السلام عليكم ورحمة الله وبركاته

اخواني اعزاي اصدقاي .. اعضاء الشبكة الموقرة

# انبراشة ماله دخل :

تتاهفت على بنات افكاري < يسمع ببنات الافكار

تتاهفت على بنات افكاري في لحظات الصباح المشرقة وعند همسات الغروب الجميلة متعلقن بأشعة الشمس الماطرة العابرة .. وحفيف الاشجار يداعب بشرتي الشهباء من وعثاء الحياة الرهيبة ..

واجد نفسي وحيدا أمام ضغّاطات كيبوردي وكأسن من القهوة الساخنة مع حبات الزيتون وكوبا من اللبن الطازج < مزاجك يبو

تخذلني أصابعي .. وأجد نفسيا وحيدا بدون أصابعي .. لماذا يا أصابعي هذا الخذلان ؟ لماذا لماذا لماذا ..

فأتمنى أن أكتب مايدوري في خلدي ( ايه خلدك واجد ) ..

ولكن .. لا يأس مع الحياة ولا حياة الفهد مع اليأس .. فلقد تبلورت أمام خلدي ( ازعجتهم بخلدك ) فكرة الموضوع ..

وها أنا ذا أطرحها أمام نظريكم .. كي تمشي عيونكم مع حروفي الجميلة بالحيل ..


# نهاية الانبراشة + كسر بالساق


في أحد عنواين المواضيع .. قريت عنوان " سرى الليل يابوثلاثة " .. وسرى الليل وحنا ماسرينا

ويا علّه ماسرى الليل عاد .. وعلى قولة الشاعر .. نقطتين فوق بعض :

أسهر إلين الصبح نوره لي يبين .. أحاكي النجمات والليل الرهيب

من يقول إن المدرب هو سبب المستوى هذا ؟ .. اللي يقول إن المدرب هو السبب يرفع اصبعه ..

لأ .. No .. Não .. غلط الكلام هذا ..

يعني الفريق كان يمشي أحلى من الحلاوة في بداية الشوط .. من بعد الهدف الأول تحوّل المستوى ..


المباراة راحت بخيره وشره .. واتمنى نشوف مستوى يخلين أحلل العشرين ريال اللي دفعته لراعي القهوة

# انبراشة تعريفية .. واحد يطلع الكورة علشان افهمكم

لا أحد ينط علي ويسوي لي تثبيت كتوف علشان قلت اني رحت القهوة .. انا منب من الرياض علشان كذا ماحضرت

فلو انا بالرياض مثلا .. كان من ليلة المباراة منزلن مرتبة السيارة ونايم عند الملعب ..

# ابرجع الكورة لملعبكم بس لا يصير حارسكم الخوجلي


وين روح اللاعبين .. < اي لاعبين تقصد ؟ .. مفرج والا نامي ..<= والله لو أرهّم له روح ماصار يعرف يلعب


ثغرات الهلال واضحة الحين .. وكوزمين كان يلعب على وضعية الدفاع لأنه عارف امكانيات الفريق الهجومية ..

لكن ..

اذا صار عندك لاعب مثل نامي .. وانا منب اتحامل على نامي .. بس هذا مجرد رأي واحد يتابع المباراة بتمعّن

ألقاه يهوجس بعض المرات بالملعب .. ويجيه LAG بمخه أحيانن كثيرتن .. الاتصال متأخر 3 ثواني عنده

فتلقاه يستلم كورة .. يهوجس .. ثم تنقطع منه

مثل مباراة الاسيوية مع الاهلي الاماراتي .. ومثله بمباراة الشباب الهدف الثالث ..

لاعب ماعنده امكانيات دفاعية .. حتى وجوده بالجهة اليمين يخرّب على قلوب الدفاع ويلخبطهم ..


فلما لاعب بهالمركز الحساس والحيوي .. يصير بهالمستوى .. وش تبي تسوي ؟ ..

هذا بحالة ان الكورة مع الفريق الخصم .. طيب اذا كانت الكورة مع نامي ؟ ..


كم كورة طويلة ارسله نامي وانقطعت ؟ .. مادري وش يحس به وهو يرسل كور طويلة ..

كم مرة نامي سبب خطأ برمية التماس ؟ .. يعني كورة لصالحك .. تهديها للخصم باردة مبردة ..

كم مرة نامي حاول يسوي مهارات بملعبنا وانقطعت ؟ .. عد واغلط ..

كم مرة نامي قطع الكورة براسه ؟ .. كور عرضية اقصد .. ولا وحدة .. ضعفه بالكرات العرضية شديد يازول


نامي الحين مهب بس نقطه ضعف دفاعية بالجهة اليمين .. لأ .. هو انسان يضيّع جهد اخوياه

ويهدر لياقتهم رايحين جايين بهالملعب على غير فايدة ..

بالاضافة انهم يتعبون يقطعون الكورة .. وهو باردة مبردة يعطي الكورة الخصم ..

هنا تحس بقيمة وعظمة خطأ بقاء اللاعب هذا بالذات في هذيك الجهة ..

على العموم نامي لو افرد عنه جريدة كاملة ماكفيته والله ..

لكن دامه بيلعب غصبن عني .. وشوله احرق رزي


# نجي لموضوع ثاني .. وهو ياسر سعيد القحطاني .. واللي بالمدرج يتفرج ..

طيب واللي بالقهوة وش يسوي ؟ .. يحط قناة غنوة ؟ .. مهب مشكلة ..

ياسر يرحم امك ماهذا ؟ ..

كروت حمر .. صرت تنافس ولهامسون بالطيحات ..


ياسر في نظر الانبراشيين عنده حاجتين .. نقطتين فوق بعض

1- نفسيته تعبانه تراه بشر و و و و ..

2- مبطي ما أخذ اجازة من عام 2006


وانا بما اني خبير نفساني ودايم اتابع دكتور فيل .. راح اعلق على هالنقطتين


1- الحين الواحد تصير نفسيته تعبانة في حالة انه ممسوك عليه شي يدينه .. تصوير فيديو اي شي ..

ياسر الحمد لله ماعليه اي شي يثبت هالشي الا كلام واشاعات ..

على اي اساس ياسر يتأثر ؟ .. ياخوي خلهم ينهقون بالمدرجات لمين تمزّع حبالهم الصوتية ..

يعني انسان واثق من نفسه .. وأكبر نعمة عليه انه متزوج .. يعني عنده انسانة توقف معه بهالموقف

على اي اساس يضيق صدره ؟ .. وعلى اي اساس يطيح مستواه ..

مع العلم ان مستواه ماطاح .. هذا يركض ويلتحم .. اللهم انه يمسك الكورة ويدقها كعوب وتسحيب لين تنقطع

يعني الواحد لاصار ضايق صدره يقعد يسحّب ؟

انا اشهد ان يوسف الثنيان كان ضايقن صدره بالحيل ..

بس يوسف كان يسحب ويجيب اهداف .. يعني كان يحاول يوسع صدره شوي ..


ياسر .. انا والله العظيم ابغمض .. ياخي ابسمع المباراة بالرادو لو تبي .. منب متفرج

بس حس شوي .. ياخي استمتع باللعب .. ركز ياخي .. تراه راس ماله 7 متر ووسطه واحد ..

عدّه واحد من أخوياك .. كل مامسكت الكورة مرر له الكورة بأقوى ماعندك .. لا تقعد تسحّب



2- موضوع الاجازة اللي ما أخذه من عام 2006 وارهاق وغيره ..

ياجماعة ياسر تزوج .. وصارت له اصابتين .. وصار عنده اجازة اجبارية ..

غير الاجازة حقت اللاعبين نهاية الموسم .. امداه يلعب عشان يرهق ؟ ..



والله ياياسر انك مهاجم من طراز نادر جدا .. بس مشكلتك مزاجي ..

حنا نبي اهداف .. سجل اهداف ياخي < احلف عاد

والله ان فيه مهاجمين اقل منك مستوى بمراحل .. ماتمر مباراة الا مسجل له هدف ..



هبوط مستوى ياسر .. سببه استهتار .. ماله علاقة بالنفسية ولا الارهاق ..

استهتار ياسر .. وتعاليه على الكورة ..


نايف هزازي لعبه يذكرني ببدايات ياسر .. نفس الحماس والاصرار والقتالية ...

بس لأنه لاعب للحين ما أخذ نصيبه من الكورة .. قاعد يحاول يعطي الكورة قد مايقدر ..

علشان كذا برز بشكل كبير ..


ياسر يبي له يلعب لطموح أكبر من اللي وصل له .. علشان يرجع لمستواه .. ثم عاد يطوره ..


# خلصت موضوع ياسر


بالاخير ماودي اطول الموضوع والا عندي كلام ابتل اكتبه ماخلص ..

بس ابلخص شي ابقوله باخر الموضوع ..

هو .. مهما صار من هبوط روح ومستوى .. اتمنى ترتفع المعنويات بالاسيوية ..

ونشوف فريق يدور عن الفوز ولا غيره .. بدون فلسفة كورية وحلول معقدة ..

ومع بداية الانتقالات .. لو كان الهلال بيحط لنفسه صورة دفاعية حقيقة ..

غير الصورة اللي اوهمنا انفسنا به .. اللي كان فيها تكتيك كوزمين هو السبب بعد الله


يبي لنا ندور ظهير ايمن حقيقي .. بمستوى الزوري او افضل ..

ونعطي خيرات الفرصة الكاملة مع بداية الموسم .. بيكون فيه مباريات تجريبية ومعكسر ..

عطوه الفرصة كاملة .. وخلوا عنكم المرشدي والمفرج .. هذي اقصى امكانياتهم ..


رادوي وويلهامسون .. الاول وجوده مطلب .. ولهامسون لاعب كبير جدا .. بس قوة الالتحام عندنا بالدوري حجب نجوميته

لاعب كبير .. لكنه يقدم 10% من امكانياته معنا .. اتمنى اعادة النظر فيه ..

اقل شي اذا ماغيروه .. ينبهونه انه يستغل فكره الكروي .. ولا يحاول يعدّي من أحد .. يستلم ويسلم

ويفتح مساحات ويركض ويحط عرضيات بس .. بدون مايعدي ويحاول يسوي مهارات

التايب .. اتمنى مايطلع عن الهلال لسبب ان التايب افضل صانع لعب بنظري عالميا ..

مهب معناه انه ليبي مهب اوروبي يعني ان غيره افضل منه ..


وخلص الموضوع .. استانستوا عاد ؟