الجماهير الهلاليه تهدي خزينة النادي 3,600,000 ريال.! - نادي الهلال السعودي - شبكة الزعيم

D.L · #1 27/08/2009, 08:00 AM

السلام عليكم ورحمة الله وبركاته..

الف الف مبروووك الفووز المستحق نتيجة ومستوى.. كنا محتاجين لمباراة البارح الي ردت فينا الرووح وشفنا فيها هلال زمان ,, بعد ماكنا نعاني بتذبذب المستويات في الموسم الي فات..

ماراح أطول عليكم أبدخل بالموضوع..

البعض يمكن يستغرب من العنوان ويبي يعرف وش سالفة هالملايين.؟ ومن وين.؟ وشلون.؟

السالفة ومافيها أن دوري زين للمحترفين السعودي (على كثر ما أسمه يغث الا أنه زين بصراحة

) استحدثوا فيه مسابقة أفضل نادي وأفضل لاعب في كل جولة من جولات الدوري.. والحمدلله أن الزعيم أحتكر الجائزتين من الجولة الأولى وبجداارة

في كل مباراة يكسب الهلال 150 الف ريال لو حصل على جائزة أفضل نادي في الجولة.. وبما أننا نمثل أكثر من ثلاث أرباع سكان السعودية.! ,, من مختلف فئات المجتمع

احتكار الجائزة في كل الجولات ماراح يعتبر شي صعب لو تكاتفنا كلنا بالتصويت

..

150000 * 24 جولة =3,600,000 ريال لخزينة النادي مع نهاية الدوري

وزد عليها جائزة أفضل لاعب والي هي 50 الف ريال مع كل جولة..

50000 * 24 جولة = 1,200,000 ريال لنجوم الزعيم

الكل يتمنى أنه يقدم للنادي ويساعد باللي يقدر عليه, وهذي فرصة من الفرص في متناول اليد..وفوق كل هذا السالفة فيها تحدي ومنافسه لجماهير باقي الأندية وهنا تطلع هيبة الموج وتكون تأكيد على جماهيرية الزعيم

الموضوع مايبيله شي راس ماله بطاقة مسبقة الدفع من زين وتصويت للهلال بعد كل جولة ,,
أتمنى يكون فيه تفاعل من إدارة المنتدى ويثبت لنا موضوع عن نجم المباراة الي الكل يصوت له ,, عشان ماتضيع اصواتنا على باقي اللاعبين ويروح علينا التصويت بلوشي

أتمنى تكون الفكرة أعجبتكم ونشوف تفاعل من الكل, وانتم قدها وقدود

أختم موضوعي بدعاء المجلس..

سبحانك اللهم وبحمدك, أشهد أن لا اله الا انت , أستغفرك وأتوب إليك..