متى تصير عاقل.. ومتى تصير خبل ؟؟ كنب او عربي ؟ وألف ريال وشلون تصرفها ؟؟
حيــــــــاكم
صح ان العقل نعمة
بس ترى حتى الجنون نعمة.... احياناً كل واحد تمر عليه في حياته مواقف... هي اللي تتحكم في ذكائه ودلاخته والذكاء في مواقف كثيرة اثبت فشله الذريع مثلاً اذا قطعت اشارة وطالعت في المراية الخلفية وشفت المرور لحقك وقف على جنب وانزل وخلك اغبى من الغباء نفسه لاتحاول تسوّي فيها مخ وتبرر لنفسك اعذار خلك ( فاهي ) وكل ماقال لك شي قل له ( انا ولهان على امي ) ثلاث دقايق بالضبط وهو ضارب لك تحية ومسامحك موقف ثاني اذا رحت للبنك تبي تسدد فاتورة او تسحب شيك او تودع فلوس وشفت العالم جالسين وارقامهم معهم والصالة ( فل ) رح انصى مدير الفرع وخلك ( غبي ) بكل معنى الكلمة اجلس عنده واطلق العنان لبلعومك وبربر بكل شي ماله أي قيمة بتلقاه بعد اقل من خمس دقايق دبّرك وخلّص امورك بنفسه وانت تشرب الشاهي
.
. والمواقف كثيرة بصراحة... لكن ترى مو معنى كلامي ان الذكاء ماينفع بالعكس... لكن الموقف هو اللي يحدد انك تصير ذكي او غبي مثلاً... اذا رحت لمطعم مشهور (الرومانسية مثلاً ) تبي تاخذ سحور لك انت واهلك ولقيت الزحمة واصلة الى نص الشارع والعالم زابنين عند دلة القهوة يقحنون كنّهم ماقد شافوا قهوة بحياتهم رح للكاشير واهمس له باذنه : تراي من المباحث العامة... طرف اللواء ركن سعيد احمد متولّي واللواء يبي حبتين مندي مع الرز ونفرين جريش صدقني اقل من دقيقتين والطلب جاهز ومعه سماطين وعشر علب سلطة حارة موقف ثاني اكثر أهميّة اذا ودك تغيب عن الدوام يوم الاربعاء والمدير حقك كافشك انت والاجازات المرضية اللي فرحان فيها وتبي حل ثاني غيرها لأنها خلاص ماعاد يقبلها المدير رح لأقرب مكتب سفريات واحجز على أي رحلة يوم الاربعاء الصباح أي مقعد فاضي ... مصر سوريا الاردن روسيا البيضاء جزر القمر وخذ ورقة الحجز وادخل بها على مديرك وقل له انا مسافر الاربعاء صدقني بينلّخم اذا شاف الحجز وماراح يسألك عن التذكرة واذا سألك عن اسباب هالسفرية المفاجئة قل له : ولد عمي موظف بالسفارة هناك وجاه انفلونزا الخنازير
.
.
. المشكلة الأزلية... كنب والا عربي ؟؟
في كل بيت سعودي تلقى هالهوشة اللي مالها حل غرفة الجلوس او مثل مايسمونها بالافلام ( غرفة المعيشة ) فيها التلفزيون وجلسة الشاهي والكراث والكليجا الواحد فينا يالرجاجيل... يروح يفرش موكيت ثقيل ومجلس عربي طبعاً علشان يمدد رجيلاته ويعرف يشرب الشاهي زي الناس والحريم... ينبت بروسهن نخل اذا شافن المجلس العربي تجيهن حالة ( شيزوفرينيا ) ممزوجة بقليل من الكراميل المحروق والسبب... الكنب لو تموت مايجوز لهن المجلس العربي... غير الكنب لاتدوّر تمسكها وتحاول تشرح وجهة نظرك : يابنت الحلال ... نبي نتمدد ونطلّق رجيلاتنا ونتعافر مع بزاريننا وهي : اقول لك اقلع هالمراتب الخايسة وهالموكيت وخل نروح نختار سيراميك وكنب زي الناس علشان كذا نصيحتي لكل رجل مغلوب على أمره حط لها الغرفة سيراميك وكنب وعطها جوّها ولاتعابط ورح طق لك بيت شعر بالحوش وتمرّغ فيه على كيفك وادحر الشيطان
.
.
. الف ريال... عدّاً ونقداً... إزّاي تبعزئها ؟؟
تخيّل انك رايح لهايبر ماركت... جيان او كارفور وانت داخل صادفك واحد عن الباب وقال لك : مبروووك ... انت الزائر رقم مليون ... وربحت معنا الف ريال كاش بس بشرط... الالف ريال تتقضّى فيها من الهايبر وماتطلع ومعك منها ريال واحد كيف راح تصرفها ؟؟ وش بتشتري فيها ؟؟ انا عن نفسي.. اضمن لكم اني راح امسحها من الوجود في مدة لاتتجاوز خمس دقائق اول شي باروح لقسم الزيتون والاجبان وبـمائة ريال احلى تشكيلة
ثم أعرج على قسم المشروبات الغازية... وعشرة كراتين دايت كولا بـمائة وثمانين ريال ثم لقسم الحلويات... وبـسبعين ريال عشرين حبة من هذا
ثم لقسم الاجهزة الكهربائية واحلى مكينة قهوة امريكية بمائة وخمسين ريال
الـ خمسمية الباقية باشتري فيها اربع ( جزم ) وانتم بكرامة مثل ذولي
شفتوا كيف انا اكوس واحد يلعن سلسفيل القريشات
بس ترى على فكرة
انا مو لحالي... 90% من الشعب السعودي اذا دخلوا الهايبر ينسون انفسهم
الا على طاري الاشارة , مرة قطعت الاشارة المشكلة ما كنت مسرع كنت ماشي على رواقه .. والمرور واري مباشرة .. ويوقفني العسكري ويقول وراك قاطع الاشارة قلت اي اشارة .. !! قال تستهبل قلت اكلمك جاد اي اشارة تتكلم عنها .. ؟! وانا صادق ما شفتها .. المشكلة ان اكبر ما في الشارع الاشارة .. بس يوم شافني اتكلم بثقه قال رح ولا تعيدها .. وعادة اذ تعقدت اموري استدلخ تنحل بسرعة ..
ثانيا الكنب ولا العربي خل ام العيال تجي بالاول ومستقعد اقعد واقف ..
اما بئزعة الفلوس .. فهاذي مشكلة الشعب كلهم .. واحد من الاثنين ياحنا دلوخ يا حنا دلخ .. اذكر مرة طلعت من البيت الساعة 2 ادور خبز وافر المحلات كلها مقفلة .. وقلت مالك الا بنده ورحت بنده ابي خبز بس طلعت منها وانا شاري اغراض بـ 140 ريال .. يعني لو لقيت مخبز فاتح ذاك الوقت كان وفرت 138 ..
يا لبا قلبك بس يابو صالح .. أنت مثلي من عشاق الزيتون الأخضر
اذكر بيت شعري لسعد علوش يقول فيه:
من الذكاء انك تسوي نفسك أحياناً غبي .. بس الغباء انك تذيكى لك على ناس أذكياء
أنا من أنصار الاستدلاخ .. و اظهار حسن النية و بياض القلب في بعض المواقف .. جربتها كثير و اعتبرها من مبادئي خصوصاً مع المدراء
ما تاخذ شغل واجد .. تنرحم كثير .. متى ما بغيت تغيب او تستاذن لك الضوء الأخضر غالباً
أما الكنب و الله اني اكرهه كره العمى .. يا زين المجلس العربي تمديد رجلين و راحة و تسدح
) 
... انت الزائر رقم مليون 
الوضع العادي
