من آخر الملعب دقيقة جداً قلصت الحلول المعتادة للنول إذا واجهه , وهذا أمر شكّيت فيه , لأن تروييسكي كان واضح تحسنه في سيسناتي .. الغلطة كلها على النول , حسسّني ان مستهزئ بخصمه كثير بحكم ان لعب معاه مواجهات عدّة .. المهم المباراة حلوة وديربي مميز لأبناء صربيا وأهنئ تروييسكي على هالأداء وهالشجاعة العالية اللي فاجأ بها مواطنه , ونتمنى ان يتطور أكثر .
اممم .. وشبعد ؟!
اي هيويت فنقشّ .. أزين لِـ فيردير لكن مش مشكلة , ماثيو بطل وإن شاء يواجهه في الدور الثالث ويحقق مفاجأة
وبس .. وكل التوفيق لخصوم نادال وفيدرير و روديك ودافي
/
تيبساريفيتش vs روديك
دافي vs جاسكيه
سوديرلينغ vs دينت
مباريات بتكون بطلة .. لحدن يفوتها
خاصة الأولى مع استهبال ومغامرة تيبسا بيكون لها دور كبير في الحماس.. وكل التوفيق لِـ تيبسا
4Likes
منافسات اليوم الأول 
الوضع العادي
