ترى العنوان ماله دخل بالموضوع

لأني ببساطة ما ادري وش معنى هالجملة

لكني شفتها منتشرة بالمنتدى هاليومين... وقلت يمكن انها موضه وخلّني اكشخ بها
.
.
.



كولّيكشن نآيس... شووووز فيري نآيس... الله يحوّم كبودكم

وش بلاهن بناتنا يموتن بشي اسمه ( التلغوي )

ياشين اللي تتلغوى وهي ماهيب يم اللغه ولاهي من ثوبها

يعني لاتزعلون من كلامي... ترى من جد حايمه كبدي

الوحده في البيت تدخل على اهلها جاية من السوق تقول :

هيييه يمّاااه شوفي كنادري الجدد يهبّلن وش زينهن

وتصوّر الكنادر وتدخل المنتدى بعد ساعة وتفتح موضوع جديد عنوانه :

شوووز نآيس

الله يرحم الحال... قبل شوي ( كنادر ) والحين ( شوووز )

لأ وتكمل الناقص بـ( نآيس )... آبوك ياللغة

وتجيك عاد شلّة المهبّل تحتها بالردود :

وااااو كثير نآآيس ... ثآآنكس

يقلبونها تحدّي واستعراض ( كشخة )

مرّه قريت وحده داخله موضوع وتعلمهم انها ماتغدّت.. تقول اكلت شوي ( سالاد )

وانا اوجعني راسي افكر بهـ( السالاد ) وش يطلع ؟؟؟!!!

واثاريها تقصد ( سلطه ) بالانجليزي ( Salad )

ماسكتن لها حبتين خيار وطماط على عدلهن وتعرم منهن مع فص بصل وتقول ( سالاد )

ياليت كل وحده ( تكرب حنكها ) وتتكلم زين ومايحتاج هالسماجة

اقول ياشباب

فيه فوّال جديد عنده ( كولّيكشن ) قلابه وعدس كثير ( نآآيس ) يعجبكم
.
.
.


قدّام ( يلعن ابو ) ورى

هذي فئة من الشباب شايله الـ( ريـوَس ) من حياتها

كل شي عنده يتم التعامل معه تحت بند ( قدّام )

مستعد يسوّي أي شي وفي أي وقت وتحت أي ظرف... قدّاااااام

يشوف شباب واقفين يتعازمون على العشاء... يلتفتون عليه ( مجامله ) ويقولون : معنا ؟؟

وماتعوق : قدااااااااااااام

يطب على الشباب بالاستراحة ويسمعهم يتواعدون... الفجر ماسكين خط الشرقية

واحد منهم يقول له ( مجاملة ) : تخاوينا ؟؟

مايكذب خبر : قدّااااااااااااام

تضيق صدور الشباب... نشب فيهم هالعلّه... وليته يقط.. مافيه امل

يجيهم الفجر ( يدودل ) ايديه... وفاقّن كشرته... وحتى ملابس وغيارات ما معه

يروح يتسدح بالهاف مون ويلقى شباب يعرفهم غير اللي جاء معهم

ويشوفهم يتواسون بالسيارة ويقول لهم : وين تبون ؟؟

يقولون : البحرين... معنا ؟؟

وماتعوق : قدااااااااااااام
.
.
.


من ضيقة الصدر.. نويت اقص الشجر

عندي جارين الله يشغلهم بانفسهم... دابلين كبدي

مستحلّين الشجرة اللي عند باب البيت... يتسابقون عليها كنّهم توم وجيري

والله العظيم تقل بزران... اذا واحد منهم شغّل سيارته وراح.. جاك الثاني طاير ولبّق مكانه

وانا ياصاحب البيت وصاحب الموقف وصاحب الشجرة ( بقريح )

قسم بالله سيارتي احترقت من الشمس

ما كأن هالشجرة من حق صاحب البيت... والله ماسحين اسمي من الوجود

المشكلة كلهم معهم جيوب... واحد لاند كروزر والثاني لكزس

يعني اذا وقف تحت الشجرة اخذ الظلال كله

وانا والله استحي منهم وماودّي اصرف لهم كاش... وازبّد لهم.. مهما كان اسمهم ( جيران )

لكنهم بصراحة زوّدوها... والواحد اذا صار وسيع وجه لاتستحي منه

حطّيت لهم اوراق بقزاز السيارة... وكتبت فيها لوسمحت لا عاد توقف هنا

لكن لاحياة لمن تنادي... كنّي احتسي على جدران

بس خلاص... عليّا وعلى اعدائي

عناد ولعانة باقص الشجرة... وخل البثارة تنفعهم
.
.
.


قينان... زعلان

قينان مستشر هاليومين... وحاقد على امير عسير

يقول ليش يمنع الحفلات الغنائية

وعاد هالآدمي ( قينان ) ماهنا اكثر من بربرته... وكلها ( هياط على خراط )

يقول ( ماهقيتها من واحد مثلك ياسمو الامير... مسلم معتدل ومتعلم )

المسلم المعتدل في نظر قينان... هو اللي يخلي الشباب والصبايا ( يرزحون ) الى آذان الفجر

عاد انا حايمتن كبدي من هالـ( قينان ) منذ مبطي

من يوم كان رئيس تحرير جريدة البلاد..

وهي بالمناسبة احد اعضاء الثالوث الشهير اللي يستخدم كـ(سماط) للفول والتميس بالدوام ( البلاد والمدينة والندوة )

اكتشف مواهبه المتطرفه ليبرالياً صاحب جريدة الوطن.. وحطّه رئيس تحرير لها

وعطاه حريه اكبر لنشر افكاره... وقينان ماقصّر راح وجاب كل الشلّه حقّون الاستراحة

ومن هنا انطلق قينان وباقي القطعان يشرشحون اهل الايمان ويمجّدون بني علمان

من اقواله المأثوره سدّ الله بلعومه بفلّينة عصير راوخ :

(( مع الاسف الشديد كل التركيز في مناهجنا يتم على العلوم الدينية ))

ويقول ايضاً بكل اندفاع عاطفي رخوي :

(( الدين كشعائر يجب ان لا يعلّم في المدارس ))

هو طبعاً يتكلم بكل أريحيه وماعنده أي مشكلة لو يقعد يمطرس بالكلام بالقنوات وغيرها

لأنه بالعرف الاعلامي يعتبر ( اعلامي محنك وقدير ) رضي الله عنه وأرضاه

عن أبي هريرة رضي الله عنه قال.. قال رسول الله صلى الله عليه وسلم (( سيأتي على الناس سنوات خداعة ،، يصدّق فيها الكاذب،، ويكذّب فيها الصادق،، ويؤتمن فيها الخائن ،، ويخوّن فيها الامين،، وينطق فيها الرويبضة )) قيل : وما الرويبضة ؟؟ قال (( الرجل التافه يتكلم في امر العامّة )) رواه احمد وابن ماجه والحاكم