ياسمو الأمير ...ياجمهور الهلال...يالعيبة الهلال...تبغون تعرفون ليه جمهور الرياض ما يحضر؟؟؟((هنا بعض الأسباب))
 

السلام عليكم ورحمة الله وبركاته,,,
بعد انقطاع طويل عن الكتابة<<<وش عنده صالح السليمان:s2:
رجعت..:ap:المهم يا شباب....
الموسم هذا زي ما يقولون ((حظنا أقرد))..لكن لا تنسون لو فريق ثاني غير الهلال صار له اللي صار للهلال والله كان راح فيها ..
بس الحمد لله تجاوزنا الظروف بأقل الخسائر..ولو إن خروجنا من الآسيويه كان صدمه بكل المقاييس...لكن((الحمد لله ..الحمد لله))
المهم...اليوم تسمعت لجميع تصاريح الأمير الشاعر شبيه الريح
من بداية الموسم...أبغى أعرف وش في قلب هالأنسان ..تتوقعون وش حصلت فيه..؟؟ الجواب ما يبيلها ((حب وعشق وجنون لشئ اسمه الهلال وجمهور الهلال))....لكن..
أكثر شئ شدني في تصريحاته هو عتبه على الجمهور وبالذات :smilie47:جمهور الرياض:smilie47:
جمهور الرياض وأنا واحد منهم...قصر في بعض المباريات بصراحة..لكن والله العظيم أنا وأعوذ بالله من كلمة أنا..لو فيه جائزة لأكثر واحد حضر الموسم هذا لنافست على الجائزة..وفيه ناس كثيرين أعرفهم بأشكالهم..والله دائما أقابلهم وحفظت أشكالهم من كثر ما قابلتهم .......
لكن..يا سمو الأمير ويا جمهور الهلال العظيم ..وزي ما يقولون ((أهل مكة أدرى بشعابها))أنا راح أفند أهم المشاكل اللي تواجه جمهور الهلال..
أولا:اذا بتروح الملعب وبالذات أستاد الملك فهد ينبغى عليك فعل ما يلي...تعبي بنزين فل وتغير زيت للسيارة وتدعي دعاء السفر وتودع أهلك:s3s:..والله بعيد بعيد وأتكلم عن نفسي يمكن حوالي 40 كيلولا وأجي مع خريص يعني أوووووم الزحمة.
ثانيا:اذا بتروح الملعب ينبغى فعل ما يلي ..كرامتك تخليها في بيتكم وتسبدلها بالبلادة...لأن بيجيك جندي منتف ويمزع فيك الين تقول بس..وعسكر والله ما يفهمون بالأخلاق الا اسمها..:ranting:
ثالثا:اذا بتروح للملعب يبغى فعل ما يلي..تتغدى في بيتكم وبعد الغدا تتغدا وبعد ما تتغدا تتغدا واذا صليت العصر تنقنق من بيت الشوايه والا الناضج والا الخرابيط هذي ..لأن ما قدامك في الملعب الا فطيرة منتهيه صلاحيتها وبيبسي حااروموية تحس أن مكتوب عليها وجبة أطفال:ap:.
رابعا:ما تحسون إن يوم الاربعا والخميس دائما فاضي ..والمباريات ما يرصونها الا في نص الأسبوع..يعني زي اللي يقول ..أتحداك تورينا شطارتك وتورينا عشقك لناديك بأنك تخلي الدراسة وتحضر للملعب....والله مسخرة.
خامسا:وهذي الحاجه ما يعرفها الأ اللي دايم يحضر وهي إنك بعد المباراة تجلس في الشوارع اللي حول الملعب وعند دوارت جابر حوالي ساعتين عشان تطلع..والله تنظيم صفر...والله سيارته عادي والله راحت عليه ..أنواع الشد العضلي في رجله اليسرى.
سادسا:اللعيبة ما عندهم تفاعل مع الجمهور ..والله يصفقون للجمهور كم تصفيقة وبس ..واذا سجلوا هدف يروحون يفرحون بلحالهم عند الركنية...يعني ذا الجمهور كله ما له عندك أي احترام
أقسم بالله الشئ هذا من أكثر الأسباب اللي أشوفها في عزوف جمهور الهلال..لعيبة الهلال يسلكون للجمهور وبس..ياخي شوف لعيبة الأتحاد والأهلي والشباب..اللاعب يسجل هدف سيدا عند الجمهور....أما عندنا خليها على ربك
............................................................
وعلى فكرة الموضوع هذا كنت بكتبه في نص الموسم ..بس خفت يقولون عني مثبط ومن ذا الك
وهذي بس أهم الاسباب اللي جات في خاطري الحين ..وأكيد بعض الشباب عندهم أزود من كذا..
لام...
وسلامتكم,,,,
أخوكم/حسن.

والله وانا اخوك حنا نجي من اكثر من350 كيلو في المباريات الهامة وماعمرنا اعترضنا
اما تعامل العسكر فمع احترامي لهم حتى اللي بالشارع يكلمك من راس خشمه كانه وزير وهو سلتوح لا راح ولاجاء يعني مستحملينهم برى الملاعب وداخله
اما الملاعب فملاعبنا صبات ومع ذلك نتحمل ومافيها الا فصفص وماء حار

الخلاصة هي متى ماودنا نجي جينا ايا كانت الاسباب

هلالي وهبي ..مشكور على مرورك يا غالي...
لكن لي تعقيب أنت اذا جيت من 350 كيلو تجي مرة وحدة والا مرتين....
لكن اللي يحضر تقريبا حوالي 20 مباراة وش يكون وضعه...

و الله يا حسن .. إن هذي المشاكل الي تقولها كان ما تهمنا إذا الفريق يلعب ..

أما إني أتحمل كل الي تقوله و بالأخير أنهزم .. أقسم بالله حرام ..

و المستوى هو الي يحدد كل شي ..

والي دايم يحضر المبارات وفي المنصه بعد

يعني صرفت اكثر من 0000ماودي اقول بس عليك الحساب كل مباراه 300

كله لعيون الزعيم

بالله وش فايدة الحضور .. إذا حضرتها بالمنصه .. ما لها طعم ولا ..؟؟؟؟

لأن في الجهه المقابله لك تشوف الحماس .. و التشجيع ..

مانقدر نقول شي

لكن نحاول نحضر اكثر واكثر

والله شف وانا اخوك كل الامور اللي قلتها نقدر نتحملها وكلها لعيون الزعيم

لكن انك تحضر ويرتفع ضغطك ويطلع في راسك الشيب وفي الاخير تنهزم ولا تفوز باخر الدقايق قهر :(


اذا كان فيه مستوى ولعب هجومي انا اقولك ابشر بالحضور وفي مباراة عادية انا اضمنلك الواجهة فل

وربي موضوع على الجرح

أأأأأليم

واذا نويت أحضر أي مباراة بودع أهلي وأخذ أغراضي وأغيب عن المدرسه ثاني يوم من التعب .؟؟

على فكرة أنا من جمهور الرياض وحضرة 70% من مباريات الهلال اللي بالرياض .



طرح راقي ومبدع وفكاهي .

معقوله يا جمهور العاصمه
معقوله هذي معاناتكم!!!!!!!!!!!!!!1
الحمدلله استاد الامير محمد بن فهد ارحم من كذا
يعني فيه شوي تنظيم
الله يعينكم
وتحملو علشان الزعيم

أخوي أشكرك على موضوعك .. ولو بتكلم عن تنظيم الإستاد ما أخلص ولا بعد شهر .. شف بصراحه الإستاد يحتاج إلى شي مهم جدا :

تقديم خدمات للجمهور .. مثل : مياه بارده ووجبات جيدة وترتيب عند منافذ بيع الأطعمه .

أما الباقي مثل الزحمة وغيرها عادي .. مقدور عليها ..



أما من ناحية اللاعبين فأنا أتفق معك 100% .. فعلا ياخي شي يقهر .. تحضر وتساند بالأخير يجيك اللاعب يصفق من دون نفس حتى مايناظر للجمهور .. ( يعني تسكيته بس ) ..

والله لو اللاعبين يظهرون لو القليل من الحب والإحترام للجمهور كان تلقون الجمهور مليان حتى بالمباريات العادية .. ويمكن أنتم تشوفون هذا أمر بسيط وممكن تقولون هذا مو مهم .. لكن بضرب لكم مثال بسيط ..

أنت رحت لعزيمة وتلقى الناس اللي بالعزيمة يسلمون عليك بدون نفس .. هل تفكر تروح لهم مرة ثانية ؟ .. وإن رحت تكون بدون نفس ..

عكس لما يرحبون فيك ويبادلونك الحب والإحترام .. تلقى نفسك تروحلهم مرة ثانية وثالثة وعاشرة وإنت مبسوط .. وتتحمس للروحة ..


هذا مجرد مثال بسيط عشان يقرب الصورة بين المشجع الهلالي وبعض اللاعبين الهلاليين اللي أعتبر فيهم بعض الغرور ..


وآسفين ع الإطالة ..

^


اتفق معك ..


وهو انه يكون فيه شركات غذائيه ويكون فيه منافسه فيما بينها

مع ترقيم الكراسي ..


والأمر الأهم ..

هو ان اللاعب يعرف قيمة الجمهور واهميته
لدرجه اكبر من اللاعب نفسه ..

اذا عرف اللاعب هالشي وان الجمهور مو مجرد انه يحضر ويجلس
في المدرج .. ولا يشوف الجمهور الا بس حق نقد ..

ولكم في سامي خير مثال في حب الجمهور
وهذا السبب اللي خلا سامي محبوب للجمهور من غير طبعاً اخلاصه
وادائه للفريق ..

اخوي حسن ..

كل الي نتمناه من الجمهور ... او ان يلتفلت الى جميع القوانين في الملعب وخارجه ..

اذا اردت ان العسكري يحترمك عليك احترامه .. واذا فتشك خل يسوي الي يسوي ..


مو تسوي فيها قوي وتقوله لاتلمس ومدري ايش .. لأنه بيستحي على وجهه اذا شاف رجل محترم وربي مايقوله شي ..

لابد ان تعي انه هناك حسيب فاغلب الي مايحضرون هم يخافون على عيالهم من ( اللوطيه ) اكرمك الله ..

اغلبهم جاي عشان ( يكحل للأسف ) ..

فتحصله يقول اخلي ولدي يشوفها في البيت اصرف له واصرف لي ... غير الي مايستحون ويدخلون يدهم في جيبك وانت متحمس وهب يامحفظه وهب ياجوال ..

عموماً لايوجد مشكله الا ولها حل باذن الله الاداره تنضر الى هذه النقاط ..

اشكرك اخوي حسن ... انت معك حق في كلامك ولكن حبيت اعلق مافي خاطري ... جست لايك ذات ..

موضوع جميع يوضح نقاط مهمه

اولا الحمد لله على كل حال ولا نفكر بان الهلال ماقدم شي هذا الموسم لا قدم وقدم وصارع على كل البطولات
وزي ماقلت انه لو فريق اخر كان ماصمد للظروف اللي واجهة الهلال وهذا من فضل ربي

كفو والله هذا مانتمناه منك ومن شرواك يالغالي والله يعينك على مشوار الملعب لكن لعيون الزعين يهون كل شيئ والله

هههههههه والله من جد انت ناوي تسافر والله الاستاد بعيد من جد
وشوف الملاعب الاوروبيه في وسط المدن يعني الواحد يجي يمشي والملاعب الاوربيه قبل المباراة بنصف ساعه يمتلي يعني مو لازم
يجي من الظهر

والله في هذي النقطه عندك حق لكن انتم يا اهل الرياض بعد مشواركم للملعب الواحد مايبغى ذبانه تمر من عنده

ماتلامون من الظهريه وانتم بالملعب الواحد يبغاله يتغدى ويتعشى وينقنق وتصبيره ..... الخ

وفي الاخير اتمنى بان ينشؤن استاد للهلال في اقرب وقت ويكون قريب من الكل
انا اشوف جمهور الرياض يملئ الملز اكثر من استاد الملك فهد لانه قريب
وشكرا لك على توضيح النقاط المهمه
وشكرا