إقتباس الرسالة الأصلية كتبت بواسطة iq1399 يالله حي تركي .. - ليه ماتكون لرؤساء روابط الاندية صلاحية لتعديل الردود في الرابطة وتغيير العنوان .. ولا هذا الشي ما يجي ؟ - هل الموقع مدعوم من ادارة الهلال بحكم انه الموقع الرسمي ، اذا كان ايه ، ليه والدعم متوفر ما تدفع مكافأة لـ اللجان اللي تشتغل بالموقع مثل لجنة الفيديو . واذا كان لا .. ليه مايكون لهم رواتب نظير الشغل المميز اللي يقدمونه ؟ - قبل سنوات كانت فيه مسابقة بالمجلس العام ، وكان فيه سؤال غلط وجاوبته غلط وبعدين اعترضت على ان السؤال كان مقدم بشكل خاطئ لأن التاريخ غير صحيح .. اجابتي رفضت لأنها خطأ ،، واعتراضي على كلامك في ذاك الوقت " قبل شكلاً ورفض مضموناً " السؤال كان عن كابتن السعودية في بطولة بتاريخ 1958 والصحيح 1957 الخطأ منكم وما بني على باطل فهو باطل .. وللاسف كان فيه بعد سؤال ثاني خطأ .. والسؤال كان عن ابعاد حقل .. ولا حدد الشكل الهندسي للحقل .. وهذا في الرياضيات خطأ .. وهذى الاخطاء راجعه لـ الاشخاص المنظمين للمسابقة لأنهم ما تحروا الدقة في الاسئلة .. أتمنى تعطيني سبب مبرر .. عن اللي صار في المسابقة ؟ وما يحتاج اقول ان الاساسات اذا كانت خطأ فـ اللي يبنى على الاساس بيصير خطأ

هلا محمد , برد عليك برد بلحالك يابعدي

1 : صلاحيات رؤوساء الروابط يابعدي درسناها قبل كذا وحصلنا انه بيصير فيها تعارض مع صلاحيات المشرفين , حتى الاعضاء كذلك بعضهم يمكن مايتقبل تحرير رئيس الرابطه عليه , يعني اذا كان بعض الاعضاء يعترض على تحرير مشرف او عضو مجلس ادارة ظنك وش بيصير اذا حرر له رئيس رابطه , علشان كذا احنا مانبي مشاكل بين الاعضاء بانفسهم وكذلك ماودنا يصير حزب رئيس الرابطه واعضاء اخرين , مع ان هالامور نشوفها موجوده بالروابط بدون مايكون عند الرئيس صلاحية تحرير فمابالك لو كان التحرير متوفر !!!

2 : لا يالغالي الموقع يدعم النادي وليس العكس , يعني الموقع يدخل للنادي مبلغ سنوي مقبول , وبالنسبة لاعضاء اللجان ادارة الشبكة تقوم بتكريم المميزين منهم بين وقت واخر .

3 : يالغالي هالمسابقه انتهت بخيرها وشرها , والعمل البشري من الطبيعي ان يكون فيه هناك اخطاء , واللي حصل خطأ من اللجنه وبالمناسبة كنت انا احد اعضاءها , وكانت الاسئلة معتمده على مصادر تاريخيه ومتاحه للجميع , يعني ماهو ذنبنا ان الخطأ كان من المصدر اذا كان فعلا موجود لاننا ماعندنا مصدر اخر للمعلومه غير المتوفر امامنا

عموما حصل خير وانا اعتذر لك نيابة عن اعضاء اللجنه في ذلك الوقت واذا كان فيه خطأ فهو طبيعة العمل البشري واللجنه كانت تعمل على مدار اليوم ووقت المسابقه محدود وكذلك يتعاملون بالاتصال عبر الانترنت ولديهم اعمالهم الخاصه ومشاغلهم يعني لابد من ان نعذرهم في حال وجود اي خطأ

حياك محمد

إقتباس الرسالة الأصلية كتبت بواسطة كيفي هلالي !! السلام عليكم ورحمة الله وبركاته ... أشكر اللجنة الاستشارية على هذه الاستضافه الرائعة تركي بإختصار : - وش افضل الفرق في فترة الانتقالات ولماذا ؟؟ - افضل المدربين من وجهة نظرك .. لو تعطيني 3 اسامي مو مشكلة - وش رايك بـ (يحلموون ) ؟؟

هلا والله بصديقي

1 : ريال مدريد بلاشك , انك تحصل على افضل لاعب بالعالم 2007 و2008 وبنزيما والونسو , بوجهة نظري صفقات قويه جدن بغض النظر عن صفقات الفريق الاخرى لكن الونسو لوحده عن 10 صفقات , لكن هالاربعة هم الابرز , ثم ياتي يوفنتوس من حيث الصفقات وكانت صفقات يحتاجها الفريق فعلا , صحيح انها ليس اسماء كبيرة باستثناء دييقو ولكنها كانت وفق احتياجات الفريق

2 : ليبي , كابيلو , فيرجسون , ولاسباب كثيره منهجية المدرب وفلسفته الخاصه وقناعاته التي دائما ماتنجح وكذلك بصمته الخاصه على الفريق , هذولي بوجهة نظري هم الافضل على مستوى العالم .

3 : قوووووووووويه يحلمون خصوصا لما البعض يطرطع منها

إقتباس الرسالة الأصلية كتبت بواسطة ABADI ALHARBI بسم الله الرحمن الرحيم السلام عليكم ورحمة الله وبركاته شكراً لكم أخواني الإستشاريين على هذه الإستضافه أسئلتي أخي العزيز تركي : 1- ماهو جديد الشبكه ككل في المرحله القادمه ؟ 2- ماهي الآليه التي يتم بها إختيار مشرفي ومستشاري وأعضاء اللجان الإعلاميه المنتديات ؟ وهل للمجامله دور في ذلك ؟ 3- هل أنت راض عن المحتوى الذي تقدمه الشبكه للأعضاء و الزوار إذا علمنا بوجود منتديات أخرى هلالية المضمون والهوى ؟ كل عام وأنتم بخير ، وتقبل الله من الجميع صيامه وقيامه . تحياتي

هلا والله

1 : جديد الشبكة ان شاء الله , تطوير على قسم البوابه بالعربي والانجليزي واضافة خدمات جديده , كذلك اضافة خدمات ستكون مفأجاه للجمهور الهلالي باذن الله تعالى , ووتغيير استايل الشبكة وكذلك الصور الرمزيه واضافة وتعديلات في بعض الاقسام .

2 : يالغالي نشاط العضو وتعاملة مع الاخرين واخلاقه التي تكشف عنها ردوده وكذلك ابتعاده عن الاستهزاء بالاخرين وكذلك ان يكون العضو له نشاط ملحوظ وقوي ومميز في القسم الذي يراد تعيينه عليه سواء مشرف او عضو لجنه .

3 : نعم انا راضي واطمح للمزيد واللي يقيم عملنا هو الجمهور , اذا كان راضي عنا فالحمدلله واذا كان غير ذلك نعدهم بالمزيد من الجهود حتى نصل الى رضاهم

إقتباس الرسالة الأصلية كتبت بواسطة الهلال موتي السلام عليكم ورحمه الله وبركاته ،، بصراحه إختيار الأستـاذ تركي كان مٌوقق جداً .. كان عندي 3 أسئله .. ولكن إختصرتها لـ سؤال واحد لأني أدري إن الضغط بيكون كبير عليك .. هذا غير إنشغالك بأمور إداريه كثيره .. الله يعينكـ .. [س] : كم هي الفتره التي تقضيها في شبكه الزعيم يومياً ~ معدل الساعات ~ ؟! لأني بأمانه كل ما أحتجت شيء .. القاكـ موجود ما شاء الله عليكـ .. --------------- سؤالي هالمره سهل .. بس لأنك صايم .. وأبشر بالخير في الإستضافات القادمه ..

هلا والله احمد

يابعدي انا طبيعة عملي الخاص او عملي الوظيفي تفرض علي تواجد كمبيوتري متصلا بالانترنت لاكثر من 18 ساعه يوميا , فتقريبا خلال 12 ساعه او اقل او اكثر قليلا تجدني بين وقت واخر اتصفح الشبكة واشوف وش صاير واذا قدرت ارد ارد , وبعدين انت مانقدر نتأخر عليك يابعدي بشئ

تحياتي لك

إقتباس الرسالة الأصلية كتبت بواسطة الاسطوره القدام اهـلــين اسـتاذ تـركـي.... كـل عـام وانـت بصـحـه وسلامـه>>> بعد الزحمه يالله ابدأ س- سمعـت ان فيـه مسـابقه فمنتدى الزعـيم وبترعاها جرير صدق الكلام او لا ؟؟ س- متـى تبـدأ بطـولة شبـكة الزعـيم الثـانيـه ؟؟ اكتـفي بهذا القدر الله يعطـيك العـافيه

هلا والله

1 : لا يالغالي غير صحيح
2 : ان شاء الله متى ماكانت الظروف متاحه اقمناها .

إقتباس الرسالة الأصلية كتبت بواسطة Hala Madrid متى بتضيفون صور رمزيه جديده للاعبين ريال مدريد ؟ ايه ونصيحه لا تخلون النظام الي يسمح لأي شخص يرفع صوره من عنده أحس بيخرب .

هلا زيد كل اللي تبيه بيصير بس عطنا وقت يالطويل

إقتباس الرسالة الأصلية كتبت بواسطة سنآيدي مسترٍ ترٍكي 1 _ صحيح كلنآ نحب آبوٍيعقوٍب لكـن آنت تحبـة بزيآدهـ هل فية موٍقف آو شي ؟ 2 _ مـن تتوٍقع يفوزٍ بآلدورٍي آلآنجليزٍي وآلآيطآلي وآبطآل آوروبآ ؟ 3 _ من تتوٍقع يفوز بآفضل لآعب بآلعآلم هآلسـنة ( ميسي _ رونآلدور _ آكزٍآفي ) وآذا فية غيرهـم آذكرٍهـم يعطيك آلعآفية يآ ترٍكي ويعطيكم العافية ياللجنة الاستشارٍية وكثروٍ من هآلموٍاضيع

هلا والله ياسنايدي

1 : ابد يالغالي من مايحب يوسف
2 : الانجليزي اتوقع مانشستر او تشلسي والايطالي يوفنتوس او انتر والابطال ريال مدريد
3 : ميسي مايبي لها نشدة مطوع اذا تقصد عن عام 2009 , بس اذا تقصد الموسم الجاي فيه اكثر من لاعب من بينهم ميسي ورونالدو وكاكا وابرا وروني وحسب عطاءات الانديه هالموسم .

إقتباس الرسالة الأصلية كتبت بواسطة هلالي من ارض اليمن تحية طيبة اخي العزيز : تركي لك جزيل الشكر والتقدير على جهودك المبذولة والرائعه في خدمة الشبكة واعضاؤها .. حيثما حللنا في احد الاقسام كان ( Mr.GoaL ) حاضرا .. بارك الله وقتك وجهدك ،،، ليست لدي اي اسئلة فقد استنزفناك يا صديقي في وقت مضى يعطيك الف عافية ،،، يحفظكم ربي .. والله يعطيكم الف عافية ،،،

هلا طارق الله يحييك , مشاركتك هنا شرف لي , خذ .

إقتباس الرسالة الأصلية كتبت بواسطة rayan0099 مرحباأ يامرحبا بالطش والرش < عندي سؤال واحد بث : "" هل الشغل اللي تسويه بـ شبكه الزعيم ياخذ من وقتك كثير ..؟! او انه يخرب عليك مثلاً .. يعني بتطلع ولا عندك شي لكن تكون مرتبط بالشبكه هالوقت .. ؟! وشكراً .

هلا بصديقي

يابعدي ابد الشغل اللي نسويه بالشبكة كله لعيون الهلال والشبكة , وصدقني في فترات كنت اجلس بالبيت ماطلع علشان شغلات للشبكة , لكن الحمدلله الان صاروا الشباب اللي يشتغلون كثير وفيهم الخير والبركه وصرنا نوفق العمل على حسب مانبي عكس اول كان العمل بالشبكة كان يحرمنا من بعض الاشياء اللي نبيها .

إقتباس الرسالة الأصلية كتبت بواسطة الفيروسه الزرقاء هلاوووين .. اخبارك قول .. عساك بخير تدري ما في بالي إلا سؤال واحد بس ! مدري هو سؤال و إلا فضفضه قول .. شلون الواحد يفرق بأن هـ الشخص طبيعي و إلا فيه روح شريره ! -->صه بس لا تلوموني ههههههه صايره هـ اليومين أسوي سيرش ع الارواح الشريره وما اشوف الا افلام فيها ارواح شريره وإلا خياليه "السماء و التنين الأزرق إلخ من معتقدات الكوريين" اذا ما تعرف تفرق بينهم لا تجاوب سؤالي الثاني ----> طلعت الاسئله اجل تبوني افوت هـ الفرصه قول في استضافه ولا اساله .. لا مايصير ما يصير لازم أسال سؤالي الثاني سلمك الله ليه حاط هـ الفيس بـ توقيعك ---> فضوليه السؤال الثالث : انت مثلاً قريت موضوع و من عجزك قلت بروح ارد عليه اذا قمت من النوم .. رحت تنام وانت تتقلب في النوم فكرت برد ترد عليه بعدها دخلت في عالم النوم ! بعد ماصحيت وروقت دخلت النت و من ثم الموضوع اللي كان ودك ترد عليه و تتفاجىء بان فكرة ردك قالها عضو ! لكن صاغها بـ أسلوبه ... يعني مو نفس اسلوبك اللي تبي تقوله قد مره صارت لك مثل كذا ! لقيت شيء ودك تقوليه احد قاله نيابه عنك طب اذا صارت لك هالشيء ليه أنت تلبثهم وهم ما يلبثونك يـ أخي صايره ارسل مسجات عقليه لـ الأعضاء ولا احد يرسلي طب مثل ما عقلي يوصل لكم وصلوا لـ عقلي .. قول لا تستغرب تقول فيّو وش فيك شنو هـ الاسئله الغبيه تراني مواصله وصائمه و فاصله .. اللجنه الاستشاريه .. يسلمو ع استضافة قول وزين ماخترتوا ... بس ياريتكم ماحددتوا عدد الاسئله ---> ناويه تطرح اسئلة أكثر ! ما نعطى فيس .. شكراً لكم استشاريي و مشرفيي العالميه ع مجهوداتكم بـ التوفيق لـ الجميع سي يا فيّو

هلا فيو

امممم حياك الله انتي واسئلتك اللي مدري وش تبي بس الله يعينا عليك

1 : والله ماعرف للارواح الشريره وهالكلام , بس اعرف ان فيه ناس شريره يعني تصنع له معروف يرده لك باساءه ومع ذلك موسع صدري وتقدر التريله تسوي يوتيرن فيه

2 : رداً على توقيع ابوثامر

3 : يس تصير معي احيان كثيره , وخصوصا بقسم العالميه فيه بعض المواضيع اقول ودي ارد عليها او بالروابط بعد اشوف كلام ودي ارد عليه اقوله خله شوي وبعدين اجي احصل واحد راد بنفس الفكره اللي كنت بقولها .

حياك فيو وارجعي مرة ثانيه بس بدون ارواح شريره وعلى فكرة توقيعك حلو

إقتباس الرسالة الأصلية كتبت بواسطة realmadred-77 السلام عليكم كيف الحال ان شاء الله بخير اسئلتي 1/ وصايا تقدمها لاعضاء الشبكه عامه والعالميه خاصه اسف ماعندي الا هــ السؤال اذا جاي شي في بالي كتبته وبالتوفيق لكم في الشبكه ويعطيك العافيه على مجهوداتك

هلا يالغالي وترى رسالتك وصلت بس خل افضى لك وارد عليك

1 : ابد يابعدي ماهنا وصايا الا ان الانسان يكون مشرف على نفسه , يعني يضع لنفسه رقيب قبل يكتب اي شئ ومو علشان المنتدى بس هذا علشان نفسه لان الانسان يملك الكلمه قبل تخرج منه ولكن اذا خرجت اصبحت تملكه , فقبل تكتب اي حرف فكر مره او مرتين ومتى ماحبيت توجه رد لاحد حط نفسك في مكانه وصدقني بتشوف نتائجها مع مرور الوقت في التعامل بينك وبين الاعضاء وعلى مستوى المنتدى ككل , وهذا مو على مستوى المنتدى على مستوى حياتك قبل تتكلم فكر مره او مرتين وعشر بعد .

إقتباس الرسالة الأصلية كتبت بواسطة وليد القحطاني هلا تركي .. سؤالين .. متى راح تسوون جمعة ثانية لاعضاء العالمية ! ? وش رايك فيني ؟

هلا وليد

اللي اخبره ان الشباب بيسوونها برمضان بس مادري اسأل ابوحمد مع اننا سوينا جمعه قبل كذا بس كانت مختصره على بعض الاشخاص , ويومها بهذلنا اسير الزعيم اجل يستأجر استراحه ويزعجنا الفجر يدق ويرسل مسجات واخرتها نجي نحصل الاستراحه مستاجرها واحد ثاني

وانت يابعدي اكوس من الكويسين كلم , والله والنعم فيك ياوليد

إقتباس الرسالة الأصلية كتبت بواسطة MASHHOUR اووه مستضيفين تريك اول سالتوه وش يشجع أن ماجاوب خلاص ماله لازمة المهم اني اني اعرف وش يشجع بالنسبة الصور الرمزية ترا عندي خيشة صور ابيكم تحطونها بث خلاث ماعندي شي

مشهور ال...... ماودي اقول هنا ياصديقي انت خلك هناك وبس

إقتباس الرسالة الأصلية كتبت بواسطة silva السلام عليكم كيف حالك تركي أن شاء الله بخير 1-هل تتوقع ان عدم تأهل المنتخب السعودي للمونديال لا سمح الله خيره؟؟؟ 2- هل تتوقع أحتراف حارس المنتخب وليد عبد الله في أوربا؟؟؟؟ 3- ما رأيك بلاعب خط وسط فالنسيا الكناري ديفيد سيلفا؟؟وهل تتوقع ياخذ جائزه الكره الذهبيه في المستقبل؟؟؟ اّسف على الأطاله SILVA

هلا والله بسيلفا

1 : نعم اتوقع وبنسبة كبيرة اننا ماراح نتاهل

2 : لا استبعد ذلك , الاحتراف يبي له عقل

3 : مميز ويكفي ان كل الانديه تتنافس على ضمه , ويحقق الكره الذهبية اذا ناديه ضبطوا وضعهم شوي وصاروا اقوى من الان يعني يرجع فالنسيا زمان اللي كان كل الفرق تهابه , الان فالنسيا الازمه الماليه ماثره عليه وبقوه والفريق يعاني , وممكن لو طلع لفريق ثاني وسلم شر الاصابات ياخذها وهو مرتاح وهذا ليس استنقاص من فالنسيا بقدر ماهو حقيقة ان فالنسيا ظروفه الماليه ماتساعده على انه يكون فريق قوي .

حياك

إقتباس الرسالة الأصلية كتبت بواسطة .. M a N U t D .. هع . هع في وآحد طآح و لأ آحد سمـى عـليه .. حيـووووه / تركي .! و الله يآ تركي آنآ مآ عندي سسسآلفه .. قسسم باللله بسس بـ سأل تقدر تقـول آستلعآن ./ زيآدة آشغآل عليك ../ يعني عششآن آلآسئله تزيد .. تـركي .. / لـو قـدر الله و تهت فـ وسسط البحـر لحآلك .. وشش تتمنى وقتهآ يكون معك .! [ جـوآل ,’ لأب تـوب ,’ آنـآ ] مع التعلـيل .. آذآ كآن خيآرك جوآل و لأ لآب .. بـرضوآ تـركي / بمآ آنك مدرب فريق سآبق آبي نقدك الهآدف لـ مستوى وآحد يقآله طلأل ,’ كآن يلعب بـآلعآلميه .. يعني سسلبيآته عششآن يتطـور .. تـركي ,’ سؤآل صدزي / وششش هدفك من الحـيآه ,’ يعني مبتغآك و مآهو الحـلم اللي تتمنى تحقيقه .! تقـبل آستلعآني ..

هلا طلو

يابعدي الله يحييك

اممم ابيك انت معي علشان تموت معي ماتسوى علي اموت بلحالي وغرقان بالبحر

وبخصوص انت والله يابعدي انت فنان عندك عيب واحد بس هو انه لما تكون ماخذ الكوره ماترفع رأسك ولاتشوف خوياك الما توقف , اللاعب لازم اول مايستلم الكوره حتى وهو يركض يرفع رأسه ويشوف خوياه , والثاني انك ماتلتزم بتعليمات المدرب وهذا كان ينرفزني عندما كنت مدربا لك << قل هو اصلا فيه تعليمات

والله يابعدي طموحي وحلمي القادم هو اني احصل على شهادة الدكتوراه وابشرك بدأت الخطوات استعدادا لذلك وعما قريب اذا تحبني بتسمع اخبار زينه عني << بس تكفى اذا ماتحبني لاتقولي ترى يمكن اتهور وانتحر بالجسر المعلق

إقتباس الرسالة الأصلية كتبت بواسطة R V P السلام عليكم اسئلتي لـ ضيفكم / سـ1ـ/ لو قالوا لك رجّع ثلاث اعضاء سابقين بالشبكه من راح تختار ؟ سـ2ـ/ من هو الكل في الكل بالشبكه ؟ سـ3ـ/ الشغل بالشبكه صعب ؟ سـ4ـ/ وش رايك بـ حظوظ ارسنال هـ الموسم ؟ سـ5ـ/ تتوقع النصر راح يثبت نفسه هـ الموسم ؟ سـ6ـ/ يقولون انك ما تزوجت ، متى ناوي تتزوج ان شاء الله ؟ سـ7ـ/ بـ رأيك ما اهمية المرأه بالنسبه للرجل ؟ سـ8ـ/ بـ صارحه .. انت زعلان علي بعد النقاش الي صار بيني وبينك ؟ ، ولا فتحت صفحه جديده ؟

هلا نايف

1 : يابعدي والله اللي طلع من الشبكة الله يستر عليه ويوفقه وان بغى يرجع الله يحييه الشبكة مفتوحه ابوابها للجميع << وش عنده المنتخب السعودي اذا بكيفي ابي اشوف ردود للثعبان الازرق وهو مو تارك الشبكة بس منقطع لظروف انا اعرفها مسبقا وننتظره يرجع , اما غيره ابدن اذا رجع الله يحييه واذا مايبي الله يوفقه .

2 : قوانين الشبكة ولوائحها هي الكل بالكل .

3 : يس وبقوه وخصوصا بموقع مثل الزعيم

4 : مركز مؤهل لدوري الابطال ممتاز جدن + المنافسه على احد الكوؤس الانجليزيه اعتقد كافي جدن على ارسنال , ماهو استنقاص بس الواقع يقول هالشئ وطبعا في كرة القدم المفاجأت وارده .

5 : لا النصر كلام بكلام كل سنه نسمع قرقعة فناجيل ولانشوف قهوه

6 : بتزوج قريبا وجدن ان شاء الله .

7 : حد فاهم حاقه ياقدعان

8 : لا بالعكس وش يزعلني منك , انت قلت اللي عندك وانا رديت عليك وحياك الله بكل وقت ابدن وانا عندي صفحة جديده للجميع دائما يعني ماني من النوع اللي يحقد على فلان علشان سالفة صارت كذا او كذا .

تحياتي لك

إقتباس الرسالة الأصلية كتبت بواسطة عاشـــ الملوك ـــق السلام عليكم يالله إن تحيي مستر قول . أخبارك علومك . أبسألك أسئلة بثره مثلي<<< 1/ما افضل رئيس مر على الهلال بوجهة نظرك؟ 2/أنت من وين؟ 3/ليش مرفقات المنتدى ماتشتغل ؟ 4/وراه إذا جيت أحمل مقطع من المنتدى مايطلعلي حجم الملف ؟ 5/ وش رايك ببيريز ووش رايك به يوم يبيع روبن.؟ 6/لاحظت إنكم رجعتوا التواقيع بالجمهور الهلالي لماذا؟ <الله من زين اللغة 7/مادوك تفعل العضو مُميّز <<فرصة لازم تسغله 8/ ورا ماتحطون بالشبكة خاصية تصغير الصور يعني إذا كانت الصورة كبيرة تصير على قد الصفحة وبه أيقونة تكبر الصورة عشان ماتتشوه الصورة <<<أتمنى إن الصورة وظحت

هلا والله حياك الله يابعدي

1 : بوجهة نظري ان بندر بن محمد هو الافضل ولو ان كلهم فيهم الخير والبركه

2 : من حزم الجلاميد

3 : احنا موقفينها

4 : مممم مشكلة من عندك وماهي من عندنا .

5 : بيريز الرئيس الذهبي لمدريد وبيعة روبين تقدر تقول خطأ وتقدر تقول صح .

6 : مزززززززاااااااااج

7 : لا

8 : واضحه الفكره وان شاء الله نوفرها من زمان ودي فيها بس كسلان

إقتباس الرسالة الأصلية كتبت بواسطة فيلسوف تركي بعد اذنك اذا تسمح لي فيه سؤال او انبراشة صغيرة http://vb.alhilal.com/member.php?u=232390 خش هالرابط وقلي وش رايك بالأسم ?

بالعكس اسم مميز و دعوة مستجابه ان شاء الله

إقتباس الرسالة الأصلية كتبت بواسطة بريماكس الســـلام عليكم ورحمة الله وبركـــاته هلا با اخوي الكبير تركي قبل فتره شرفتنا بالمجلس بس مامليت منك ودي اسالك كم سؤال فيذا تحملنا الله لايهينك بسم الله وعلى بركة الله نبدأ .. !! 1 - تركي .. سجلت بيوزر قديم ومع الأيام مدري وش صار عليه وبحكم ان وقتي ذاك الأيام الواحد ما يحصله يدخل نت الا بالشهر مره وانا ودي اشوف يوزري تاريخ تسجيله قديم شوي ومشكلتي مضيع يوزري الأول .. وش الحل تكفى ؟ 2 - تركي .. بعام 2006 كنت اكثر ما اكون متواجد بمنتدى الجمهور الهلالي بس صدع راسي ومليت من كثر المواضيع هههههههههه هههه بالثانيه عشرين موضوع لو بيدي سلطه ذاك الوقت كان موقف نص الأعضاء اللي يجيك ومتكلف ومنزل لك موضوع وكله عشان يقول متى المباراة القادمه .. ولا هل بيشارك سامي ؟؟ قلت الحال مش حلو كذا .. فكررررررت وفكرررررررررررت الا تطلع فكره بريماكسيه قلت ليه مانفتح موضوع يكون خاص للاستفسارت ؟؟ اي عضو بيسأل عن مباراة !! ولا عن معلق المباراة!! ولا لاعب بيشارك يكتبه هنا بدل من طرح موضوع .. ! من شان نحافظ على جمالية المنتدى وهـــذا الأهم ....! توكلت على الله ونزلت الموضوع وكان فيه تأأييد من بعض الاعضاء ماودي اقول كلهم اخاف تدخل الموضوع وتشوف وتقول وين اللي كلهم هههههههههههااي المهـــم .. مرت الأيام والشهور والسنين واليوم اشوف فيه قسم استفسارات ؟ مدري رأيك تروكي ؟؟ والله يعطيكم العافيه يااارب ،

هلا بولد التويجري

يابعدي الله يحييك بكل مكان

1 : عطني الايميل اللي كنت مسجل فيه اذا تذكر واجيبها لك .

2 : القلوب عند بعضها يابعدي هالفكره مطروحه منذ زمن بس الان تغيروا المشرفين ولازم تتغير الامور حسب مايرونه مناسبا لتنفيذ عملهم .

حياك يابعدي

إقتباس الرسالة الأصلية كتبت بواسطة مجنونyasser20 هلا اخووي تركي .!! 1/ ليه الصور الرمزيه صغيره جـدآ من ناحيه الحجم ليه ما تكبرونها نفس المنتديات الاخرى ؟؟ (النصراويين يذبون يقولون منتداكم صورته الرمزيه 20×20 ) 2/ من هو فريقك المفضل ومن الفريق الذي تحب تشاهد يلعب كورة قدم؟ 3/ من هو الاعب الذي تتمنى ما تشوفه في الهلال (يعني يتم تنسيقه)؟

حياك الله

1 : والحين
2 : الهلال والله احب اشوف الكوره كلها باي دوري كان , حسب الفراغ يعني انسان كورجي
3 : اللاعب اللي مايلتزم بما يطلب منه سواء في الملعب او خارجه .

إقتباس الرسالة الأصلية كتبت بواسطة ..departed.. أسئلتي بعيده عن الرياضه : 1/ ماهي الرياضات التي تتابعها غير كرة القدم ؟ 2/ هل أنت من عشاق السفر .. ماهي الدول اللي سافرت لها أو تتمنى السفر لها ؟ 3/ أشياء تكره وجودها في الشاب السعودي وأشياء تحبها ؟ 4/ ماهي الأكله المفضله ؟ والسياره المفضله ؟ ومن تحب تسمع له ؟ .. 5/ هل تجيد اللغه الإنجليزيه ؟ << << أدري بتقول وش يبي هذا وأسئلته الفاشله .. أهم شيء لاتعصب .. لك ..

مرحبا حياك الله يابعدي

1 : التنس حسب الفراغ .
2 : يس لكن للاسف ماسافر بسبب كثرة الاشغال والارتباط في الفتره الاخيره واتمنى السفر لاسبانيا منذ سنتين وودي بزيارة لها , وبالنسبة للدول اللي سافرت لها مرني واعطيك جوازي تشوفه اهم شئ ان السودان وايران وسوريا وكوريا الشماليه ليست من ضمنها << اخاف انك من FBI
3 : التقليد الاعمى لبعض الثقافات الغربية السئيه , يعني لو اننا ناخذ من الغرب التزامهم بالمواعيد ودقتهم فيها وكذلك ثباتهم على المبادئ وكذلك تفانيهم واخلاصهم باعمالهم كان نقول صح , بس للاسف ماستوردنا منهم الا كل شئ سئ مثل طيحني واخوانه
4 : الاكلة المفضلة الثوم بالبصل والسيارة المفضلة ددسن 84 واحب اسمع بشير حمد شنان وعيسى الاحسائي
5 : اجيد منها القدر الذي يكفيني شر متحدثيها .

إقتباس الرسالة الأصلية كتبت بواسطة Blanco Soul ياهلا و الله و مرحبا بـ تركي .. كيف حالك يابوي عساك طيب .. * وش تعرف عن Blanco Soul ؟ * مارأيك بمشرفي العالمية ؟ يااخي احسهم اعلق مشرفين بالشبكة ؟ لي عوده ان شاء الله

هلابك يابعدي

انت عضو كويس ومن الكويسين بالشبكة ياراوؤل سابقا
والله كلهم كويسين باستثناء ابوحمد واسير الزعيم لاتمشي معهم ابدن الاثنين هذولا من المفسدين في الارض

حياك

إقتباس الرسالة الأصلية كتبت بواسطة Mr:A.w آلسسلآم عليكم ورحممة آلله وبركآته ، قوه تركي آهلآ بك آخي محمآس بين آحبابك في آلعآلمية آنآ ليس عندي آسئلة بقدر ماعندي استفتارات 1ّ~آنت قلت عزيزي آن آلآستآيل حق آلشبكة رآح يتغير يوم آلخميس فهل آلخميس هذآ هو بكــرآ آمـ 16 من سبتمبر .. 2~تبي تغيرون كل شيء ؟! آهم شيء لآ تنسون آلفيسآت واللي يرحم وآلديك غيروهن..!! 3~ وش رآيك بهالفيس () وهالفيس () وهالفيس بعد () محبك ومقدرك ومعزك ومـ ...الخ : سليمـاN

هلابك يابعدي

الاستايل تغير حسب الموعد , والفيسات بنغيرها بس مو الان او بنحدثها بالاصح .
واحد شاطر بدروسه
يالبا فاسكو دي جاما
ينطبق على بعض اعضاء المنتدى للاسف


حياك الله

إقتباس الرسالة الأصلية كتبت بواسطة ابودحه الهلالي حـيّـآك الله تركي ! الصراحة ما اوفيك حقك ابداً لو اتكلم من اليوم لبكرة .. لذلك خلينا في الاسألة ! 1 / لو اشتكى أحد الاعضاء على مشرف على احد الأقسام يصدف انه صديق لك .. وتأكدت ان المشرف هو المخطئ خطأ كبير .. هل ستعاقب المشرف .. ولا الصداقة أولاً !؟ 2 / التوقيع في الزعيم .. ليه مسموح 3 صور بس على الاقل لا تحتسبون الابتسامات ضمن الصور .. لانه الواحد وده يبدع في توقيعه لكن يحده قلة الصور ? 3 / متى نعرف الفريق الي تشجعه في الدوري الايطالي ؟ هذا الي عندي .. تحيتي أضطريت اني ارجع واكتب هالسؤال لانه من زمان يقرقع في قلبي * ليه ما تسوون ستايل ثاني لمنتدى الزعيم بحيث انه يكون سهل التصفح وما يعلق معك .. خصوصاُ لان الزعيم اوقات الزنقات وانخفاض السرعه .. ابتعد عن تشغيله لانه ستايله يبطئ التصفح .. لذلك اتمنى قريب تنشوف ستايل خفيف لمنتدى الزعيم مثل موقع كوورة ! تحيتي !

حياك الله ابودحه

1 : لا بكل تاكيد مبدأ الثواب والعقاب موجود بينا وكذلك العتاب , وحتى لو كانت بينا بشكل غير معلن , ولمعلومايتك بس مو كل المشرفين نعرفهم , يعني فيه مشرفين ماعرفناهم الا بعد ماصاروا مشرفين وفيه مشرفين للحين حتى رقم جواله مانعرفه ولانعرف الا اسمه الاول , لذلك اذا عندك شكوى على اي مشرف او حتى علي انا شخصيا تقدم فيها وبتحصل اللي يرضيك انت او اي عضو آخر , بس مو تجي وتقعد تقول تركي انسان غير محترم وانسان حقير وابعد مايكون عن الاحترام , ومن ثم تبي اوقف معك ضد المشرف , حتى لو كان معك بس ماتاخذ حقك باهانه وسب وشتم زميل لي في الاشراف ويخدم الشبكة , بينما انت تتسدح في بيتكم وتدخل الموقع متى ماتبي وتجي تسب وتشتم , هنا الاشكاليه فقط , وترى هنا اضرب مثال يعني لاحد يتوقع اني اقصد احد او ان هالاحداث صارت .

2 : ان شاء الله بنزيد عدد الصور بالتواقيع بس هذي نقطة اجيب فيها على سؤالك اللي قبل , المشكلة ان بعض الاعضاء يحط في التوقيع 3 صور كل صورة حجمها 500 كيلو بايت يعني عندنا 1500 كيلو بايت تتحمل مع الصفحه اول ماتفتح والصفحه فيها 15 رد , لذلك هذا يفسر احيانا البطء علشان كذا نضطر نحدد عدد الصور واحجامها علشان ماتبطئ التصفح ولاتثقل على الزوار .

3 : جزء من الاجابه ذكرته اعلاه والجزء الاخر ان شاء الله الاستايل الجديد بيكون اخف باذن الله تعالى .

إقتباس الرسالة الأصلية كتبت بواسطة كابتن الزعيم حياك الله تركي كل عام وأنت بخير كنت حاضراً هنا لتسجيل حضوري ومتابعتي للقاء ولكن حضر في ذهني سؤال ...؟! لماذا لا يتم تكليف مشرفين خاصين بتفعيل الاعضاء لكي يتفرغ أعضاء مجلس الإدارة بأعمالهم ..؟ سؤالي على حسب الفتره الماضيه الي كنا نشاهد في تأخر في التفعيل لكن حالياً مدري عن التفعيل مع إن ودي تطقون الاعضاء الجدد سنه عشان يجونك وهم حريصين على العضوية ومايسون حوسه شاكر لك تقبل تحياتي كابتن الزعيم / خالد

هلا خالد

يابعدي والله التفعيل جاري على قدم وساق ووفق خطط علميه مدروسه حتى الان تم تفعيل جميع المسجلين ماقبل شهر ابريل والباقي جاي بالطريق باذن الله تعالى .

تحياتي لك خالد

إقتباس الرسالة الأصلية كتبت بواسطة BLUE MAN 360 اهلين مستر قول حبيت اسألكـ هل انت من متابعي الدوريات الاجنبية ؟ وتحديدا وش تتابع بالضبط ووش تشجع ؟ ووش رايك براعول وبس ومن العايدين مقدما وقبل الزحمة !

اهلين بلو مان

يس بكل تاكيد متابع للدوري الايطالي منذ القدم وكذلك الانجليزي والاسباني بشكل مكثف منذ انتقال زيدان للريال

واشجع اتلتيكو مدريد

اما راؤول فهذا هداف اوروبا التاريخي << الله يخلي ليخنشتاين وسان مارينو , راوؤل لاعب كبير وانجازاته تتكلم عنه بغض النظر عن مستواه حاليا بس يكفي انك تطالع سيرته الذاتيه وتجد القابه اكثر من القاب بعض الانديه

تحياتي لك

إقتباس الرسالة الأصلية كتبت بواسطة H A R R Y . السلام عليكم ّ , بما إن المسأله ّ.. أسئلة .. لن أفوت فـُرصة إجابة مُثمره ! بداية سـ أسألك , بلطف ! سبقتها بغيرك وهي أنك أجمل من نختلف على جمالك ليست مُجاملة .. تلك هي الحقيقة ! لكن أنت ! كيف تنظر إلى نفسك ؟ .. - تركي .. ! أعتقد إنك تذكرنيّ بلعبة أفضل مدرب بالنسخه الأولىّ .. كيف إنطباعك عنيّ .. ؟ خصوصًا بعد مشكلة زيدّ هيلا مدريدّ .. وبعد ما خطفت أنا أحد الأنديه من غير قصد .. ! إلى الآن أتذكر كيفية التشهير بي ! بس مع ذلك مازلت أكن لك إحترام كبيرّ بعد ما عرفت معدنك الذهبيّ .. ! - تخيلّ معي .. ! معآك رقم لوحه .. [ ق م ر 5 1 ] ورقم مميز ّ [ 050 .. والباقي ماتغيرّ ] يا ترى هل ستبيعهـا أم تتكشخ بها .. ؟ - من أوائل الأعضـاء اللي تعرفت عليهم بالشبــكهّ قبل ما أغتنمت أحد المنـاصب .. ؟ ومن من الأعضـاء تُعجبك ردوده بهذا القسـمّ سواء سابقًا .. أم حاليًا .. ! . شكرًا لمن إختارك لنـا .. وشكرًا .. لك .. .. عليك .. فيك !

هلا والله محمد

والله يابعدي الواحد صعب يقيم نفسه , وصعب يقول اني ناجح او اني فشلت ولو ان الفشل غير موجود بقاموسي , بس انا اعتقد ولله الحمد انني وصلت الى مرحلة (على مستوى الانترنت) تجعل الاخرين يختلفون حولي وهذا بحد ذاته ارى بانه نجاح وشئ كبير بالنسبة لي مع انني مابحثت عن هالشئ في يوم من الايام نهائيا , بس هي الحياه جت كذا , وتقدر تقول لو رجعت الايام وراء كم سنه او كم شهر او كم يوم فيه قرارات تخذتها ماراخ اتخذها مرة ثانيه , لكن الواحد يتعلم من حياته .

بالنسبة للعبة النسخة الاولى والله يابعدي اني ناسيها وناسي الاحداث اللي صارت فيها , لكن اذا اني شهرت فيك يومها فانا اعتذر منك الان وامام الجميع وحقك علي , وقد يكون يومها اني ماقصد التشهير بمعنى التشهير ولكن قد يكون اني استغليت خطأ منك في توجيه رسالة للاخرين في عدم الوقوع في مثل هالخطأ مرة ثانيه , وهذي احد الاساليب اللي تقدر تقول اني فكرت فيها بفرض سيطرة على الامور وان تكون تحت سيطرتي , لكن ارجع واقولك اذا اني اخطيت بحقك او شهرت فيك فانا آسف واتمنى ان تعذرني وتسامحني .

بالنسبة للارقام مع ان رقم جوالي اول ماستخرجته حرصت على ان يكون مميزا , وقد يكون لعامل السن وقتها دور بس الان اصبحت غير مهمه بالنسبة لي مسألة تميّز الارقام واللوحات حتى ان لوحة سيارتي عجزت احفظه للحين من كثر ماهي حروف وارقام كل واحد من ديره , ولو ان رقم جوالي الحالي اللي اشوفه مميز انا ودي اغيره بس اخاف اني اخسر ناس كثيرين يعرفوني على هالرقم من سنوات طويله , وبينا عيش وملح وعشرة عمر ومكالمات وايام واحداث ماتنسي

والله بالضبط ماتذكر حاليا وقد يكون للايام دور بس اني كنت مقل في علاقاتي الانترنتيه مع الاخرين , ولازلت اتحفظ في علاقات الانترنت لاني ماشوف فيها صدق وجديه الا ماندر , يعني واحد تتعرف عليه عن طريق المنتدى ومن ثم تطلعون وتروحون وتجون مع بعض ويصير بينكم عيش وملح وعشرة , ثم عند اول اختلاف بوجهات النظر يقعد يسبك ويشتمك , طبعا هذا مو الكل بس الاغلب , انا حدود علاقاتي خارج المنتدى مع الاعضاء لاتتجاوز رقم الهاتف والاسم الاول والاخير فقط , ولو ان فيه اعضاء بيني وبينهم علاقات واسرار يمكن اقرب الناس مايعرفونها عني ومرتبط فيهم اكثر من اقاربي , وارتحت لهم واشوف انهم يرتاحون لي وهذولي يدخلون ضمن الاستثناء .

الاعضاء اللي احرص على متابعتهم سابقا وحاليا كثيرين لكني بذكر الابرز
skroo اليوفي وبس وليد (لوف فور ايفر) الثعبان الازرق باتي قول هلالي عسل (بالانجليزي) J o s e وجريت انتر بالانجليزي , فيرجي بالانجليزي , وانت طبعا ولو انك في الفتره الاخيره بخيل علينا بالمشاركات , وكثيرن والله منهم زيدان اند راؤول برابطة الريال والتي فيها عدة اقلام احرص على قراءة كتاباتهم وكذلك اي كيو 1399 مدري كم وهلالي موت طبعا المشرف وبويل كارلوس حسين حق برشلونه ورهيف خوينا بتاع الكرة الصفراء وزيزو الاستشاري اللي حاط لي كم سؤال تحت , واعضاء كثيرين والله والحمدلله الشبكة تزخر عندنا بالاقلام المميزه والمميزه جدن .

إقتباس الرسالة الأصلية كتبت بواسطة ViTa AS RoMa بنتسجيل حضور وإعجاب باللجنة الإستشارية على الشغل المبذول والي يشكرون عليه بالنسبة لتركي فحبيت اسلم عليك وعندي اسئلة اتمنى تكون خفيفة عليك 1/‏ الجميع يتذكر الحملة الي قامت بهدف محاربة تركي قبل مدة وش كان الهدف منها 2/‏ رأيك في نادي روما وفي توتي ووش تقول للي يقولون توتي ظلم نفسه لما جلس في نادي روما ؟ 3/‏ رأيك في ViTa AS RoMa‏ ‏" فيصل " وماهي ابرز السلبيات الموجوده فيه وش أخبار فريق العالمية :‎ d تقبل تحياتي وأتمنى أكون ما طولت عليك

هلا فيصل
1: والله يافيصل مدري بس ودي انهم يجابون زعماء الحمله علينا , مع اني كنت ولازلت اؤكد بان اي واحد عنده اي مشكلة معي هو يراها طبعا , يجي ويكلمني سواء بالخاص او بالايميل او بالجوال , وصدقني فيه ناس من اعضاء الحمله انا حرصت عليهم وتواصلت معهم واتصلت على جوالاتهم , وكانوا يقولون كلام وتحصل بالنت لهم ردود ثانيه وكلام ثاني , انا ارجع واقول نفس الكلام في كل مره من عنده مشكلة معي يجي ويقولها بكل صراحه وصدقني بيحصل اللي بيرضيه ,بس اساليب الصغار هذي ماحبها انا , ولاراح اسامح كل من اخطأ بحقي نهائيا ولا كل من زور او ساهم في الاساءه لي بغرض تشويه صورتي فقط بدون اي اسباب , وحسبي الله ونعم الوكيل .

2 : روما يحتاج بس الدعم المادي , الفريق قوي ومن كبار الانديه بايطاليا وينافس كل سنه على كافة الاصعده , وهو بظروفه الحاليه فمابالك لو توفرت الماده وحافظ على نجومه واشترى عليهم نجوم وقتها بيصير كلام ثاني .

توتي اسطوره ولاعب كبير ومافيها كلام وانا اشوف ان توتي على حق ببقاءة في روما لانه لو راح فريق ثاني ماراح يحصل نفس الوضع في روما وهذا لايعني ان اللاعب عادي , توتي لاعب كبير وذكي ولاعب مميز وبقاءة في روما افضل له من انتقاله لاي فريق .

3 : فيصل والله عضو مميز وفي فتره من الفترات يعتبر الافضل بالشبكة بس عاد الفتره الاخيره مدري وش جاه صار يتغلى علينا ولو ان عذره اللي وصلني غير مقبول وكنت ولازلت وسأظل انتظره لو كل اسبوع مشاركه او مشاركتين لانه بحق من الاعضاء المميزين بالشبكة .

وفريق العالميه ابدن ماهنا اخبار على خبرك ماصار شئ

إقتباس الرسالة الأصلية كتبت بواسطة CaPTiN السلام عليكم وانا اقول العالمية منور اثرك فيذا عندي ثلاث اسئلة : 1- لكل شخص ميول للاعبين في خانه معينه وش تفضل انت ؟ 2- لو كلفت برئاسة نادي هل تبحث عن اسثمارات تطور النادي ومن ثم البطولات او البطولات اولا ؟ 3- بحكم تدريبك لفريق العالمية في - بطولة الزعيم الاولى - من المدربين يعجبك طريقة تفكيره وقيادته للفريق ؟ كل الشكر لك

هلا بالكابتن ولو اني ماودي اجاوب عليك لانك تمشي مع اسير وابوحمد وهذا بحد ذاته سبب كافئ لتلويث صورتك وسمعتك عندي بس يالله لعيون جليل وعصير الفرواله بجاوب عليك

1 : انا افضل قلوب الدفاع والمحاور تقريبا بدرجة اولى ثم صانع اللعب او تقدر تقول الجوكر

2 : استثمارات تطور النادي بدرجه اولى اذا كنت راعي طويله في النادي , اما اذا ابو اربع سنوات لا والله كم بطوله واصير بطولة الجماهير الاغلى والنادي بحريقه

3 : ليبي ثم كابيلو ثم فيرجسون , (ذكاء وقدرة على قراءة المباريات والتعامل معها والعمل حسب الامكانيات المتاحه وتحقيق الانجازات وفوق كل هذا الشخصيه القويه للمدرب مماينعكس على الفريق واللاعبين )

تحياتي لك ياصديقي

إقتباس الرسالة الأصلية كتبت بواسطة F.C.Blugrana يعطيكم العافية يالاستشاريّين أسئلتي للأخ مستر قول ،، 1 / الحملة اللي شنت ضدّ مستر قول قبل فترة .. تتوقّع وش أهدافها ؟ ... وليش كان الاختيار على مستر قول بالذات ؟! مع العلم إن المشرفين غيرك ... كثار ! 2 / ليش تحاول تخفي ميولك ؟! مع العلم إنّ أغلب المشرفين إن لم يكن ... جميعهم يفصحون عن ميولهم بلا أدنى حرج ! 3 / مكتسبات مستر قول من الإشراف ؟! وهل ترى إن الإشراف قدّم لمستر ... قول أكثر ؟! ولا أنت قدّمت للإشراف ؟! 4 / رأيك في المطبّلين ؟!

هلا عبدالعزيز تراني زعلان عليك لي مده << ماترضى

1 : والله يابعدي انا مثلك للحين مدري وش السبب ومثل ماقلت في جوابي على فيصل , كان بودي ان اي واحد يختلق مشكلة مع نفسه ثم يحطني السبب فيها يجي ويناقشني فيها ويقول ياتركي انا عندي كذا وكذا وكذا , وصدقني بيحصل رد يرضيه , بس المشكلة ان الواحد يتخيل مشكلة ثم يرمي فيها على تركي ومن ثم راح يسب ويشتم , يعني مثلك انت زعلت بفتره من الفترات مدري وش مزعلك وحطيتني السبب مع اني مالي فيك اي علاقه نهائيا ولاقربت لك ولاجيتك , ولو انك ماقلت لي هالكلام بس اني عرفته وعرفت انك حاطني السبب اللي خلاك تترك الشبكة بفتره من الفترات ثم رجعت واتمنى انك يوم رجعت عرفت اني اني مالي علاقه بسبب زعلك ان كان فيه سبب فعلا , وترى يوم سألتني عن فارس عوض وقلت لك معلومة غير صحيحه كانت اشاره مني لك باني ماخذ موقف منك بس انت مافهمتها والا فارس عضو صقيقي الصقوق , عموما هذا مايعني انك من الاعضاء المميزين بالشبكة وانا حريص كل الحرص على مشاركتك فيها وحزنت للفتره اللي انت ابتعدت فيها وفرحت لك لما رجعت , وربي محييك يابعدي , وترى تعمدت اكتب هالكلام امام الجميع مو اقصد اني احرجك بس اني وافقت على هالمقابله حتى اكشف امور كثيره منها هالنقاط واللي هي الصراحه مع الجميع وامام الجميع , وارجع واقولك انت عضو مميز سواء زعلت على تركي والا زعل عليك انت تبقى من المميزين بالشبكة ولايعني زعل تركي عليك شئ وكذلك رضاه عنك لايعني شئ .

2 : والله يابعدي انا شايف انها معلومه غير مهمه بالنسبه للاعضاء خصوصا انه يتعامل معي كمسؤول فلو مثلا عرفت اني مدريدي وانت برشلوني وحررت لك رد او عطيتك انذار بتقول ايه هالمدريدي حاقد علي ومايحبنا واصلا يبي يطفشني , وهالشئ يصير وواقع نشوفه قدامنا كل يوم بالشبكة وكانت تجينا شكاوى على مشرفين نتيجة ميولهم مع انهم كانوا يتخ1ون قرارات صحيحه 100% وفق قوانين الشبكة ووفق عملهم , واذا انت تابعت موضوع سليمان في مقابلته مع ثامر بالاتجاه المعاكس بتعرف وش اعني بالضبط , وحتى انا عانيت من هالنقطة والطرف الاخر عنده مجرد شك اني اشجع النادي الفلاني او العلاني واحد الاعضاء اشتكاني عند ابولما يقول تركي يشجع ,,,, واحنا ,,,,, ومايحبنا , كلمني ابولما يقول انت ياتركي تكره النادي ,,,, من متى صرت تحبه وتحارب الاعضاء اللي يشجعون خصمه , قلت انت تشوف يابولما

اقولك وش اسجع بس اعتبرها سر ولاتعلم احد (الله من الملاقيف انت وياه )

3 : مابي اقولك محبة الناس بس مكاسبي من الاشراف اني تعرفت على ناس اعتبرهم اخوان لي لم تلدهم امي ورجال اتشرف بمعرفتهم وكذلك اشرافي بالشبكة اوصلني لامور كثيره ولشخصيات لم اكن اتوقع بيوما من الايام اني ساجلس بجانبه على كرسي واحد , ماهو تقليل من شخصي لكن لولا الله ثم الاشراف بالشبكة لماوصلت له .

4 : بختصرها لك بكلمتين (المطبلين مساكين)

إقتباس الرسالة الأصلية كتبت بواسطة S U L A I M A N مراحب تركي متى تغيرون الصور الرمزيه ؟ < أمزح بس من كثر هالسؤال حسيت نفسي اسأله وانا مادري - لماذا تقاس العقليات بالميول بعض الاحيان ! يعني اذا انت تشجع فريقي يعني انت اطلق واحد ! - رأيك بالقصه المنتشره هاليومين عشره عن عشره تفرق وكون ميسي صار زلابه بعد ما صار تأهلهم أصعب .. وهل رونالدو زلابه يوم عجزوا يتأهلون للحين مع انه الكابتن - شفت موضوعي ولا للحين لا تقول ذكرن وانت ترد على هالسؤال شفه وعلمن

هلا بالسلمي

1: يالسلمي هذي مشكلة ازلية عندنا جميعا ونعاني منها كشعوب عربية , يعني المشكلة ماهي مثلا انك برشلوني وانا مدريدي مثلا , المشكلة تربية تربينا عليها كلنا انت هلالي انت كويس انت نصراوي انت زلابه والعكس وكذلك اتحادي واهلاوي فلما نكبر ونشجع الانديه العالميه تصير هالثقافه مترسخه معنا , انا ارى ان لكل مشجع الحق في الفخر بانجازات فريقه مثلا كمدريدي مثلا يحق لك الفخر ب 9 بطولات بينما انت يالبرشلوني ماعندك الا ثلاث بس هذا مايعطيني الحق في انك انتقص منك كشخص او اشخصن القضية التي بيني وبينك , لك حق تفخر بناديك وانا كذلك بدون الاساءة الشخصيه للاشخاص لاننا قبل مدريد وبرشلونه اخوة في الدين والوطن .

2 : يالسلمي هالنقطة كتبت عنها رد في موضوع الاستوديو من هنا , وهذي وجهة نظري وارى بان من يتبنى وجهة النظر 10/10 يتبناها من باب السخريه فقط والا لايوجد عاقل ينتقص من ميسي علشان البرازيل فازت او ينتقص من كاكا علشان الارجنتين فازت , او ينتقص من رونالدو لان البرتغال ماتاهلت , لان هذولي الافضل بالعالم , اضافة الى ان زمن اعتماد الفريق على لاعب واحد انتهى , الان زمن الكره الجماعيه , زمن 11 لاعب في ارض الملعب , ومدرب على الدكه يعرف يتصرف حسب احداث المباراه , وكذلك قبل وبعد المباراه المدرب لازم يكون له بصمه .

بالنسبه لموضوعك ابشر بس هالايام مشغول شوي ومالك الا اللي يبيض وجهك ياذيبان

إقتباس الرسالة الأصلية كتبت بواسطة زعلوهـ اووووه تركي اختيار جميل صراحه كان ودي اسألك عن الاستايل والصور الرمزيه لكن الشباب سألوك قبلي بكتفي بهالسؤال س / ليه ما نشوف يوزرك بالمتواجدين تحت ،، مثلنا يعني ؟

هلا زعلوه << لاعاد تزعلونه

ابشر عما قريب الاستايل والصور الرمزيه ويمكن تطلع والمقابله هذي ماخلصت ومبدئيا فجر الخميس يطلع الاستايل الجديد مع الصور الرمزيه باذن الله تعالى .

وبالنسبة لتواجدي يالغالي التخفي زين علشان بعض الاماكن تلبق فيها وتاخذ لك بريك , ماودك احد يشوفك

والله التصفح الظاهر يسبب لك ازعاج خصوصا من الاعضاء الجديد يقعدون يرسلون لك وهو ماعنده الامشاركتين يقول ابي اصير مشرف على قسم الجمهور الهلالي مثل واحد مرسلي امس رساله يبي اشراف على قسم الجمهور الهلالي وهو تو مفعلينه قبلها بيومين مدري مين اللي مسلطه علي وانا متخفي فمابالك بالظهور , وسبق من تجارب سابقه التخفي افضل .

إقتباس الرسالة الأصلية كتبت بواسطة مطيحن كنك تعرفني....مايصير تركي..ضلمتني كذا....والبركه في بعض المشرفيين الله يسامحه....اجل يوقف يوزر..وش يقول..انك خوي اليوزر الثاني.. وش ذا العباطه....تركي وضعي مزري مع بعض المشرفيين.. ودي اناقشك فيها شوي لو سمحت..

هلا يابعدي انت والله اللي عندك مشكله وخلنا نكون صريحين مع بعض اذا انت عاشق الاسطورة ميسي

انت سجلت بخمس يوزرات وفي كل مره تروح تسرق مواضيع من مواقع ثانيه وتجي تنشرها باسمك , ماتبي المشرفين يوقفونك , لما تجي وتسرق موضوع واحد تعبان فيه ومن موقع ثاني ومجتهد فيه وتجي تنسبها لنفسك , كذلك ازعاجك للمشرفين واعضاء اللجان بالرسائل الخاصه , ترى اذا عندك عضويه مو شرط تكتب مواضيع , ولاهو شرط تسرق بعد مجهودات ناس اخرين .

ماكان ودي اقول هالكلام هنا بس انت اللي حديتني عليه

إقتباس الرسالة الأصلية كتبت بواسطة مهبول سامي2 السلام عليكم .. حيا الله أخونـا تركي متى المعرفه؟ حبيبي .. حبيت اسألـك هل هناك لجنة تطويريه لقسم الثقافه الاسلاميه ؟؟ لأن القسم الحين صايـر نآآآآيـــم .!. وينمل منه للأسـف .. ..2_ ليه ما نقدر ننسق الملف الشخصي مثلك ؟ لا تصير متكبّر أمزح معـك ايضاً ياليت تشيّك على كوول الأقسـام .. بعض الأقسام مملة جداً ..! ف ياليت يتم تطويرهـا أو تقشعها يكون أفضـل أخيـراً .. شكــراً لـــك .

حياك الله يابعدي
بالنسبة لقسم الثقافه ان شاء الله بنطور هالقسم ونبحث عن اشخاص مناسبين
وبالنسبة للملف الشخصي هذا سر المهنه تعرف القويين مثلي لازم يكونون مميزين

وبالنسبة للاقسام ان شاء الله فيه اعادة دراسة لبعض الاقسام الشبكة وبيتم دمجها مع اقسام اخرى

تحياتي لك

إقتباس الرسالة الأصلية كتبت بواسطة الأمبراطور أهلآ ً بـ مستر تركي أسألتي إن شاء الله مافيها وجع راس / * / تأخر تفعيل العضويات وش سببه ؟ وكثير أعضاء يجون لهم شهور مسجلين و ما تفعلوا .. ؟؟ / * / القناة السعودية الرياضية .. وش رايك في مذيعينهم .. وهل استديوهاتم المبالغ فيها سبب في فشلهم ؟؟ / يعطيك العافية تركي ويعطيكم الف عافية استشاريي المنتدى

حيا الله المخضرمين

1 : يابعدي العضويات اكثر التاخير من العضو نفسه في انه مايقوم بتفعيل بريدة الالكتروني , وفي هالحاله مانقدر نسوي له شئ , اما الاعضاء الذين فعلوا البريد الالكتروني فجميع المسجلين قبل 1/4/2009 تم تفعيلهم وجاي العمل على تفعيل البقية قبل نهاية شهر رمضان المبارك

2 : القناة السعوديه فيها ناس مجتهدين لكن ضعف الامكانيات الماديه هو السبب في فشلهم , وكذلك لو يطلعون من عباءة انهم قناة حكوميه بيحققون نجاحات كبيره

حياك يابعدي

إقتباس الرسالة الأصلية كتبت بواسطة MiLAN LoVeR صباح الخير ... تركي اختيار مميز عندي سؤالين .. س1/ وش رايك في نادي ميلان ووضعه الحالي ؟ ~~ س2/ وش الحل مع الشبكه بعد كل مباراة لـ الهلال اقصد التعليق والبطء ؟ وسلامتك

هلا باتو7

1 : نادي ميلان هالسنه اذا تاهلوا لدوري الابطال بيكون شئ كويس منهم لانه الفريق يعاني من كافة الجوانب .

2 : ابدن يالغالي هذا الوضع سابقا حاليا الشبكة مميزه ومافيها بطء سواء قبل او اثناء او بعد المباريات , تحياتي لك