السلام عليكم ورحمة الله وبركاته ..


كل عام و أنتم بخير وصحة وسلامة .. أبيكم تعطوني من وقتكم 9 دقايق ونص !! وإذا هي كثيرة .. أبد سامح لكم تطمرّون وتشطفوّن بعض الحتسي اللي ماله سنع !!

أولا : وصلّوا تحياتي للغالي على قلب كل مسلم وكل عربي وكل سعودي وكل هلالي .. ( أبو متعب ) يا جعله ذخر ..


ثانيا : أنتم شفتوا البربسة اللي صارت لنا قبل كم يوم ؟!

أنتم تدرون إننا نحترق بس يرتفع ( شعار لا إله إلا الله .. محمد رسول الله ) بكل محفل وتجمع تكون وجهة العالم كلها له ؟!

أنتم تدرون إن فيه غلط برياضتنا ولازم يتصلح !!

أنتم تدرون إن الرياضة هي المتنفس الوحيد لنا !!

أنتم تدرون إن (الشاب) هو الثروة الحقيقة لأي مجتمع !! بلا بترول بلا صناعة بلا تين شوكي !!

أنتم تدرون إنه ملعوب علينا من أكثر من 15 سنة !! بوعود واهية !! ويبي يسوّون لنا ويفعلون لنا !! و منــّاك كل مالها رياضتنا وتدحدر !!

أنتم تدرون إننا الدولة الوحيدة اللي محرومة من مشاهدة مباريات كاس العالم !! إلا بصفقة دراهم !! أو تنــّطق وتنثبر بمقهى أنظف واحد فيه طالب (معسل تفاحتين) !! والعاقل ( يدخن إل إم أزرق ) !!

أنتم تدرون إننا الدولة الوحيدة اللي محرومة تناظر ( مباريات منتخبها ) حتى بتلفزيوناتها الرسمية !! أو غيرها !! إلا بـ ( مبلغ وقدره ) !!

أنتم تدرون إن عندنا بربسة بجدولة مبارياتنا المحلية !! ما يسويها ولا ( وكيل مدرسه توهم معيّنينه ) !!

أنتم تدرون إن اللاعب السعودي هو أكثر لاعب مكروف على وجه الكره الأرضية .. بسبب بربسة التنظيم !! وحوسة المباريات .. وضغط المشاركات !! بحيث إذا جاء وقت ( تشريف الوطن ) !! صار خرقة مبلولة يالله يقوى يتحرك !!

أنتم تدرون إن مالنا حيلة بعد الله إلا أنتم بتوصيل أصواتنا لأعلى سلطة بالبلد !!

أنتم تدرون إننا نجل ونقدر أي شخص خدم هالأرض اللي نفداها بأرواحنا !!

أنتم تدرون إن (رياضتنا) حواق بـ حواق !! وحان الوقت ( اللي نشكر فيه المسؤولين على كل اللي قدموه .. ونعطي الفرصة أسماء جديدة ) !!

أنتم تدرون إننا ( نثق فيكم ) !! وكلنا أمل إنه ينصلح الحال !!


أنتم تدرون إن لكل عملية حسابية : مدخلات ثم معالجة --->> بعدين نخلص على مخرجات !!
فعشان كذا ( إذا المدخلات هي هي ما تغيّرت ) !! بالله وشلون نطالب بـ(مخرجات تبيّض الوجه ) !!

وشلون نطالب بنتائج تفرح قلب كل سعودي !! إذا ( الأشخاص هم هم !! والأفكار هي هي ) !!


أنتم تدرون إننا نتكيّ على ( صبات ) طاقتها الشمس الين قالت بس !! من العصرية الين تقضي المباريات !! وكله في سبيل هالوطن !! الكرسي الوحيد اللي نفتخر به هو "مقاعد استاد الملك فهد " !! ومع ذلك ما يهم إذا ( المحصلة النهائية ترضي الخاطر ) !!

أنتم تدرون إننا من أكثر من خمس طعش سنة !! ما بعد شفنا أي قفزة نوعية في رياضيتنا بتخطيط وجهد جماعي !! كلها محاولات فردية وعلى استحياء !!

أنتم تدرون إن الشباب الرياضي قاعد ياكل الأخو أخوه !! والكل قاعد يتفرج .. ولا فيه أي تدخل من متخذ القرار في المجال الرياضي !!

أنتم تدرون إن أقبح الألفاظ وأوسخ العبارات اللي يقرونها أبناءنا وبناتنا !! و سوالف التشهير وقصص التفضيح !! ما نشوفها إلا في جرايدنا الرياضية !!

أنتم تدرون إننا رغم كل الإمكانيات والدولة الوحيدة اللي تحكـّم شرع الله .. وإسلاميتها وأخلاقيتها فوق كل اعتبار !! يهان فيها ( الحكم الرياضي) !! ولا من شاف ولا من دري !!

أنتم تدرون إننا رغم الدعم اللامحدود من والد الجميع أمد الله بعمره .. الدولة اللي من 15 سنة تمشي رياضتها بانحدار لحد ما حرمنا فرحة المشاركة في المحفل العالمي !!

أنتم تدرون إنــّا صرنا نخاف على أنفسنا وعلى أهالينا .. إذا قلنا كلمة ( حق ) في حق رياضتنا السعودية !!

أنتم تدرون إن ما فيه ولا رياضي راضي عن هالمطرسة اللي حاصلة لرياضة الوطن !!

وأكيد إنكم مقتنعين ودارين .. إننا عاذرين ( مجالس الشورى ) !! وعارذين ( المجالس البلدية ) !! وعاذرين ( مجالس الأمناء ) !! بأن يتدخلوا في مشاكل رياضتنا ويتركوا أمور أهم !! لكن برضوا ندري إنكم مقتنعين : إن الشاب السعودي محتاج (رعاية أكثر من أول ) !! و (حرص أكثر من أول ) !! إلى متى وحنا ما ندري وين نروح ولا وين نتجه !!


أنتم تدرون إنــّا مستعدين نعيد لكم كلام أي مسؤول رياضي .. بالحرف !! وعندنا ناس تعرف تقلد حركات اليدين والخشة !! وتضبط لكم وش يبي يقول قبل لا ينطق ولا كلمة !!

أنتم تدرون : إن الخطط البديلة معدومة نهاااااااااائيا في " مجتمعنا الرياضي " !!

أنتم تدرون : إننا صرنا ما نقدر نتوقع ولا ندري وش ممكن يصير بكرة في رياضتنا من ( قوّ الغموض ) !! و ( ارتجالية القرارات ) !! ( سرعة تغيرّها ) !! و ( هول تضادها وتصادمها ) !!

أنتم تدرون إن ( الأمل ) متلاشي تماااااااااما في داخل ( كل رياضي سعودي ) إذا استمر الحال على ما هو عليه !!

أنتم تدرون إن ( التخصصية في المجال الرياضي والشبابي تكاد تكون مفقودة ) في مجتمعنا الرياضي !!

أنتم تدرون إن الكل ( متذمر ) وحايمة تسبده من هاللي يشوفه برياضتنا !!

أنتم تدرون إن المشكلة ما هي بالدعم والميزانية المرصودة !! المشكلة بـ ( التخطيط السيئ) !! ( والفردية الاجتهادية ) !! و ( سوء الانفاق ) !!

أنتم تدرون إن ما فيه محاسبة لأي مخفق !! ولا فيه تحفيز لأي متميز !! بشكل مقنع !! والدليل ( مغادرة أهم الأسماء الرياضية ) !! و ( تندح وبقاء وسشمه ) !!

أنتم تدرون إننا رغم التطور الأمني الراقي .. إلا إن ملاعبنا وبواباتها : بلا كاميرات مراقبة !! هههههه أما كمرات مراقبة .. وبلا احتياطات وقائية احترازية !!

أنتم تدرون إنها تتقطع قلوبنا وحنا نشوف حال الرياضة وصل لهالمستوى المتدني !! وكل واحد ( يشوت ) اللوم على الثاني !!

أنتم تدرون إن ( الاستفادة من الخبرات الخارجية ) مفقودة تماما إلا على نطاق ضيّق .. وأحيانا ( سلبي ) !!

أنتم تدرون إن (البيئة الرياضية الرسمية ) لا يوجد لها أي صلة بعالم التكنلوجيا !! وعالم المعلومة المحدثة السريعة !! ولا بعالم الانترنت !! ولا لأمها دخل بالتثقيف الاجتماعي المستمر !!


-------------------

سؤالي : إذا تدرون وراكم ساكتين ؟! ما أحد يقدر ينقل معاناتنا مثلكم !! لأنكم أقرب الناس له !!

بلغوه تحياتنا وسلامنا وفخرنا واعتزازنا فيه .. والله يديم عليه ثوب الصحة والعافية .. ويعيننا على رد الدين لأغلى وطن ..

.


.


أنت تدري إنهـ جتني رسالهـ من جوال صالح السليمان تقول وصلت تعليمات لمحرري الصحف بعدم الكتابهـ أو مناقشهـ أسباب الخروج المخزي من الملحق



أنت تدري (( إن سموهـ حفظهـ اللهـ )) حمل الاعبين 30% والمدرب 70% وهو 0% من الخروج المر


أنت تدري إن التحليل المباريات بعد كأس الخليج كلهـ هرج فاضي وأنت تدري ليهـ

خبر أحزنني وأن أقراء في منتديات كورهـ وبتحديد منتديات الكورهـ السعودي عن إيقاف 700 عضو خلال إسبوع وكلهـ من التعصب

التعصب في الرياضهـ زاد عن حدهـ بكثير ولكن لاحياة لمن تنادي

أخوي مغاط كلنا ندري ولكن ما باليد حيلهـ ورجع شاهد المهزلهـ اللي صارت في الأستديو التحليلي في نهائي الخليج وتعرف إنهـ ما باليد حيلهـ

.

.

هلا والله بـــ " مغاط "
نورت المنتدى والله يعطيكــ العافيه
تحياتي
" الفن منبعه الهلال "

إلى متـٌى ..؟
إلى متـٌى وٍحنـٌآ مكتفيـٌن بمسمـٌى ( آلرٍئـٌآسة آلعـٌآمة لرٍعـٌآية آلشبـٌآب ) ..؟
ليـٌش مـٌآ تصـٌيرٍ ( وٍزٍآرٍهـ آلشبـٌآب وٍآلرٍيـٌآضة ) مثـٌلآ ..؟

نطـٌآلب كسعـٌوٍديين .. بآلعـٌمل آلآحترٍآفي .. بينمـٌآ آلسعـٌوٍدية مـٌع آحتـٌرٍآمي آلشديـٌد ليسـٌت جـٌآهزٍهـ آلـٌى آلآن للدخـٌوٍل فـٌي عـٌآلم آلآحتـٌرٍآف ,,
عقـٌوٍل آلسعـٌوٍديين آلـٌى آلآن ليسـٌت مهيئـٌة للآحتـٌرٍآف ,,
وٍهـٌذآ عكـٌس صـٌوٍرٍتنآ للغـٌرٍبيين بـٌآننآ متخـٌلفين ,,
وٍآنـٌنآ لآ زٍلنـٌآ نرٍكب آلجمـٌآل وٍزٍي كـٌذآ ,,
جـٌب لـٌك شـٌآب سعـٌوٍدي وٍشـٌآب برٍيطـٌآني مثـٌلآ .. وٍآسـٌآل مـٌآ مفهـٌوٍم آلآحتـٌرٍآف ..؟
صـٌدقني آلسعـٌوٍدي مـٌآ رٍآح يعـٌرٍف .. آنـٌآ بنفسـٌي للحيـٌن مـٌآ آدرٍي شمعنـٌآه ..!!
هـٌذآ هـٌوٍ آلسبـٌب آللـٌي يدفـٌع آي محتـٌرٍف للتفكـٌيرٍ آلف مرٍهـ قبـٌل مـٌآ يوٍآفق على مجيـٌئه للدوٍرٍي آلسعـٌوٍدي ,,
وٍهـٌوٍ نفـٌس آلسبـٌب آللـٌي يدفـٌع آلآنديـٌة آلآوٍرٍبية عـٌلى آلتفكـٌيرٍ ميـٌة مرٍهـ قبـٌل جلـٌب آي لآعب سعـوٍدي ..!!




شكـٌرٍآ مغـٌآط ,,





مـٌوٍدتيّ ,,

يووووووووووه




منذ مبطي محتاجين مثل هالخطاب




يالله عسى يوصل بس




بيض الله وجهك

عدت عاد عقب الحجز علشان ارد ..


أخوي مغاط .. كان بودي أحط راسك على كتفي وأكفكف دموعك و أخليك تنفّس عن أحزانك المكبوتة داخل ذلك الصدر الكبير .. اقصد صدر كبير من ناحية السعة اللي يشيله من هموم وآلام


علشان ردي يصير جميل وهناء .. قررت استعين بصور .. بحثت عنهن بالمحرك الشهير قوقل ايرث ..

ولكن للأسف .. ماحصل لي اني ألقى صورة مغاط .. لقيت نبّاطة .. لذلك بستعين بصورة النبّاطة علشان يصير المشهد مؤثر ..

صح اني بحث عن مغاط وطلعت لي صورة مادري وش دخله بالسالفة ..

بس حسيت انه رومنسية .. حسيته مغاطة مهب مغاط ..


ولقيت ضمن بحثي عن مغاط .. لقيت صورة لرابح صقر .. بس حسيت ماله داعي احطه





أخوي

لعلمك .. جميع المنشآت الرياضية .. كانت على زمن النهضة الكروية .. أيام فيصل بن فهد الله يرحمه

كان كل شي يخص الرياضة .. منظم .. واحترافي في زمن هواة ..

الحين .. مازالت المنشآت مثل ماهي .. زادت وتيرة التعصب .. < شف مغاط .. ركز لي على كلمة وتيرة تكفى

يعني احمد ربك انك ماتلعب باستاد الصبان الدولي الحين ..


بالنسبة للتخلف الرياضي اللي نعيشه .. طبيعي أخوي

لأن المثل يقول .. ورى كل رجل عظيم امرأة ..



لن وخواته .. نتقدم الا بوجود كوادر مؤهلة .. عنده شهادات وخبرات .. عنده حماس الشباب

اما الترزز بمجالس فلان وعلان .. وبعد كم يوم يمسك منصب .. وهو مايدري وين شرقي (....) ..على قولة اهل حايل

فهذا خطأ داخل الثمانطعش ..


اخوي مغاط .. كفكف دموعك .. ولملم خلاقينك .. حنا مكتوب علينا نعيش في وقت مهب وقتنا ..

[



فعلا صوره معبره


بس ودك امغط واحد في بالي الى ما يذن الفجر

مشكوور اخوووي يعاطيك الف عاافيه

هلا مغاط ,,
اقرب مثال الى ذلك استاد جدة الدولي شف من متى التخطيط وشف الى متى يكون مكتمل ,,
اتمنى ان يصل صوتك للمسئولين في الجهات الحكومية في اقرب فرصه و بلغ سلامي يا مغاط ,,

المشكلة هي ان رياضتنا اصبحت عالقة في مستنقع قذر

فمن سينظف هذا المستنقع ؟؟؟

اخوي مغاط : مواضيعك دائماً في الصميم و شهادتي فيك مجروحة
ألف شكر

اممممممم لا تعليق في كلام جدا رائع ............................................................ التاحية التنظيمية لان اصلا ما فية نظام النظام سلطان ونواف اذا كانو رايقين مع ابو بلوتوث سلملي على النظاام

صح الله لسانك


الخطط معدومة جداً

حتى بالمهمة الوطنية نناظر التلفاز بالكـــــاش


كل شي الله يعين بس على حياتنا التي مابقي منها الا القليل

والله أفضل موضوع يبرد القلب
ياخي من حقنا نفرح في منتخب وطنا زي اي مواطن

اللي يقهر انه عندنا أفضل اللاعبين والماده موجوده ولكن زي ماقلت نقول شكراً للاتحاد السعودي
ونريد فتح الفرصه لدماء اخرى تصنع لنا مجد

إقتباس أنتم تدرون إننا الدولة الوحيدة اللي محرومة من مشاهدة مباريات كاس العالم !! إلا بصفقة دراهم !! أو تنــّطق وتنثبر بمقهى أنظف واحد فيه طالب (معسل تفاحتين) !! والعاقل ( يدخن إل إم أزرق ) !!

بغيت اصيح من هذي

والله غبنهــ

لاحول ولاقوة الا بالله