( جيريتس الانضباطي ) ياخوفي يجيب العيد.. إنّي اتوجّس خيفةً ياصانع القرار
حيــــــــــاكم
الامير عبدالرحمن مبسوط مره من جيريتس ومعجب فيه
علشانه رجل ( انضباطي ) جداً ويتأبّط صرامة 
وعلى قولته انّه قد ( لطع ) حاتم بن عرفه كم شهر بالاحتياط علشانه ( بزوَط ) ذات مساء 
وما جاب خبر للجماهير والاعلام وكل الضغوط... راسه يابس وصاك القزاز كل هالكلام حلو وشغل احترافي على اعلى مستوى 
لكن سين سؤال :
انضباطية جيريتس وصرامته توكّل عيش في ربوع مملكتنا الحبيبة ؟؟ 
اتركونا من سالفة دعم الامير عبدالرحمن وإعطائه الصلاحية المطلقة
خلونا نبربر بواقعية لاتشوبها شائبة هناك في اوروبا
النادي عبارة عن ( شركة مساهمة )
لايمتلكها شخص واحد... بل الملايين حول العالم 
علشان كذا نشوف الشغل الاحترافي بحذافيره... وبالقلم والمسطرة
اللاعب اذا عاقبه المدرب او شدّ عليه في التمارين... يتقبّل ويعرف ان الله حق
ماعندهم شي اسمه ( عضو شرف ) يروح له يتباكى عنده ويتشكّى
الكل يحترم قرار المدرب مهما كان قاسي... حتى رئيس النادي مايقدر يمنعه
فيه قوانين تحكم العقود .. وموضح فيها صلاحيات كل واحد
المدرب هو الكل في الكل
هو اللي يتعاقد مع اللاعبين... وهو اللي يوقع معهم العقود ويقدمهم للاعلام
وهو اللي يستبعد هذا ويسترجع هذاك... دون أي ( لقافة ) خارجية
لكن فيييييذا اعضاء الشرف هم اللي يصرفون على النادي.. وهم اللي يدفعون رواتب اللاعبين
وهم اللي يموّلون صفقات شراء النجوم
وهم اللي يدفعون راتب المدرب وكل الطاقم اللي معه
وانا اذا كنت عضو شرف فعّال... وقاعد اغرف للنادي بالكريك مثل مايقولون وجاني ذاك النجم اللي انا دافع فيه دم قلبي... جاني يشتكى من المدرب 
انه جاء متأخر عن التمرين... وحطّه احتياط وشاله من التشكيله 
انا من ناحيتي ياعضو الشرف بارفع السماعه على رئيس النادي واغسل شراعه الحين انا ادفع كل هالملايين علشان اجيب لك هاللاعب.. ويقوم هالشايب يدفنه بالاحتياط ؟؟؟ 
من اليوم ورايح لاتقول لي ترانا مزنوقين براتب شهرين او ثلاثة 
ورئيس النادي ساعتها يكون في وضع حرج...
صعبه عضو الشرف يزعل.. وصعبه اكسر كلمتي مع المدرب
لكن بالنهاية كلام عضو الشرف هو اللي يمشي
وتبقى الاندية السعودية اكثر أندية تلغي عقود المدربين في العالم ويبقى اللاعب السعودي مدللاً حتى إشعار آخر 
ملاحظة بسيطة : انا ترى مع المدرب 100% ومو ضده... اتمنى فهم الموضوع بالشكل الصحيح 
الوضع الشجري
