نادي الهلال السعودي - شبكة الزعيم - الموقع الرسمي - معروض لـ ( طويل العمر ) !! " هذا اللي صار بالضبط في ملعب الملز " !!

- نبذة عن مقدّم المعروض :/

* الاسم : مغاط !!
* العمر : توني صغيّر !!
* الجنسية : بادي أشك من تالي إني بنغالي !!
* الديانة : مسلم سنيّ .. ومحوميّن تسبدي الحوثيين !!
* الأكلة المفضلة : حب مصري !!
* المشروب المفضل : - قبل ينلعب علينا ويزيدون النص كنت - أقدّر البيبسي ..
أما الحين رجعت لـ جيم كولا !!
* طموحك في الحياة : إني أدخل مباراة و ألقى الإنسان يـُعامـَـل على أساس إنه " إنسان
" !!
* حكمتك في الحياة : مالك إلا خشمك لو هو (أعوج) !! بس عقب ( عمليات
التجميل ) !! أكتشفت إننا عايشين على " حكم و تصورات بالية " !! و اكتشفت
إن هالحكمة نصبة وكذبة .. مثلها مثل : "مدّ لحافك على قد رجليك" !! إلا قم
وأكرف واشتغل عشان تقدر تشتري لحاف أطول .. وتمدّه عشان يغطي سيقانك هالمشعّرة
!!

-----------------------------------
-----------------------------------

- نص المعروض :/

أنا يا طويل العمر إنسان أحّب الكورة !! صح إن عندنا أنواع الأنشطة والفعاليات !!
والواحد يتلخبط إذا جاء الويك إند !! ما يدري وش يبدّي .. ولا وش يختار ؟! وياشين
هالنصابيّن اللي يقولون لك (الكورة هي المتنفس الوحيد) !! تسنهم ما شافوا رجال
الأعمال اللي ماغير طقاق على هالشاب كل واحد يقول للثاني .. ( أنا اللي حالــّه قبلك )
!! و آخر ماشفت رجل أعمال مالط أم الشنب .. ورابط بشته على خصره ومعه نعلة
نايلون .. و يالله فكيناه من رجل أعمال ثاني !! باني لنا نادي " تعليم طيران"
!! وأنا ما رفع ضغطي كثر رجال هالأعمال اللي ما يمرّ أسبوع إلا شايـلنا بالباصات الصفر .. ورايح بنا يا أما رحلة تجديف وإلا غوص !! يا أخي ملينــّا !!

المهم يا طويل العمر .. إني رحت اليوم أحضر مباراة للفريق اللي أحبـّه !! وعشاني
حبيّب وأصدق أي شي !! وعشانهم (مقدميّن) المباراة ومتذيهنين وقايلين إن الجوّ بررد
مووت .. فأنا طقيت ذيك البجامة اللي تقول لبجامة علاء الكويكبي .. يالله مناااااك !!
و فوقه ثوب شتوي (غاطين) !! وجكيت فرو لونه فيراني يحبه قلبك !! لدرجة لو
تجيب طبق بيض وتحطه بمخابي ثوبي .. والله إن يفقسن قبل يقضي الشوط الأول .. من قوّ الحر اللي جوّا !! والله يوم جيت للملعب يا طويل العمر .. وإلا وش أشوف ؟!

* أول شي شفته :

- أكشاك بيع التذاكر الزجاجية الداخلية !!
وأحب أشكركم بهالمناسبة .. لإحساسكم بقيمة (المشجع الرياضي) اللي هو (المقياس
الأهم في نجاح أي تظاهرة رياضية ) !! و أشكر لكم حرصكم وقيامكم بإغلاق (الدرايش
اللي على الشارع العام ) خخخخخخخخ تذكرها يا طويل العمر ؟! ذيك الدرايش ما غيرها .. اللي إذا صفيت بالسرا .. توقع يا يدعسك موتر يا تلخك مراية لموزين !! كل
ما تذكرت أشكالنا وحنا مالين السايدين وراقين على الرصيف اللي بالنص ونحتري !! والله إني أموت ضحك .. تدري إن السرا واصل إلى مبنى مكافحة المخدرات ..والسرا اللي بجنبنا واصل إلى جامع الراجحي اللي على الدائري .. قسم بالله شي يوجع القلب 17 ألف متفرج متوقع حضورهم وراصين أم أمهم بدريشتين وعلى شارع .. الله لا يعيد ذيك الايام!! فأثمن لكم استغلال الساحة الداخلية وفتح أكشاك لبيع التذاكر .. بشكل يوحي بمدى اهتمامكم بالـ ( مشجع القلق) !!

* خامس شي شفته :

- لوحة إظهار عدد التذاكر المتبقية :
أعجبني يا طويل العمر حركتكم .. وحرصكم على وقت (المشجع القلق ) ..
وهالسابقة اللي تعتبر الأولى من نوعها !! عشان ما يرّص في السرا اللي طول قريح !! وبالأخير يطلّع بياع التذاكر راسه مع الدريشة هو وضروسه ويقول لك : ترا التذاكر قضت .. علـّم اللي وراك !! خخخخ تذكر هالبربسة يا طويل العمر ؟! الحين الله يحفظكم .. فعلا أثبتــّوا للمشجع الرياضي أنكم حريصين كل الحرص على كل ما يكفل راحته وسلامته ووقته !! وأكثر شيء أعجبني إن كل بياع تذاكر بمجرد ما يبيع أي تذكرة يضغط زر عنده قينقص الرقم اللي على الكشك الزجاجي .. اللي يوضح عدد التذاكر المتوفرة !! فيقدر أي شخص يعرف إن صفتــّه على سنع وإلا يقلب وجهه و يروح لكشك ثاني .. من البداية !!

* رابع شي أعجبني :

- الـ Duty Free of Malaz
"السوق الحرة في الملز" !!
الصراحة أكثر شي استانس عليه إننا فتحنا الباب لـ"المستثمر الأجنبي" يبربس ويحوووق
أمها عند ملاعبنا !! يا حبي لهم ههههههه ودي تشوف أشكالهم يا طويل العمر .. و حنا
نلاحقهم .. وهم يساومونــّا على أسعار التذاكر !!
طبعا يجي (الباكستاني) شاري له 300 تذكرة !! و يحتري التذاكر تقضي !! ثم
تعال شف تدبيل الأسعار !! قسم بالله يا طويل العمر إني شاريها .. أنا وخوّيي و
بـ80 !! لكن إذا جاء أبو .. جايب عياله الأربعة أو الخمسة !؟؟؟! معك آله
حاسبة يا طويل العمر ؟! أحسبها شف كم !! لاااااا هذا إذا صار (الباكستاني حبيّب
وعلى نياته .. و له فترة بالسعودية !! ) وإلا قسم بالله إن سعر التذاكر اليوم متعدّي
( 120) ريال !!

* تاسع شي أعجبني :

- قرار عدم بيع أكثر من تذكرتين للشخص الواحد !!
و أثمن لكم تعديلكم على القرار - يا حبكم عاد لتعديل قراراتكم خخخخ لعبتكم ذي!! - أيه
أقول .. أثمّن لكم فتح المجال للشخص الواحد بشراء أربع تذاكر مرة واحدة !! أدري
صعبة السيطرة على هالتلاعب !! لكن في علم القانون .. إذا ما قدرت تمنع ( الجريمة
والتلاعب بنسبة 100 % ) فحاول قدر المستطاع ( التقليل من وقوعه ) !!
وهذي طبيعة أكثر التشريعات والقوانين .. الهدف منها (الوصول لأعلى مستوى ممكن من
صيانة حقوق الإنسان وممتلكاته مهما كانت تافهة ) !! بس والله يا هي ضحك يا طويل
العمر !! أطعم شيء بالدنيا إنك تنزرف .. ولا فيه أي جهة رقابية تحفظ لك أبسط حقوقك
!! بس لا تحسب إننا متضايقين !! لاااااااا بالعكس يا رجال .. ترا العالم مكيفــّة و
فاليّن والديها !!

* سابعطعش شي أعجبني :

- تنسيقكم مع وزارة الداخلية !!
و عمل ورش عمل شبه أسبوعية لرجال الأمن المشرفين
على المناسبات الرياضية .. وترسيخ مفهوم ( احترام المشجع الرياضي .. أو
باختصار " احترام الإنسان لمجرد أنه إنسان لا أكثر " ) !! ودّي إنك شايف وشلون
المعاملة الراقية يا طويل العمر .. حتى فيه عسكري لاحقني !! و التفت وأثره وراي
.. وأنا اللي أحط رجلي و لازنــّي و أنا اللي أعظ شليلي وهو مكيـّم وراي .. بس قهر
صادني .. وأثر معه (باقة ورد) وهو يقعد يمحطنــّي فيها !! و ميّت من الضحك
ويقول لي وشلون تدخل الملعب بدون ما أعطيك وردة !! الصراحة أنا تروّعت .. أدري
إن عساكرتنا حبيبّين بس ما توصل الأمور للورد وعبق الزهور !! اللي طفشني صدق يا
طويل العمر .. إننا متراهنين أنا وواحد نشوف كم عدد العساكر اللي ( مكشريّن
وينفخون على العالم .. ويحسبون العالم بهم !! ) بس قهر مالقينا إلا واحد ..يوم جينا
نكتب اسمه .. اعتذر وقام يحلـّف ما يعيدها وشطبنا اسمه !!

-----------------------------------
-----------------------------------

- أشياء سقطت سهوا من المعروض :/

تخيلوا ؟!

بدال الـ 150 ألف و الـ 50 ألف اللي تدفعها زين كل أسبوع .. وبمنهجية عقيمة !! تخيلوا
لو قلـّل هذا المبلغ لـ 50 % وراحت للجائزة 100 ألف (75 ألف للفريق و 25 ألف للاعب
) ولتطوير (مشاكل الملاعب المائة الف الثانية ) ؟! بالله مهوب أصرف من هالبرابيس
اللي انبحـّت أصواتنا وحنــا نسلط الضوء عليها !!

تخيلوا ؟!

يبادر مجموعة من رجال الأعمال اللي أكلوا الأخضر واليابس .. ويحس بواجبه الوطني
ودوره التثقيفي والتوعوي !! ويشارك بوضع بعض النقاط على الحروف الواردة في
المعروض أعلاه !!

تخيلوا ؟!

إني صاير بجيح ومتكلم - للمرة الثمانمية - .. عن مسألة ترقيم كراسي الجماهير
!! وطريقة تدفق الجماهير لـ مقاعدهم !! و استيعاب الحس الوقائي الأمني المتضمن لهذا القرار من قبل المسؤولين !!

تخيلوا ؟!

يكون كل اللي صار اليوم .. فعلا مشروع لإسقاط وإعثار الزعيم .. عن مواصلة زحفه للقمة !! و ذلك عن طريق ( الإرهاق النفسي والجسدي لجماهيره ) التي تعتبر - دون أدنى شك - هي المحرّك الأساس والوقود الفعــّال لما حققه حتى الآن !!