الطفولهـ وما الطفولهـ
طبعا بما اني للحين ماوصلت الـ 20 سنهـ
وما زلت اسير في عامي الـ 19
فاعتبر نفسي طفلهـ بسم الله علي
يعني اخذهـ طفولتي حاليا من ملامح الطفولهـ الي بوجهي
وبرائهـ الافكار
مايحتاج اني اعدد
معروفهـ الطفولهـ وش هي
نجي للاسئلهـ
/
أكلتك المفضله وأنت صغير ؟
اهلي يقولون اني كنت اعشق المكرونهـ
والحين سبحان الله تغير كل شي
المكرونهـ ما اكلها بتاتا البتهـ
شخصيه كرتونيه كنت تحبها ؟
شخصيه معينهـ مافيه تقدرين تقولين رابح
مع انهـ مو وانا صغيرهـ مرهـ .. بس هذا الي اتذكر
وسامي بالرميهـ الملتهبهـ
باباي وزيتونهـ
ام العصاقيل
بلوط وعلقم
<< عشر طعش شخصيه مو وحده هذي
كيف كنت ايام طفولتك شيطاني ولامؤدب ؟ <- بالأمانه
والله الي اذكرهـ انا عن نفسي
اني كنت مؤدبهـ اسم الله علي
ماهي المواقف التي عرضتِ فيها اهلك للاحراج ؟ 
امي قبل كم يوم تقول لي كنتي تحرجيننا دايم
اذا جاء احد عندنا بالبيت اقط الخيط والمخيط
مافيهـ شي صار بغيابهم الا اقوله
وش اشترينا ووين رحنا ومن جانا
يعني بالعربي كنت فضيحهـ
هل كنتِ شخص ذو شخصيه قويه أم مغلوب عليه ؟
لا هذي ولا هذي
مسألة قويهـ فهذي بعيدهـ عني
ومغلوب عليها يعني بس مو مرهـ
تقدرين تقولين دابهـ سليمهـ
موقف تمنيت انك تصير فيها كبير ؟
بالزواجات وطلعات السوق
كانو الحريم يروحون وحنا لا
عشاننا بزران
ونفس سالفة المكرونهـ
الحين ماحب الزواجات ولا الاسواق
اكبر مغامره قمت فيها وانت صغير ؟
قلت لك دابهـ سليمهـ
ماني راعيه مغامرات حتى
الا بالروضه بس
لكن عندي اهلي البرائه تقوطر مني
من هو الشخص اللي يقع دائمأ في شر اذيتك ؟
مافي احد
تقريبا الانسان الي تأذى مني شوي
وبنفس الوقت كان هو الصديق
ولد عمي ايام الروضهـ
يوم كنت صغير كنت تترأس عصابه ام انك كنت عضو فيها فقط ؟
بالبيت عضو بعصابه وقت الاجازات
ووقت الدراسهـ بالبيت مالي عصابه ولا شي
وبالروضهـ انا رئيسة العصابه
لا وكنا نخطط على شلة ولد عمي واخوياهـ
انا ضدهـ وهو ضدي
وخذي يا هوشات وضرب
وتراهـ ماقد عضني ابد قدام صديقاتي
ولا رحت واخذت حقي منهـ قدام مدرّستهـ بالفصل
بس نرجع للبيت خلاص نصير سمن على عسل
لان مالي الا هو وهو مالهـ الا انا نلعب سوا
من كـان يدلعك أكثر أبوك ِ او أمك ؟ 
ابوي كان يدلعني أكثر
والحين عساني مانحرم منهم كلهم
اســم دلعك بالطفوله لحد الان ينادونك فيـه ؟ وماهو ؟
ماكان لي اسم دلع
وانا خربوها ودلعوني حطو اخر شي هاء والا ياء
وهذي ماتصير الا بالمناسبات
وش كنت تحب السن توب او سن كولا ؟
اييييييييييييييييييهـ ذكرتيني بالذي مضى
كنت اشرب سن توب
بس اعشق سن كولا
لكن كانوا اهلي معذبيني فيهـ
ومايشترونهـ لي
مدري من ناصب عليهم وقايل لهم انهـ يضر
وحرموني منهـ
لين مرهـ قلت مابروح للمدرسهـ الا وهو معي
ليه كل صديقاتي اهلهم يجيبون لهم وانا لا
قالوا اهلهم مايحبونهم يجيبون لهم الي يضرهم
قلت لا تحبوني وجيبو لي
وجابوا لي
كنت دب وانت صغير او نحيف ؟
نحيفهـ
ماقد صرت دبهـ بحياتي الا بالمتوسط
وبعدها عاد الوضع لطبيعتهـ
هل عندك لعبه موجوده من صغرك إلى الحين ؟ وماهي ؟
لعبهـ ما لعبهـ
غير السيكل لا تدورون عندي
السيكل من ايام سيكل ابو ثلاث كفرات و(صندوق) على قولتنا ورى
وانا العب فيهـ .. وبعدهـ يجي السيكل ابو كفرات سفنج ملونهـ
ومعهـ مساعدات يمين ويسار على الكفر الي ورى
بعدين نتطور شوي ونمشي على مساعدهـ بجههـ وحدهـ
بعدين سيكل عادي بدون مساعدات بس مو طويل
بعدين نشتري سيكل طويل وعادي زي الي دايم الكبير
هذي مراحلي بالسياكل
وكنا نسوي بالحوش اشارات نصرف الي اصغر منا يوقفون بنص الحوش ويمسكون ورق ملون اخضر واحمر
وحاطين محطهـ بانزين
هذا واحد عندهـ أكل اقاله هو البانزين نجي نشتري اكل
وخذي يا لعب بالسياكل من بعد مانجي من الروضهـ بالظهر
ليييييين بعد صلاة العشاء
وكلهـ كوم واذا امطرت كوم ثاني
ملابسنا من ورى تصير نبيهـ من الطين مع المويا
ويوصل الطين الى شعورنا من ورى
ويوميا طيحات ومخوش
وللحين الاثار عايشهـ فينا
هذا غير التهزيئ الي يجينا بكل دخلهـ للبيت قبل النوم
عشان الملابس تكون نظيفهـ مره
هـل كـنت تـعانـي مـن اخـطاء فـي مخـارج الحـروف .؟
لا الحمدلله
بس يقولون ان الحين صاير كلامي مثل النمس
<< والا لا يالي تذبون علي
وانت صغير يشبهوك على مين من العائله ؟
حنا يارب لكـ الحمد ماحد يشبهـ الثاني
تشوفنا تقول مجمعين
ولا واحد يشبهـ الثاني
تخيلو
حتى امي ماتشبهـ ابوي ..!
رند
ياجعل والديكـ بالجنهـ يارب
اقسم بالله يا ذكرتيني لذكريات
شكلي بروح افتح كاميرة الفيديو واشوف الاشرطهـ القديمهـ
حسيت اني حنيت لاحساسنا لوصالنا من كثر ماحنيت حسيت ان الوصل ... الخ
<< مسكت خط
شي أساسي بحياتي 
<<< علبالنا لا سهرت تسير كبير 
الوضع العادي
