يادار.. لاهنتي ولاهان راعيك ... ولا هان شعب كرموا راية الديــن - نادي الهلال السعودي - شبكة الزعيم

Fahad Al Sudais · #1 04/03/2010, 11:03 PM

حيـــــــــاكم

ذات مساء ممطر .. مغبر

مفعم بالحيوية بالانتعاش... كنت قاعد لحالي آكل فش فاش

واقحن شاهي من ابريقي الأثري.. وارجع بالذاكرة الى العصر الحجري

وكنت ( طاقّن الهوجاس ).. مع أخذ الحذر ضد الكهرب والإلتماس

لاشيء يعلو على صوت المكيف في خيمة العز والشرف.. والشيطان عني قد ( ذلف ) وانحرف

بملعقة الذكاء والعباطة.. اقلّب افكاري المطاطة

ابحث عن سبب واضح وصريح... لتفسير هروب الخادمات بهذا الوضع المريح ؟؟

يخرب بيت الخادمة لا هجّت بكل عنفوان.. وانت يالكفيل رح قشر بصل وهش الذبان

زرفت لها طقمين ذهب وخمس الاف ريـال.. وحطت رجلها ملعونة الخيّر بلا جدال

هي تفتح الباب وتفرك بكل أريحيه.. وانت رح ( ألطم ) وقل شققيني يالرياح العارضيه

تروح تبلغ عنها في قسم الشرطه.. يقول لك ( سقها ) والله يعينك على هالورطه

تشد الرحال بإتجاه مكتب إيواء الخادمات.. يقول لك ليه تزعّلها

ولا تندم على ما فات

تبهذلها وتكرفها وتلعن جدفها بالشغل والتمسيح.. واذا نفذت بجلدها تجينا تشتكي وتصيح

تقعد تحلف له انها عايشه مثل الأميره

.. ما غير تبلع اندومي والسندويشات عندها ( تصبيره )

وخذ يا بطايق سوا وموبايلي وزين.. تكلم اهلها الصبح والعصر وبين العشاوين

وكل يوم والثاني تبي كريم نيفيا وشامبو.. وتمسك معها على العشاء شاورما جامبو

وتاليتها بنت اللي منيب قايل تقضب الباب... وتتركنا نقول ( يادي النيله.. يادي الهباب )

يقول لك : خلاص لاتكثر البربره والكلام

... رح وراجعنا بعد اسبوعين باحترام

تجيه بعد اسبوعين مثل ماطلب.. يقول لك : ( ياكثرك

) وخذ اسبوعين ثانية بكل أدب

وراح شهر وشهرين وثلاثة شهور.. وانت على حالتك قافله معك ومقهور

بعد فترة لقوها في بيت دعارة بالبطحاء مع بنغالي.. وانت ياغافل لك الله تقول الله يعلم بحالي

يدقّون عليك : بكرى تحضّر عندنا

... من صباح الله اترك كل شي وتعال لمّنا

تجيهم وتلقى الشرطي ومندوب الأمارة.. كل واحد فيهم رازّن خشته وطاق الزقارة

تدخل عليهم وانت كلك رومانسية وطيبه

.. تقول عطوني قريشاتي وذهيبات زوجتي الحبيبه

يكشّر بوجهك حق الأمارة وتجحظ عيونه.. ويقول لك تستهبل وتستخف دمك يالدرة المكنونه

قم دام النفس عليك طيبه وجب لنا تذكرتها.. علشان نسفّرها لأهلها لا تزعل حكومتها

وانت ( طس بقريح ) ولاعاد تشغلنا.. لابوووك لابووو ( قرد ) يامواطن بلدنا

ياجماعة الخير وين العدل والانصاف

.. وش هالظلم ؟؟ وش هالإجحاف ؟؟

ندفع للدولة ألفين وللمكتب ست ألاف وزيادة.. وننتظر ثلاث او اربع شهور معتادة

ولما تجي طويلة العمر وتوصل بالسلامة.. نرجع وندفع لهم من حلالنا علشان الإقامة

ثم تسرق وتنهب وتفتح الباب وتهج.. وانت ( انتظر ام العوف على قرونها تحج )

مدفن

دارنا مثل العروس.. وكـلـنـــا خـطـابـــهـا

من يبي شمس الشموس.. من يحب ترابها

مهرها بذل النفوس.. وستـرها وحجـابـها

كلمة الله والحسام.. ومن مع الله ما يظام