الشباب السعوديين والعمل في القطاع الخاص.. الى متى الجدل البيزنطي والنظرة القاصرة ؟؟ - نادي الهلال السعودي - شبكة الزعيم

Fahad Al Sudais · #1 16/03/2009, 10:25 PM

حيــــــــــاكم

الواحد اوقات ودّهـ يتكلم ولايسكت ابد

وش الدافع في هالشعور ؟؟

وش اللي يشعل الخاطر في هالموضوع بالذات ؟؟

ترى كل الكلام اللي راح اقوله ( جادّ ) وخالي من المزح..

صار لي اكثر من تسع سنين في القطاع الخاص

عاشرت الاجانب والسعوديين

الاجانب بكل فئاتهم..

امريكان وفرنسيين وبريطانيين وبرتغاليين ولبنانيين واردنيين ومصريين وسودانيين ومغاربه وشوام

ولاحظوا اني قاعد اتكلم عن الجنسيات اللي تزاحمنا في الوظائف المتعارف عليها..

يعني استبعدت ابو هنّود وابو فيلبّو بجميع الفئات

وباعطيكم سبب تفضيل اصحاب الشركات والادارات العليا للاجانب :

( طبعا كلامي لايشمل الكل من السعوديين.. بل الاغلبية )

الدوام يبدأ الساعة 7,30 او ثمان.. الاجنبي على الموعد.. والسعودي كل يوم متأخر

الساعة 9.. الاجنبي منهمك في العمل.. والسعودي يقرأ الرياضية

الساعة 10.. الاجنبي منهمك في العمل.. والسعودي طالع مستأذن ساعة

الساعة 11 .. الاجنبي منهمك في العمل.. والسعودي توّهـ راجع وماسك قوطي سفن اب

الساعة 11,30 .. الاجنبي منهمك في العمل.. والسعودي رايح جاي بين المكاتب وسواليف مع الشباب واستهبال على الهندي عامل الشاهي

الساعة 12 .. الاجنبي يرتاح في وقت الـ( BREAK ) .. والسعودي يطلع يجيب خواته من المدارس

الساعة 12,30 .. الاجنبي يواصل العمل.. والسعودي مابعد جاء

الساعة 1 .. الاجنبي منهمك في العمل.. والسعودي مابعد جاء

الساعة 1,30 .. الاجنبي منهمك في العمل.. والسعودي توّهـ راجع وماسك قوطي بيبسي

الساعة 2 .. الاجنبي قاعد يتطلّب السعودي يخلّص له المعاملات اللي عنده

الساعة 3 .. الاجنبي منهمك فيما تبقّى من عمل.. والسعودي نازل تحت عند البوابه يستهبل على السيكورتيه

الساعة 4 .. الاجنبي يسترخي في مكتبه بانتظار نهاية الدوام الساعة 5 .. والسعودي ( يفخت ) من بعد صلاة العصر

هذا بالنسبة لدوام الشركات ذات الفترة الواحدة..

أمّا بالنسبة للفترتين.. لاتحلم ان السعودي يداوم الفترة المسائية طول ايام الاسبوع

يعني بكل امانة : يومين في الاسبوع لازم يتغيّب عن الفترة المسائية

وفي كل الحالتين.. دوام الفترة الواحدة والفترتين.. مافيه أمل السعودي يداوم الخميس.. الا ما ندر

واذا ودّكم تعرفون ليش السعودي يتصرف بهالشكل..

اقول لكم : عدم اقتناعه بالعمل في شركة... يبي وظيفة حكومية

ياشباب باعطيكم اياها على بلاطة.. وخصوصا اللي مابعد خلصوا الجامعة

ترى المستقبل الجاي كلّه ( قطاع خاص )

يعني مردّك تتوظف في شركة

لاتحتقر الدوام في الشركة.. وتجلس فيها كأنك ضيف

مدري ليش شبابنا يعتبرون الشركات للاجانب.. ويعتبرها محطة مؤقته له حتى يدبّر له وظيفة حكومية

اقسم بالله ان القطاع الخاص افضل من الحكومي بمراحل

اولا : الشركة تعطيك تامين طبي لك ولزوجتك ولابنائك باكبر المستشفيات ( دله – المملكة – الحمادي – السعودي الالماني... الخ )... الوظيفة الحكومية تعطيك كروكي لمستشفى الشميسي

ثانيا : اغلب الشركات تتبع نظام ( البونس ) وهو المكافأة الدورية بواقع راتب نص شهر او شهر كامل كل ست شهور او سنة.. الوظيفة الحكومية تعطيك علاوة سنوية 200 او 300 ريال

ثالثا : بعض الشركات تسلّمك سيارة.. الوظيفة الحكومية تعطيك ( الضعوي )

رابعا : بعض الشركات الكبيرة تقدر تتنقل بين فروعها بسهوله حسب ظروفك للدمام اوجدة.. بمجرد تقدم طلب نقل كلها شهرين او ثلاثة وانت منتقل.. الوظيفة الحكومية ( تبطي عظم )

خامسا : اغلب الشركات متعاونة معك كموظف وتعطيك تسهيلات في الحصول على قرض من الشركة بكل سلاسة.. الوظيفة الحكومية يقولون لك مانعرفك ولاتعرفنا

سادسا : علاقات البنوك وتعاملهم مع منسوبي بعض الشركات افضل واسرع من منسوبي الوظائف الحكومية خصوصا في فتح الحساب واستخراج البطاقات الائتمانية

سابعا : الحكومي يحسم له تقاعد.. وانت يحسم لك تامينات.. مافيه فرق

ثامنا وهو الأهم في نظري : موظف القطاع الخاص ( حر ).. متى ما لقى وظيفه في شركة اخرى افضل مزايا من الوظيفة اللي هو فيها.. يمشي فورا بدون تفكير.. يستلم مكافأته من الشركة السابقة وينخرط في العمل مع الشركة الجديدة بكل انسيابية وبدون تعقيد.. عكس موظف الحكومة.. اللي تمر عليه سنين ولاهو قادر ينقل ولا يحسّن وضعه ولا يغيّر مكان عمله

واذا جينا للجد..

لازم نعترف ان جو العمل الحقيقي هو القطاع الخاص

العمل الحكومي عبارة عن بيروقراطية قاتلة للموظف والمراجع في نفس الوقت

عكس القطاع الخاص.. المرونة فيه اكبر ومجالات التصرّف اشمل واوسع

ترى الموضوع بسيط.. بسيط جدا ياجماعة

اول ماتتخرج قدّم ملفك لمكتب العمل

كلها كم يوم ويتصلون عليك ويحوّلونك لشركة

اشتغل فورا ولاتفكر بالراتب

بعد كم شهر وبعد ماتتعود على العمل في الشركات.. ابدأ بالبحث عن شركة اخرى براتب افضل لو بزيادة بسيطة

صدقوني خلال سنتين بتلقى نفسك في وظيفة ممتازة وراتب محترم

وبالمقابل.. ماضاعت سنتين من عمرك في انتظار وظيفة حكومية بائسة

بالعكس.. اكتسبت خبرة.. ومصروف.. واشتد عودك في القطاع الخاص

وعلى فكرة

اللي يتشدّقون بالامان الوظيفي للعمل الحكومي

صدقوني مافيه فرق كبير.. الدولة بكبرها معك ياموظف القطاع الخاص

عريب عبدالله · #2 16/03/2009, 10:35 PM

خلينا حقانيين ترى كثير من السعوديين مخلصين في عملهم وجادين

مش بس في المؤسسات الراقية وحتى اللي يعملون سكيورتية أو في الكاشير

الحين الناس صارت تبي الستر بأي وظيفة مش عشان يتوظف أقلها يشيل نفسة عن أهلة

أنا قبل كم يوم شايفة سعودي يعمل بمحطة البنزين في التعبئة للزباين "شغلة البنقالية والهنود"

المهم أنه يدور رزقة بالحلال أحنا نظلم السعودي لو قلنا يتشرط شباب الحين أكثرهم ما يتشرطون

لازم نغير نظرتنا عن الشباب ونعطيهم فرصتهم وبدل الأجانب أبناء الوطن أولى

لأن الأجنبي يصرفون علية بدل سكن وتذاكر وغيرها والسعودي يملك نفس المؤهلات والخبرة تجي مع الممارسة

واللي ما ينضبط عندهم صلاحية فصلة وحتى في النظام الحكومي الأمر نفس الشي

لكن أنا واثقة أن شبابنا ماعاد يتشرطون مثل أول لأن العمل ماهو عيب ولا حرام

بالحب والإشراق

abo 3losh · #3 16/03/2009, 10:55 PM

ضف على اللي قلته الخااص تماارس اللي درسته بتخصصك ..طبعا اقصد التخصصات العلميه مثل الهندسه وغيرهاا ..باختصاار ماايرووح اللي درسته هباء
ايضا فيه جديه اكثر موب بس شاااي وجرااايد بالمؤسسات النظااميه..

الصخره
وش عندك اليووم مغير السيستم اللي متعودينه لموااضيعك

قناص20..!! · #4 16/03/2009, 11:15 PM

الصخره اي شي حكومي خاص اللي يجي بس المشكله مافيه وظايف والواحد مو قاعد يتخير..

هو صحيح فيه وظايف في القطاع الخاص بالنسبة لحملة الشهاده الثانويه لكن احس انها محدوده يعني مافيه شي بعدها

قصدي سلم وظيفي او مدري وش تسمونه انتم الموظفين.. يعني كاشير على انواعها مطعم سوبرماركت وانت ماشي ..

وبالنسبه لموضوعك فعلاً القطاع الخاص افضل لكن انت جالس تتكلم عن ثقافة مجتمع كامل يحسب الدوام فترة نقاهه

ماتعودنا اننا نشتغل حكومتنا مدلعتنا ولاحسيب ولارقيب وهذا الشي واضح لنا خاصةً لما يكون الموظف الحكومي

يواجه عملاء من الشعب تجي تعطيه معاملتك كنك تشحذه ويالله يالله بطلعة الرووح يقوم عشان يدبك فيها ..

يعني احنا شعب للاسف مدلع ونبي الراتب يجينا في جيوبنا باقل جهد ممكن يعني لما تشووف الاجنبي يشتغل صح

ترا مو زود فيه لانه هذا المفروض وهذا الشي الطبيعي لكن المشكله فينا احنا للاسف والله يصلح الحال ..

يعطيك العافيه على الموضوع الجاد..

اخوك تـركــي ..

Fahad Al Sudais · #5 16/03/2009, 11:18 PM

إقتباس

الرسالة الأصلية كتبت بواسطة رائدة الزعيم


	خلينا حقانيين ترى كثير من السعوديين مخلصين في عملهم وجادين

كلامك صحيح

وانا ماقلت الكل.. قلت الاغلبية

انتي تتكلمين بنظرة شمولية تحتمل الكثير مما تسمعين وينقل لك

لكن انا اتكلم بعين شاهد العيان اللي عاشر عدد كبير خلال سنوات في نفس المجال

وليس من شاهد كمن سمع ياعريب الدار

Fahad Al Sudais · #6 16/03/2009, 11:23 PM

إقتباس

الرسالة الأصلية كتبت بواسطة abo 3losh


	ضف على اللي قلته الخااص تماارس اللي درسته بتخصصك ..طبعا اقصد التخصصات العلميه مثل الهندسه وغيرهاا ..باختصاار ماايرووح اللي درسته هباء ايضا فيه جديه اكثر موب بس شاااي وجرااايد بالمؤسسات النظااميه.. الصخره وش عندك اليووم مغير السيستم اللي متعودينه لموااضيعك

ولد عمي اصدق دليل على كلامك

تخرج مهندس.. وتعيّن في امانة مدينة الرياض ( حكومي )

وقعد سنة كاملة في وظيفة ماهي من تخصصه نهائيا

وبالاخير... قدم استقالته وراح توظف في شركة بنفس تخصصه.. وصار له ثلاث سنين ومبسوط

ومن ناحية السيستم.. لاتخاف كل شي له وقته

..مجرد شخص.. · #7 16/03/2009, 11:25 PM

صدقت إخوي الصخره بكل حرف قلته
..

الـــــــــــوعي هذا ماينقصنا وللإسف..

مافيه وعي والله مايدري وش صالحه

يبي يتوظف وبس أهم شي الراتب ينزل أخر الشهر

غميضه والله<<ماتوظف

انا عني مسكت محل خضره صباحي وأحيانا امسكه يوم كامل

بالعكس أحس بنهاية اليوم بسعاده
أعتبر إني أنجزت شي
<,<ع فكره لاتحسبني داج (معي دبلوم4من5لكن أشغل نفسي لين ألقى عمل

..
وهنا أقصد الواحد لما يتعب أخر اليوم راح يشعر بمتعه
غير كذا يحصل رفعه في نفس مكان العمل..
..
خلاصة الكلام الشباب السعودي(أغلبه)ينقصه الوعي
..
تسلم اخوي الصخره
موضوع في غاية الأهميه
دمت لنا مبدع

..

هلالية أبوها أتحادي · #8 16/03/2009, 11:28 PM

كلامك صحيح ويحمل الكثير الكثير من المصداقية
لكن بالنسبة للمدارس الاهلية بعتباره تحت مسمى (القطاع الخاص) لايوجد بها اي ميزة بل بالعكس ياخذون كل طاقتك وينشفون دمك وعلى 1500 واحيانا 3 شهور ماتشم ريحة الراتب ويطالبونك بانشطة تكلفك دبل الراتب الطفس يمكن يكون قطاع التعليم اسواء قطاع من بين القطاعات الخاصة
فعلا أنت عضو شامل عندك كل شيء زي المولات الكبيرة

(ان تبي فكاهه ,سخرية ذات مضمون,تشبيهات , شاعرية ,جدية كل شيء موجود

الله لايضرك
مشكور يالصخرة ألف شكر يالمبدع

Fahad Al Sudais · #9 16/03/2009, 11:33 PM

إقتباس

الرسالة الأصلية كتبت بواسطة قناص20..!!


	الصخره اي شي حكومي خاص اللي يجي بس المشكله مافيه وظايف والواحد مو قاعد يتخير.. هو صحيح فيه وظايف في القطاع الخاص بالنسبة لحملة الشهاده الثانويه لكن احس انها محدوده يعني مافيه شي بعدها قصدي سلم وظيفي او مدري وش تسمونه انتم الموظفين.. يعني كاشير على انواعها مطعم سوبرماركت وانت ماشي ..

ومنهو الاهبل اللي قال لك هالكلام ياتركي ؟؟

اتحداك اذا كنت رحت لمكتب العمل وسألت عن الوظايف اللي على شهادة الثانوية

بلاش مكتب العمل.. افتح جريدة الرياض كل صباح وطب وتخيّر

بس باعطيك معلومة اعتقد انها بديهية.. اللغة الانجليزية شرط عام لكل الشركات

ممكن يتنازلون عن الخبرة.. لكن اللغة مستحيل الا اذا تبي وظيفة امن

sowaid · #10 16/03/2009, 11:38 PM

طرح رااقي اخوي

لاعدمنااااااااااااااكـ

الغرناطي · #11 16/03/2009, 11:39 PM

..

الإنسان ذو الهمة العالية سيجد ما يريد بالتأكيد

..

قناص20..!! · #12 16/03/2009, 11:39 PM

هنا الكلام احنا وش ذبحنا غير هالانجليزي احنا وش ذنبنا اذا كان الاساس غلط ..

مو مشكلتي يجيني استاذ الانجليزي في الحصه ويتكلم عربي الحصة حصة انجليزي ويتكلم عربي وشلون بنفهم ..

انا ماذبحني غير هالانجليزي .. الله يعين .. وبالنسبه لجريدة الرياض فعلاً صادق لكن كل ماشفت اعلان (لغة انجليزيه)..

(خبره لاتقل عن خمس سنين ولا اقضب الباب)<< تعقدت وبعدين بيني وبينك صدقني حتى في القطاع الخاص ماتمشي الا بواسطه

يعني الواسطه ورانا ورانا .. عموماً

يعطيك العافيه ..

abo.a7mad · #13 16/03/2009, 11:49 PM

أقول يازين العسكريـــــــــــــــــــــــــــــــــــــــــــــــــــة

تخيل , ملازم أول يستلم 6000 ريال في الشهر من أول ما يتوظف

طبعا الموظف أول ما يستلم يعطونه راتب شهرين يعني 12000

//

أنصحك تطلع من القطاع الخاص وتدور لك حكومي << بيوهقك

شكرا صخورتي

,

Fahad Al Sudais · #14 16/03/2009, 11:49 PM

إقتباس

الرسالة الأصلية كتبت بواسطة ..مجرد شخص..


	يبي يتوظف وبس أهم شي الراتب ينزل أخر الشهر

وهذي هي للاسف ثقافة العمل الحكومي

قلّة انتاج.. قلّة تفاعل.. اهم شي راتبي نهاية الشهر

القطاع الخاص غير.. غير

عمل.. جدية.. انتاج.. جهد

وهذا هو الشي اللي ينقصنا كثقافة.. وبإذن الله راح يتغير مع الوقت وفي القريب العاجل

هلاليه محترفه · #15 17/03/2009, 12:00 AM

لكل مجتهد نصيب

وبالاضافه بعض الشباب يبون راتب مغري ! وعالي وهو توه متوظف
انا احس في مبالغه من بعض الشباب يعني امش حبه حبه لحد ماتوصل للي تبيه اما يايجيك الراتب الي تبيه ولا أجلس في البيت مو منطق!!
وفي الاخير الوظيفه الي حصلها بتعود له بمنفعه وخبره حتى لوكان الراتب قليل

بس يمكن مافي وعي او يبون الدلع طبعاً اتكلم عن بعض الشباب

شكرا لك اخوي الصخره ع الموضوع الجاد