لاحول ولا قوة الا بالله
يعني الى متى يا عبدالله بن مساعد؟؟؟؟؟؟ تكفى لا تصرح بأي شي يخص النادي
رئيس النادي موجود ونائب الرئيس موجود ورئيس اعضاء الشرف موجود
دائما تصاريحك تسيء للهلال او تأثر عليه...السنه اللي راحت لما فكر الاتحاد السعودي ياخذ كوزمين لتدريب المنتخب رحت ادليت بتصريح استفزازي وتقول لو كنت رئيس الهلال واخذوا كوزمين لتدريب المنتخب بأستقيل ..كأننا ناقصين عداواة في الاتحاد السعودي طيب هذاهم شالوا كوزمين وبالقوه ومو للمنتخب الا طلعوه برا....وش سويت؟
طيب الحين تصرح عن مستوى ياسر والدعيع....يا استاذي كلنا نعرف الشي اللي تعرضله ياسر الموسم اللي راح وللأسف لسبب او لآخر ادارة الهلال ماقدرت تسوي اي شي للدفاع عن الاعب حتى ماقدرت تاخذ حق الاعب بعقوبه رمزيه لجماهير الانديه اللي اسائت له بشكل قذر وتأثر مستواه في نهاية الموسم...طيب الآن حنا في اول الموسم ونشوف ياسر بادي يستعيد مستواه اكيد مارجع لمستواه اللي نعرفه للحين بس برضوا حنا في اول الموسم مالعبنا الا 4 مباريات تجي وتتكلم بالطريقه هذي؟؟؟
الدعيع ماكان له داعي تتكلم عن اعتزاله خاصه انه توه داخل فينا هدف بغلطه منه...كذا انت تأثر عليه وتزيد الطين بلله .
بعدين ليش التناقض؟ من نهاية الموسم اللي راح وانتم تقولون جيرتس عنده كل الصلاحيات في التشكيله وحاجة النادي للعيبه الاجانب...خلاص اتركوه هو اللي يحدد.
التصريحات اللي مالها داعي اتركوها حتى لو كانت في مقابله ليش تعطون المرضى النصراويين وجبات دسمه وفرصه يتدخلون ويسيئون للعيبة الهلال؟؟
امس في برنامج مساء الرياضيه تو المطيويع يقدم الضيوف الا ونط الصحفي النصراوي على طول وقال البارح صرح الامير عبدالله بن مساعد وقال ان الدعيع المفروض يعتزل وياسر مستواه هابط...لاحظ المفردات اللي استهخدمها (المفروض يعتزل) (هابط)
ابدا ما ننكر المجهود الكبير اللي يقدمه الامير عبدالله بن مساعد للهلال سواء على مستوى تعاقدات الاعبين او العقود الاستثماريه والتسويقيه لكن اتمنى يتقبل النقد.
وفي النهايه....اختلاف الرأي لا يفسد للزعــــــيم قضيه