28/08/2009, 08:27 AM
|
| الكاتب الساخر | | تاريخ التسجيل: 19/06/2006 المكان: Najd
مشاركات: 1,022
| |
إنفلونزا الهياط !! " سجل عندك هالأثنين " !!
أنتم سمعتوا اللي يقول : " ما يغثك من الدبش إلا أرداها " ؟!
من أول ما بدا هالرمضان الله يجعلنا فيه واياكم من المقبولين .. وأنا معاهدن نفسي و حالفن ما عاد " اتلطم " ولا عاد أنفخ على أحد .. وأي واحد يخطم علي وإلا يحدني ويرقيني رصيف .. إني لا ألحقه لو يصير اللي يصير .. و أبتسم بوجهه وأعطيه كتيّب وأقول رح الله يسامحك يالعليمي .. و مخصص لي وقت ألـفّ فيه سمبوسة مع أهلي .. وبالنسبة للقيمات فأنا ملغي أي ارتباطات قبل المغرب عشان أفضّي نفسي تماما لها لأني لازم أضبطها وأخليها مدوّره صح .. مهوب كلها طعوج وصعارير .. تسنها كور " دوري زين " !!
وعشان أعوّد نفسي الصبر والاعتماد على الذات !! لازم أحضر مباراة للهلال أسبوعيا !! حتى لو صار مسؤول الملعب ما عنده أي إحساس بالمسؤولية و حاشر العالم قدام الملعب !! وبما إن مرض انفلونزا الخنازير لاعب في العالم !! فالواجب علي كمواطن .. بما إن وزارة الصحة مكتفية بهالتصاريح بعيدة المدى ولا شفنا لها أي حضور يواكب هالحدث !! إني أشتري لي أقل شي 10 كمامات !! وأحط في كل مخباة خمس .. وكل من صدمني بكتفه وإلا دفنـّي وإلا قشـّم على كتوفي .. رحت لمـّه وقلت شف أنت ووجهك خذ هذي كمامة أسأل الله لي ولك النجاة من الانفلونزا !! أقل شيء يصير لي ( دور وقائي وتثقيفي ) في مثل هالتجمعات !!
وحتى وأنا (صاف في السرا) عشان أشتري التذكرة .. خخخخخخخخخخخ أدري بتقولون " أي سرا أنت ووجهك " ؟! أحب أقول لكم آسف ما دريت إنكم منتبهين لي !! فقصدي وأنا آكلن خابور بالزحمة عند درايش بيع التذاكر .. خخخخخخخخ أدري بتقولون " أما درايش أنت وآذانك ؟! " أحب أقول لكم يا شينكم كفشتوني ثاني مرة .. قصدي وأنا بالزحمة عند ( الدريشتين حقات بيع التذاكر ) .. أبحاول اكتب ورقة صغيرة وأجهزها .. وأول ما يشوتوّني العالم .. ويدففوني الين أوصل للدريشة غضب .. بمّد للي يبيع دراهمي ومعهن الورقة اللي كاتبن فيها :
أخي المسؤول .. لم كل هذا الإسراف والبذخ والتبذير ؟! ونحن بلد ٌ قد وقعنــّا عقد بـ 300 مليون مع ART !! وبطخة ملايين مع Zain غير الدعم اللي يجينا من ولاة الأمر !! وأخرتها ما تشكرون النعمة !! الحين يومكم فاتحين ( دريشتين ليه ؟! ) يالمبذرين يالمسرفين !! وش قصدكم ؟! تبي تقهرون الخبـّازين عشان ما عندهم إلا فتحة وحدة !! أما تعلموا إنكم (محاسبون) !! دريشتين يالظالمين !! وحدة تكفي !! وأنا اللي علي سويته وإن شاء الله إني أبريت ذمتي قدام الله أيها المفسفسون بالدراهم!!
--------------------
--------------------
و قايلن ما نيب مناظر ولا مسلسل !! إلا إذا فيه ( وجوه جديدة ) !! والحمد لله ماخاب ظني .. والوطن زاخر بالمواهب !! فالوجه الشاب ( مصلح آل مسلم ) يفجرّها بقوة ويقول لكم : جايك يا علي المدفع .. و طموحي منافسة إبراهيم الصّلال !! أول ما شفته قلت ( تمثيله عادي ) .. بس لخمني يوم بدأ يتكلم عن ( قوة الشخصية ) !! ووضّح لنا كيف تكون (الشخصية مهزوزة ) !! أنتم سمعتوا ذبته يوم يقول : كان فيه ( زيدي ) خخخخخخخخخخخ الله يرجك يالمنتهي !! تكفون متى مباراتهم الجاية لازم أتابعه ولا أفوّت ولا حلقة !!
بس بما إنها ماسكة نصائح !! وبما إن ( مصلح ) ببداية مشواره التمثيلي .. اللي كلنا أمل إننا نشوفه الموسم الجاي بدال ( ممادو ) ويسافرون به لتركيا ويفّل والدينها معهم !!
أضف إلى ذلك إن (هاني نفخة ) مهوب مكمل مع العيسى والمالكي .. فهذي فرصة جته باردة مبردة !!
و أحب أقول لك بما إني لقيت فيه أنا وقت ألـّف سمبوسة وأضبط اللقيمات .. فأنت عندك وقت إن شاء الله تقرأ كتاب (كيري باترسون ) !! وكيف إنـّه شخصّ حالتك بالضبط !! بوصفه لأسلوب ( الضحية و الجاني ) !!
أولا : " أخي الممثل الظريف " :
- ترا صومي أهم من خشتك مية مرة !! لكن بما إنك موهبة و (قوي شخصية وشكيمة في نفس الوقت ) فما بغيت أؤجل الرد عليك إلى ثاني العيد :
استفد من تجربة ( هزاع القادسية ) !! شف وشلون بربرته ما نفعته !! و قام يخابط ويلابط !! ويبرّر سقوطه وفشله .. ونسى نفسه .. والنتيجة ( رقعوه بـ سبعة ) بعد أول مسرحية فاشلة !! فانتبه يصير تمثيلك مثله !! خلك واقعي واترك الهياط !! و مناقشتك لاهتزاز " شخصية فريقك " أهم من تقييمك لشخصيات غيرك !! يا ( مصلح نفخة ) !!
فريق متهالك .. بغى ياكلها 10 زي السلام عليكم !! على أيش نفشة الريش !! و على أيش المصارخ وأنت جايب لك 11 واحد مدخلهم الملعب بأعصاب أردى من أخلاقك وأعصابك !!
وصدق اللي قال ( كما تكونوا يوّلى عليكم ) !! فأنت وفريقك المهزوز ( وجهان لنفس العملة ) !! لذلك ليه رمي " التهم جزافا " ؟!
تدري وش مشكلتنا يا ( عندليب الشاشة ) ؟! إننا كهلاليين ما نغلط على أحد ولا نتعرض أحد !! لكن لنا " لسان " يصلخ وجه كل من تمادى !! ولنا " أفعال " تصفع كل من تذاكى !!
ثانيا : يقول الفيلسوف الأغريقي بولطس " إذا تلفظت بالشتائم سمعت الشتائم " !! وبما إننا في رمضان فأسمح لي أحرّف المثل وأخليه : ( إذا تلفظت بالشتائم .. سمعت الحقائق ) !! لكن للمعلومية هالمثل "عرض خاص " في رمضان فقط !! ومع الهلاليين فقط !! أما بعد رمضان فما علي منك !!
ولربما كانت (الشتائم) التي تتمنّى سماعها !! أهون عليك من أحجار (الحقائق) التي ملأ عبدالرحمن بن مساعد بها فاك !! و " فاك يعني خشتك " !! يعني فمك !!
ثالثا : حينما تستغل سذاجة (البعض) !! وتعاطف المتكالبين على الهلال !! لتمرير " نزاعات طائفية " فهنا لن تجد حولك أحدا .. حتى (ممثلي الكومبارس) الذين امتلأت بهم القنوات !! لأن ( لحمة هذا الوطن ) أمتن وأعتى من أن تهزها افتراءات ( طائش ) !!
--------------------
--------------------
- ما يستفاد من الموضوع :
* تخيّلوا تستغل (إيرادات) دورينا !! ونشاهد شراء التذاكر عن طريق النت !! قصدي عن طريق مكائن خاصة منتشرة حول البوابات !! قصدي يفتحون " دريشة ثالثة " لبيع التذاكر !! <-- الشكوى لله !!
* تخيّلوا كل شخص منا ( يحترم مهنته ) !! بالله وش كثر المشاكل اللي تبي تنحل ؟!
--------------------
--------------------
- اللهم يا حي يا قيوم بهذا اليوم الكريم أسألك أن تغفر لـ(سعود الزهراني Saud.m) !!
- صعقت عندما سمعت "الحادثة الغاشمة" التي استهدفت سموّ الأمير " محمد بن نايف " !! أي دين هذا ؟! أي مذهب هذا ؟! أي جماعة تلك ؟! التي تسفك حرمة رمضان ؟! وتبيح دم المسلم ؟! وتزخرف طريق الانتحار !! اللهم احفظ ولاة أمرنا !! اللهم احفظ (أمن هذا البلد و استقراره ) !! ولن تزيدنا هذه الحوادث ( إلا التفافا حول ولاة أمورنا ) !! فالحمد لله على سلامتك .. |
الوضع الشجري
