26/02/2010, 09:18 AM
|
 | زعيــم متألــق | | تاريخ التسجيل: 09/07/2008
مشاركات: 962
| |
|
رسميا : بوهانج الكوري والهلال السعودي وجها لوجه في دور الـ 16 !! يا ويلنا ولا يا ويلهم !!
بسم الله الرحمن الرحيم نواف الهلالي يعود لكم من جديد  يالله حيهم  ألف مبروك لكل هلالي فوق كل أرض وتحت كل سماء على صعود الدرجة الأولى من السلم الآسيوي  البطولة الآسيوية وما أدراك مالبطولة الآسيوية ..!! هذي البطولة مشكلتها غير مسموح فيها الهفوات أو التراخي ولا فيها تعويض لو خسرت ..!!
البطولة هذي تحتاج إلى رووح وعزيمة وإصرار وفريق جاهز بالكامل ( وبدلاء جاهزين ) ..!
دائما إذا فكرت أنك تحصل على بطولة مثل هذي .. ناظر من أقوى فريق يمكن إنك تقابله !!
بعد كذا تجهز فريقك حتى يصل لمستوى تتأكد فيه أنك قادر على هزيمة هذا الفريق بإذن الله ..!!
لأنه باختصار وأنا متأكد إن الجميع يوافقني على هذا الكلام .. إذا كان الفريق لن يصل لمستوى
أفضل من الفريق البطل اللي سنواجهه على النهائي بحيث نقدر نفوز عليه ، فالأفضل عندنا إننا نخرج
من الدور هذا ولا نتعب أنفسنا ونحرق أعصابنا وناصل النهائي وننهزم ..!!
:
: عشان كذا السؤال الآن : هل الهلال مستعد لهزيمة بوهانج الكوري لو وضعتنا القرعة في مواجهته ..؟؟ خلونا في البداية نتكلم عن اللاعبين :
اللاعبين لا يكفي فقط إنه يكون عندنا فريق أساسي قوي لا .. بل لابد يصير فيه بدلاء جاهزين لأنه احتمال بأي لحظة
أحد اللاعبين يصاب واحتمال لاعب ياخذ كرت .. المهم إنه احتمال يغيب أي لاعب موجود عشان كذا البديل ماهو أقل
أهمية من الأساسي ..!! ولا فيه شيء اسمه تمشي الأمور لا لا يا حبيبي آسيا ما فيها شيء اسمه تمشي الأمور !!
ولا فيها إن شاء الله نبي نفوز وإن شاء البديل بيلعب زين < الكلام هذا ما يصلح !!
إلا ( اعقلها وتوكل ) يعني اعمل واشتغل وهات بدلاء وجهز فريقك وتوكل معها على رب العالمين ..!! ولنا في غيرنا عبرة شوفوا الاتحاد مثلا لما غاب الرهيب في النهائي ومشّوا الأمور بـ عبيد الشمراني وش اللي صار ..!!
أكلوا هوا ..!! عشان كذا الحين لما نشوف لعيبتنا كعناصر أساسية اللي هي الدعيع ولي يونق وهوساوي والمرشدي والزوري وعزيز ورادوي
و ويلي والعابد ونيفيز وياسر .. هذي التشكيلة كعناصر ممتازة بغض النظر عن طريقة اللعب اللي أبتكلم عنها بعد شوي ..!!
لكن المشكلة الآن لما نجي للبدلاء ..: لا يوجد إلا الوسط هو اللي يزخر باللاعبين الجيدين أساسيين وبدلاء ..!
لكن لما نجي للدفاع مثلا : لي يونق .. من بديله لو أصيب أو أخذ كرت ؟؟ لا يوجد ..!!
ثانيا : أسامه .. نقول يوجد بديل جيد وهو حسن خيرات !!
ثالثا : المرشدي .. من بديله مدافع يلعب باليسرى لو أصيب أو أخذ كرت ؟؟ لا يوجد ..!!
رابعا : الزوري .. نقول فيه الكوري يغطي مكانه لو حصل شيء ..!!
أما الهجوم : ماذا لو ياسر أصيب أو أخذ كرت وغاب عن النهائي مثلا ؟؟؟
الصويلح يترنح مع الاصابات .. والعنبر ماهو قد المقام .. وعيسى : هو البديل الوحيد اللي احتمال يكون جاهز واحتمال لا بسبب عدم
وجود فرصه له للعب في المباريات اللي قبل .. فالمسألة تبي تصير مغامره .. ومثل ما قلنا المغامرات مرفوضة في آسيا واللعب لازم يكون على المضمون ..!! عشان كذا الآن إذا كان الهلاليين لديهم رغبة جادة بالمنافسة على البطولة فلا بد من إحضار بدلاء في هذه الخانات الثلاث
الظهير الأيمن .. والمدافع الأيسر .. والمهاجم .. ويكونون لاعبين محليين طبعا لكن في مستويات ممتازة ( ولو بالإعارة ) ..!
وإلا بغير كذا فمسألة مشي حالك والبركة بالموجود هذي باي باي آسيا من هالحين ..!! النقطة الثانية اللي يجب أن نعرفها أيضا وهي إن لاعبين بوهانج وأندية شرق آسيا عموما يمتازون باللعب السريع
يعني اللاعب البطيء كالشلهوب في مستواه الحالي أو الغنام أو غيرهم هذولاء ما يقدرون ياكلون معهم عيش ..!!
والدليل شاهدنا مناف أبو شقير لاعب الاتحاد يلعب في مستويات لا بأس بها لكن لما جاء قدام الفريق هذا صار عالة
على الفريق بشهادة خالد الشنيف .. لأنه باختصار ما يمديه يثبت الكوره ويلف جسمه إلا واثنين من لاعبينهم عند خشمه 
لذلك كل ما صار لعبنا أسرع كل ما صرنا للبطولة أقرب !! والعكس صحيح !! طـريـقـة اللـعــب بالنسبة لطريقة لعب الهلال الآن .. لدينا مشكلة كبيرة وهي كثرة دخول الأهداف أكثر من قبل ..!!
بعض الشباب يعلل المشكلة بأن هذا بسبب الطريقة الهجومية اللي تفرض عليك دخول مثل هالعدد من الأهداف ..!!
أنا أقول التعليل هذا غير صحيح إطلاقا !! والدليل هذا بطل العالم برشلونة يلعب بثلاث مهاجمين وأمام أكبر فرق العالم
ومع ذلك لا يستقبل الكثير من الأهداف ..!! وش السبب ؟!
السبب سلمكم الله هو أنه إذا كانت الكوره مع الخصم تلقاهم يضغطون على حامل الكره بأكثر من لاعب ورجل لرجل
مع اللاعبين الآخرين بحيث يصير فيه ارتباك للخصم بسبب أسلوب الضغط الرهيب هذا وتلقى أكثر مناولاته خاطئة
والضغط يكون في ملعب الخصم لدرجة تخليه يجد صعوبة في الوصول لمنتصف الملعب حتى ..!!
أما في الهلال فالمشكلة تلقى الخصم ماسك الكوره وهات وخذ ولعيبتنا بدل ما يتقدمون ويضغطون تلقاهم يتراجعون
حتى صار من أسهل الأمور دخول منطقة الجزاء الهلالية ..!! وهذا أكبر خطأ ..!!
الواجب والمفترض إن الضغط يبدأ من المهاجم إلى الوسط والمحاور بحيث يقاتلون عشان يمنعون الكره من الوصول للدفاع
وليس مثل ما نشاهد أكثر الكور لا تقطع إلا من الدفاع حتى مع أسوأ الفرق ..!!
وحتى تطبق هالطريقة بالشكل المطلوب لابد يكون هناك تقارب من الخطوط ..!! مهب نشوف عزيز ورادوي وهم كلهم محاور
ومع ذلك بينهم مسافات يسرح ويمرح فيها الخصم ..!!
^^^ هذا هو الحل الرئيسي لمشكلة كثرة استقبال الأهداف ومثل ما قلت من يقول إن الخطة الهجومية تستوجب هذا فكلامه غير صحيح أبدا ..!! رميات جانبية << يسمع بالعناوين
# مشكلة الشلهوب الآن هي نفس مشكلته الموسم الماضي وهي البطء الشديد ويا ليت يحاول يعالج هالمشكلة مثل ما عالجها أول !!
يعني يمكن لياقته نزلت أو وزنه زاد !! يعني فيه شيء جاه وخلى سرعته تضعف ..!! أتمنى عودته لسرعته حتى يعود لمستواه سريعا فالزعيم بحاجته ..!!
لكن مسألة إصرار جريتس على إشراكه من أول المباراة هذا ماهو حل ولن يفيده !! الحل مع النجوم الكبار لما ينزل مستواهم
وسبق أن ذكرت الكلام أيام نواف هو أنه في البداية يخليه عدة مباريات يلعب في آخر نصف ساعة حتى يجيب كل اللي عنده ..!!
بعكس لما يلعب من أول المباراة تلقاه ما يجهد نفسه كثير لأن قدامه 90 دقيقة ..!! فلا بد من تطبيق هالشيء حتى يعود الموهوب لمستواه ..!!
# واضح إن رادوي مرتاح يوم صار عزيز يلعب معه وصار يتأخر في الرجوع والتغطية !! بيني وبينكم
بديت أشك إن عزيز طاق صدره وقايل له خلك قدام وازهل الدفاع يالسنايدي 
# من أكثر ما استانست عليه هو نقطة جوهرية كانت من أكبر أسباب خروجنا من البطولات الآسيوية الماضية وهي الضغط على الفريق
بموال البطولة الآسيوية فالرئيس يصرح ويقول الآسيوية والمدرب يقول العالمية والجماهير تطالب فيدخل اللاعبين للملعب في ضغط
نفسي هائل يخسرون معه من أضعف الأندية .!! وهذا الشيء اللي كان يخليني دائما أتوقع خروجنا من البطولة في أي وقت ..!!
لكن لما تشاهد التصريحات هذا الموسم من الإدارة تلقى إنهم استوعبوا هالنقطة ويوضحون إنه لن يكون هناك ضغط على اللاعبين
وهذا هو المطلوب ..!!
# بخصوص سالفة ويلي .. بصراحة مع كل التقدير والاحترام لإدارتنا الموقرة إلا أني أشوف فيه مبالغة كبيرة في العقوبة
وأشوف إننا جارينا صفر الوجيه في مطالباتهم !! فاللاعب الأكثر عطاء في الفريق واللي يستاهل التكريم بصراحه
نجي مع أقرب زله ونفرض عليه هذي العقوبة القاسية جدا اللي ما يستحقها أبدا ..!!
أتمنى من الإدارة يوم كانت مضطرة لوضع مثل هالعقوبة إنها على الأقل خلتها عقوبة صورية
يعني باختصار لا تطبق !! فقط تكون لإسكات من يصطادون في المياه العكره ..!! أعتذر وبقوّه على الإطالة .. ولكم مني أرق التحايا ،،، |
الوضع العادي
