هلا .. <<-- يقولها وهو منزّل راسه من الفشيلة .. وتراكم على البال حتى لو إني بعيد .. ومثل ما فقدتوني أنا فاقدكم <<-- شرهتك على اللي طاقن لك خبر يا رجال !!
---------------------------------------
---------------------------------------
- اتذكر مرة سافرت من واشنطن العاصمة وكانت درجة الحرارة درزن تحت الصفر .. وكنت آخذن احتياطي ولابس 19 فنيلة و30 قفاز وناوي ألبس فروة وتعوذت من أبليس .. وطاق برموده وتحتها بجامة صوف .. طالع تسني محيسن الجمعان .. منطلق بهجمة !!
حتى بالمطار شكوّا بوضعي لأنه مابقى إلا فاروع وحبل وأصير من ذولاك اللي يخيمون بالقطب المتجمد .. ولا أخفيكم طقتني الروعة .. عاد تعرفون الأمريكيين إذا استقعدوا للواحد استقعدوا .. وقعدت أتخيل إنهم ملفقين لي قضية محاولة خداع وتهريب ملابس داخلية عبر المطارات .. وتخيلت شكلي وأنا مكلبش وملبسيني هيلاهوب برتقالي .. وصورتي بتواقيع المنتديات : وكاتبين اللهم فك قيد مغاط !! واللي مدخل صورتي بتصميم فلاش وحاط أغنية دويتو حزين عبادي وحسين الجسمي عقب ما طاح بالخبز البر وخلا عنه المفاطيح !!.. وكاتب في التصميم تضامنا مع مغاط !! أما تضامنا ً !! يا أخي بعض الناس ما ودّك يفزع !!
المهم كانت الرحلة من شرق أمريكا لغربها لـ لوس أنجيليس بكالفورنيا ..
وصلت قبل موعد شغلي بيومين عشان يمديني أفصـّخ هالخلاقين !! وكان جاي معي ألماني بثر الظاهر إن خواله فلبينين أو كواريا من أقلعنا وهو يصورّ .. أمتلت الذاكرة وحنا ما بعد وصلنا .. أجل به أحد يصور مضيفات ؟ <<-- أشوى إنك قايلن له !!
وصجني إلا نزور " Universal studios" اللي فيها تصوير أفلام " هوليوود" !! المهم وصلنا كالفورنيا ..واتجهنا للفندق وكنا بغرب المدينة بمنطقة اسمها " سانتا مونكا " .. عاد المواصلات العامة بلوس أنجيليس دبلة تسبد وقلق من جد <<-- اللي يشوفه يقول أنسباه من مدريد !!
وكنا بلوبي الفندق وقاعدين نتناقش عن آجار السيارة والتنقلات وهو معلق الكاميرا برقبته .. إلا ذاك الأمريكي (المجنتل) اللي خش عرض وقال تسمحون لي أجلس !!
جلس الأمريكي وقام يبربر علينا .. وإنه يدّل كل الأماكن اللي تستاهل الزيارة ويعرف الشوارع عاير عاير !! .. المهم تواعدنا بكرة على أساس إننا نطلع سوا لـ(هوليوود) المهم يوم قمنا وعينـّا من الله خير .. وطلعنا إلا هالمرتز عند الباب موقف لنا تاكسي وجالس يحترينا !!ركبنا معهم واتجهنا لليونفيرسال ستديوز .. عاد الأمريكي صار يشتغل بـ(مونتاج صوتيات بهوليوود) .. بغيت أقول له تكفى : طلعني بلقطة مع " كاترينا زيتا جون " بأي فيلم .. لو أسطرها !! لو أمعـّط شعرها !! يا ربيييييييييك يا زينها !! أحم المهم وصلنا لشارع النجوم هناك .. وأنا كاشخ كشخة وطاق جاكيت جلد اللي يشوفني يقول مخرج فيلم الزئبق!! يا شين لبس بعض السعوديين برّا !!
المهم الأمريكي ما سكت في التاكسي أبد ومن ضمن الكلام اللي قاله لي : يا أخي وراك ما تبتسم ؟!
قلت أما سعودي وابتسم خير إن شاء الله ما بقى إلا هي .. والله لو إني مهبول !!
قال لا أجل معذور !!
وكنا نتكلم عن الثقافات الاجتماعية والعادات ..
فكان من ضمن الكلام اللي قاله :
إن ثقافة المجتمع مشكلتها : ما تقدر تدرّسها أو تفرضها عليهم ! يعني يكتسبها الشخص من الناس اللي حوله !!
وأهم نقطة : إن الأغلبية والأكثرية يمارسونها !! عشان كذا صارت " سمة وميزة لهالشعب " وتجي بالتدرج والتعود من أشخاص لأشخاص !!
وبدون ( مؤسسات تنموية ) !! إنس يتطور هالشعب أو يتحرك من مكانه !!
نزلنا من التاكسي .. وأنا أقول بنفسي ( إيه هيّن تنموية) !! و دفعنا الحساب أنا والألماني .. قال لنا الأمريكي : أنا عندي لكم عرض إذا شريتوا التذاكر من هالمركز !! بدال ما تشترون التذكرة الكاملة بسعر عالي أنا بحكم عملي هنا راح أبيعكم التذكرة بـ 50 دولار لكل شخص فقط ..
عطيته أنا خمسين وعطاه الألماني خمسين!!
ورقى لمبنى بشارع النجوم بـ(هوليوود) عشان يجيب التذاكر المخفضة !! وكانكم شفتوا الأمريكي .. فترانا شفناه !!
* يعني طلع ( حرامي ابن ستين حرامي ) !!
وبدينا نتفلسف على بعض أنا والألماني .. وقلت للألماني : يا أخي حاس إنه نصاب ولا ارتحت له !! قال اي والله حتى أنا !! ومن هالكلام الفاضي اللي ما يودّي ولا يجيب !! عاد الألماني مابقى شي ما صوّره إلا هالأمريكي .. وش هالحظ المخيس ..وحنا نستعرض الصور لقينا صورة لخشم الأمريكي .. عاد أنا مدقق بفتحات خشم الأمريكي لأن فيه فتحة أكبر من الثانية !!
وأقنعت الألماني إنه يدوّر عسكري ويوريّه صورة الخشم .. لأنها دليل قوي !! ويخليهم يبحثون عن المشتبه به !! وراح لم عساكر والظاهر إنهم كرشوه هو وكمرته !!
قبل لا أقول لكم وش يستفاد من القصة اللي حصلت لي بحذافيرها !! أحب أوجه الشكر الجزيل للأخت الدكتورة : نجلاء .. أستاذة علم الاجتماع اللي راسلتني بخصوص تمرير رسالة عبر هذا الصرح الشامخ اللي يرتاده جميع طبقات المجتمع .. للإبتعاد عن " مواطن الشبهات في الخارج " وعدم الانقياد لأي كمين !! و محاولة عكس صورة تليق بنا أمام الغير !! بمناسبة قرب عطلة الصيف وسفر العوائل والأفراد خارج أرض الوطن !!
* بالنسبة لي من الأشياء اللي استفدتها من هالقصة :
- رغم تفاهة المبلغ .. وقباحة المهنة !! إلا أن الفرق بيننا وبينهم أنهم ( يعملون بمهنية راقية و احترافية عالية وتخطيط متقن ) !!
- البسوا زين وخلوّا عنكم الخلاقين اللي مالها سنع !! وترا البساطة ما هنا بأزين منها !!
- السذاجة الزايدة والثقة المفرطة بالغير .. أسهل الطرق لاستدراجك للغرق بشبر ماء !!
- جرّب مرّة وحدة .. إنك تصير (سفير لبلدك) .. ادحر الشيطان و " ابتسم " أدري صعبة بس حاول !! والله بتقدر .. اعرف لك ناس قدروا !! تكفى صر منهم !!
- اترك عنك النفخة برّا !! وعش يومك للمتعة وتغيير الجو !! ترا مصيرك بترجع لهالديرة يا حبي لترابها .. وتبي تمزّعك الشمس تمزيع ألين تذنّ !!
- شكرا لك أخوي الحرامي لأنك علمتنا إننا بحاجة لـ(مؤسسات تنموية جاااااادّة ) يكون صوتها جهوري ومسموع !!
---------------------------------------
---------------------------------------
** دوري ( حليب أبو قوس) السعودي للمحترفين !!
تخيلوّا يا جماعة الخير .. يصيرون جاديّن حقيّن الاتحاد السعودي لكرة القدم ويقلبون مسمّى الدوري لـ( زين للمحترفين ) !! ههههه فاهمين الاحتراف غلط !! واحمدوا ربكم إن شركة ( سيرلاك) وشركة بامبرز و ( نيدو ) ما دخلوا بالمنافسة !! وإلا تسان يصير دورينــّا .. دوري (نيدو للمحترفين) !!
وتخيلوا عاد شكل " ريان بلال " و "حسين عبدالغني" وهم ملزقين عليهم دعايات نيدو وكاتبين على فنايلهم ( يكبروا يكبروا ) !!
مشكلة اللي يستبد برأيه ولا يعرض المواضيع الحسـّاسة على المختصيّن !! ويسلب حقوق شركات أخرى لها الحق في المشاركة والحسم !! وحق المنافسة أيضا !! لأن المستفيد هو ( المشجع السعودي ) و ( اللاعب السعودي ) و ( المجتمع السعودي ) !! و (الرياضة السعودية ) !!
لكن بهذه الضبابية !! و الارتجالية المتكررة !! لم يستفد إلا ( .... و ......) وإلا تدرون مهوب لازم !!
---------------------------------------
---------------------------------------
** عندما يطنقر الـ(بجيح) !!
من أبسط حقوقنا كهلاليين أن نطبق مبدأ (المعاملة بالمثل) !! ولكن ليس على الإطلاق !! ففي مجتمعنا الرياضي .. لابد أن يكون هناك ( كر و فر ) !! فأحيانا تكون بمثابة ( الصفعة ) لمن يعتقد أن من حقه أن يقتات فريقه على فتات منسقينا !! و أحيانا يكون من الأجدر أن نغض الطرف عن بعض الأمور !! فلكي تكون ( زعيما ً ) يجب أن يكون ( التغاضي ) أحد أسلحتك .. التي ( تكرم وتهين ) بها غيرك !!
---------------------------------------
---------------------------------------
** معسكر ( هذلول ) !!
- أتمنى أن يكون بمثابة ( سرير "فرويد" للإيحاء الحر ) !! فالترويح النفسي .. والاحتواء الروحي .. والانصات الانعكاسي .. والتفريغ السيكولوجي .. هو ما نطمح إليه !! لأن هذه المرحلة تحتاج لجراحة (عقلية وروحية ونفسية ) و بذر حبوب الثقة في أراضي لاعبينا (الخصبة) !! لتستعيد نضارتها !! فبقدر حاجتنا لاختبارات فنية !! و انضباطية ٍ تكتيكية !! نحن بحاجة لـ ( تهيئة نفسية ) نرى نتاجها بأعين اللاعبين !!
---------------------------------------
---------------------------------------
- اللهم بهذا اليوم الكريم أسألك أن تغفر لـ( Saud.m سعود الزهراني) وتعلي درجته في الجنة .. وتظله في ظلك يوم لا ظل إلا ظلك .
شكراً لك يا (أنظف) حرامي بالدنيا !! 
الوضع الشجري
