إخواني الأعزاء ... السلام عليكم ...

تحدث لنا أبو فهد في الجزء السابق - الصحافة )1) ... اللي إنتقد فيه نوعية معينه من الصحفيين وأسماهم بأصحاب (نصف نجمه) ... والصحافة المتخصصة وحالها ... وإختتم اللقاء بقوله أن لديه فكرة يتمنى أن تتبناها الصحافة عندنا ، وأنه يراهن على نجاحها ... خلونا نشوف وش عند أبو فهد ... تصدقون إتصل على الإستاذ صالح الحمادي ... ويقول إنه من يوم قرأ هالموضوع ... له كم يوم ما نام زين ... يبي يعرف فكرة أبو فهد قبل ما تنزل للمنتدى ... علشان يصير عنده سبق صحفي ... ورفضت طبعاً ... لأن هالموضوع حق من حقوق المنتدى ... (تراني أمزح) ... المهم خل نشوف وش عند أبو فهد ... ؟؟؟

http://alzaeem.com/vb/showthread.php?threadid=83455

.............................................. وش عند أبو فهد ...................................................

أبو فهد : الموضوع بسيط ... ويبي له شوية همه وشغل ... وإمعان وتفكير فيه ...

خلاصة الفكرة ... لو قامت أي جريده وجابت لها مجموعة خبراء رياضيين (إحصائيين) ... يخططون ويجمعون بيانات المسابقات الرياضية بأنواعها ... وبعدين يحطونها في قاعدة بيانات ... ويحفظونها في كمبيوتر ... ومثل هالطريقة مطبقة في معظم دول العالم ... اللي تبي تتطور وتتقدم ... حنا يا أخي في عصر الكمبيوتر ... ومثل هالموضوع ضروري ولا يحتاج لأي تأخير ...؟؟؟

أبو محمد : طيب وش نوعية البيانات اللي تقصدها يابو فهد ...؟؟؟

أبو فهد : البيانات لازم تكون شامله ... ومتميزة طبعاً ... ويحددها الخبراء ... والمهم إننا نطلع منها بنتائج مفيدة ... ؟؟؟
وخذ عندك مثلا ... كل مباراة لها تسجيل كامل للاعبين والحكام والبطاقات والأهداف ... وهذه بيانات عامه أكيد إنها متوفرة في الرئاسة العامة لرعاية الشباب ...؟؟؟

أبو محمد : لا تكبر الموضوع يابو فهد ... وش دور الصحافة ...؟؟؟

أبو فهد : إصبر علي شوي وأنا أخوك ... إذا جابت الصحافة (الخبراء الإحصائيين) مثل ما قلت لك ... وحطت لها كم واحد يراجعون أرشيفها الصحفي (فقط) في البداية ... وبعض أشرطة الفيديو ... وطبعا يراجعون سجلات الرعاية في مراحل لاحقة ...؟؟؟

لكن خل تكون البداية على خفيف ... من أرشيفهم فقط ... وياخذون (الدوري السعودي لكرة القدم) كتجربة ... ويجهزون لهم نظام حاسب آلي ... يسجلون فيه بيانات محددة ..تشتمل على بعض المعلومات الأساسية والمميزة ... طبعاً يحددها الخبراء ... راح تبدأ بإخراج معلومات جديدة (خرافية) ما لها حصر ... ؟؟؟

وبهالطريقة راح تكون هالبيانات نواة أساسية تنطلق منها وتتشعب فيما بعد ... وطبعاً راح تكون الصحافة مصدر إيجابي للمعلومات ... لأنها تمتلك معلومات هامة فوائدها تتعدى التصور ... ؟؟؟

وخل أعطيك جزئية بسيطه من نوعية هالمعلومات ... اللي يفترض أن تكون متوفرة عند الصحافة فقط ... وأبضرب لك مثال في الأهداف المسجلة في كل مباراة ...؟؟؟

لو إستطاعت الصحافة من خلال أرشيفها حصر الأهداف المسجلة في كل مباراة وصممت لها نموذج عن كل هدف ومعلوماته ... وأدخلته في الحاسب الآلي ... حسب البيانات التالية ...؟؟؟

o المسابقة اللي سجل فيها الهدف ( دوري – كاس وغيرها) من البداية.
o الموسم الرياضي - التاريخ (هجري وميلادي) إسم اللاعب
o النادي صاحب الهدف – النادي المسجل عليه الهدف .
o الملعب – والمرمى (شمالي وجنوبي)
o نوع الهدف من كرة ملعوبه .
o الأهداف بالقدم ونخصص أيضا (اليمين – والشمال) .
o الأهداف بالراس .
o الأهداف من ضربات جزاء (بلنتيات) .
o الأهداف من ضربات حرة مباشرة (فاولات) .
o الأهداف من ضربات حرة (غير مباشرة).
o الأهداف من ركنيات
o الأهداف (داخل منطقة الجزاء) و (خارج منطقة الجزاء).
o الأهداف حسب أيام الأسبوع .
o الأهداف حسب زمن المباراة
o الأهداف حسب الزمن الفعلي - الساعة والدقيقة - نهارا ... ليلا ...

وقس على ذلك ضربات الجزاء ... وحالات التسلل ... وغيرها من المعلومات... وراجع المحصلة اللي بتطلع عندك ...؟؟؟

هذا غيض من فيض ... وطبعا إذا توفرت هالمعلومات ... راح يرتقي مستوى المتابعة والتحليل ... خل نصير مثل العالم وأنا أخوك ... وطبعا إذا إرتفع مستوى التحليل ... من طقها وإلحقها ... أو الأسلوب الوصفي المتبع (حسب مزاج الكاتب) ... سيرتفع مستوى وعي القاريء ... لإختلاف المعلومة ... ومنها سيرتفع أسلوب المتابعة والمشاهدة عند الجماهير ... واللاعبين أيضا ... ومن مثل هالبيانات ... تستطيع تقويم وتقييم اللاعبين وأدائهم ... وتحليل طرق اللعب المتبعة ... وفق (خطط علمية مدروسة) صحيحة ... وبعدين تستطيع معالجة نقاط الضعف ... وفوائد كثيرة مالها حصر ... ؟؟؟؟


وتوقف أبو فهد قليلا وتبسم ... وهو يرى علامات الإندهاش الواضحه على أخوكم ... ثم تابع قائلا ...

وطبعا المعلومات اللي ذكرتها في مجال الأهداف فقط ... وعليك القياس لو توسعت وخليتها على مواضيع ثانيه ... مثل طرق الأداء وتقييم عطاء اللاعبين وغيرها ... يا أخي الدراسات الصحيحه لازم تعتمد على معلومات إحصائية دقيقة ... وحنا للأسف نفتقد لأبسط هذه المعلومات ... حتى ما عندنا اللي يفكر فيها ...؟؟؟

أبو محمد : والله يابو فهد كلامك كبير ... وأشوفك أخذتني بعيد ... ومثل هالكلام ما خطر على بالي ...؟؟؟

لكن أظن الفائدة من بعض البيانات ... قليلة وما تسوى التعب عليها ... وأشوف المشوار بعيد ... وتكلفته كثيرة ...؟؟؟

أبو فهد :
صدقني ... ما فية معلومة ما لها فائده ... وبصراحة ... لازم نبدأ ... ولو على خفيف ... المهم نبدأ ...

وبعدين راح تشوف لو توفرت هالمعلومات البسيطة ... بيتغير التحليل والمتابعه ... والجريدة اللي بتتبنى هالفكرة ... راح تكون وحيده (في الساحة) ... (تغرد خارج السرب) ... لأن عندها معلومات تساوي ذهب ... وتكاليفها (لا تذكر) ... مقارنه بفائدتها ... ولا تنسى حقوق الحماية الفكرية (لأبو فهد) ...؟؟؟

والاستفادة طبعاً للجميع ... الإعلام والأندية ورعاية الشباب والشارع الرياضي بأكملة ... لأنها راح توضح كثير من النقاط الخافية في اللاعب السعودي ...؟؟؟

أبو محمد : طيب هذي مسؤولية الصحافة ... أو الإتحاد السعودي ... أو الأندية ...؟؟؟

أبو فهد : الجميع ... وكل من له مسؤوليته الخاصة ... والصحافة قبل غيرها ... لازم تحرص على مثل هالموضوع ... لأنها بترفع من مستوى طرحها ... اللي راح يكون تأثيره إيجابي على مستوى وعي القارئ ... لأنه يأخذ معلومة مفيدة ... ؟؟؟

أنت هالحين إذا قريت الخبر الإعلامي عن أي مباراة دولية ... تلاقيه يعتمد على المعلومات الإحصائية ...
أما ربعنا ... (طقها وإلحقها) ... تعتمد على الوصف حسب المزاج ...؟؟؟

يا أخي لازم يتوفر في الصحافة متخصصين يقدمون دراسات ومساهمات ترفع من شأن وفكر القاريء ... لأن هذا هو دورها الرئيسي ...
وللأسف صحافتنا متخصصة في زرع الحزازات والنعرات ... كذب ودجل ... عناوين صارخة ... ألفاظ جارحة ... تجاوز للأدب ... يمارسه أطفال وأقزام الصحافة ... والهدف تجاري بحت ... وبعدين يقولون حنا بريئين ...؟؟؟

أبو محمد : والله يابو فهد ... حيرتني ما أدري وش أقول ... لكن أظن اللي تطلبه (دور الجرايد) ...؟؟

أبو فهد : أجل دورها تحش فلان وعلان من الناس ، الجرايد هي حلقة الوصل بين الأندية والجماهير الرياضية ، وعلشان كذا لازم يكون دورها أشمل وأسمى من واقعها الحالي ...؟؟؟

وبعدين يا أخي حنا دائما ننشد الأفضل ... واللي أشوفه من وجهة نظري كقاريء ... إن صحفنا تحتاج لعمليات غربلة وتطوير شاملة ... والأعجب إننا كل يوم نتفاجأ بجريدة رياضية متخصصة جديدة ... يعني عندك الرياضية وعالم الرياضة مثلا ... مطبوعتين ومن مصدر واحد ... يصير هالكلام ...؟؟؟

أبو محمد : الشغله تجارة ... وهذا طلب السوق ... ما دام الجريدتين كسبانه والناس تشتري ... وش اللي يمنع البحث عن المصلحة ... والجيد يفرض نفسه ...؟؟؟

أبو فهد : إذا إختلف الهدف الأساسي ... إذا كانت الدعوى (أرباح) ... وأحط الرياضية للهلاليين مثلا ... وعالم الرياضة للإتحاديين ... والرياضي للنصراويين ... و و و و ... أجل أفضل شيء أتوقف عن الكلام ... لأني أنفخ في قربة مشقوقة ...؟؟؟

أبو محمد : اللي أنا شايفه يابو فهد إن كلامك أخذ جانب بعيد ما كنت حاطه على بالي ... وأنا كنت أبغى أسألك عن واقع صحافتنا في الوقت الحاضر ... وكنت محضر لك سؤال هو هل صحافتنا (صحافة أندية) ... لكن فاجأتني بهالموضوع ... خل نرتاح شوي ونشوف ردود الإخوان على رأيك وبعدين نكمل ...؟؟؟

.............................................. أنتهى الصحافة (2) ...................................

إخواني الأعزاء أختم الجزء الثاني من حديث أبوفهد عن الصحافة الرياضية السعودية عند هذا الحد ...؟؟؟

وأتمنى إن تجيبوني بكل صراحة ... ولا تبخلوا علينا بإبداء الرأي ... وتعطوني رأيكم في فكرة أبو فهد ... (هو نجح وتجاوز الإختبار) ... يوم إنه تحدى في الجزء السابق ... أو إن كلامه غير معقول وجانبه الصواب ... أو إنه ما جاب جديد ...؟؟؟

وبإذن الله في الجزء السادس ستقرؤون رأي أبو فهد في صحافتنا ووجهة نظرة بصحافة الأندية وسبب حدوثها ... بتحليل ماركة (أبو فهد) ...... ؟؟؟

وتقبلوا تحيات أخوكم : أزرق هلالي

آلف شكر لك أخوي " أزرق هلالي " ..

موضوع متميز وحلو ومرتب ...

والله يعطيك العافية ...

مقال رائع جدا وسوالف كلها درر

شكرا لك

تحياتي

الله يعطيك العافية على هالموضوع الرائع ولكن تبي رائي عن الصحافه الرياضيية عندنا والله ما عندك أحد الا من رحم ربي

كلام جميل
لكن المشكله ليست في التقنيه لكن من يدير هذه التقنيه ؟؟

كلام جميل ........ وفكر تقدمي راقي .. باختصار هو ينشد الإستفادة من التقنية الحديثة والمتمثله


في الحاسوب !! والحقيقة الفكرة التي طرحها >>>>>>>>>>>> مهمة ....... وصعبة .......


والمؤسف أن جميع الجهات تفتقر إليها ............ وهي موضوع >>>>> الإحصاء .. وتوفر

المعلومه !! وأرى شخصياً أن الجهة التي يجب عليها تبني هذه الفكرة هي >>>> وزارة

الإعلام ؟؟؟؟ وقد ذكرني هذا الموضوع ....... خبراً قرأته عن شريط الثنيان وهو عدم التمكن

من الحصول على مباراة شارك فيها ضد فريق أجنبي >> أو ما شابه ذلك ! ولم توجد في

الوزارة ..... وأقول الوزارة لأنها هي التي تمثل الإعلام السعودي بكل جوانبه ... !

ويأتي إتحاد القدم .. بعد الوزارة .. وإن كان يفترض أن يكون هو السباق لمثل هذا العمل .. لأنه

القطاع المعني بالرياضة لكن ......... وش نقول ؟؟؟؟؟؟؟؟؟؟؟؟؟؟؟؟ الدعوى كل شي يمشي

بالبركة ........ !


والخلاصة أن قضية الإحصاءات وتوفر المعلومات للباحثين في كل الأجهزة الحكومية لا زالت

قائمة ويعتريها الكثير من القصور ؟؟؟؟؟؟؟؟؟؟ والآن بدأت محاولات لجمع ما يمكن

تجميعه !! من المعلومات المتناثرة هنا وهناك ...... لدرجة أن قطاع تعليم البنات مثلاً توجد

فيه شعب إحصائية ما لا حصر لها .......... ورغم ذلك لا أحد يستطيع الحصول على معلومة

متكامله لتشتت الجهد وعدم التنسيق فيما بينها ! لقد خرجت عن النص أعرف ذلك ولكن هذه

حقيقة الإحصاءات التي يطرحها أبو فهد .. وياليت الصحافة التي بدأت في التنافس على

اللحاق بركب التطور التقني من خلال منشآتها الكبيرة والفخمة .. وأجهزتها الحديثة تتبنى مثل

هذه الأفكار .. بدلاً من تبني صحفيين غير مؤهلين ! يعملون لتبني توجهات أخرى تخدم

مصالحهم فقط ؟؟؟؟؟؟؟؟؟؟؟؟؟؟؟ على كل حال >>>>>>>> تفاءلوا بالخير تجدوه <<<<<<<<

الله كريم .................

كلام حلو... ومقال ولا أروع


الله يعطيك العافية